Zozwe na tagɩ taanɩ dɩlʋ o kweeli tɩn
23
Kʋ na wʋra kʋ wʋra tɩn, Baŋa-Wɛ dɛɛn laan ma pa Yisɩrayɛlɩ tiinə bam dʋna maama daa ba yaarɩ-ba. Zozwe dɩ nan ya tiini o kwɩn mʋ ka maŋa nɩ. 2 Dɛ dɩdwɩ mʋ o bəŋi Yisɩrayɛlɩ tiinə nakwa bam, dɩ ba yigǝ tiinǝ bam, dɩdaanɩ dɩdɛɛra balʋ na nii ba baŋa nɩ tɩn. O ma ta dɩ ba o wɩ: «Amʋ tiini a kwɩn zanzan. 3 Abam nan nɛ á Tu Baŋa-Wɛ dɩm na dɛ abam ŋwaanɩ DƖ kɩ te maama dɩ tɩɩnɩ dɩlʋ ya na wʋ yo tɩn. Dɩntʋ mʋ jaŋɩ DƖ di-dɩ DƖ pa abam. 4 Tɩɩnɩ dɩlʋ ta na daarɩ sɩ á di-dɩ najara baŋa nɩ tɩn, abam ye nɩ amʋ maŋɩ a pɔɔrɩ-dɩ a pa á dwiə yam maama sɩ ba di ba daarɩ ba taa te. Amʋ ta pɔɔrɩ tɩɩnɩ dɩlʋ maama dɩ́ na maŋɩ dɩ́ di kʋ zɩgɩ Zʋrdɛn bugə kam nɩ sɩ kʋ yi Mediterane nɩnɩʋ kʋm seeni tɩn a pa abam. 5 Abam na ve sɩ á jeeri-ba dɩ najara, Baŋa-Wɛ wʋ́ pa ba duri abam yigə nɩ. DƖ ni-gonim dɩm ŋwaanɩ mʋ DƖ lagɩ DƖ zəli-ba sɩ abam wanɩ ba tɩga kam á joŋi.6 Kʋntʋ ŋwaanɩ, kɩ-na dam á tɩtɩ kuri nɩ sɩ á daarɩ á kɩ á tɔgɩ Wɛ niə tɔnɔ kʋm Moyisi na pʋpʋnɩ tɩn dɩ cɩga. Yɩ kuri-na yadonnə á yagɩ. 7 Á yɩ zaŋɩ á ta wɩ á wʋ́ da á guuni dwiə yalʋ na tɔgɩ ba zʋʋrɩ abam te nɩ tɩn wʋnɩ. Á nan yɩ bəŋi ba wa yam yɩra. Á nan yɩ zaŋɩ á ta á wɩ á wʋ́ ta á du dɩ ba wa yam yɩra. Á yɩ zaŋɩ á tʋŋɩ á pa-ya, na á vu á tiiri ya yigə nɩ, á zuli-ya. 8 Abam nan maŋɩ sɩ á taá jɩgɩ cɩga mʋ dɩ á Tu Baŋa-Wɛ dɩm nɩnɛɛnɩ á na kɩ te sɩ kʋ yi zɩm tɩntʋ tɩn.
9 Bɛŋwaanɩ, abam na jeeri tɩɩnɩ dɩlʋ na daga yɩ dɩ ta tiini dɩ dana tɩn, Baŋa-Wɛ zəli-ba mʋ, yɩ nɔɔn-nɔɔnʋ warɩ sɩ o jɩgɩ dɩdaanɩ abam. 10 Baŋa-Wɛ na jaŋɩ DƖ pa abam tɩn ŋwaanɩ mʋ pa á wʋnɩ dɩdʋa tɩtɩ wʋ́ zəli á dʋna mʋrʋ, nɩnɛɛnɩ DƖ na goni ni dɩ abam nɩ DƖ wʋ́ kɩ te tɩn. 11 Nan kwaanɩ-na á taá soe á Tu Baŋa-Wɛ dɩm.
12 Abam nan na nuŋi á cɩga kam kwaga nɩ, pa á yɩ dɩ tɩɩnɩ dɩlʋ na gilimi abam tɩn, yɩ á sɛ sɩ á taa di da-bukwa, 13 nan lwarɩ-na sɩ Baŋa-Wɛ dɩm daa bá zəli-ba sɩ abam zʋ. Tɩɩnɩ dɩm kʋntʋ maa wʋ́ joori dɩ ji cɩkʋ á yigə nɩ. Dɩ wʋ́ taa nyɩ dɩ fɩna kalʋ na magɩ ka zʋʋrɩ á yɩra tɩn mʋ, yɩ dɩ ta ji sabarɩ sɩ zɔa á yiǝ. Baá yaarɩ abam taan sɩ kʋ yi maŋa kalʋ Baŋa-Wɛ na wʋ́ saarɩ abam yɩrɩ tɩ-ywəŋə kalʋ DƖ na kwe DƖ pa abam tɩn baŋa nɩ.
14 Kʋ daa bá daanɩ sɩ amʋ tɩ. Abam tɩtɩ nan ye nɩ Baŋa-Wɛ sɩɩnɩ DƖ kɩ DƖ ya na goni ni sɩ DƖ kɩ te maama tɩn, kʋlʋkʋlʋ wʋ maŋɩ kwaga nɩ. 15 Nan lwarɩ-na sɩ Baŋa-Wɛ na pɛ wo-laarʋ tɩm maama sɩɩnɩ tɩ kɩ nɩnɛɛnɩ DƖ na goni ni te tɩn, DƖ nan ta wʋ́ wanɩ DƖ cɔgɩ abam nɩnɛɛnɩ DƖ na tagɩ te tɩn, sɩ á yɩrɩ saarɩ tɩ-ywəŋə kantʋ DƖ na pɛ abam tɩn baŋa nɩ. 16 Abam na vɩn sɩ á tɔgɩ Baŋa-Wɛ ni-mɔrɔ dɩm, yɩ á puli sɩ á taá zuli wa yadonnə, lwarɩ-na nɩ DƖ banɩ wʋ́ zaŋɩ dɩ abam mʋ sɩ DƖ cɔgɩ abam lɩla. Abam wʋlʋwʋlʋ daa ma bá daarɩ tɩ-ywəŋə kantʋ DƖ na kwe DƖ pa abam tɩn baŋa nɩ.»