Zozwe 8

Yisɩrayɛlɩ tiinə bam di Ayi tɩʋ kʋm

Baŋa-Wɛ laan ma ta Zozwe DƖ wɩ: «Yɩ ta n fʋna, nan yɩ pa n vwana parɩ. Ja á kɔgɔ kʋm maama na yɩ jar-kərə tɩn n vu n jeeri Ayi tɩʋ kʋm, sɩ amʋ sɩɩnɩ a kwe tɩʋ kʋm Pɛ, dɩ o nɔɔna bam, kʋ wǝli dɩ tɩʋ kʋm tɩtɩ dɩdaanɩ ba laŋa kam maama mʋ a pa abam. 2 Kɩ-na Ayi tɩʋ kʋm dɩ kʋ Pɛ nɩnɛɛnɩ á na kɩ Zeriko dɩ kʋ Pɛ wʋm te tɩn. Tɩntʋ mʋ za wʋ́ ləri: Wǝǝnu tɩlʋ maama á na wʋ́ di Ayi tɩʋ kʋm wʋnɩ tɩn yɩ á nyɩm mʋ sɩ á taá jɩga. Kʋ maa yɩ ba naanɩ dɩm dɩ ba jɩjɩgɩrʋ mʋ kʋntʋ. Nan ve-na á səgi sɩ kʋ taa bwələ dɩ tɩʋ kʋm.»

3 Zozwe ma kuri jar-kərə balʋ na ye najara kǝm lanyɩranɩ tɩn, sɩ ba yi nɔɔna mʋrrʋ fiintɔ. Tɩtɩɩ dɩm kʋntʋ nɩ, ba ma vu sɩ ba zaŋɩ najara dɩdaanɩ Ayi tiinə bam. 4 O dɛɛn ma pa nɔɔna bam ni dɩntʋ:

«Á ve-na á vu á liisi á səgi tɩʋ kʋm kwaga seeni. Á nan za á ta ba twarɩ dɩ tɩʋ kʋm, sɩ á daarɩ á ta yɩ siri sɩ á li-kʋ. 5 Kʋ daarɩ jar-kərə balʋ maama na tɔgɩ dɩ amʋ tɩn wʋ́ vu sɩ dɩ́ jeeri-ba dɩdaanɩ najara. Ayi tiinə bam maa wʋ́ nuŋi nɩnɛɛnɩ dayigə kam nɩ tɩn, sɩ ba zaŋɩ najara dɩdaanɩ dɩbam. Dɩ́ maa wʋ́ titwəni sɩ dɩ́ duri dɩ́ daarɩ-ba. 6 Dɩ́ lagɩ dɩ́ pa ba zəli dɩbam mʋ, yɩ dɩ́ wʋra dɩ́ ganɩ-ba mʋ kʋntʋ sɩ ba maama nuŋi ba daarɩ ba tɩʋ kʋm. Bɛŋwaanɩ, baá bʋŋɩ ba tɩtɩ nɩ nɩ: ‹Dɩ́ daa pɛ Yisɩrayɛlɩ tiinə bam duri dɩbam yigə nɩ nɩnɛɛnɩ dayigə kam tɩn.› 7 Maŋa kalʋ nɩ ba maama na nuŋi ba ti yɩ ba daa baŋwɛ dɩ ba tɩʋ kʋm tɩn, mʋ abam wʋ́ zaŋɩ á na səgi mɛ tɩn sɩ á zʋ á vrɩ ba tɩʋ kʋm. Baŋa-Wɛ mʋ wʋ́ kwe-kʋ DƖ pa abam. 8 Á maa na nɛ nɩ á vrɩ tɩʋ kʋm maama, sɩ á zwɛ-kʋ. Baŋa-Wɛ wɩ á kɩ kʋntʋ mʋ, amʋ dɩ nan pɛ abam ni sɩ á kɩ kʋntʋ.»

