<<    <     Zozwe     22     >    >> 
Yisɩrayɛlɩ dwiə yadonnə joori wa-puli seeni
22
Zozwe laan ma tʋŋɩ ni sɩ Ruban dwi tiinə bam dɩ Gadɩ dwi tiinə bam dɩdaanɩ Manasɩ dwi cicoro kʋm na wʋ wa-puli seeni tɩn ba sɩ o na-ba. 2 O ma ta dɩ ba o wɩ: «Abam kɩ cɩga dɩ á na kɩ kʋlʋ maama Baŋa-Wɛ tɩntʋŋnʋ Moyisi dɛɛn na pɛ ni sɩ á kɩ tɩn. Kʋlʋ maama amʋ dɩ maa na brɩ sɩ á kɩ tɩn, á sɩɩnɩ á kɩ-kʋ. 3 Abam pɩɩnɩ mʋ yɩ á sɛ á Tu Baŋa-Wɛ niə yam, á daarɩ á wǝli á cʋrrʋ tɩm taa sɩ kʋ yi lele. Á maa wʋ nuŋi ba kwaga nɩ. 4 Kʋ nan yi sɩ á joori á sam dɩm na wʋ Zʋrdɛn bugə kam wa-puli seeni, yɩ Baŋa-Wɛ tɩntʋŋnʋ Moyisi kwe o pa abam tɩn. Bɛŋwaanɩ, Baŋa-Wɛ na goni ni sɩ DƖ pa á cʋrrʋ tɩm sin dɩ najara kǝm tɩn, DƖ sɩɩnɩ DƖ kɩ kʋntʋ mʋ. 5 Nan kwaanɩ-na sɩ á taá kɩ kʋlʋ maama Moyisi na brɩ sɩ á kɩ tɩn. O maŋɩ o brɩ abam sɩ á taá soe á Tu Baŋa-Wɛ dɩm, yɩ á daarɩ á taá jɩgɩ cɩga á pa‑DƖ. Abam ta maŋɩ sɩ á zuli‑DƖ mʋ yɩ á sɛ DƖ ni dɩdaanɩ á bɩcara dɩ á dam maama.»
6-8 Zozwe laan ma loori Wɛ sɩ DƖ kɩ-ba lanyɩranɩ yɩ o daarɩ o banɩ-ba o yagɩ cwǝŋǝ nɩ sɩ ba viiri. O na banɩ-ba o yagɩ cwǝŋǝ nɩ kʋntʋ tɩn, o ma ta o wɩ: «Abam ma á joori á sam dɩ jɩjɩgɩrʋ zanzan mʋ á na vrɩ á dʋna tee nɩ. Abam vara daga lanyɩranɩ, yɩ á ta jɩgɩ səbu-poŋo, dɩ səbu-sɩŋa, dɩ canna, dɩ luuru, dɩ gwaarʋ zanzan. Ve-na á cɛ tɩ maama dɩ á cʋrrʋ. Wɛ wʋ́ pa á yi lanyɩranɩ.»
Kʋ na yɩ Manasɩ dwi dɩm, Moyisi dɛɛn pɔɔrɩ ba cicoro mʋ o pa-ba tɩga Basan laŋa kam nɩ. Zozwe dɩ ma kwe tɩga o pa ba cicoro kʋdoŋ kʋm Zʋrdɛn bugə kam wa-zʋʋrɩ seeni, sɩ ba jǝni dɩ Yisɩrayɛlɩ dwiə yadonnə yam.
9 Ruban dwi tiinə bam dɩ Gadɩ dwi tiinə bam dɩdaanɩ Manasɩ dwi cicoro kʋm maama ma kwe cwǝŋǝ ba maa joori ba sam nɩ. Ba yagɩ Yisɩrayɛlɩ tiinə badonnǝ bam mʋ Kaanan tɩʋ Siloo nɩ. Ba ma joori ba tɩtɩ tɩga kam na wʋ Galadɩ nɩ yɩ Moyisi kwe o pa-ba sɩ kʋ tɔgɩ dɩ Baŋa-Wɛ ni dɩm tɩn.
