Akanɩ na kɩ lwarɩm dɩlʋ tɩn
7
Yisɩrayɛlɩ tiinə bam dɛɛn tʋŋɩ vwan mʋ wǝǝnu tɩlʋ Baŋa-Wɛ na wɩ tɩ maŋɩ dɩ cɔgɩm tɩn baŋa nɩ. Akanɩ dɛɛn mʋ ŋɔgɩ wǝǝnu tɩm tɩdonnǝ. O dɛɛn yɩ Karmɩ bu mʋ, ba maa yɩ Zabidi digə tiinə. Ba ta yɩ Zuda dwi dɩm nɔɔna mʋ na yɩ Zara dwi tiinə. Akanɩ kikiə yam ŋwaanɩ mʋ Baŋa-Wɛ banɩ zaŋɩ dɩ Yisɩrayɛlɩ tiinə maama.2 Zozwe ma zɩgɩ Zeriko nɩ o tʋŋɩ nɔɔna badonnǝ sɩ ba vu ba ŋɔ ba nii Ayi tɩʋ kʋm na yɩ te tɩn. Kʋ dɛɛn wʋ Betɛlɩ wa-puli seeni mʋ sɩ kʋ maŋɩ dɩdaanɩ Bɛt-Avɛn.
3 Ba ma vu yɩ ba joori ba ta dɩdaanɩ Zozwe ba wɩ: «Tɩʋ kʋm kʋntʋ yɩ tʋ-balaŋa mʋ. Dɩ́ na jaanɩ nɔɔna mʋrrʋ tɩle naa mʋrrʋ tɩtɔ dɩ́ vu sɩ dɩ́ jeeri-ba, dɩ́ wʋ́ di-ba. Yɩ tʋŋɩ kɔgɔ kʋm maama.» 4 Kʋntʋ ŋwaanɩ, ba dɛɛn lɩ nɔɔna mʋrrʋ tɩtɔ mʋ pa ba vu sɩ ba jeeri Ayi tiinə bam. Ayi tiinə bam ma wanɩ Yisɩrayɛlɩ tiinə bam ba di pa ba pipiri ba duri. 5 Ba zɩgɩ ba tɩʋ kʋm manco-pɩɩna ni nɩ ba dɩ Yisɩrayɛlɩ tiinə bam, sɩ kʋ yi pweeru tɩm laŋa. Ba ma gʋ Yisɩrayɛlɩ tiinə bam nɩnɛɛnɩ nɔɔna fiintɔ-bardʋ zoŋo kʋm təŋə nɩ. Kǝm dɩm kʋntʋ sʋ Yisɩrayɛlɩ tiinə bam mʋ. Ba vwana ma parɩ, yɩ fʋʋnɩ zʋ-ba.
6 Zozwe wʋʋ ma cɔgɩ. O dɛɛn ma kaarɩ o gwaarʋ, yɩ o daarɩ o tʋ o vin o yibiyə tɩga nɩ. O dɛɛn ta bibili Wɛ ni-gonim daka kam yigə nɩ taan, sɩ kʋ yi dɩdaan-ni maŋa. Yisɩrayɛlɩ nakwa bam dɩ dɛɛn kɩ kʋntʋ mʋ yɩ ba pɛ kasʋlʋ ba taagɩ ba yum maama. 7 Zozwe laan maa wɩ: «Tɩntʋ maama yɩ bɛ? Yuutu Baŋa-Wɛ, bɛŋwaanɩ mʋ nmʋ jaanɩ dɩbam n bɛ bugə kam n ba yo seeni? N lagɩ n kwe dɩbam mʋ n kɩ Amɔɔrɩ tiinə bam jɩŋa nɩ na? Nmʋ wɩ ba cɔgɩ dɩbam mʋ na? Dɩbam ya na maŋɩ Zʋrdɛn bugə daa kakam kam nɩ, kʋ ba garɩ tɩntʋ na? 8 Amʋ Yuutu, kɔɔ mʋ amʋ daa maŋɩ sɩ a ta, yɩ dɩ́ dʋna pa dɩ́ pipiri dɩ́ duri tɩntʋ? 9 Kaanan tiinə bam dɩdaanɩ dwiə yalʋ maama na zʋʋrɩ yo seeni tɩn laan na ni tɩntʋ, baá na baarɩ sɩ ba ba ba gilimi dɩbam ba kɩ tɩtarɩ nɩ. Ba laan maa wʋ́ pa dɩ́ yɩrɩ je tɩga baŋa nɩ. Kʋntʋ na kɩa, nmʋ yɩrɩ kamunu paarɩ-zulǝ yam nan daa bɛ?»