9 Nɔɔna bam ma zaŋɩ tɩtɩɩ dɩm kʋntʋ nɩ, ba vu ba səgi je na twɛ dɩdaanɩ tɩʋ kʋm tɩn. Ayi wa-zʋʋrɩ daa kam seeni mʋ ba səgi, Betɛlɩ dɩ Ayi tɩtarɩ laŋa nɩ. Sɩ kʋ na yɩ Zozwe, wʋntʋ maŋɩ daanɩ mʋ tɩtɩɩ dɩm kʋntʋ. O ma pəni o nɔɔna bam tee nɩ.

10 Tɩga na jɩgɩ ka pʋʋrɩ tɩn, Zozwe ma la Yisɩrayɛlɩ jar-kərə bam o kɩ daanɩ. O dɩ Yisɩrayɛlɩ nakwa bam ma tʋ ba yigə nɩ yɩ ba laan kwe Ayi cwǝŋǝ ba maa kɛa. 11 Ba ma vu ba maŋɩ Ayi tɩʋ kʋm jazɩm baŋa seeni daa kam nɩ ba cwi ba vwə. Bolo mʋ dɛɛn tigi ba dɩdaanɩ Ayi tɩʋ kʋm tɩtarɩ nɩ. 12 Tɩtɩɩ dɩm kʋntʋ nɩ, Zozwe ma pa nɔɔna mʋrrʋ tɩnu vu ba səgi Betɛlɩ dɩdaanɩ Ayi tɩtarɩ nɩ, sɩ kʋ maŋɩ dɩ tɩʋ kʋm wa-zʋʋrɩ seeni. 13 Ba na kɩ te tɩn mʋ tɩntʋ: Ba nɔn-kɔgɔ kʋm ma zɩgɩ ba maŋɩ dɩdaanɩ tɩʋ kʋm jazɩm baŋa seeni daa kam, yɩ balʋ na səgi ba vwɛ tɩn zɩgɩ ba maŋɩ dɩ tɩʋ kʋm wa-zʋʋrɩ seeni. Zozwe tɩtɩ laan ma vu bolo kʋm nɩ tɩtɩɩ dɩm kʋntʋ.

14 Tɩga kam na pʋʋrɩ yɩ Ayi tɩʋ Pɛ na-ba tɩn, o ma kɩ lɩla o la o nɔɔna bam pa ba zaŋɩ najara dɩdaanɩ Yisɩrayɛlɩ tiinə bam. Ya dɛɛn kɩ ya maŋɩ dɩ bolo kʋm sisərə kam nɩ mʋ. Ayi tɩʋ Pɛ maa wʋ lwarɩ nɩ nɔɔna badonnǝ mʋ vwɛ sɩ ba zʋ o tɩʋ kʋm wʋnɩ. 15 Zozwe dɩdaanɩ Yisɩrayɛlɩ kɔgɔ kʋm maama ma kɩ nɩnɛɛnɩ ba lagɩ ba duri mʋ sɩ ba lu, yɩ ba dɛɛn kwe kagʋa cwǝŋǝ kam ba maa kɛa. 16 Ayi tɩʋ Pɛ wʋm ma bəŋi o tɩʋ kʋm nɔɔna bam maama sɩ ba nuŋi ba zəli Yisɩrayɛlɩ tiinə bam. Kʋ dɛ cwǝŋǝ kam kʋntʋ nɩ mʋ, yɩ ba maama nuŋi ba daarɩ ba tɩʋ kʋm. 17 Nɔɔn-nɔɔnʋ dɛɛn daa wʋ daarɩ Ayi nɩ naa Betɛlɩ tɩʋ nɩ. Ba maama dɛɛn nuŋi mʋ sɩ ba zəli ba ja Yisɩrayɛlɩ tiinə bam. Ba tɩʋ kʋm manco-pɩɩna yam ma daarɩ ya tigə woo.

18 Baŋa-Wɛ ma ta dɩ Zozwe DƖ wɩ: «Twɩ n cicwe dɩm n jeeri Ayi tɩʋ kʋm, sɩ a lagɩ a kwe tɩʋ kʋm mʋ a kɩ n jɩŋa nɩ.» Zozwe ma kɩ Baŋa-Wɛ na brɩ sɩ o kɩ te tɩn. 19 Zozwe na yɔɔrɩ o te o cicwe dɩm o jeeri Ayi tɩʋ kʋm tɩn mʋ nɔɔna balʋ na səgi ba cǝgǝ tɩʋ kʋm ni nɩ tɩn da ba nuŋi ba vwɛɛm je sɩm nɩ. Ba ma zʋ ba di tɩʋ kʋm yɩ ba daarɩ ba zwɛ-kʋ.

