Yisɩrayɛlɩ dɩ Madian najara yam
31
Baŋa-Wɛ dɛɛn ma ta dɩ Moyisi DƖ wɩ: 2 «Zaŋɩ n pa Yisɩrayɛlɩ tiinə bam joori ba cɔgɩ Madian tiinə bam dɩ ba na kɩ-ba te tɩn. Dɩntʋ kǝm dɩm kwaga nɩ, n maŋɩ sɩ n tɩ mʋ.»3 Moyisi ma ta dɩ nɔɔna bam o wɩ: «Ti-na á yigə sɩ á jar-kərə badonnǝ nuŋi ba vu ba zaŋɩ najara dɩ Madian tiinə bam. Baŋa-Wɛ lagɩ DƖ tɔgɩ abam baŋa mʋ DƖ waarɩ-ba. 4 Lɩ-na nɔɔna mʋrʋ mʋrʋ Yisɩrayɛlɩ dwi maama wʋnɩ sɩ ba vu ba kɩ najara yam.» 5 Ba ma sɩɩnɩ ba lɩ nɔɔna mʋrrʋ fugǝ-tɩle (12,000) sɩ ba nuŋi ba vu ba zaŋɩ najara yam, dwi maama dɩ dɩ nɔɔna mʋrʋ. 6 Moyisi ma pa ba nuŋi yɩ Wɛ kaanɩm tu Eleyazaarɩ bu Fineasɩ dɩ wʋ ba tee nɩ. Fineasɩ ma kwe Wɛ jero-vwe zɩla yadaara o wǝli da, dɩdaanɩ nabwaanʋ sɩ ba wu-tɩ jara-kǝm ŋwaanɩ.
7 Yisɩrayɛlɩ tiinə jar-kərə bam ma nuŋi ba jeeri Madian tiinə dɩ najara, nɩnɛɛnɩ Baŋa-Wɛ na pɛ Moyisi ni sɩ ba kɩ te tɩn. Ba ma wanɩ-ba yɩ ba gʋ ba baara bam maama. 8 Ba dɛɛn gʋ Madian pwa banu bam dɩ mʋ: Evi, dɩ Rekem, dɩ Zurǝ, dɩ Huuri, dɩdaanɩ Reba. Ba ta ma gʋ Beyɔrɩ bu Balam ba wǝli da.a 9 Ba laan ma lɛɛrɩ ba pɛ Madian tiinə kaana dɩ ba biə, ba daarɩ ba vrɩ ba vara, dɩ ba jɩjɩgɩrʋ maama ba ja ba viiri. 10 Ba ma zwɛ tɩɩnɩ dɩlʋ Madian tiinə bam na zʋʋrɩ dɩ wʋnɩ tɩn, dɩ ba vwə yam. 11 Ba laan ma pɛ kʋlʋ maama ba na vrɩ ba dʋna tee nɩ tɩn, kʋ wǝli dɩ nɔn-biə dɩ vara maama ba ja ba viiri. 12 Ba ma ja nɔɔna bam, dɩ vara bam, dɩ jɩjɩgɩrʋ tɩm maama sɩ ba vu ba brɩ Moyisi, dɩ Eleyazaarɩ, dɩdaanɩ Yisɩrayɛlɩ kɔ-fɔrɔ kʋm maama. Kʋntʋ tɩn, dɩ ba ya cwi ba vwə yam Moabɩ laŋa kam tɩ-kamparɩ nɩ mʋ, je sɩlʋ na wʋ Zʋrdɛn bugə kam ni nɩ yɩ Zeriko dɩ wʋ bubɛ dɩdoŋ dɩm seeni tɩn.
