6
Zeriko tɩʋ kʋm maama dɛɛn pɩ mʋ kʋ zɩga Yisɩrayɛlɩ tiinə bam ŋwaanɩ. Nɔɔna daa ba jɩgɩ cwǝŋǝ sɩ ba zʋ tɩʋ kʋm wʋnɩ naa ba nuŋi pooni. 2 Dɩ kʋntʋ maama, Baŋa-Wɛ ta tagɩ dɩ Zozwe mʋ DƖ wɩ: «Amʋ kwe Zeriko tɩʋ kʋm, dɩ kʋ pɛ, dɩ o jar-kərə bam maama a kɩ nmʋ jɩŋa nɩ. 3 Abam maama dɩ á jar-kərə bam maŋɩ sɩ á vu mʋ á kaagɩ tɩʋ kʋm bɩdwɩ dɛ maama, sɩ kʋ yi da yardʋ. 4 Kaanɩm tiinə barpɛ mʋ wʋ́ taa jɩgɩ nabwaanʋ ba tɔgɩ Wɛ ni-gonim daka kam yigə nɩ ba kɛa. Da yarpɛ dɛ dɩm nɩ, á wʋ́ vu á kaagɩ tɩʋ kʋm kuni bɩrpɛ mʋ, yɩ kaanɩm tiinə balʋ na ze nabwaanʋ tɩm tɩn dɩ maa wʋ́ taa wui-tɩ. 5 Kaanɩm tiinə bam wʋ́ ba ba tiini ba wu nabwaanʋ tɩm ba daanɩ. Kʋ na kɩ kʋntʋ, sɩ n pa nɔn-kɔgɔ kʋm kaasɩ dɩ tiguri-kaasa, sɩ tɩʋ kʋm kabri-dɛɛrʋ tɩm wʋ́ tʋ tɩga nɩ buri buri. Nɔɔna bam maama laan wʋ́ duri ba yɔɔrɩ ba zʋ tɩʋ kʋm ba jagɩ je maama.»6 Nun bu Zozwe ma bəŋi kaanɩm tiinə bam yɩ o ta dɩ ba o wɩ: «Kwe-na Wɛ ni-gonim daka kam á zɩŋɩ. Ta kuri-na kaanɩm tiinə barpɛ sɩ ba taa wʋ ni-gonim daka kam yigə nɩ ba taa ze nabwaanʋ.»
7 O ma daarɩ o pa nɔɔna bam maama ni nɩ: «Taá ve á kaagɩ tɩʋ kʋm na. Jar-kərə bam nan mʋ wʋ́ taa wʋ Wɛ ni-gonim daka kam yigə nɩ.»
8 Zozwe na yɔɔrɩ o ŋɔɔnɩ dɩ nɔɔna bam o ti tɩn, mʋ kaanɩm tiinə barpɛ bam kwe ba nabwaanʋ tɩrpɛ tɩm ba wui yɩ ba veǝ. Kaanɩm tiinə badonnǝ ma zɩŋɩ Baŋa-Wɛ ni-gonim daka kam ba tɔgɩ ba kwaga. 9 Jar-kərə bam maa wʋ Wɛ ni-gonim daka kam kwaga nɩ yɩ ba badonnǝ dɩ wʋ kaanɩm tiinə bam yigə nɩ. Kaanɩm tiinə barpɛ bam ma yɔɔrɩ ba jɩgɩ ba nabwaanʋ tɩm ba wui.
10 Zozwe nan ya pɛ nɔn-kɔgɔ kʋm ni mʋ o wɩ: «Nɔɔn-nɔɔnʋ ba maŋɩ sɩ o bagɩ tiguri-kaasa, nan yɩ ŋɔɔnɩ-na taanɩ á brɩ daanɩ, sɩ kʋ taa nii maŋa kalʋ amʋ na wʋ́ brɩ abam nɩ á kɩ te maama tɩn!» 11 Ba ma sɛ Zozwe ni dɩm maama, yɩ ba zɩŋɩ Wɛ ni-gonim daka kam ba kaagɩ tɩʋ kʋm ni bɩdwɩ. Ba na kaagɩ bɩdwɩ kʋntʋ tɩn, ba laan ma joori ba na cwi ba vwə yam mɛ tɩn ba pəni sɩ tɩga pʋʋrɩ.
12 Zozwe ma zaŋɩ tɩ-pʋra ni nɩ, yɩ kaanɩm tiinə bam dɩ daa kwe Wɛ ni-gonim daka kam ba zɩŋɩ. 13 Kaanɩm tiinə balʋ dɩ na jɩgɩ nabwaanʋ tɩm tɩn tɔgɩ daka kam yigə mʋ yɩ ba wui-tɩ. Jar-kərə bam dɩ ma tɔgɩ daka kam kwaga, yɩ badonnǝ wʋ kaanɩm tiinə bam yigə nɩ. Maŋa kam kʋntʋ maama nɩ, kaanɩm tiinə bam lɛɛrɩ ba wui ba nabwaanʋ tɩm mʋ. 14 Da yale dɛ dɩm nɩ nɔn-kɔgɔ kʋm maama dɩ ma saŋɩ ba kwaga ba vu ba kaagɩ tɩʋ kʋm ni bɩdwɩ: yɩ ba laan joori ba vwə yam nɩ. Ba kɩ kʋntʋ mʋ taan, sɩ kʋ yi da yardʋ.
