Wɛ niə yam taanɩ
4
«Yisɩrayɛlɩ dwi tiinə bam, taá cəgi-na Wɛ niə yalʋ amʋ na lagɩ a brɩ abam zɩm tɩntʋ tɩn, dɩdaanɩ DƖ cullu tɩm maama. Á na sɛ á tɔgɩ-ya, kʋʋ́ pa á wəri yɩ á daarɩ á zʋ á joŋi tɩga kalʋ á nabaara Baŋa-Wɛ dɩm na lagɩ DƖ pa abam sɩ á taá te tɩn. 2 Taá ye-na sɩ á yɩ wǝli kʋlʋkʋlʋ niə yalʋ a na lagɩ a pa abam tɩn wʋnɩ, nan yɩ lɩ-na kʋlʋkʋlʋ ya wʋnɩ á yagɩ. Za á kɩ-na á tɔgɩ Baŋa-Wɛ niə yalʋ maama a na wʋ́ pa abam tɩntʋ tɩn.3 Abam tɩtɩ dɛɛn nɛ Baŋa-Wɛ na kɩ te Baal-Pewɔrɩ je sɩm nɩ tɩn. Á nɛ nɩ DƖ gʋ abam wʋnɩ balʋ maama na sɛ ba zuli Baal-Pewɔrɩ jwəm dɩm tɩn mʋ. 4 Kʋ daarɩ yɩ abam balʋ maama na salɩ Baŋa-Wɛ tɩn daa ta ŋwɩ dɩ zɩm maama.
5 Nii-na! Amʋ kwe a Tu Baŋa-Wɛ cullu tɩm dɩ DƖ niə yam a brɩ abam nɩnɛɛnɩ DƖ na pɛ-nɩ ni sɩ a kɩ te tɩn. Abam maŋɩ sɩ á sɛ á taá tɔgɩ-ya mʋ, nɩnɛɛnɩ á na zʋʋrɩ tɩga kalʋ á na wʋ́ joŋi á taá te tɩn wʋnɩ. 6 Sɩɩnɩ-na á yiǝ á taá sɛ-ya, sɩ dwi-gɛ tiinə wʋ́ lwarɩ nɩ á jɩgɩ swan dɩ yi-pʋrʋ lanyɩranɩ. Bantʋ wʋ́ ba ba ni Wɛ cullu tɩm yɩ ba ta ba wɩ: ‹Dwi kamunu kʋntʋ tiinə sɩɩnɩ ba jɩgɩ yi-pʋrʋ dɩ swan zanzan.› 7 Dwi-gɛ tiinə wa yam ba bwələ dɩ ba, ba tɩʋ kʋm na maŋɩ kʋ yɩ tʋ-fɔrɔ te. Dɩbam Tu Baŋa-Wɛ nan tiini DƖ bwələ dɩ dɩbam yɩ DƖ yǝni DƖ cəgi dɩ́ wɛ-loro kʋm maŋa kalʋ maama dɩ́ na wʋ́ bǝŋi-DƖ tɩn. 8 Dwi-gɛ tiinə tǝrǝ ba na jɩgɩ cullu dɩdaanɩ kwiə yalʋ na tɔgɩ cɩga nɩnɛɛnɩ Wɛ niə yantʋ doŋ amʋ na wʋra a paɩ abam zɩm tɩn.