Baŋa-Wɛ gulə bimbim dɩm
10 Ruban tiinə bam, dɩ Gadɩ tiinə bam, dɩ Manasɩ dwi cicoro kʋm ma vu ba yi Gelilɔtɩ. Je sɩm kʋntʋ dɩ wʋ Kaanan laŋa kam nɩ mʋ, yɩ kʋ wʋ Zʋrdɛn bugə kam ni nɩ. Ba ta na wʋ bɛ bugə kam tɩn, ba ma zɩgɩ dáanɩ ba lɔ bimbin-kamunu ba yagɩ da. 11 Kʋ na wʋra kʋ wʋra tɩn mʋ Yisɩrayɛlɩ dwiə yadonnə ni nɩ Ruban tiinə bam, dɩ Gadɩ tiinə bam dɩ Manasɩ dwi cicoro kʋdoŋ kʋm mʋ lɔgɩ kaanɩm bimbim ba zɩgɩ Gelilɔtɩ nɩ, kʋ na maŋɩ dɩ bantʋ bubɛ dɩm na wʋ Zʋrdɛn bugə kam nɩ tɩn. 12 Yisɩrayɛlɩ kɔgɔ kʋm maama ma jeeri Siloo nɩ, sɩ ba vu ba zaŋɩ najara dɩ ba cʋrrʋ tɩm na wʋ Zʋrdɛn bugə kam wa-puli seeni tɩn.
13 Ba ma tʋŋɩ Wɛ kaanɩm tu Eleyazaarɩ bu Fineasɩ sɩ o vu o ŋɔɔnɩ dɩ ba sɩ kʋ laan daarɩ sɩ ba jeeri-ba dɩ najara. 14 Ba ta ma lɩ yigǝ tiinǝ fugə sɩ ba nuŋi ba dwiə fugə kam maama wʋnɩ ba tɔgɩ dɩ Fineasɩ ba vu ba te. Bantʋ maama jɩgɩ sam mʋ ba nii dɩ baŋa nɩ. 15 Fineasɩ dɩ nɔɔna fugə bam ma vu Galadɩ ba jeeri dɩ Ruban tiinə bam, dɩ Gadɩ tiinə dɩ Manasɩ dwi cicoro kʋdoŋ kʋm, yɩ ba ta dɩ ba ba wɩ: 16 «Baŋa-Wɛ kɔ-fɔrɔ kʋm mʋ tʋŋɩ dɩbam á tee nɩ sɩ dɩ́ bwe abam dɩ́ nii bɛŋwaanɩ á daa na ba jɩgɩ cɩga dɩdaanɩ Baŋa-Wɛ tɩn. Bɛɛ mʋ kɩa yɩ abam lɔ Baŋa-Wɛ kwaga nɩ, yɩ á daarɩ á lɔ bimbim sɩ á taá kɩ kaanɩm dɩ baŋa nɩ? Abam daa ba zuli Baŋa-Wɛ dɩm. 17 Abam swe lwarɩm dɩlʋ dɩ́ dɛɛn na kɩ Peora nɩ yɩ Baŋa-Wɛ waarɩ dɩbam tɩn mʋ na? DƖ pɛ yawɩ-cɛɔ tʋ dɩ́ wʋnɩ yɩ kʋ gʋ dɩ́ kɔgɔ kʋm zanzan. Lwarɩm dɩm kʋntʋ nan ta wʋ nuŋi dɩ́ tɩtarɩ nɩ. a 18 Abam daa bʋŋɩ sɩ á nuŋi Baŋa-Wɛ kwaga nɩ mʋ na? Abam zɩm na vanɩ‑DƖ, DƖ banɩ jwa wʋ́ zaŋɩ mʋ dɩdaanɩ Yisɩrayɛlɩ tiinə kɔ-fɔrɔ kʋm maama. 