Levi dwi tiinə tɩɩnɩ dɩm
21
Kʋntʋ kwaga nɩ mʋ balʋ na wʋ Levi dwi tiinə yigə nɩ tɩn ve kaanɩm tu Eleyazaarɩ, dɩ Nun bu Zozwe dɩdaanɩ Yisɩrayɛlɩ dwiə yam maama yigǝ tiinǝ bam te. 2 Maŋa kam kʋntʋ nɩ dɩ ba ta zʋʋrɩ Kaanan tɩʋ Siloo wʋnɩ mʋ. Levi yigǝ tiinǝ bam ma yi ba te ba ta ba wɩ: «Baŋa-Wɛ nan ya maŋɩ DƖ pa Moyisi ni mʋ nɩ: dɩbam maŋɩ sɩ dɩ́ joŋi tɩɩnɩ mʋ dɩ́ taa zʋʋrɩ da sɩ dɩ́ daarɩ dɩ́ taa kɔna.» 3 Yisɩrayɛlɩ tiinə bam tɩtɩ dɛɛn ma da Baŋa-Wɛ ni dɩm ŋwaanɩ ba lɩ ba dwiə yam dɩdʋa dɩdʋa tɩɩnɩ dɩdonnǝ ba pa-ba sɩ ba taa zʋʋra. Ba ta ma pa-ba vara pwəli sɩ ba taa maa kɔnɩ vara.aKeyatɩ sɔ-yuu tiinə tɩɩnɩ dɩm
4 Ba ma ta jɔrɔ sɩ ba lwarɩ Baŋa-Wɛ na lagɩ sɩ tɩɩnɩ dɩm pɔɔrɩ dɩ pa Levi dwi tiinə bam te tɩn. Keyatɩ tiinə bam nan mʋ dɛ yigə ba na ba tɩɩnɩ dɩm pʋpwara, digə maama dɩ ka nyɩm. Bantʋ balʋ na yɩ Wɛ kaanɩm tu Arɔn digə kam tɩn ma joŋi tɩɩnɩ fugə-dɩtɔ, yɩ dɩ maama wʋ Zuda dɩ Simeyon dɩdaanɩ Bɛnzamɛn dwiə yam laŋa wʋnɩ. 5 Kʋ maa na daarɩ Keyatɩ tiinə balʋ tɩn, ba dɩ dɛɛn nɛ tɩɩnɩ fugə mʋ na wʋ Efrayim dwi dɩm, dɩ Dan dwi dɩm, dɩdaanɩ Manasɩ dwi cicoro kʋm laŋa wʋnɩ. 6 Kʋ nan na yɩ Gɛrsɔnɩ tiinə bam, bantʋ dɛɛn nɛ tɩɩnɩ fugə-dɩtɔ mʋ na wʋ Yisakaarɩ dwi dɩm, dɩ Asɛɛrɩ dwi dɩm, dɩ Nɛfitali dwi dɩm, dɩ Manasɩ dwi cicoro kʋkʋm kʋm laŋa wʋnɩ. 7 Merari tiinə bam dɩ ma na tɩɩnɩ fugə-dɩle na wʋ Ruban dwi dɩm, dɩ Gadɩ dwi dɩm, dɩdaanɩ Zabulɔn dwi dɩm laŋa wʋnɩ, digə maama dɩ ka nyɩm.
8 Baŋa-Wɛ dɛɛn na pɛ Moyisi ni sɩ ba pɔɔrɩ tɩɩnɩ dɩm ba pa Levi tiinə bam te tɩn mʋ Yisɩrayɛlɩ tiinə bam dɩ kɩa, kʋ wǝli dɩdaanɩ vara pwəli sɩ ba taa kɔnɩ ba vara.
9 Kʋ na yɩ Zuda dwi dɩm dɩdaanɩ Simeyon dwi dɩm laŋa kam, tɩɩnɩ dɩntʋ mʋ ba dɛɛn lɩ sɩ ba pa 10 balʋ na yɩ Keyatɩ dwi tiinə yɩ ba yɩ Arɔn biə tɩn. Ba pɛ-ba tɩɩnɩ dɩm kʋntʋ bɛŋwaanɩ jɔrɔ kʋm kuri bantʋ mʋ yigə.
