Gabawɔn tiinə ganɩ Yisɩrayɛlɩ tiinə bam
9
Tɩɩnɩ dɩm na wʋ Zʋrdɛn bugə kam wa-zʋʋrɩ seeni tɩn pwa maama ma ni kʋlʋ na kɩ tɩn. Pwa bam kʋntʋ dɛɛn zʋʋrɩ pweeru laŋa kam nɩ mʋ, dɩdaanɩ wa-zʋʋrɩ seeni bwəəlu tɩm nɩ. Ba badonnǝ maa zʋʋrɩ ba twɛ dɩdaanɩ Mediterane nɩnɩʋ kʋm ni dɩm, yɩ kʋ tʋlɩ kʋ maa ve baŋa nɩ sɩ kʋ maŋɩ dɩ Liban. Kʋ maa yɩ Hɛtɩ tiinə, dɩ Amɔɔrɩ tiinə, dɩ Kaanan tiinə, dɩ Perezi tiinə, dɩ Hevi tiinə, dɩdaanɩ Yebusi tiinə pwa bam mʋ kʋntʋ. 2 Pwa bam kʋntʋ maama ma kɩ ni-mɔrɔ sɩ ba jar-kərə bam maama gwaanɩ daanɩ sɩ ba laan kɩ najara dɩ Zozwe dɩdaanɩ Yisɩrayɛlɩ kɔgɔ kʋm maama.3 Kʋ daarɩ Gabawɔn tiinə bam na ni Zozwe dɩ o kwaga kam na kɩ te Zeriko dɩdaanɩ Ayi tɩɩnɩ dɩm baŋa nɩ tɩn, 4 mʋ ba kɩ swan sɩ ba wanɩ ba joŋi ba tɩtɩ ba yagɩ. Ba ma kɩ wʋdiu, yɩ ba kwe-kʋ ba kɩ yol-zɩnzwaanʋ wʋnɩ ba daŋɩ ba bɩnɛ baŋa nɩ. Ba lɔɔrʋ tɩm dɩ dɛɛn maa doori lanyɩranɩ yɩ tɩ kaarɩ kaarɩ. 5 Gwaarʋ tɩlʋ nɔɔna bam na lɛ tɩn dɛɛn maa yɩ gwar-zɩnzwara, yɩ ba kwe natrɩ-doorə ba zʋ. Ba wʋdiiru dɩ dɛɛn ma kuuni, yɩ kʋdoŋ dɩ kʋ.
6 Zozwe dɩ o nɔɔna bam dɛɛn maŋɩ Giligalɩ nɩ mʋ ba cwi ba vwə. Gabawɔn tiinə bam ma vu ba yi da, yɩ ba ta dɩ Zozwe dɩdaanɩ Yisɩrayɛlɩ tiinə bam ba wɩ: «Dɩbam tɩʋ baŋwɛ. Dɩ́ nan tu abam te sɩ dɩ́ ni-mɔrɔ mʋ dɩ abam.»
7 Yisɩrayɛlɩ tiinə bam ma lǝri-ba wɩ: «Dɛdoŋ abam zʋʋrɩ yo bwələ bwələ mʋ. Kʋ maa na yɩ kʋntʋ, dɩbam bá wanɩ dɩ́ kɩ ni-mɔrɔ dɩ abam.»
8 Nɔɔna bam ma ləri Zozwe wɩ: «Dɩbam tu sɩ dɩ́ sɛ dɩ́ pa abam.»
Zozwe ta ma joori o bwe-ba o wɩ: «Abam yɩ bran mʋ, yɩ á nuŋi yən mʋ?»