19 Abam tɩga kam nan na cɔgɩ mʋ pa á warɩ Baŋa-Wɛ sɩ á zuli‑DƖ ka wʋnɩ, sɩ á bɛ Zʋrdɛn bugə kam á ba á taá zʋʋrɩ dɩbam tee nɩ Baŋa-Wɛ vwe dɩm na wʋ mɛ tɩn. Yɩ ywəri-na Baŋa-Wɛ kwaga nɩ, dɩdaanɩ dɩbam maama kwaga nɩ, sɩ á kɩ bimbim á wǝli dɩbam Tu Baŋa-Wɛ kaanɩm bimbim dɩm wʋnɩ. 20 Nan ta guli-na maŋa kam Zara bu Akanɩ na cɔgɩ Wɛ yigə yɩ o kwe wǝǝnu tɩlʋ Baŋa-Wɛ na wɩ tɩ yɩ DƖ nyɩm tɩn. Kʋ dɛɛn daɩ Yisɩrayɛlɩ tiinə kɔ-fɔrɔ kʋm maama mʋ nɛ waarɩm kʋ ŋwaanɩ na? Nɔɔna zanzan mʋ dɛ ba tɩ Akanɩ lwarɩm dɩm ŋwaanɩ sɩ kʋ dɛɛn daɩ o yɩranɩ mʋ tɩga.»b
21 Ruban tiinə bam, dɩ Gadɩ tiinə bam, dɩ Manasɩ dwi cicoro kʋm ma lǝri-ba ba wɩ:
22 «Yuutu Baŋa-Wɛ dɩm mʋ dwe maama! Dɩntʋ mʋ wʋ́ ta DƖ pa dɩbam! DƖ ye bɛŋwaanɩ dɩ́ na kɩ bimbim dɩm tɩn. Taá ye-na nɩ dɩ́ brɩ dɩ́ wʋ baarɩ Baŋa-Wɛ kwaga nɩ. Kʋ nan na daɩ kʋntʋ, sɩ dɩ́ yɩ lu zɩm dɛ dɩntʋ. 23 Dɩ́ taanɩ dɩm na yɩ vwan sɩ Baŋa-Wɛ waarɩ dɩbam. Dɩ́ wʋ kɩ bimbim dɩm sɩ dɩ́ ma nuŋi Baŋa-Wɛ kwaga nɩ. Dɩ́ nan wʋ bʋŋɩ sɩ dɩ́ kwe-dɩ dɩ́ ma dɩ́ kɩ vara zwɛɛm kaanɩm, naa wʋdiu-kaanɩm, naa yazurə kaanɩm sɩ dɩ́ joŋi yu-yoŋo Baŋa-Wɛ tee nɩ. 24 Dɩbam dɛ fʋʋnɩ ŋwaanɩ mʋ dɩ́ kɩ kʋntʋ. Dɩ́ tɩtɩ mʋ bʋŋɩ dɩ́ ja nɩ: abam biə jwa wʋ́ bwe dɩbam biə ba wɩ: ‹Abam dɩdaanɩ Yisɩrayɛlɩ Baŋa-Wɛ dɩm jɩgɩ bɛɛ mʋ sɩ á kɩ daanɩ? 25 Baŋa-Wɛ kwe Zʋrdɛn bugə kam DƖ ma DƖ ji sisəm mʋ sɩ ka pɔɔrɩ dɩbam Yisɩrayɛlɩ tiinə bam dɩdaanɩ abam Ruban tiinə dɩ Gadɩ tiinə bam daanɩ. Abam daɩ Baŋa-Wɛ nyɩm!› Tɔ. Kʋ na kɩ kʋntʋ, abam biə wʋ́ cɩ dɩbam biə sɩ ba yɩ tɔgɩ ba zuli Baŋa-Wɛ. 26 Kʋntʋ nan mʋ pɛ dɩ́ kɩ bimbim dɩm. Kʋ daɩ sɩ dɩ́ ma dɩ́ kɩ vara zwɛɛm kaanɩm dɩ kaanɩm dwi maama. 