Dɛ dɩm wɩa kam na zɩgɩ cɛpɩ tɩn
10
Adoni-Zɛdɛkɩ na yɩ Zeruzalɛm tɩʋ Pɛ tɩn dɛɛn ni nɩ Zozwe di Ayi tɩʋ kʋm. O ta ni nɩ Zozwe yɔɔrɩ o cɔgɩ tɩʋ kʋm maama dɩ kʋ Pɛ, nɩnɛɛnɩ o na maŋɩ o loori yigə o kɩ te dɩ Zeriko tɩʋ dɩ kʋ Pɛ te tɩn. O ta ni Gabawɔn tiinə bam na kɩ ni-mɔrɔ dɩdaanɩ Yisɩrayɛlɩ tiinə bam pa ba zʋʋrɩ dɩ ba te tɩn. 2 Kʋ ma pa fʋʋnɩ tiini dɩ zʋ wʋntʋ dɩ o tɩʋ nɔɔna bam, bɛŋwaanɩ Gabawɔn dɛɛn yɩ tʋ-fɔrɔ mʋ kʋ dwe Ayi tɩʋ kʋm. Kʋ nɔn-biə bam dɩ dɛɛn nan ya yɩ jar-kərə mʋ cɩga cɩga.3 Kʋntʋ ŋwaanɩ Pɛ Adoni-Zɛdɛkɩ tʋŋɩ sɩ pwa bantʋ jeeri ba zən‑o: Ebrɔn tɩʋ pɛ Hoham, dɩ Yarmuti tɩʋ pɛ Piram, kʋ wǝli dɩ Lakisi tɩʋ pɛ Yafɩa, dɩdaanɩ Egilon tɩʋ pɛ Debiri. 4 O ma pa-ba kwǝrǝ kantʋ o wɩ: «Ba-na á wǝli-nɩ sɩ dɩ́ kɩ najara dɩdaanɩ Gabawɔn tiinə bam. Bɛŋwaanɩ, ba kɩ ni-mɔrɔ mʋ dɩdaanɩ Zozwe dɩ o nɔɔna Yisɩrayɛlɩ tiinə bam.»
5 Amɔɔrɩ tiinə pwa banu bantʋ ma la ba jar-kərə bam ba kɩ daanɩ: Zeruzalɛm pɛ, dɩ Ebrɔn pɛ, dɩ Yarmuti pɛ, dɩ Lakisi pɛ, kʋ wǝli dɩ Egilon pɛ. Ba maama laan ma ba ba gilimi Gabawɔn tiinə bam ba kɩ tɩtarɩ nɩ sɩ ba cɔgɩ-ba.
6 Gabawɔn tiinə bam ma tʋŋɩ kwǝrǝ lɩla sɩ ka yi Zozwe, yɩ Yisɩrayɛlɩ tiinə bam ta wʋ Giligalɩ nɩ. Ba maa wɩ: «Dɩbam yɩ nmʋ tɩntʋŋna mʋ. Nan yɩ swe-na dɩbam swiə. Kɩ-na lɩla á ba á joŋi dɩbam á yagɩ. Bɛŋwaanɩ Amɔɔrɩ tiinə bam maama na zʋʋrɩ pweeru tɩm laŋa nɩ tɩn mʋ gilimi daanɩ sɩ ba cɔgɩ dɩbam.»
7 Zozwe ma zaŋɩ Giligalɩ nɩ dɩdaanɩ o jar-kərə bam maama sɩ o vu ba te, yɩ balʋ na damma dɩ najara kǝm lanyɩranɩ tɩn dɩ wʋ ba wʋnɩ. 8 Baŋa-Wɛ ma ta dɩdaanɩ Zozwe DƖ wɩ: «Yɩ ta n kwarɩ fʋʋnɩ. A lagɩ a pa nmʋ mʋ di-ba. Nɔɔn-nɔɔnʋ tǝrǝ o na wʋ́ wanɩ o dwəni dɩ nmʋ.»