9 Ba ma lǝr-o ba wɩ:
«Dɩbam nuŋi tɩʋ yigə yigə mʋ dɩ́ ba yo. Kʋ nan yɩ abam Tu Baŋa-Wɛ dɩm yɩrɩ kamunu kʋm ŋwaanɩ mʋ dɩ́ tuǝ. Dɩ́ ni DƖ na kɩ te maama Ezipi nɩ tɩn. 10 Dɩ́ ta ni Baŋa-Wɛ na tʋŋɩ te dɩdaanɩ Amɔɔrɩ tiinə pwa bale bam na zʋʋrɩ Zʋrdɛn bugə kam wa-puli seeni tɩn. Kʋ maa yɩ Hesebon tɩʋ Pɛ Sɩhɔn mʋ dɩdaanɩ Basan tɩʋ Pɛ Ɔgɩ paarɩ dɩm na di Asetaro nɩ tɩn. 11 Dɩbam tɩʋ nakwa dɩdaanɩ dɩ́ nɔn-biə bam maama ma ta dɩbam ba wɩ: ‹Kwe-na wʋdiiru cwə-dɔrɔ kʋm ŋwaanɩ sɩ á vu á jeeri Yisɩrayɛlɩ tiinə bam. Nan ta-na dɩ ba nɩ: Dɩbam lagɩ sɩ dɩ́ sɛ dɩ́ pa abam. Abam dɩ nan sɛ sɩ dɩ́ kɩ-na ni-mɔrɔ daanɩ.› 12 Nii-na dɩbam dɩpɛ kʋntʋ! Dɩ́ yɔɔrɩ dɩ wɔ-dɩ dɩ́ ti mʋ yɩ dɩ́ kwe cwǝŋǝ sɩ dɩ́ ba yo. Lele kʋntʋ kʋ nan kuuni mʋ yɩ kʋ kʋ. 13 Lɔɔrʋ tɩntʋ dɩ́ na kɩ na tɩ wʋnɩ tɩn ya yɩ lɔ-dʋnnʋ mʋ. Tɩ laan nan doori mʋ, yɩ tɩ bagɩ bagɩ. Dɩ́ natra dɩdaanɩ dɩ́ gwaarʋ maama ma cɔgɩ cwə-dɔrɔ kʋm baŋa nɩ mʋ.»
14 Yisɩrayɛlɩ nakwa bam ma joŋi Gabawɔn tiinə wʋdiu kʋm ba laŋɩ ba nii, yɩ ba wʋ bwe sɩ ba lwarɩ Baŋa-Wɛ wʋbʋŋa. 15 Zozwe ma kɩ ni-mɔrɔ dɩ nɔɔna bam sɩ Yisɩrayɛlɩ tiinə bam yɩ gʋ-ba. Yisɩrayɛlɩ nakwa bam dɩ dɛɛn ma du durə sɩ kʋ sɩɩnɩ kʋ taa yɩ kʋntʋ.
16 Ba na kɩ ni-mɔrɔ dɩdaanɩ Gabawɔn tiinə bam ba ti tɩn, mʋ da yatɔ wɛɛnɩ ba ni nɩ nɔɔna bam zʋʋrɩ ba twɛ-ba. 17 Yisɩrayɛlɩ tiinə bam dɛɛn ma kaagɩ laŋa kam sɩ ba nii Gabawɔn tiinə tɩɩnɩ dɩm na wʋ mɛ tɩn. Ba ma kwe da yatɔ ba yi ba tɩɩnɩ dɩm. Tɩɩnɩ dɩm yɩra dɛɛn mʋ yɩ Gabawɔn, dɩ Kefira, dɩ Beerotɩ, dɩdaanɩ Kiriaf-Jeerim. 18 Yisɩrayɛlɩ tiinə bam maa wʋ jeeri Gabawɔn nɔɔna bam dɩ najara, ba yigǝ tiinǝ bam na loori yigə ba kɩ ni-mɔrɔ dɩ ba yɩ ba ma Yisɩrayɛlɩ tiinə Baŋa-Wɛ dɩm yɩrɩ mʋ ba du durə ba pa-ba tɩn ŋwaanɩ.