20 Ayi tɩʋ nɔɔna bam na pipiri sɩ ba nii tɩn, ba nɛ nɩ nyʋa mʋ zaŋa ba tɩʋ kʋm nɩ kulululu. Ba daa maa yǝri ba na wʋ́ kɩ te te ba lu, bɛŋwaanɩ Yisɩrayɛlɩ tiinə balʋ ya na duri ba yɔɔrɩ kagʋa kam seeni tɩn joori ba pipiri mʋ ba zaŋɩ najara dɩ ba. 21 Zozwe dɩ nɔɔna balʋ na wʋ o tee nɩ tɩn maanɩ nɩ: balʋ na səgi tɩʋ kʋm ni nɩ tɩn wanɩ-kʋ. Ba ma pipiri ba jeeri Ayi tiinə bam ba di-ba najara wʋnɩ. 22 Yisɩrayɛlɩ tiinə balʋ dɩ ya na səgi tɩʋ kʋm təŋə nɩ yɩ ba laan wʋ kʋ wʋnɩ tɩn ma nuŋi ba puli sɩ ba zɩgɩ kwaga nɩ ba taa gʋɩ Ayi tiinə bam. Bantʋ dɛɛn laan wʋ Yisɩrayɛlɩ tiinə bam tɩtarɩ nɩ mʋ. Ba wʋlʋwʋlʋ wʋ daarɩ. Nɔɔn-nɔɔnʋ nan wʋ lugi. 23 Kʋ daarɩ Ayi tɩʋ Pɛ wʋm yɩranɩ mʋ ba jaanɩ yɩ o ta ŋwɩ. Ba ma ja-o ba vu Zozwe te.

24 Yisɩrayɛlɩ tiinə bam dɛɛn ma zəli Ayi tɩʋ kʋm nɔɔna balʋ maama na nuŋi kʋ wʋnɩ tɩn yɩ ba gʋ ba maama nyɔ pwələ kam nɩ! Kʋntʋ kwaga nɩ mʋ ba duri ba zʋ tɩʋ kʋm wʋnɩ ba gʋ balʋ maama na wʋ kʋ wʋnɩ tɩn. 25 Ayi nɔn-biə bam maama, baara dɩ kaana dɛɛn yɩ mʋrrʋ fugǝ-tɩle (12,000) mʋ. Yisɩrayɛlɩ tiinə bam ma ti ba ni dɩm maama nyɔ! Nɔɔn-nɔɔnʋ dɛɛn daa wʋ daarɩ. 26 Bɛŋwaanɩ, Zozwe cicwe dɩlʋ o na ze tɩn ta twɩ kʋntʋ mʋ taan, sɩ kʋ yi maŋa kalʋ Yisɩrayɛlɩ tiinə bam na yɔɔrɩ ba cɔgɩ Ayi nɔɔna bam maama tɩn. 27 Yisɩrayɛlɩ tiinə bam dɛɛn ya wʋ cɔgɩ tɩʋ kʋm vara dɩ kʋ jɩjɩgɩrʋ tɩm. Baŋa-Wɛ dɛɛn pɛ Zozwe ni sɩ o pa-ba cwǝŋǝ sɩ ba kwe tɩntʋ ba taa jɩga. Ba ma sɩɩnɩ ba kɩ kʋntʋ.

28 Zozwe ma zwɛ Ayi tɩʋ kʋm pa kʋ ji weeru-puuri kʋ ba yi zɩm. 29 Sɩ kʋ na yɩ Ayi tɩʋ Pɛ wʋm, Zozwe kuur‑o mʋ o yagɩ tiu yɩra nɩ pa o lǝgǝ da kʋntʋ taan, sɩ kʋ yi dɩdaan-ni maŋa. Wa-zʋʋrɩ maŋa nɩ, Yisɩrayɛlɩ tiinə bam ma par‑o ba ja ba vu ba dʋlɩ ba yagɩ tɩʋ kʋm manchoŋo ni nɩ. Ba dɛɛn ma la kandwa ba panɩ o maama. Kandwa yam dɛɛn diini mʋ vili vili yɩ ya ta wʋra sɩ kʋ ba yi zɩm.