9 Zozwe dɩ o jar-kərə bam dɛɛn kwe tɩtɩɩ dɩm maama mʋ ba zɩgɩ Giligalɩ nɩ ba vu ba yi Gabawɔn tiinə bam. Kʋ ma pa ba da ba zaŋɩ Amɔɔrɩ tiinə bam baŋa nɩ. 10 Baŋa-Wɛ ma pa Amɔɔrɩ tiinə bam wʋbʋŋa je, yɩ Yisɩrayɛlɩ tiinə bam dɛɛn gʋ ba zanzan Gabawɔn nɩ. Amɔɔrɩ tiinə bam badonnǝ ma kwe pweeru laŋa cwǝŋǝ kam na wʋ Bɛte-Horon seeni tɩn. Ba na duri sɩ ba lu tɩn, mʋ Yisɩrayɛlɩ tiinə bam zəli-ba ba gʋɩ ba vu ba kwaarɩ Azeka dɩdaanɩ Makeda na wʋ jagwiə seeni tɩn. 11 Amɔɔrɩ tiinə bam maa na zɩgɩ Bɛte-Horon nɩ ba duri ba ve Azeka seeni kʋntʋ tɩn, mʋ Baŋa-Wɛ tɔgɩ ba kwaga DƖ dʋlɩ-ba dɩdaanɩ dʋ-kambana taan, sɩ ba vu ba yi Azeka. Dʋ-kambana yam dɛɛn ma gʋ ba zanzan sɩ kʋ dwǝni balʋ Yisɩrayɛlɩ tiinə bam na gʋ tɩn.a
12 Dɛ dɩlʋ wʋnɩ Baŋa-Wɛ dɛɛn na pɛ Yisɩrayɛlɩ tiinə bam di Amɔɔrɩ tiinə bam tɩn, mʋ Zozwe zɩgɩ Yisɩrayɛlɩ kɔgɔ kʋm yigə nɩ o loori Baŋa-Wɛ o wɩ:
«Wapuli, ta n zɩgɩ kʋntʋ cɛpɩ
Gabawɔn tɩʋ baŋa nɩ!
Cana, nmʋ dɩ maŋɩ Ayalɔn
bolo kʋm nɩ kʋntʋ n zɩgɩ!»
13 Wapuli dɩm ma maŋɩ da, dɩ zɩgɩ cɛpɩ. Cana kam dɩ daa maa wʋ fʋfɔ ka vu yigə, sɩ kʋ taa nii Yisɩrayɛlɩ tiinə bam na di ba dʋna bam ba ti tɩn. Kǝm dɩntʋ maama nan pʋpʋnɩ mʋ dɩ tigi Cɩga tu tɔnɔ kʋm wʋnɩ. Wapuli dɩm dɛɛn ma maŋɩ wɛyuu kʋm tɩtarɩ nɩ dɩ zɩgɩ cɛpɩ. Dɩ maa wʋ ve dɩ tʋ, sɩ kʋ maŋɩ dɩ dɛ-puni. 14 Dɩ́ ta wʋ fɔgɩ dɩ́ na dɛ nɩnɛɛnɩ dɛ dɩm kʋntʋ, pa Baŋa-Wɛ cəgi nabiinu kwǝrǝ kʋntʋ doŋ. Baŋa-Wɛ ma wǝli dɩ Yisɩrayɛlɩ tiinə bam yɩ ba kɩ najara yam.
15 Zozwe dɩdaanɩ Yisɩrayɛlɩ tiinə bam maama daa ma joori Giligalɩ nɩ, mɛ ba ya na maŋɩ ba zʋʋrɩ tɩn.
Ba gʋ Amɔɔrɩ tiinə pwa banu
16 Najara yam ta na wʋra ya kɩ kʋntʋ tɩn, Amɔɔrɩ pwa banu bam ma duri ba vu ba səgi piu kʋdoŋ bɔɔnɩ wʋnɩ. Je sɩm wʋ Makeda laŋa nɩ mʋ. 17 Nɔɔnʋ ma na-ba yɩ o cɔ o brɩ Zozwe ba na wʋ mɛ tɩn. 18 Zozwe dɩ ma pa ni o wɩ: «Lagɩ-na kandwa kamunə á ma á pɩ piu bɔɔnɩ dɩlʋ ba na səgi da tɩn ni, sɩ á ta daarɩ á beeri nɔɔna sɩ ba yɩrɩ bɔɔnɩ dɩm. 19 Kʋ daarɩ abam wʋlʋwʋlʋ yɩ maŋɩ kwaga nɩ! Zəli-na á dʋna bam, sɩ á cɩ ba yigə sɩ ba yɩ zʋ ba tɩɩnɩ dɩm wʋnɩ. Bɛŋwaanɩ, abam Baŋa-Wɛ dɩm pɛ abam dam sɩ á di-ba mʋ.»