Yisɩrayɛlɩ kɔgɔ kʋm maama ma sɩŋɩ sɩ ba pʋʋnɩ ba yigǝ tiinǝ bam, ni-mɔrɔ dɩm ŋwaanɩ. 19 Ba yigǝ tiinǝ bam ma lǝri-ba ba wɩ: «Dɩbam na loori yigə dɩ́ ma Yisɩrayɛlɩ tiinə Baŋa-Wɛ dɩm yɩrɩ dɩ́ ma dɩ́ du durə dɩm tɩn, dɩ́ daa bá wanɩ-ba kʋlʋkʋlʋ sɩ dɩ́ kɩ. 20 Kʋ maŋɩ sɩ dɩ́ yɩ gʋ-ba mʋ. Dɩ́ na cɔgɩ ni-mɔrɔ dɩntʋ, Baŋa-Wɛ banɩ wʋ́ zaŋɩ dɩbam baŋa nɩ mʋ.» 21 Ba daa maa wɩ: «Ba na ŋwɩ: dɩ́ wʋ́ pa ba taa goni dɛ yɩ ba daarɩ ba mɔɔnɩ na ba paɩ Yisɩrayɛlɩ kɔgɔ kʋm maama.» Yisɩrayɛlɩ nakwa bam dɛɛn na bwɛ sɩ ba kɩ kʋlʋ tɩn mʋ kʋntʋ.
22 Zozwe ma bəŋi Gabawɔn tiinə bam yɩ o bwe-ba o wɩ: «Bɛŋwaanɩ mʋ á ganɩ dɩbam kʋntʋ? Abam tagɩ nɩ á tɩʋ baŋwɛ, yɩ á laan zʋʋrɩ yo seeni bwələ bwələ. 23 Lɛɛrʋ laan nan mʋ wʋ á yuu nɩ. Kʋ zɩgɩ zɩm dɛ dɩm sɩ kʋ taa ve maŋa maama, á wʋ́ taá yɩ balʋ na goni dɛ mʋ, yɩ á daarɩ á mɔɔnɩ na dɩbam Wɛ digə kam tɩtʋŋa ŋwaanɩ.»
24 Ba ma ləri Zozwe ba wɩ: «Dɩ́ yɩ n tɩntʋŋna mʋ. Dɩ́ maŋɩ dɩ́ ni abam Baŋa-Wɛ dɩm na pɛ DƖ tɩntʋŋnʋ Moyisi kwǝrǝ nɩ: o di wɔnɔ tɩga kantʋ maama baŋa nɩ o pa abam, sɩ á daarɩ á cɔgɩ ka nabiinǝ bam maama te tɩn. Kʋ ma tiini kʋ pa fʋʋnɩ zʋ dɩbam yɩ dɩ́ kɩ dɩ́ na kɩ te maama tɩn. 25 Lele kʋntʋ, dɩbam laan nan wʋ nmʋ jɩan wʋnɩ mʋ, kɩ dɩbam nɩ nmʋ bʋbʋŋa na lagɩ te tɩn.»
26 Zozwe ma sɛ. O maa wʋ pɛ pwələ sɩ Yisɩrayɛlɩ tiinə bam gʋ-ba. 27 Kʋ na zɩgɩ dɩntʋ dɛ dɩm nɩ sɩ kʋ yi zɩm tɩn, Zozwe pɛ Gabawɔn nɔɔna bam taa goni dɛ mʋ yɩ ba daarɩ ba mɔɔnɩ na ba paɩ Yisɩrayɛlɩ kɔgɔ kʋm maama. Ba dɛɛn ta kɩ kʋntʋ mʋ Baŋa-Wɛ kaanɩm bimbim dɩm tɩtʋŋa ŋwaanɩ. Kʋ nan yɩ je sɩlʋ Baŋa-Wɛ na kuri tɩn nɩ mʋ ba kɩ kʋntʋ.