Zozwe kɩ najara dɩdaanɩ jazɩm baŋa seeni pwa bam
11
Hazora tɩʋ pɛ Yabin dɛɛn ma ni Yisɩrayɛlɩ tiinə bam na di wɔnɔ laŋa kam maama baŋa nɩ te tɩn. O ma tʋŋɩ kwǝrǝ o pa Pɛ Yobabɩ. Wʋntʋ dɛɛn yɩ Madon tɩʋ pɛ mʋ. O kwǝrǝ kam ta ma yi Simirɔnɩ tɩʋ pɛ, dɩdaanɩ Akesafɩ tɩʋ pɛ wʋm dɩ. 2 O dɛɛn ta ma guli dɩdaanɩ pwa balʋ maama na wʋ jazɩm baŋa seeni pweeru tɩm laŋa nɩ tɩn, dɩ pwa balʋ na wʋ Galile jagwiə seeni sɩ kʋ maŋɩ dɩdaanɩ Zʋrdɛn bugə kam tɩn, kʋ wǝli dɩ balʋ na wʋ wa-zʋʋrɩ seeni bwəəlu tɩm nɩ sɩ kʋ taa ve Dora na wʋ nɩnɩʋ kʋm ni nɩ tɩn. 3 Pɛ Yabin ta ma pa kwǝrǝ yi Kaanan tiinə bam. Bantʋ zʋʋrɩ Zʋrdɛn bugə kam wa-puli seeni dɩ ka wa-zʋʋrɩ seeni maama nɩ mʋ. O ta ma tʋŋɩ kwǝrǝ Amɔɔrɩ tiinə bam, dɩ Hɛtɩ tiinə bam, dɩ Perezi tiinə bam, dɩdaanɩ Yebusi tiinə bam tee nɩ. Bantʋ nan zʋʋrɩ pweeru laŋa nɩ mʋ. O kwǝrǝ kam ta ma yi Hevi tiinə bam dɩ. Bantʋ dɛɛn zʋʋrɩ Mitspa laŋa nɩ mʋ, Hɛrmɔn Piu kʋm təŋə nɩ. 4 Pwa bam kʋntʋ maama ma zaŋɩ ba la ba jar-kərə bam ba kɩ daanɩ vulululu, nɩnɛɛnɩ nɩnɩʋ ni kasʋlʋ na daga te tɩn. Ba siseŋ-nɔɔna dɩ sise-tərikooru maa gaalɩ. 5 Pwa bam dɩ ba jar-kərə bam laan ma la daanɩ Merɔm na bam ni nɩ, sɩ ba kɩ najara dɩdaanɩ Yisɩrayɛlɩ tiinə bam.6 Baŋa-Wɛ ma ta dɩ Zozwe DƖ wɩ: «Yɩ kwarɩ fʋʋnɩ dɩ ba. Jwa kantʋ maŋa nɩ, ba maama wʋ́ ji twa mʋ á yibiyə nɩ. Abam maa wʋ́ pa ba siseŋ-nɔɔna bam gwarɩgɩ, sɩ á daarɩ á zwɛ ba sise-tərikooru tɩm maama.»
7 Zozwe dɩdaanɩ Yisɩrayɛlɩ kɔgɔ kʋm maama ma da ba zaŋɩ pwa bam dɩ ba nɔɔna bam baŋa nɩ. Ba ma kɩ najara dɩ ba Merɔm na bam je sɩm nɩ. 8 Baŋa-Wɛ ma pa Yisɩrayɛlɩ tiinə bam di-ba. Ba ma zəli-ba ba pa ba duri ba yɔɔrɩ ba yi Miserefɔtɩ-Mayim, dɩdaanɩ Sidɔn tʋ-fɔrɔ kʋm. Badonnǝ ma kwe wa-puli seeni cwǝŋǝ kam ba vu Mitspa bolo kʋm nɩ. Ba kɩ najara yam mʋ taan. Ba ma gʋ ba dʋna bam maama yɩ wʋlʋwʋlʋ wʋ daarɩ. 9 Zozwe dɛɛn ma kɩ kʋlʋ maama Baŋa-Wɛ na pɛ‑o ni sɩ o kɩ tɩn. O dɛɛn pɛ ba siseŋ-nɔɔna bam maama ji wo-gwanɩ mʋ, yɩ o daarɩ o zwɛ ba sise-tərikooru tɩm maama.
10 Zozwe laan ma joori o pipiri o vu o kɩ najara dɩ Hazora tɩʋ kʋm. O ma wanɩ tɩʋ kʋm nɔɔna dɩ ba pɛ wʋm maama, yɩ o gʋ-ba. Kantʋ maŋa nɩ, Hazora dɛɛn mʋ yɩ tɩɩnɩ dɩm kʋntʋ maama tʋ-fɔrɔ. 11 Yisɩrayɛlɩ tiinə bam ma yɔɔrɩ ba cɔgɩ tɩʋ kʋm kʋntʋ nɔɔna bam maama. Ba wʋ pɛ pwələ sɩ nɔɔn-nɔɔnʋ taa ŋwɩ. Ba dɛɛn ta ma zwɛ tɩʋ kʋm.
