Ni-gonim taanɩ
Baarʋ na goni ni o pa Baŋa-Wɛ, naa o na dugi durə sɩ o kwe woŋo o pa‑DƖ, sɩ kʋntʋ tu yɩ joori o ni dɩm kwaga nɩ. O maŋɩ sɩ o kɩ kʋlʋ maama o na tagɩ tɩn mʋ.
3 Kʋ nan na yɩ bukɔ na zʋʋrɩ o ko sɔŋɔ nɩ tɩn na goni ni naa o du durə sɩ o kɩ woŋo o pa Baŋa-Wɛ, 4 yɩ o ko na lwarɩ kʋ ni nɩ, pa o cɩm, kʋ maŋɩ sɩ bukɔ wʋm sɩɩnɩ o kɩ o ni dɩm na brɩ te maama tɩn mʋ. 5 Sɩ o ko nan na ni o bukɔ wʋm ni-gonim dɩm ŋwa, pa o yiri-dɩ o yagɩ, bukɔ wʋm daa daɩ sɩ o kɩ o tɔgɩ kʋlʋ o na goni ni naa o du durə sɩ o kɩ tɩn. Baŋa-Wɛ wʋ́ kwe o kikiə DƖ cɛ-o, o ko na wʋ sɛ tɩn ŋwaanɩ.
6 Bukɔ ni nan na vrɩ pa o du durə naa o goni ni sɩ o kɩ woŋo, sɩ kʋ loori o ban-zʋrɩ, 7 o maŋɩ sɩ o kɩ nɩnɛɛnɩ o ni dɩm na brɩ te maama tɩn mʋ, kʋ na daɩ nɩ o barʋ wʋm mʋ ni dɩ ŋwa yɩ o yiri-dɩ o yagɩ. 8 O barʋ wʋm nan na ni yɩ o yiri-dɩ, kaanɩ wʋm daa daɩ sɩ o kɩ o tɔgɩ kʋlʋ o na dugi durə naa o goni ni sɩ o kɩ tɩn. Baŋa-Wɛ wʋ́ kwe o kikiə DƖ cɛ-o.
9 Kadənə dɩ balʋ ban-zʋrɩ na cɔgɩ tɩn na dugi durə naa ba goni ni ba pa Wɛ, ba maŋɩ sɩ ba kɩ ba niə yam na brɩ te maama tɩn mʋ.
10 Kaanɩ nan na zʋʋrɩ o barʋ sɔŋɔ nɩ yɩ o goni ni naa o du durə, 11 o barʋ wʋm na ni kʋ ŋwa pa o wʋ tagɩ dɩd-o nɩ o yiri o ni dɩm o yagɩ, kaanɩ wʋm maŋɩ sɩ o kɩ o tɔgɩ o ni dɩm na brɩ te maama tɩn mʋ. 12 O barʋ wʋm nan na ni yɩ o yiri-dɩ, kaanɩ wʋm daa daɩ sɩ o kɩ o tɔgɩ kʋlʋ o na goni ni naa o du durə sɩ o kɩ tɩn. Baŋa-Wɛ wʋ́ kwe o kikiə DƖ cɛ-o, o barʋ wʋm na wʋ sɛ tɩn ŋwaanɩ.
13 Nɔɔnʋ kaanɩ na dugi durə naa o goni ni sɩ o wʋ́ ja o tɩtɩ dɩ woŋo doŋ, o barʋ wʋm jɩgɩ cwǝŋǝ sɩ o sɛ o ni dɩm kʋntʋ, naa sɩ o yiri-dɩ o yagɩ. 14 O barʋ wʋm nan na ni o ni dɩm ŋwa pa da yale kɛ yɩ o ta maŋɩ da cɩmm, kʋ brɩ nɩ o sɛ sɩ o kaanɩ wʋm kɩ o tɔgɩ o ni dɩm na brɩ te maama tɩn mʋ. Kaanɩ wʋm maa maŋɩ sɩ o kɩ sɩ kʋ tɔgɩ dɩ o ni dɩm mʋ, o barʋ wʋm na lwarɩ dɩ ni nɩ yɩ o cɩm tɩn ŋwaanɩ. 15 Da yale nan na kɛ yɩ o barʋ wʋm laan yiri kʋ tu ni dɩm o yagɩ, kaanɩ wʋm tusim dɩm wʋ́ taa wʋ o barʋ wʋm yuu nɩ mʋ.»
16 Niə yantʋ mʋ Baŋa-Wɛ dɛɛn pɛ Moyisi baara dɩ ba kaana seeni, dɩdaanɩ bukwa balʋ ta na zʋʋrɩ ba kwə tee nɩ tɩn seeni.