Ka-duri-ka-zʋ-ka-səgi tɩɩnɩ dɩm
20
Maŋa kadoŋ nɩ mʋ Baŋa-Wɛ tagɩ dɩ Zozwe DƖ wɩ: 2 «Laan ta dɩ Yisɩrayɛlɩ tiinə bam sɩ ba lɩ tɩɩnɩ dɩdonnǝ, ka-duri-ka-zʋ-ka-səgi ŋwaanɩ, nɩnɛɛnɩ a na maŋɩ a ta dɩ Moyisi sɩ o brɩ-m te tɩn. 3 Wʋlʋ na wʋ paalɩ o gʋ nɔɔnʋ, oó wanɩ o duri o vu o səgi tɩʋ kʋm kʋntʋ wʋnɩ sɩ o lu balʋ na beeri o gʋm tɩn jɩŋa nɩ. 4 O maa na duri o vu o yi tɩɩnɩ dɩm kʋntʋ dɩdʋa, oó vu kʋ manchoŋo ni nɩ o lwǝni o taanɩ dɩm dɩ tɩʋ kʋm nakwa bam mʋ. Bantʋ maa wʋ́ beeri je ba pa‑o sɩ o zʋ ba tɩʋ kʋm o taa zʋʋrɩ dɩ ba. 5 Wʋlʋ na beeri o gʋm tɩn nan na zəg-o o yi da, kʋ daɩ sɩ tɩʋ kʋm tiinə lɩ-o ba pa kʋntʋ tu, bɛŋwaanɩ o wʋ paalɩ o gʋ nɔɔnʋ wʋm. O nan ya ba cul‑o. 6 Tɩʋ kʋm nakwa bam wʋ́ di o taanɩ sɩ ba lwarɩ kʋ kɩ kʋ maŋɩ mʋ naa o paalɩ o gʋ o doŋ wʋm mʋ. O na wʋ paalɩ o kɩ, ba maa wʋ́ yagɩ sɩ o taa zʋʋrɩ dɩ ba sɩ kʋ yi kaanɩm yigə tu wʋm na tɩga. Kʋntʋ mʋ o laan wʋ́ wanɩ o joori o tɩtɩ tɩʋ kʋm.»7 Kʋ ma pa ba lɩ Galile tɩʋ Kedɛsɩ na wʋ Nɛfitali pweeru laŋa kam nɩ tɩn ba zɩgɩ kʋ ŋwaanɩ. Ba ta lɩ Sishɛm na wʋ Efrayim pweeru laŋa kam nɩ tɩn mʋ, dɩ Kiriyat-Arba na wʋ Zuda pweeru laŋa kam nɩ tɩn. Tɩʋ kʋm kʋntʋ laan mʋ yɩ Ebrɔn. 8 Kʋ daarɩ tɩɩnɩ dɩlʋ na wʋ Zʋrdɛn bugə kam wa-puli seeni tɩn mʋ ba kuri Bezerɩ na wʋ Ruban dwi dɩm laŋa kam nɩ tɩn. Je sɩm kʋntʋ yɩ tɩ-kamparɩ mʋ ka yi kagʋa kam na wʋ Zeriko wa-puli seeni tɩn. Ba ta ma lɩ Gadɩ dwi dɩm tɩʋ Ramɔtɩ na wʋ Galadɩ nɩ tɩn, dɩdaanɩ Manasɩ dwi dɩm tɩʋ Golan na wʋ Basan nɩ tɩn.
9 Yisɩrayɛlɩ tiinə bam ma kuri tɩɩnɩ dɩm kʋntʋ ba tiŋi ka-duri-ka-zʋ-ka-səgi ŋwaanɩ. Kʋ maa yɩ sɩ nɔɔnʋ na wʋ paalɩ o gʋ nɔɔnʋ, o na yɩ Yisɩrayɛlɩ tu naa vəru, sɩ kʋntʋ tu duri o zʋ dɩ wʋnɩ o səgi sɩ wʋlʋ o na gʋ tɩn yɩra nɔɔna yɩ yi‑o ba gʋ. Kʋ ta yɩ sɩ tɩʋ kʋm nakwa bam wanɩ o taanɩ dɩm mʋ ba di dɩ cɩga.