12 Zozwe ta ma di pwa badonnǝ bam dɩdaanɩ ba tɩɩnɩ dɩm maama. O ma yɔɔrɩ o gʋ-ba, nɩnɛɛnɩ Baŋa-Wɛ tɩntʋŋnʋ Moyisi dɛɛn na pɛ ni sɩ ba kɩ te tɩn. 13 Kʋ nan na yɩ tɩɩnɩ dɩlʋ na je pu-kuni sɩm yuu nɩ tɩn, Zozwe dɩ o nɔɔna bam dɛɛn wʋ zwɛ-dɩ. Hazora yɩranɩ mʋ ba zwɛ. 14 Yisɩrayɛlɩ tiinə bam na di tɩɩnɩ dɩlʋ maama tɩn, ba dɛɛn kwe dɩ jɩjaanʋ tɩm maama, kʋ wǝli dɩ ba vara mʋ ba jɩga. Ba ma daarɩ ba gʋ nɔn-biə bam maama, yɩ nɔɔn-nɔɔnʋ wʋ daarɩ. 15 Baŋa-Wɛ dɛɛn na pɛ DƖ tɩntʋŋnʋ Moyisi ni dɩlʋ tɩn, mʋ o taga o brɩ Zozwe. O dɩ maa tʋŋɩ te maama Baŋa-Wɛ na brɩ Moyisi nɩ ba kɩ tɩn.a
Wɔnɔ dim taanɩ
16 Zozwe dɛɛn ma di wɔnɔ laŋa kam maama wuu baŋa nɩ, kʋ zɩgɩ pweeru laŋa kam nɩ, sɩ kʋ taa tu jagwiə kagʋa kam seeni. Kʋ daa ta ve Gozɛnɩ seeni, dɩ wa-zʋʋrɩ seeni bwəəlu tɩm, dɩ Zʋrdɛn bolo kʋm, kʋ wǝli dɩdaanɩ pweeru laŋa kam maama. 17 Yisɩrayɛlɩ tiinə tɩga kam laan ma zɩgɩ Pi-kʋrʋ kʋm nɩ, mɛ na bwələ dɩ Seyiri tɩn, sɩ ka vu jazɩm baŋa seeni ka yi Baal-Gad na wʋ Liban bolo kʋm nɩ yɩ kʋ wʋ Hɛrmɔn Piu kʋm təŋə nɩ tɩn mʋ. Zozwe dɛɛn ma wanɩ pwa balʋ na te laŋa kam kʋntʋ maama tɩn mʋ, yɩ o daarɩ o gʋ-ba. 18 O dɩdaanɩ pwa bam kʋntʋ dɛɛn ma kɩ najara yam ba daanɩ, yɩ o laan di-ba. 19 Hevi tiinə balʋ na zʋʋrɩ Gabawɔn tɩʋ kʋm nɩ tɩn yɩranɩ dɛɛn mʋ kɩ ni-mɔrɔ dɩ Yisɩrayɛlɩ tiinə bam. Tɩɩnɩ dɩlʋ maama na daarɩ tɩn, Yisɩrayɛlɩ tiinə bam di-ba najara kǝm baŋa nɩ mʋ. 20 Kʋ dɛɛn nan yɩ Baŋa-Wɛ mʋ pɛ ba bɩcara kɩ dam, sɩ ba kɩ najara dɩ Yisɩrayɛlɩ tiinə bam. DƖ dɛ kʋ baŋa nɩ sɩ DƖ pa ba yɔɔrɩ ba na cɔgɩm, yɩ yibwənə tǝrǝ kʋ wʋnɩ. Kʋntʋ maama nan kɩ kʋ maŋɩ dɩ Baŋa-Wɛ na pɛ Moyisi ni te tɩn mʋ.
21 Kantʋ maŋa kam nɩ mʋ Zozwe dɛɛn cɔgɩ nɔn-dɩdwaarʋ balʋ na yɩ Anakɩ tiinə tɩn. Ba dɛɛn zʋʋrɩ Yisɩrayɛlɩ dɩ Zuda pweeru laŋa kam nɩ mʋ. Ba tɩɩnɩ dɩm maa yɩ Ebrɔn dɩ Debiri dɩ Anabɩ. Zozwe dɛɛn yɔɔrɩ o cɔgɩ ba maama mʋ dɩdaanɩ ba tɩɩnɩ dɩm. 22 Anakɩ tiinə bam dɛɛn daa maa wʋ daarɩ Yisɩrayɛlɩ tɩga kam baŋa nɩ, sɩ ba badonnǝ dɛɛn za ta daarɩ ba zʋʋrɩ Gaza nɩ, dɩ Gatɩ nɩ, dɩdaanɩ Asedodi wʋnɩ. 23 Kʋ dɛ cwǝŋǝ kam kʋntʋ mʋ yɩ Zozwe joŋi tɩga kam maama, nɩnɛɛnɩ Baŋa-Wɛ dɛɛn na maŋɩ o pa Moyisi ni te tɩn. Zozwe dɩ ma pɔɔrɩ pɔɔrɩ tɩga kam o pa Yisɩrayɛlɩ tiinə bam, sɩ kʋ tɔgɩ dwi dɩdaanɩ dwi sɩ ba taa te.
Nɔɔna bam laan ma sin dɩ jara-kǝm.