10 Baŋa-Wɛ ma ta Zozwe DƖ wɩ:
«Zaŋɩ wɛɛnɩ! Kʋ kɩ tɩta mʋ yɩ n vin n yibiyə tɩga nɩ kʋntʋ? 11 Yisɩrayɛlɩ tiinə bam mʋ cɔgɩ, yɩ ba vɩn ni-mɔrɔ dɩlʋ na wʋ amʋ dɩ bantʋ tɩtarɩ nɩ tɩn. Ba ma ŋɔ wǝǝnu tɩlʋ a na wɩ tɩ yɩ amʋ nyɩm tɩn. Ba ŋwɩɩnɩ dɩm kwaga nɩ, ba ta fɔgɩ vwan. Ba ta daarɩ ba kwe wǝǝnu tɩm kʋntʋ ba wǝli ba tɩtɩ wǝǝnu wʋnɩ. 12 Kʋntʋ ŋwaanɩ nan pa á duri á dʋna bam yigə nɩ. Lɛɛrʋ nan wʋ Yisɩrayɛlɩ yuu nɩ yɩ ba maŋɩ dɩ cɔgɩm. Abam nan na wʋ cɔgɩ wǝǝnu tɩlʋ ya na maŋɩ sɩ tɩ cɔgɩ yɩ á kwe-tɩ tɩn, amʋ daa bá taa wʋ á tɩtarɩ nɩ.
13 Zaŋɩ n vu n ta sɩ nɔɔna bam kwɛ ba tɩtɩ sɩ ba jwa jeeri-nɩ! Bɛŋwaanɩ Yisɩrayɛlɩ tiinə Baŋa-Wɛ dɩm tagɩ tɩntʋ mʋ: ‹Abam kwe wǝǝnu tɩlʋ na maŋɩ sɩ tɩ taa yɩ Baŋa-Wɛ nyɩm tɩn mʋ á wǝli á wǝǝnu wʋnɩ. Abam nan na wʋ lɩ-tɩ á wǝǝnu tɩm wʋnɩ, á bá wanɩ á dʋna bam á di.›
14 Abam kɔgɔ kʋm maama jwa wʋ́ jeeri Baŋa-Wɛ yigə nɩ. Baŋa-Wɛ maa wʋ́ lɩ Yisɩrayɛlɩ dwi dɩlʋ na cɔgɩ tɩn. Dwi dɩm laan maa wʋ́ nuŋi dwi dɩ dwi sɩ Baŋa-Wɛ lɩ dwi kʋlʋ na cɔgɩ tɩn. Dwi kʋm dɩ wʋ́ nuŋi mʋ digə maama wʋnɩ, sɩ Baŋa-Wɛ lɩ digə kalʋ na cɔgɩ tɩn, yɩ digə kam kʋntʋ dɩ laan ma nuŋi nɔɔnʋ dɩdʋa dɩdʋa, sɩ Baŋa-Wɛ lɩ wʋlʋ na cɔgɩ tɩn. 15 Ba na nɛ nɔɔnʋ wʋlʋ na ŋɔgɩ wǝǝnu tɩlʋ á na maŋɩ sɩ á cɔgɩ tɩn, ba laan wʋ́ zwɛ kʋ tu mʋ. Ba ta maŋɩ sɩ ba ja o yɩra woŋo maama mʋ ba wǝli da ba nuŋi ba zwɛ. Bɛŋwaanɩ, o tiini o kɩ wo-balɔrɔ mʋ na daɩ sɩ kʋ kɩ Yisɩrayɛlɩ nɩ. O cɔgɩ ni-mɔrɔ dɩlʋ Wɛ dɩ DƖ nɔɔna bam na kɩ daanɩ tɩn mʋ.»
16 Tɩga na pʋʋrɩ tɩn, Zozwe ma pa Yisɩrayɛlɩ tiinə bam nuŋi sɩ Wɛ lɩ dwi dɩlʋ na cɔgɩ tɩn. Zuda dwi dɩm mʋ ba dɛɛn lɩ. 17 Zuda dwi dɩm ma nuŋi dwi dɩ dwi. Ba ma lɩ Zara dwi kʋm. Zara di sɩm na puli sɩ tɩ nuŋi tɩn, Zabidi digə kam mʋ ba lɩ. 18 Zabidi digə kam nɔɔna bam ma nuŋi nɔɔnʋ dɩdʋa dɩdʋa yɩ ba lɩ Karmɩ bu Akanɩ.