20 Zozwe dɩdaanɩ o jar-kərə bam ma wanɩ Amɔɔrɩ tiinə jar-kərə bam maama ba ti. Ba fɩnfɩɩn yɩranɩ mʋ duri ba lu ba vu ba zʋ ba tɩɩnɩ dɩlʋ na lɔgɩ dɩ pɩ tɩn wʋnɩ. 21 Kʋntʋ kwaga nɩ, Yisɩrayɛlɩ jar-kərə bam maama ma joori Makeda dɩdaanɩ yazurə. Dáanɩ mʋ Zozwe ya wʋra o cəgi-ba. Nɔɔn-nɔɔnʋ daa maa warɩ sɩ o ta Yisɩrayɛlɩ tiinə bam yɩra wo-lɔŋɔ.
22 Zozwe ma ta o wɩ: «Magɩ-na kandwa yam piu bɔɔnɩ dɩm ni nɩ, sɩ á ja pwa banu bam á ba amʋ te.» 23 Nɔɔna bam ma ja Zeruzalɛm pɛ, dɩ Ebrɔn pɛ, dɩ Yarmuti pɛ, dɩ Lakisi pɛ, kʋ wǝli dɩdaanɩ Egilon pɛ ba ba o te. 24 Zozwe laan ma bəŋi Yisɩrayɛlɩ jar-kərə bam maama yɩ o ta dɩdaanɩ pamaŋ-bɩbɛ sɩlʋ na tɔgɩ dɩd-o ba vu ba kɩ najara yam tɩn o wɩ: «Titwəni-na á yi yo, sɩ á kwe á nɛ á daŋɩ pwa bantʋ dɩdʋa dɩdʋa ban nɩ.» Ba dɩ ma sɩɩnɩ ba kɩ kʋntʋ.
25 O daa ta ma ta dɩ ba o wɩ: «Yɩ kwarɩ-na fʋʋnɩ. Nan yɩ pa-na sɩ á kwarɩ fʋʋnɩ. Kɩ-na dam á tɩtɩ kuri nɩ sɩ á daarɩ á ja baarɩ. Abam dʋna balʋ maama á na wʋ́ kɩ najara dɩ ba tɩn, Baŋa-Wɛ lagɩ DƖ kɩ-ba kʋntʋ doŋ mʋ.» 26 Zozwe laan ma gʋ pwa banu bam, yɩ o kwe ba yɩra yam o lə tweeru dɩnu yɩra nɩ. Pwa bam ma maŋɩ tweeru tɩm yɩra nɩ sɩ kʋ yi dɩdaan-ni maŋa.
27 Wa-zʋʋrɩ maŋa nɩ, Zozwe ma pa ni sɩ ba bwǝli twa bam tweeru tɩm yɩra nɩ, yɩ ba laan dʋlɩ-ba ba dɩ piu bɔɔnɩ dɩlʋ wʋnɩ ba ya na səgi tɩn. Ba ma joori ba kwe kandwa kamunə ba ma ba pɩ dɩ ni. Dáanɩ mʋ ya ta wʋra sɩ kʋ yi zɩm maama.
Zozwe di tɩɩnɩ dɩdonnǝ jagwiə seeni
28 Zozwe dɛɛn ma wanɩ Makeda tɩʋ dɩ kʋ pɛ wʋm maama. O dɛɛn yɔɔrɩ o cɔgɩ ba maama mʋ yɩ nɔɔn-nɔɔnʋ wʋ daarɩ tɩʋ kʋm wʋnɩ. Zozwe dɛɛn tʋŋɩ dɩdaanɩ Makeda pɛ wʋm nɩnɛɛnɩ o na maŋɩ o da yigə o tʋŋɩ te dɩ Zeriko pɛ wʋm mʋ.
29 Zozwe dɩdaanɩ Yisɩrayɛlɩ jar-kərə bam maama zɩgɩ dáanɩ mʋ ba vu Libina. Ba dɛɛn ma kɩ najara dɩdaanɩ tɩʋ kʋm kʋntʋ tiinə. 30 Baŋa-Wɛ dɛɛn ta ma pa ba di Libina tiinə bam. Nɔɔn-nɔɔnʋ wʋ lugi da. Zozwe ma tʋŋɩ dɩdaanɩ Libina tɩʋ pɛ wʋm dɩ o nɔɔna bam nɩnɛɛnɩ o na kɩ te Zeriko nɩ tɩn.