13 Moyisi dɩ Wɛ kaanɩm tu Eleyazaarɩ, dɩdaanɩ Yisɩrayɛlɩ kɔ-fɔrɔ kʋm maama ma nuŋi ba na zʋʋrɩ mɛ tɩn ba vu ba jeeri ba jar-kərə bam. 14 Moyisi banɩ dɛɛn ma zaŋɩ dɩ jar-kərə dɩdɛɛra balʋ na joori najara yam wʋnɩ tɩn. Bantʋ yɩ balʋ na nii nɔɔna mʋrʋ baŋa nɩ dɩ balʋ na nii nɔɔna bi baŋa nɩ tɩn mʋ. 15 O ma bwe-ba o wɩ:
«Bɛɛ mʋ yɩ abam yagɩ Madian tiinə kaana bam maama pa ba ta ŋwɩ? 16 Nii-na! Kaana bantʋ dɛɛn mʋ sɛ Balam ni pa ba sʋgɩ dɩ́ baara bam sɩ ba ywəri Baŋa-Wɛ kwaga nɩ ba daarɩ ba zuli Baal-Pewɔrɩ tɩn. Ba na kɩ te kʋntʋ tɩn pɛ yawɩ-cɛɔ ja Baŋa-Wɛ nɔn-kɔgɔ kʋm mʋ kʋ cɔgɩ-ba. 17 Kʋntʋ ŋwaanɩ, zaŋɩ-na á gʋ ba biə balʋ maama na yɩ bəkəri tɩn, dɩ ba kaana balʋ na pəni dɩ baara tɩn maama. 18 Kʋ nan na yɩ ba bukwa balʋ ta na yǝri baara tɩn, yagɩ-ba-na sɩ á di-ba á ma á kɩ á kaana.
19 Abam wʋlʋ maama na gʋ nɔɔnʋ naa o na dwe tʋʋ jara-kǝm baŋa nɩ, sɩ kʋ tu taa zʋʋrɩ dáa dáa dɩ kɔgɔ kʋm maama sɩ kʋ yi da yarpɛ. Da yam kʋntʋ da yatɔ dɛ dɩm nɩ, dɩdaanɩ ya da yarpɛ dɛ dɩm nɩ, kʋ tu wʋ́ kwɛ o tɩtɩ, dɩ balʋ o na jaanɩ jara-kǝm baŋa nɩ tɩn sɩ ba maama maŋɩ dɩ cullu tɩm. 20 Á ta maŋɩ sɩ á zarɩ á gwaarʋ, dɩdaanɩ kʋlʋ maama á na jɩgɩ yɩ ba kwe varɩm tɔnɔ, naa bʋŋʋ kʋrʋ, naa dɛ ba ma kɩ-tɩ tɩn mʋ pa tɩ laan kwɛ.»
21 Wɛ kaanɩm tu Eleyazaarɩ dɩ ma ta dɩ jar-kərə bam o wɩ: «Baŋa-Wɛ na kwe niə yalʋ DƖ pa Moyisi sɩ o pa abam tɩn mʋ tɩntʋ:
22-23 Kʋ na yɩ wǝǝnu tɩlʋ maama na ba zwɛ mim wʋnɩ tɩn, nɩ səbu-sɩŋa, dɩ səbu-poŋo, dɩ canna, dɩ luuru dwi dɩdonnǝb na yɩ te tɩn, á maŋɩ sɩ á kwe-tɩ á dɩ mim wʋnɩ pa tɩ kwɛ cullu tɩm seeni mʋ. Á na lɩ-tɩ mim dɩm wʋnɩ, sɩ á ma cullu kwɛɛm na bam á miisi tɩ yɩra nɩ sɩ tɩ laan kwɛ tɩ ti. Kʋ nan na yɩ wǝǝnu tɩlʋ mim na wʋ́ zwɛ tɩn, sɩ á miisi-tɩ dɩ cullu kwɛɛm na bam sɩ tɩ kwɛ. 24 Da yarpɛ dɛ dɩm nɩ, á wʋ́ zarɩ á gwaarʋ, sɩ á maŋɩ dɩ cullu tɩm. Abam laan jɩgɩ cwǝŋǝ sɩ á joori á ba á taá zʋʋrɩ kɔgɔ kʋm wʋnɩ.»