11 Zuda pweeru laŋa kam nɩ mʋ ba lɩ Kiriyat-Arba ba pa-ba, kʋ wǝli dɩdaanɩ kʋ vara pwəli sɩm. Ba laan bə-kʋ nɩ Ebrɔn mʋ. Araba dɛɛn yɩ Anakɩ ko mʋ. 12 Sɩ kʋ na yɩ tɩʋ kʋm karɩ sɩm dɩdaanɩ kʋ nawuurə yam, ba ya maŋɩ ba kwe tɩntʋ ba pa Yefune bu Kalɛbɩ mʋ sɩ o taa te. 13 Ebrɔn ya yɩ tɩʋ kʋlʋ ba na tiŋi ka-duri-ka-zʋ-ka-səgi ŋwaanɩ tɩn mʋ. Wɛ kaanɩm tu Arɔn biə bam ma joŋi-kʋ. Ba ta ma wǝli tɩɩnɩ dɩntʋ:
Libina, 14 dɩ Yatira, dɩ Esɩtemoa, 15 dɩ Holon, dɩ Debiri, 16 dɩ Ayin, dɩ Yuta, dɩ Bɛtɩ-Sɩmesa. Tɩɩnɩ dɩntʋ dɩdaanɩ dɩ vara pwəli sɩm yɩ tɩɩnɩ nʋgʋ mʋ ya na yɩ Simeyon dɩdaanɩ Zuda laŋa kam nyɩm. 17 Kʋ daarɩ Bɛnzamɛn laŋa kam nɩ mʋ ba pɛ-ba tɩɩnɩ dɩna mʋ: Gabawɔn, dɩ Geba, 18 dɩ Anatɔtɩ, dɩ Alɩmon mʋ kʋ wǝli dɩdaanɩ dɩ vara pwəli sɩm.
19 Kʋntʋ tɩn, tɩɩnɩ fugə-dɩtɔ dɩdaanɩ dɩ vara pwəli sɩm mʋ ba dɛɛn kwe ba pa Arɔn digə tiinə bam na yɩ kaanɩm tiinə tɩn. 20 Kʋ maa na yɩ Levi dwi dɩm na yɩ Keyatɩ dwi kʋm yɩ ba daɩ Arɔn biə tɩn, ba lɩ tɩɩnɩ dɩna mʋ Efrayim dwi dɩm laŋa kam nɩ ba pa-ba.
21 Sishɛm dɛɛn yɩ laŋa kam kʋntʋ tɩʋ mʋ. Kʋ maa yɩ tɩʋ kʋlʋ ba na tiŋi ka-duri-ka-zʋ-ka-səgi ŋwaanɩ tɩn mʋ. Kʋ maa wʋ Efrayim pweeru laŋa kam nɩ. Ba dɛɛn kwe-kʋ ba pa-ba, ba wǝli dɩ Gezɛrɩ, 22 dɩ Kibizayim, dɩ Bɛte-Horon. Tɩɩnɩ dɩna dɩm kʋntʋ dɩdaanɩ dɩ vara pwəli mʋ ba pɛ-ba.
23 Dan laŋa kam nɩ mʋ ba lɩ tɩɩnɩ dɩntʋ ba pa-ba:
Elɩtekɩ, dɩ Gibeton, 24 dɩ Ayalɔn, dɩ Gatɩ-Rimɔn. Tɩɩnɩ dɩna dɩdaanɩ dɩ vara pwəli sɩm mʋ kʋntʋ. 25 Manasɩ dwi cicoro kʋm na wʋ wa-zʋʋrɩ seeni tɩn laŋa nɩ mʋ ba ma kwe tɩɩnɩ dɩntʋ ba pa-ba: Taanakɩ, dɩ Gatɩ-Rimɔn. Tɩɩnɩ dɩle dɩdaanɩ dɩ vara pwəli sɩm mʋ kʋntʋ.
26 Kʋ maa brɩ nɩ Keyatɩ sɔ-yuu tiinə balʋ na daɩ Arɔn biə tɩn dɛɛn joŋi tɩɩnɩ fugə mʋ dɩdaanɩ dɩ vara pwəli sɩm.
Gɛrsɔnɩ sɔ-yuu tiinə tɩɩnɩ dɩm
27 Kʋ daarɩ kʋ na yɩ Levi dwi tiinə balʋ na yɩ Gɛrsɔnɩ sɔ-yuu tiinə tɩn, ba dɛɛn lɩ tɩɩnɩ dɩntʋ mʋ ba pa-ba:
Manasɩ dwi cicoro kʋdoŋ kʋm laŋa nɩ mʋ ba lɩ: Basan tɩʋ Golan dɩdaanɩ Be-Esɩtara. Golan ya yɩ tɩʋ kʋlʋ ba na tiŋi ka-duri-ka-zʋ-ka-səgi ŋwaanɩ tɩn mʋ. Ba nan kwe tɩɩnɩ dɩle dɩm kʋntʋ mʋ dɩdaanɩ dɩ vara pwəli sɩm ba pa-ba.
28 Ba ma joŋi tɩɩnɩ dɩntʋ Yisakaarɩ dwi dɩm laŋa nɩ: Kision, dɩ Daberata, 29 dɩ Yarmuti, dɩ En-Ganim. Tɩɩnɩ dɩna dɩ dɩ vara pwəli mʋ ba lɩ ba pa-ba.