Ba guli Baŋa-Wɛ ni-gonim dɩm gulə

30 Ba dɛɛn ma vu ba yi Ebalɩ Piu kʋm je sɩm. Zozwe ma tigisi kandwa daanɩ o lɔ bimbim o ma zuli Yisɩrayɛlɩ Baŋa-Wɛ dɩm. 31 Wɛ tɩntʋŋnʋ Moyisi dɛɛn na pʋpʋnɩ kʋlʋ maama sɩ ba taa kɩ tɩn mʋ o dɛɛn kɩa. Kʋ pʋpʋnɩ Wɛ niə yam tɔnɔ kʋm nɩ kʋ wɩ: «Sɩɩnɩ-na kandwa yalʋ á na wʋ mɛ luuru naa kʋlʋkʋlʋ á ma á goni tɩn, sɩ kʋ taa yɩ kaanɩm bimbim kʋ pa-nɩ.» Ba na lɔgɩ-dɩ tɩn, ba ma kɩ zwɛɛm pɛɛra dɩdaanɩ yazurə pɛɛra ba kaanɩ ba pa Baŋa-Wɛ. 32 Zozwe ma zɩgɩ Yisɩrayɛlɩ kɔgɔ kʋm yigə nɩ o pʋpʋnɩ Wɛ niə yam o kɩ kandwa baŋa nɩ sɩ kʋ lwǝni Wɛ niə yalʋ Moyisi na pʋpʋnɩ tɩn. 33 Yisɩrayɛlɩ kɔgɔ kʋm maama, tɩmbiə dɩdaanɩ vərə, kʋ wǝli dɩ ba nakwa dɩ ba yigǝ tiinǝ dɩ ba dɩdɛɛra balʋ na nii ba baŋa nɩ tɩn maama dɛɛn pɔɔrɩ mʋ kuni bɩle ba zɩga. Pʋpwara dɩdʋa dɛɛn zɩgɩ yɩ ba kwaga jeeri Gerizim Piu kʋm mʋ. Pʋpwara kadoŋ kam dɩ maa zɩga yɩ ba kwaga jeeri Ebalɩ Piu kʋm. Levi dwi kaanɩm tiinə bam laan maa wʋ ba tɩtarɩ nɩ yɩ ba zɩŋɩ Wɛ ni-gonim daka kam. Ba kɩ kʋntʋ maama sɩ kʋ tɔgɩ dɩdaanɩ Wɛ tɩntʋŋnʋ Moyisi dɛɛn na brɩ sɩ ba taa kɩ te tɩn yɩ ba laan kwe Wɛ zaanɩ ba ma kɩ Yisɩrayɛlɩ tiinə bam yu-yoŋo.

34 Kʋntʋ kwaga nɩ Zozwe daa ma joori o karɩmɩ Wɛ niə yam maama, Wɛ ywəəni bɩtarɩ dɩdaanɩ DƖ Kampwəl-balwaarʋ tɩlʋ maama Moyisi dɛɛn na pʋpʋnɩ o tiŋi Wɛ niə tɔnɔ kʋm wʋnɩ tɩn. 35 Taanɩ tǝrǝ Moyisi na pʋpʋnɩ o tiŋi Wɛ niə tɔnɔ kʋm wʋnɩ yɩ Zozwe wʋ karɩmɩ sɩ Yisɩrayɛlɩ tiinə kɔgɔ kʋm maama ni. O dɛɛn karɩmɩ kʋ maama mʋ nyɔ pa ba cəgi. Kaana bam dɩ biə bam maama dɛɛn wǝli da mʋ ba cəgi yɩ vərə bam dɩ dɛɛn wʋ maŋɩ kwaga nɩ.