19 Zozwe laan ma ta dɩ Akanɩ nɩ: «Amʋ bu, nmʋ zɩgɩ Baŋa-Wɛ dɩm na yɩ Yisɩrayɛlɩ tiinə Wɛ tɩn yigə nɩ mʋ. Kʋntʋ tɩn, pa‑o zulə sɩ n daarɩ n ta cɩga. Ta n kǝm dɩm maama jaja n brɩ-nɩ, sɩ n yɩ səgi kʋlʋkʋlʋ amʋ yigə nɩ.»
20 Akanɩ ma lǝr-o o wɩ: «Amʋ sɩɩnɩ a tusi a cɔgɩ Baŋa-Wɛ dɩm na yɩ Yisɩrayɛlɩ tiinə Wɛ tɩn yigə. Amʋ nan kɩ tɩntʋ mʋ: 21 Dɩ́ na zʋ sɩ dɩ́ wanɩ Zeriko tɩn mʋ a nɛ gwar-laa na nuŋi Babilɔnɩ tɩn, dɩdaanɩ səbu-poŋo səbu-dala biə-yale, kʋ ta wǝli dɩ səbu-sɩŋa kukolo na tiini dɩ dummə dɩ dwe kilo cicoro tɩn. Amʋ fra ma tiini ya zʋ-tɩ, pa a kwe. Amʋ kʋgɩ tɩga a vwe dɩm wʋnɩ mʋ a səgi tɩntʋ maama. Á wʋ́ na-tɩ dáanɩ yɩ səbu-poŋo tɩm səgi tɩ maama kuri nɩ.»
22 Zozwe ma tʋŋɩ nɔɔna sɩ ba vu o vwe dɩm nɩ ba buŋi ba nii kʋ yɩ cɩga mʋ na. Ba ma duri ba vu yɩ ba sɩɩnɩ ba na wǝǝnu tɩm maama na səgi da. Lu-nyɩnnʋ tɩm sɩɩnɩ tɩ wʋ vwe dɩm tɩga nɩ, kuri kuri. 23 Nɔɔna bam ma kwe wǝǝnu tɩm vwe dɩm nɩ ba ja nuŋi ba ba Zozwe dɩdaanɩ Yisɩrayɛlɩ tiinə bam tee nɩ. Ba ma jalɩ tɩ maama Baŋa-Wɛ yigə nɩ.
24 Zozwe dɩdaanɩ Yisɩrayɛlɩ kɔgɔ kʋm maama dɛɛn ma ja Akanɩ, ba wǝli dɩ səbu-poŋo tɩm, dɩ gwar-laa kʋm, dɩ səbu-sɩŋa kukolo kʋm, kʋ wǝli dɩ o biə maama, bəkəri dɩ bɩsankam, ba ja ba tu Akɔɔrɩ bolo kʋm nɩ. Ba dɛɛn ta ma ja o bɩnɛ, dɩ o naanɩ, dɩ o peeni, kʋ wǝli dɩ o vwe dɩm tɩtɩ. O woŋo maama mʋ ba jaanɩ ba wǝli da ba vu bolo kʋm. 25 Zozwe laan ma ta dɩd-o o wɩ: «Bɛŋwaanɩ mʋ yɩ n ja cam dɩntʋ n ba n pa dɩbam? Baŋa-Wɛ dɩ nan wʋ́ pa cam yi‑m zɩm.»
Yisɩrayɛlɩ tiinə bam maama laan ma dʋl-o dɩ kandwa ba gʋ. Ba dɛɛn ta dʋlɩ o woŋo maama mʋ ba gʋ. Kʋ kwaga nɩ, ba dɛɛn ma zwɛ wʋntʋ dɩ o digə tiinə bam dɩ o wǝǝnu maama. 26 Ba laan ma tigisi kandwa o baŋa nɩ. Kandwa-dɔgɩla yam ta wʋra dɩdaanɩ zɩm maama. Kʋ nan na zɩgɩ kantʋ maŋa nɩ sɩ kʋ yi zɩm tɩn, ba jɩgɩ je sɩm kʋntʋ ba bǝi nɩ: Cam bolo mʋ.a Kʋ ma pa Baŋa-Wɛ ban-lʋm dɩm tʋ.