15 Da yarpɛ dɛ dɩm nɩ, Yisɩrayɛlɩ tiinə bam goni tɩga mʋ ba zaŋɩ. Ba ma tɔgɩ naga kalʋ ba na yǝni ba tɔga ba kaagɩ tɩʋ kʋm tɩn. Dɩntʋ dɛ dɩm nɩ ba za kaagɩ kuni bɩrpɛ mʋ. 16 Kaagɩm bɩrpɛ tu wʋm baŋa nɩ, mʋ kaanɩm tiinə bam wugi nabwaanʋ tɩm ba daanɩ. Zozwe dɩ ma pa ni o wɩ: «Laarɩ-na dɩ tiguri-kaasa, bɛŋwaanɩ Baŋa-Wɛ mʋ kwe tɩʋ kʋm o kɩ á jɩŋa nɩ! 17 Tɩʋ kʋm dɩ kʋlʋ maama na wʋ kʋ wʋnɩ tɩn yɩ Baŋa-Wɛ nyɩm mʋ. Zwɛ-na tɩ maama á pa‑DƖ. Ka-boro Rahabɩ, dɩ balʋ na wʋ o sɔŋɔ kʋm nɩ tɩn yɩranɩ mʋ wʋ́ lu. Bɛŋwaanɩ wʋntʋ mʋ yɩ wʋlʋ na səgi dɩ́ na tʋŋɩ balʋ sɩ ba ŋɔ ba nii tɩga kam tɩn. 18 Wǝǝnu maama tɩʋ kʋm nɩ tɩn zɩgɩ sɩ á yɔɔrɩ á cɔgɩ-tɩ mʋ. Kʋntʋ tɩn, yɩ kwe-na tɩʋ kʋm kʋlʋkʋlʋ, sɩ á na kɩ kʋntʋ, á dɩ wʋ́ da á na cɔgɩm mʋ. Kʋ kwaga nɩ, á wʋ́ ja cam á ba á pa Yisɩrayɛlɩ tiinə bam maama. 19 Tɩʋ kʋm səbu-sɩŋa dɩdaanɩ səbu-poŋo dɩ kʋ canna dɩ kʋ luuru tɩm maama yɩ Baŋa-Wɛ nyɩm mʋ. Tɩntʋ maama maŋɩ sɩ á la-tɩ mʋ á pa Baŋa-Wɛ.»
20 Nɔɔna bam na yɔɔrɩ ba ni nabwaanʋ tɩm kwǝri tɩn, mʋ ba tiini ba kaasɩ tiguri-kaasa. Zeriko kabri-lilirru tɩm ma tʋ tɩga nɩ maama vim! Nɔɔna bam maama ma duri ba zʋ tɩʋ kʋm wʋnɩ ba joŋi-kʋ ba te. 21 Ba ma kwe tɩʋ kʋm maama ba pa Baŋa-Wɛ yɩ ba ma sʋ-lwaanʋ ba gʋ nɔɔna balʋ maama na wʋ kʋ wʋnɩ tɩn. Baara, dɩ kaana, dɩ nankwɩn: dɩdaanɩ nɔn-dʋnnʋ, wʋlʋwʋlʋ wʋ daarɩ. Ba ta ma cɔgɩ varɩm dwi maama, naanɩ dɩ peeni dɩ bɩnɛ maama.
22 Zozwe ma ta nɔɔna bale balʋ ba dɛɛn na tʋŋɩ sɩ ba ŋɔ ba nii tɩʋ kʋm tɩn o wɩ: «Ve-na ka-boro kʋm sɔŋɔ, sɩ á kwe ni dɩlʋ á na goni o yigə nɩ tɩn. Ve á ja-na wʋntʋ, dɩ o sɔŋɔ tiinə maama á ba yo seeni.» 23 Nɔn-dʋnnʋ tɩle tɩm ma vu ba ja Rahabɩ dɩ o nu dɩ o ko, kʋ wǝli dɩ o dwi dɩlʋ maama na zʋʋrɩ dɩd-o tɩn ba ja ba nuŋi.a Ba ma pa ba jǝni ba twɛ dɩ Yisɩrayɛlɩ nɔɔna bam maama na wʋ mɛ tɩn.
24 Yisɩrayɛlɩ tiinə bam ma zwɛ tɩʋ kʋm dɩdaanɩ kʋlʋ maama na wʋ kʋ wʋnɩ tɩn. Tɩʋ kʋm səbu-sɩŋa dɩdaanɩ səbu-poŋo dɩ kʋ canna dɩ kʋ luuru tɩm maama, ba ma la tɩntʋ ba pa Baŋa-Wɛ. 25 Sɩ kʋ na yɩ ka-boro Rahabɩ, kʋ dɛ cwǝŋǝ kantʋ mʋ yɩ Zozwe wǝli pa o dɩ o digə kam daa wʋ tɩgɩ nɩnɛɛnɩ Zeriko nɔɔna bam. Wʋntʋ dɛɛn mʋ səgi nɔɔna balʋ Zozwe na tʋŋɩ sɩ ba vu ba ŋɔ ba nii tɩʋ kʋm tɩn. O ma lɛɛrɩ o zʋʋrɩ dɩdaanɩ Yisɩrayɛlɩ tiinə bam sɩ kʋ yi zɩm maama.
26 Kantʋ maŋa kam nɩ Zozwe ma zɩgɩ o du durə dɩntʋ o wɩ: «Baŋa-Wɛ wʋ́ pa wʋlʋ maama na bʋŋɩ sɩ o joori o lɔ Zeriko tɩʋ kʋm tɩn na o lɛɛrʋ.
Kʋ tu bu-kwɩan mʋ wʋ́ tɩ
sɩ tɩʋ kʋm biri-bərə laan zɩgɩ.
Sɩ wʋlʋ maama na wʋ́ kɩ kʋ bwəəru-kamunə yam da tɩn
dɩ ga o jɩŋa bu.»b
27 Baŋa-Wɛ dɛɛn maa wʋ Zozwe tee nɩ maŋa maama. O yɩrɩ ma zaŋɩ je sɩm maama nɩ.