9 Nan taá yɩrɩ-na á tɩtɩ. Taá ye-na sɩ á yɩ zaŋɩ á swe wo-kamunnu tɩlʋ Wɛ na kɩ yɩ á yi na-tɩ tɩn. Abam ta na wʋ á ŋwɩa wʋnɩ, lwəni-na-tɩ á brɩ á biə dɩdaanɩ á naarʋ tɩm maama. 10 Guli-na dɛ dɩm abam dɛɛn na wʋ Sinayi piu kʋm təŋə nɩ yɩ á zɩgɩ Baŋa-Wɛ yigə nɩ tɩn. Dɩntʋ dɛ dɩm nɩ mʋ Baŋa-Wɛ tagɩ amʋ DƖ wɩ: ‹Moyisi, pa nɔɔna bam la ba jeeri-nɩ sɩ ba wanɩ ba cəgi a kwǝrǝ. Kʋntʋ wʋ́ pa ba taa kwarɩ amʋ maŋa kalʋ maama ba na jɩgɩ ŋwɩa tɩga baŋa nɩ tɩn, sɩ ba daarɩ ba brɩ ba biə sɩ ba dɩ taa zuli-nɩ.›a
11 Abam dɛɛn tu á zɩgɩ piu kʋm təŋə nɩ. Min-vʋgʋ ma zaŋɩ piu kʋm baŋa nɩ kʋ di wɛyuu. Kunkwən-luluru ma kwǝli je sɩm maama pa kʋ kɩ lim. 12 Baŋa-Wɛ dɛɛn ma zɩgɩ mim dɩm tɩtarɩ nɩ DƖ ŋɔɔnɩ dɩ abam. Abam ma ni DƖ bɩtarbiǝ bam yɩ á wʋ nɛ DƖ nyɩnyʋgʋ dɩ fɩnfɩɩn dɩ. DƖ kwǝrǝ kam yɩranɩ mʋ á niə. 13 DƖ dɛɛn pɛ á lwarɩ ni-gonim dɩlʋ DƖ na lagɩ DƖ kɩ dɩ abam tɩn. DƖ ma pa abam ni sɩ á sɛ á tɔgɩ DƖ Niə Fugə kam, yɩ DƖ daarɩ o pʋpʋnɩ-ya DƖ tiŋi kandwa-pɩlɛ sɩle baŋa nɩ. 14 Ka maŋa nɩ, mʋ Baŋa-Wɛ dɛɛn pɛ-nɩ ni sɩ a brɩ abam o cullu tɩm dɩ DƖ niə yam sɩ á sɛ á taá tɔgɩ-ya, nɩnɛɛnɩ á na tu á bɛ Zʋrdɛn bugə kam yɩ á zʋʋrɩ tɩga kalʋ á na wʋ́ joŋi á taá te tɩn wʋnɩ.
Kʋ culǝ sɩ ba taa kaanɩ jwǝnǝ
15 Dɛ dɩm Baŋa-Wɛ na zɩgɩ mim dɩm wʋnɩ o ŋɔɔnɩ dɩ abam Sinayi piu kʋm yuu nɩ tɩn, á dɛɛn wʋ nɛ DƖ nyɩnyʋgʋ. Kʋntʋ ŋwaanɩ, taá ye-na 16 sɩ á yɩ digimi á tɩtɩ sɩ á mɔ nyɩnyʋgʋ sɩ kʋ ji jwəm kʋ pa abam. Kʋ na maŋɩ kʋ yɩ baarʋ nyɩnyʋgʋ, naa kaanɩ nyɩnyʋgʋ, 17 naa tɩga baŋa varɩm, naa zuŋə kalʋ dwi maama na kaagɩ wɛɛnɩ ka jaanɩ tɩn, 18 naa tɩga wo-vəlu, naa kaləŋə kalʋ na wʋ na wʋnɩ dɩ, sɩ á yɩ mɔ-na tɩ nyɩnyʋgʋ.b 19 Kʋ ta wǝli da, abam na kwǝni á yum á na wapuli dɩm, naa cana kam, naa calɩcwɩ sɩm, naa wǝǝnu tɩlʋ maama na wʋ wɛyuu nɩ tɩn, nan yɩ kɩ-na fra sɩ á tiiri á zuli-tɩ. Baŋa-Wɛ yagɩ-tɩ wɛyuu nɩ lʋgʋ baŋa dwi maama ŋwaanɩ mʋ. 20 Kʋ daarɩ kʋ na yɩ abam, á yɩ balʋ Baŋa-Wɛ na lɩ DƖ ja nuŋi min-vʋgʋ yaara doŋ nɩ tɩn mʋ. O dɛɛn vrɩ abam Ezipi tiinə jɩŋa nɩ sɩ DƖ ma abam DƖ ma DƖ kɩ DƖ nɔɔna, nɔɔna balʋ na wʋ́ ta yɩ DƖ nyɩm tɩn. Á cɩga nan sɩɩnɩ á yɩ kʋntʋ mʋ dɩ zɩm maama.