Ba cɛ jɩjɩgɩrʋ ba pa daanɩ
25 Baŋa-Wɛ ma ta dɩ Moyisi DƖ wɩ: 26 «Nmʋ dɩ kaanɩm tu Eleyazaarɩ, dɩ Yisɩrayɛlɩ sɔ-yuni yigǝ tiinǝ bam mʋ maŋɩ sɩ á jeeli kʋlʋ maama jar-kərə bam na di Madian tiinə bam yɩ ba ja ba ba yo seeni tɩn, kʋ na yɩ ba nabiinǝ dɩ vara dɩ. 27 Laan pɔɔrɩ-tɩ kuni bɩle, sɩ a kwe pʋpwara dɩdʋa á pa jar-kərə bam, yɩ á daarɩ á kwe pʋpwara kadoŋ kam á pa Yisɩrayɛlɩ tiinə kɔgɔ kʋlʋ na daarɩ tɩn. 28-29 Kʋ na yɩ jar-kərə pʋpwara kam, zʋ ka wʋnɩ n lɩ nɔɔnʋ dɩdʋa naa varɩm dɩdʋa ba biə-yanu maama wʋnɩ, sɩ n kwe n pa Eleyazaarɩ. Nɔɔna bam kʋntʋ, dɩ vara bam kʋntʋ yɩ Baŋa-Wɛ nyɩm mʋ. 30 Kʋ nan na yɩ Yisɩrayɛlɩ tiinə badaara bam pʋpwara, n maŋɩ sɩ n lɩ nɔɔnʋ dɩdʋa naa varɩm dɩdʋa mʋ ba fiinnu maama wʋnɩ, sɩ n kwe n pa Levi tiinə bam, ba na tʋŋɩ jero-vwe dɩm tɩtʋŋa tɩn ŋwaanɩ.»
31 Moyisi dɩ Eleyazaarɩ ma kɩ te Baŋa-Wɛ na brɩ Moyisi tɩn.
32 Jar-kərə bam dɛɛn na vrɩ wǝǝnu tɩlʋ ba ja ba joori yɩ tɩ daarɩ tɩn mʋ tɩntʋ:
Peeni dɩ bʋm dɩm maama ni dɛɛn yɩ mʋrrʋ biə-yardʋ dɩ fusɩrpɛ-tenu (675,000), 33 dɩ naanɩ mʋrrʋ fusɩrpɛ-tɩle (72,000), 34 dɩ bɩnɛ mʋrrʋ fusɩrdʋ-dɩdʋa (61,000), 35 dɩdaanɩ bukwa balʋ na yǝri baara tɩn mʋrrʋ fiintɔ-tɩle (32,000).
36 Jar-kərə balʋ na ve jara-kǝm wʋnɩ yɩ ba joori tɩn pʋpwara kam dɛɛn yɩ tɩntʋ mʋ:
Peeni mʋrrʋ biə-yatɔ dɩ fiintɔ-tɩrpɛ dɩdaanɩ biə-yanu (337,500). 37 Ba ma lɩ peeni biə-yardʋ dɩ fusɩrpɛ-sɩnu (675) sɩ wʋnɩ ba pa Baŋa-Wɛ. 38 Naanɩ mʋrrʋ fiintɔ-tɩrdʋ (36,000). Ba ma lɩ naanɩ fusɩrpɛ-dɩle (72) dɩ wʋnɩ ba pa Baŋa-Wɛ. 39 Bɩnɛ mʋrrʋ fiintɔ dɩ biə-yanu (30,500). Ba ma lɩ bɩnɛ fusɩrdʋ-dɩdʋa (61) sɩ wʋnɩ ba pa Baŋa-Wɛ. 40 Nɔɔna mʋrrʋ fugə-yardʋ (16,000). Ba ma lɩ nɔɔna fiintɔ-bale (32) ba wʋnɩ ba pa Baŋa-Wɛ.