30 Ba dɛɛn ta joŋi tɩɩnɩ dɩntʋ Asɛɛrɩ dwi dɩm laŋa nɩ: Misalɩ, dɩ Abedon, 31 dɩ Helikatɩ, dɩ Rehɔbɩ. Tɩɩnɩ dɩna dɩ dɩ vara pwəli sɩm mʋ ba pɛ-ba.
32 Kʋ na daarɩ Nɛfitali dwi dɩm laŋa kam tɩn, ba joŋi tɩɩnɩ dɩntʋ mʋ: Kedɛsɩ na wʋ Galile nɩ tɩn, dɩ Hamɔtɩ-Dora, dɩ Karatan. Kedɛsɩ ya yɩ tɩʋ kʋlʋ ba na tiŋi ka-duri-ka-zʋ-ka-səgi ŋwaanɩ tɩn mʋ. Ba nan kwe tɩɩnɩ dɩtɔ dɩm kʋntʋ dɩ dɩ vara pwəli sɩm ba pa-ba.
33 Kʋ maa brɩ nɩ Gɛrsɔnɩ sɔ-yuu tiinə bam dɛɛn joŋi tɩɩnɩ fugə-dɩtɔ mʋ dɩdaanɩ dɩ vara pwəli sɩm.
Merari sɔ-yuu tiinə tɩɩnɩ dɩm
34 Merari tiinə bam laan mʋ daarɩ yɩ ba ta yɩ Levi dwi dɩm wʋnɩ. Ba ma joŋi tɩɩnɩ dɩntʋ mʋ ba pa-ba:
Zabulɔn dwi dɩm laŋa kam nɩ mʋ ba lɩ tɩɩnɩ dɩntʋ: Yokenɩam, dɩ Karata, 35 dɩ Dimina, dɩ Nahalali. Tɩɩnɩ dɩna dɩdaanɩ dɩ vara pwəli sɩm mʋ kʋntʋ.
36 Kʋ na yɩ Ruban dwi dɩm laŋa kam tɩn, ba joŋi tɩɩnɩ dɩntʋ mʋ ba pa-ba: Bezerɩ, dɩ Yahaza, 37 dɩ Kedemɔtɩ, dɩ Mefaatɩ. Dɩ ta maa yɩ tɩɩnɩ dɩna dɩ dɩ vara pwəli sɩm.
38 Gadɩ dwi dɩm laŋa nɩ mʋ ba ta ma joŋi tɩɩnɩ dɩntʋ: Ramɔtɩ na wʋ Galadɩ nɩ tɩn, dɩ Mahanayimi, 39 dɩ Hesebon, dɩ Yazɛrɩ. Ramɔtɩ ya yɩ tɩʋ kʋlʋ ba na tiŋi ka-duri-ka-zʋ-ka-səgi ŋwaanɩ tɩn mʋ. Ba nan kwe tɩɩnɩ dɩna dɩm kʋntʋ dɩ dɩ vara pwəli sɩm ba pa-ba.
40 Kʋ maa brɩ nɩ Merari sɔ-yuu tiinə bam dɛɛn joŋi tɩɩnɩ fugə-dɩle mʋ dɩdaanɩ dɩ vara pwəli sɩm.
41 Kʋntʋ tɩn, Yisɩrayɛlɩ dwi tiinə tɩga kam maama wʋnɩ mʋ Levi tiinə bam dɛɛn joŋi tɩɩnɩ fiinna-nana dɩdaanɩ dɩ vara pwəli sɩm. 42 Tɩʋ maama maa jɩgɩ vara pwəli sɩlʋ na kaagɩ-kʋ tɩn.
43 Baŋa-Wɛ dɛɛn ma pa Yisɩrayɛlɩ tiinə bam tɩga kalʋ maama DƖ ya na goni ni dɩ ba nabaara sɩ DƖ pa-ba tɩn. Ba dɩ ma jaŋɩ ba di-ka yɩ ba jǝni ka wʋnɩ. 44 Baŋa-Wɛ dɛɛn ma pa ba sin dɩ najara kǝm, nɩ DƖ na goni ni dɩ ba nabaara bam sɩ DƖ kɩ te tɩn. Yisɩrayɛlɩ tiinə dʋna bam wʋlʋwʋlʋ wʋ wanɩ-ba ba cɔgɩ, Baŋa-Wɛ na pɛ-ba dam sɩ ba di-ba tɩn ŋwaanɩ. 45 Baŋa-Wɛ dɛɛn na goni ni sɩ DƖ kɩ wo-laarʋ tɩlʋ maama DƖ pa Yisɩrayɛlɩ tiinə bam tɩn mʋ DƖ sɩɩnɩ DƖ kɩ DƖ pa-ba. Dɩdʋa tɩtɩ wʋ maŋɩ kwaga nɩ.