31 Zozwe dɩdaanɩ o kɔgɔ kʋm ma zɩgɩ Libina nɩ ba kɛ ba yi Lakisi. Ba ma gilimi tɩʋ kʋm ba pu, yɩ ba kɩ najara dɩ kʋ. 32 Najara yam kǝm da yale dɛ dɩm nɩ mʋ Baŋa-Wɛ pɛ ba di tɩʋ kʋm kʋntʋ. Yisɩrayɛlɩ tiinə bam ma gʋ tɩʋ kʋm nɔɔna maama, nɩ ba dɛɛn na kɩ te Libina nɩ tɩn. 33 Kantʋ maŋa kam nɩ, Gezɛrɩ tɩʋ Pɛ Horam dɩ ma ba sɩ o da o wǝli Lakisi tiinə bam. Zozwe ma ti wʋntʋ dɩ o jar-kərə bam maama, nɔɔn-nɔɔnʋ wʋ daarɩ.
34 Zozwe laan ma ja o nɔɔna bam maama o vu Egilon. Ba ma gilimi tɩʋ kʋm ba pu, yɩ ba kɩ najara dɩ ba. 35 Ba dɛɛn kwe dɛ dɩdwɩ yɩranɩ mʋ ba ma wanɩ tɩʋ kʋm. Ba ma yɔɔrɩ ba cɔgɩ kʋ nɔɔna bam maama, nɩ ba dɛɛn na kɩ Lakisi te tɩn.
36 Zozwe dɩ o nɔɔna bam ma zɩgɩ Egilon nɩ ba vu sɩ ba kɩ najara dɩdaanɩ Ebrɔn tiinə. 37 Ba dɛɛn ma wanɩ tɩʋ kʋm kʋntʋ dɩdaanɩ kʋ nawuurə yam maama. Ba dɛɛn gʋ kʋ pɛ wʋm dɩ kʋ nɔn-biə bam maama. Ba maa wʋ daarɩ nɔɔn-nɔɔnʋ tɩʋ kʋm wʋnɩ. Ba dɛɛn tʋŋɩ dɩ ba nɩnɛɛnɩ ba na kɩ te maama Egilon baŋa nɩ tɩn mʋ.
38 Yisɩrayɛlɩ tiinə bam daa ma pipiri ba vu ba kɩ najara dɩdaanɩ Debiri tɩʋ. 39 Ba dɛɛn ma wanɩ tɩʋ kʋm dɩ kʋ pɛ maama. Ba di tɩʋ kʋm nɔɔna maama, dɩdaanɩ kʋ nawuurə yam mʋ, yɩ ba gʋ kʋ nɔɔna maama. Zozwe dɛɛn na tʋŋɩ te Ebrɔn dɩdaanɩ Libina yɩra nɩ tɩn, mʋ o ta kɩ kʋntʋ Debiri tɩʋ pɛ dɩ o nɔɔna bam yɩra nɩ.
40 Zozwe dɛɛn ma di laŋa kam kʋntʋ maama. O dɛɛn wanɩ pwa bam dɩ ba nɔɔna bam maama: balʋ na zʋʋrɩ pweeru laŋa kam nɩ, dɩdaanɩ wa-zʋʋrɩ seeni bwəəlu tɩm nɩ, dɩ jagwiə seeni kagʋa kam wʋnɩ, kʋ wǝli dɩ wa-puli seeni pweeru laŋa kam nɩ. Zozwe nɔɔna bam ma yɔɔrɩ ba cɔgɩ ba maama, yɩ nɔɔn-nɔɔnʋ wʋ daarɩ. Yisɩrayɛlɩ Baŋa-Wɛ dɩm nan ya maŋɩ DƖ pa-ba ni sɩ ba kɩ kʋntʋ mʋ. 41 Zozwe wanɩ nɔɔna bam mʋ sɩ kʋ zɩgɩ Kadese-Baranɩa na wʋ jagwiə seeni tɩn kʋ taa ve Gaza. O ta ma di-ba sɩ kʋ zɩgɩ Gozɛnɩ laŋa kam nɩ, sɩ kʋ yi Gabawɔn na wʋ jazɩm baŋa seeni tɩn. 42 Zozwe dɛɛn na di pwa bantʋ dɩ ba tɩɩnɩ dɩm maama bɩdwɩ baŋa nɩ tɩn, kʋ yɩ Yisɩrayɛlɩ tiinə Baŋa-Wɛ dɩm na jaŋɩ o pa-ba tɩn ŋwaanɩ mʋ.
43 Kʋntʋ maama kwaga nɩ tɩn, Zozwe dɩdaanɩ Yisɩrayɛlɩ jar-kərə bam maama joori ba vu ba zʋʋrɩ Giligalɩ nɩ mʋ.