41 Moyisi ma kwe Baŋa-Wɛ nyɩm o pa Eleyazaarɩ, nɩnɛɛnɩ Baŋa-Wɛ na pɛ‑o ni sɩ o kɩ te tɩn.
42-43 Yisɩrayɛlɩ tiinə badaara bam pʋpwara kalʋ Moyisi dɛɛn na pɔɔrɩ jar-kərə bam jɩjɩgɩrʋ tɩm wʋnɩ o pa Yisɩrayɛlɩ nɔn-kɔgɔ kʋm tɩn maa yɩ:
Peeni mʋrrʋ biə-yatɔ dɩ fiintɔ-tɩrpɛ dɩdaanɩ biə-yanu (337,500), 44 dɩ naanɩ mʋrrʋ fiintɔ-tɩrdʋ (36,000), 45 dɩ bɩnɛ mʋrrʋ fiintɔ dɩ biə-yanu (30,500), 46 dɩ nɔɔna mʋrrʋ fugə-tɩrdʋ (16,000).
47 Moyisi ma zʋ Yisɩrayɛlɩ tiinə kɔgɔ kʋm pʋpwara kam wʋ o lɩ nɔɔnʋ dɩdʋa naa varɩm dɩdʋa ba fiinnu maama wʋnɩ, nɩ Baŋa-Wɛ na pɛ‑o ni sɩ o kɩ te tɩn. O maa kwe nɔɔna bam dɩ vara bam kʋntʋ o pa Levi dwi tiinə balʋ na tʋŋɩ jero-vwe dɩm tɩtʋŋa tɩn.
48 Jar-kərə bam dɩdɛɛra balʋ na nii nɔɔna mʋrʋ baŋa nɩ dɩ balʋ na nii nɔɔna bi baŋa nɩ tɩn dɛɛn ma vu Moyisi te, 49 yɩ ba ta dɩd-o ba wɩ: «Dɩ́ ko, dɩbam na jeeli dɩ́ nɔɔna bam ni, kɔgɔ dɩ kɔgɔ tɩn, dɩ́ maanɩ nɩ nɔɔn-nɔɔnʋ wʋ je. 50 Kʋntʋ ŋwaanɩ dɩ́ laan kwe səbu-sɩŋa jɩjɩgɩrʋ tɩlʋ dɩ́ na jaanɩ dɩ́ kɔɔnɩ Madian tiinə bam yɩra nɩ tɩn mʋ dɩ́ ba sɩ dɩ́ pa Baŋa-Wɛ. Səbu-sɩŋa wǝǝnu tɩm maa yɩ bɛn, dɩ jafʋla, dɩ zwa-kwana, dɩ wǝǝnu tɩdonnǝ. Dɩ́ kɩ kʋntʋ sɩ dɩ́ ma dɩ́ kɩ Baŋa-Wɛ le yɩ dɩ́ daarɩ dɩ́ lɩ dɩ́ tusim DƖ yigə nɩ mʋ.»
51 Moyisi dɩ Wɛ kaanɩm tu Eleyazaarɩ ma joŋi səbu-sɩŋa jɩjɩgɩrʋ tɩm jar-kərə dɩdɛɛra bam tee nɩ. 52 Ba dɛɛn na jeeli tɩ duuni tɩn, tɩ dɛɛn yi kilo bi dɩ funʋgʋ (190) mʋ.c Ba ma kwe tɩ maama ba pa Baŋa-Wɛ. 53 Kʋ daarɩ jar-kərə bam maama dɩ dɛɛn joŋi ba nyɩm wǝǝnu tɩlʋ ba na vrɩ Madian tiinə bam tee nɩ tɩn wʋnɩ mʋ. 54 Moyisi dɩ Eleyazaarɩ dɛɛn ma joŋi səbu-sɩŋa wǝǝnu tɩm dɩdɛɛra bam tee nɩ ba ja ba vu ba tiŋi jero-vwe dɩm wʋnɩ, sɩ kʋ taa yɩ gulə kʋ paɩ Yisɩrayɛlɩ tiinə bam Baŋa-Wɛ ŋwaanɩ.