21 Abam ŋwaanɩ mʋ Baŋa-Wɛ banɩ dɛɛn zaŋɩ dɩ amʋ. DƖ ma ta DƖ du DƖ wɩ: amʋ bá da a bɛ Zʋrdɛn bugə kam sɩ a zʋ tɩ-ŋʋŋa kalʋ o na lagɩ o pa abam sɩ á taá te tɩn wʋnɩ. 22 Kʋntʋ ŋwaanɩ, amʋ maŋɩ sɩ a maŋɩ yo seeni mʋ a tɩ. A bá da a bɛ Zʋrdɛn bugə kam. Abam nan wʋ́ bɛ á zʋ á joŋi tɩ-ŋʋŋa kam kʋntʋ á taá te. 23 Nan tiini á taá ye sɩ á yɩ swe ni-gonim dɩlʋ á Tu Baŋa-Wɛ dɩm na kɩ dɩ abam tɩn. Yɩ kɩ-na jwəm dwi dɩlʋ maama nyɩnyʋgʋ á zɩgɩ sɩ á zuli-kʋ, Baŋa-Wɛ na culi-kʋ tɩn ŋwaanɩ. 24 Bɛŋwaanɩ, abam Tu Baŋa-Wɛ yi pagɩ abam baŋa nɩ mʋ. DƖ maa nyɩ dɩ min-fɔrɔ kʋlʋ na di wo-yɔɔrʋ maama tɩn mʋ.
25 Abam na tu á zʋ tɩga kam yɩ á jǝni da á daanɩ, pa á lʋ biə dɩdaanɩ naarʋ zanzan, sɩ á yɩ digimi á tɩtɩ dɩ á na kɩ jwəm nyɩnyʋgʋ á zɩgɩ sɩ á taá zuli te tɩn. Kʋntʋ wʋ́ taa yɩ lwarɩm mʋ Baŋa-Wɛ yigə nɩ yɩ kʋ pa DƖ banɩ zaŋɩ dɩ abam. 26 Zɩm dɛ dɩntʋ nɩ a kwe wɛyuu kʋm dɩ tɩga kam baŋa maama mʋ, sɩ tɩ taa yɩ maana abam dɩ Baŋa-Wɛ tɩtarɩ nɩ. Abam na vɩn Wɛ ni dɩntʋ, sɩ á dwi yɔɔrɩ dɩ je tɩga kalʋ á na lagɩ á bɛ Zʋrdɛn bugə kam á zʋ tɩn baŋa nɩ. Abam na zaŋɩ á zuli jwǝnǝ, sɩ á yɩ daanɩ tɩ-ŋʋŋa kam baŋa nɩ. Á wʋ́ na cɔgɩm mʋ. 27 Baŋa-Wɛ wʋ́ ja abam DƖ jagɩ DƖ yagɩ tɩɩnɩ dɩm maama tɩtarɩ nɩ. DƖ na zəli abam DƖ yagɩ tɩɩnɩ dɩlʋ wʋnɩ, á lagɩ á tɩ mʋ sɩ á nɔɔna bam fɩnfɩɩn yɩranɩ daarɩ dɩ wʋnɩ. 28 Abam na zʋʋrɩ je sɩm kʋntʋ maama nɩ, á wʋ́ taá zuli nabiinǝ na kwe dɛ dɩdaanɩ kandwa ba ma ba kɩ jwǝnǝ yalʋ tɩn mʋ. Yantʋ warɩ sɩ ya nii ya na wǝǝnu naa sɩ ya ni kwǝri. Ya nan warɩ wʋdiu sɩ ya di, ya maa ba ni lwəm. 29 Abam na wʋ́ taá zʋʋrɩ tɩɩnɩ dɩlʋ maama nɩ tɩn, nɩnɛɛnɩ á na bʋŋɩ sɩ á joori á beeri á Tu Baŋa-Wɛ je, abam wʋ́ na‑DƖ. Kʋ nan wʋ́ tɔgɩ dɩdaanɩ á na sɩɩnɩ á yiǝ á beeri‑DƖ dɩdaanɩ á wʋbʋŋa maama dɩ á wʋ maama mʋ. 30 Abam na tu á zʋ cam wʋnɩ, pa wǝǝnu tɩntʋ maama yi abam, kʋ kwaga nɩ á laan wʋ́ pipiri á joori á Tu Baŋa-Wɛ dɩm te, sɩ á sɛ DƖ ni. 31 Bɛŋwaanɩ, Baŋa-Wɛ tiini DƖ jɩgɩ abam yibwənə. DƖ bá fɔgɩ DƖ dɩ abam DƖ yagɩ. DƖ nan bá cɔgɩ abam. DƖ bá swe ni dɩlʋ DƖ dɛɛn na goni dɩdaanɩ abam nabaara bam yɩ DƖ du durə dɩ baŋa nɩ tɩn.