27 Dɩ́ kɩ-dɩ sɩ dɩ taa yɩ maana mʋ dɩbam dɩ abam tɩtarɩ nɩ. Dɩ ta wʋ́ ji maana dɩ pa dɩbam biə dɩdaanɩ abam biə. Kʋ na yɩ vara zwɛɛm kaanɩm naa kaanɩm dwi maama, dɩ́ wʋ́ taa jaanɩ dɩ́ pɛɛra dɩ́ tui Baŋa-Wɛ vwe dɩm nɩ sɩ dɩ́ ma zuli‑DƖ. Kʋ ta wʋ́ pa á biə jwa yɩ ta wɩ: dɩbam biə ba jɩgɩ kʋlʋkʋlʋ sɩ ba kɩ dɩdaanɩ Baŋa-Wɛ dɩm. 28 Dɩ́ ta bʋŋɩ nɩ kʋ na yɩ kʋntʋ, dɩbam biə wʋ́ ta dɩ abam biə ba wɩ: ‹Nii-na! Dɩbam kwə kɩ bimbim mʋ na lwǝni Baŋa-Wɛ kaanɩm bimbim dɩm. Ba nan wʋ kɩ-dɩ sɩ ba taa kɩ kaanɩm da ba zuli Baŋa-Wɛ, sɩ dɩ yɩ maana mʋ dɩ pa dɩbam dɩdaanɩ abam.› 29 Wɛ wʋ́ cɩ sɩ dɩ́ yɩ baarɩ DƖ kwaga nɩ dɩ́ daarɩ dɩ́ kɩ bimbim dɩ́ kwe-dɩ dɩ́ kɩ vara zwɛɛm kaanɩm, naa wʋdiu-kaanɩm, naa yazurə kaanɩm dɩ́ pa‑DƖ. Dɩbam bá sɛ sɩ dɩ́ kɩ bimbim dɩ́ ma zuli Baŋa-Wɛ, kʋ na daɩ kaanɩm bimbim dɩlʋ na wʋ Baŋa-Wɛ Wɛ-di-kamunu kʋm nɩ tɩn.»
30 Wɛ kaanɩm tu Fineasɩ dɩ Yisɩrayɛlɩ kɔgɔ kʋm yigǝ tiinǝ fugə bam ma cəgi Ruban tiinə, dɩ Gadɩ tiinə, dɩ Manasɩ dwi cicoro kʋm ni dɩm maama. Ba wʋ ma tʋ dɩ taanɩ dɩm. 31 Eleyazaarɩ bu Fineasɩ ma ta dɩ ba o wɩ: «Dɩbam laan lwarɩ nɩ Baŋa-Wɛ sɩɩnɩ DƖ wʋ dɩ́ tee nɩ. Bɛŋwaanɩ, abam wʋ cɔgɩ Baŋa-Wɛ yigə. Kʋ ta brɩ nɩ abam wʋ pɛ cwǝŋǝ sɩ Baŋa-Wɛ waarɩ dɩbam Yisɩrayɛlɩ tiinə bam.»
32 Fineasɩ dɩ Yisɩrayɛlɩ kɔ-fɔrɔ yigǝ tiinǝ bam ma zaŋɩ Galadɩ nɩ ba joori ba vu Kaanan. Ba ma lwǝni ba brɩ Yisɩrayɛlɩ tiinə bam maama ba dɩdaanɩ Ruban dɩ Gadɩ tiinə bam jǝŋǝ kam na tu te tɩn. 33 Yisɩrayɛlɩ tiinə bam wʋʋ ma tʋ yɩ ba sɩŋɩ sɩ ba taa te Wɛ. Ba ya bʋŋɩ sɩ ba kɩ najara dɩ Ruban dɩ Gadɩ tiinə bam mʋ sɩ ba ti ba dwi dɩm. Ba laan ma dʋlɩ bʋbʋŋɩ dɩm kʋntʋ ba yagɩ. 34 Ruban dɩ Gadɩ tiinə bam ma ta ba wɩ: «Bimbim dɩntʋ yɩ maana mʋ dɩ paɩ dɩbam maama nɩ: Baŋa-Wɛ mʋ sɩɩnɩ DƖ yɩ dɩbam Tu Wɛ.» Ba maa jɩgɩ-dɩ ba bǝi nɩ ‹Maana Bimbim›.