Yisɩrayɛlɩ dwi tiinə bam yɩ ba yɩra
32 Bʋŋɩ-na á nii kʋ na yɩ te faŋa faŋa tɩn, sɩ á lwarɩ kʋlʋ na wʋra tɩn. Kʋ na zɩgɩ dɛ dɩm Wɛ na puli DƖ naanɩ nabiinǝ sɩ kʋ ba kʋ yi zɩm tɩn, beeri-na tɩga baŋa ni maama nɩ, sɩ á nii wo-kamunu kʋntʋ doŋ fɔgɩ kʋ kɩ je sɩlʋ nɩ na? Bwe-na á nii nɔɔnʋ ni kǝm dɩm kʋntʋ dwi ŋwa je nɩ na? 33 Dwi dɩdoŋ tiinə wʋra yɩ ba ni ba Wɛ dɩm kwǝrǝ na zɩgɩ mim wʋnɩ ka ŋɔɔnɩ dɩ ba yɩ ba ta ŋwɩ na? Abam yɩranɩ mʋ nɛ kǝm dɩm kʋntʋ doŋ. 34 Dwi dɩdoŋ tiinə wɛ tiini dɩ kwaanɩ dɩ vrɩ dɩ nɔɔna bam tɩʋ kʋdoŋ jɩŋa nɩ pa ba ji Wɛ dɩm kʋntʋ tɩtɩ tiinə na? Sɩ abam tɩtɩ yi mʋ nɛ abam Tu Baŋa-Wɛ dɩm na tʋŋɩ dɩ DƖ dam-fɔrɔ DƖ kɩ wo-kamunnu dɩdaanɩ wo-kɩnkagɩla sɩ DƖ ma maŋɩ Ezipi tiinə bam DƖ nii yɩ DƖ daarɩ DƖ tɔgɩ jara baŋa nɩ DƖ vrɩ abam ba jɩŋa nɩ te tɩn.
35 Baŋa-Wɛ dɛɛn pɛ á na DƖ kənə yantʋ maama sɩ á wanɩ á lwarɩ nɩ Dɩntʋ yɩranɩ mʋ yɩ Wɛ cɩga cɩga, yɩ Wɛ dɩdoŋ tǝrǝ sɩ dɩ dwəni dɩ DƖ. 36 DƖ ma pa DƖ kwǝrǝ mʋ zɩgɩ wɛɛnɩ ka ba á te sɩ DƖ ma DƖ kaanɩ abam sɩ á taá sɛ DƖ ni. DƖ ta ma pa á zɩgɩ tɩga baŋa nɩ á na DƖ min-fɔrɔ kʋm DƖ na tɔgɩ kʋ wʋnɩ DƖ ŋɔɔnɩ dɩ abam tɩn. 37 DƖ na jɩgɩ á nabaara bam sono tɩn ŋwaanɩ mʋ DƖ kuri abam na yɩ ba naarʋ tɩn, sɩ á taá yɩ DƖ nɔɔna. Baŋa-Wɛ tɩtɩ dɛɛn mɛ DƖ dam-fɔrɔ mʋ DƖ lɩ abam Ezipi wʋnɩ. 38 DƖ laan ma da á yigə DƖ zəli dwi-gɛ tiinə balʋ na daga ba dwe abam, yɩ ba ta dana ba dwe abam tɩn, sɩ DƖ pa á kwe ba tɩga kam á taá te, nɩnɛɛnɩ kʋ na yɩ te zɩm tɩntʋ tɩn.
39 Laan nan kwe cɩga kam kʋntʋ á kɩ á bɩcarɩ nɩ zɩm, sɩ á sɛ nɩ Baŋa-Wɛ mʋ yɩ dɩlʋ na te wɛyuu dɩdaanɩ tɩga baŋa maama. Wɛ dɩdoŋ daa tǝrǝ. 40 Taá tʋŋɩ-na á tɔgɩ Baŋa-Wɛ niə yalʋ a na pɛ abam zɩm tɩntʋ tɩn. Abam na sɛ DƖ kwiə yam kʋntʋ, á ŋwɩa wʋ́ kɩ lanyɩranɩ ka pa abam dɩ á kwaga kam. Á laan maa wʋ́ taá zʋʋrɩ tɩga kalʋ Baŋa-Wɛ na kuri sɩ á taá te taan wuu tɩn wʋnɩ á daanɩ.»
Ka-duri-ka-zʋ-ka-səgi tɩɩnɩ dɩm
41 Moyisi dɛɛn na tagɩ kʋntʋ maama o ti tɩn, o ma lɩ tɩɩnɩ dɩtɔ na wʋ Zʋrdɛn bugə kam wa-puli seeni tɩn o zɩgɩ dáanɩ. 42 Tɩɩnɩ dɩm kʋntʋ wʋra sɩ nɔɔnʋ na wʋ paalɩ o doŋ, yɩ o na gʋ-o, sɩ kʋ tu duri o zʋ dɩ wʋnɩ mʋ sɩ o joŋi o tɩtɩ ŋwɩa. 43 Ruban dwi dɩm wʋnɩ o dɛɛn lɩ Bezerɩ mʋ. Tɩʋ kʋm kʋntʋ maa wʋ zwǝǝnu yuu nɩ yɩ ka ta yɩ kagʋa laŋa. O ta ma lɩ Ramɔtɩ o pa Gadɩ dwi dɩm. Tɩʋ kʋm kʋntʋ maa wʋ Galadɩ laŋa kam nɩ. O ma daarɩ o lɩ Golan o pa Manasɩ dwi dɩm. Tɩʋ kʋm kʋntʋ maa wʋ Basan laŋa kam wʋnɩ.
Wɛ niə yam pulim taanɩ
44 Wɛ niə yantʋ mʋ Moyisi dɛɛn tʋlɩ o brɩ Yisɩrayɛlɩ tiinə bam. 45-46 Yantʋ mʋ yɩ kwiə dɩ cullu dɩdaanɩ cwe sɩlʋ Yisɩrayɛlɩ tiinə na maŋɩ sɩ ba taa tɔgɩ tɩn. Maŋa kalʋ ba na nuŋi Ezipi wʋnɩ yɩ ba vu ba yi bolo kʋlʋ na bwələ dɩdaanɩ Bɛt-Pewɔrɩ tɩn mʋ Moyisi kwe Wɛ niə yam kʋntʋ o brɩ-ba. Zʋrdɛn bugə kam wa-puli seeni mʋ kʋntʋ, je sɩlʋ Amɔɔrɩ tiinə Pɛ Sɩhɔn na di o paarɩ Hesebon nɩ tɩn. Moyisi dɩdaanɩ Yisɩrayɛlɩ tiinə bam dɛɛn na zɩgɩ Ezipi nɩ ba maa kɛ tɩn mʋ ba wanɩ Pɛ Sɩhɔn ba di. 47 Ba dɛɛn ta ma vrɩ o tɩga kam dɩdaanɩ Basan tɩʋ Pɛ Ɔgɩ tɩga kam maama. Pwa bantʋ bale maa yɩ Amɔɔrɩ tiinə pwa balʋ na di ba paarɩ Zʋrdɛn bugə kam wa-puli seeni tɩn. 48 Ba laŋa kam kʋntʋ dɛɛn zɩgɩ Aroyɛrɩ tɩʋ kʋm seeni mʋ, kʋ na wʋ Aranon bugə kam ni nɩ tɩn, ka yi Siriyɔn piu kʋm seeni. (Piu kʋm yɩrɩ dɩdoŋ mʋ yɩ Hɛrmɔn.) 49 Tɩga kam maa tɔgɩ Zʋrdɛn bugə kam wa-puli seeni dɩm maama mʋ ka yi Araba nɩnɩʋ kʋm.c Pisiga piu kʋm təŋə maa wʋ ka wa-puli seeni.