Simeyon dwi dɩm tɩga kam
19
Simeyon dwi dɩm dɛɛn mʋ saŋɩ sɩ ba joŋi ba pʋpwara kam. Ba tɩga kam dɛɛn tʋlɩ ka vu ka gaalɩ Zuda tɩga sisəm dɩm mʋ. 2 Tɩɩnɩ dɩntʋ nan ya wʋ Simeyon tɩga kam nɩ mʋ:Bɛɛr-Seba (Seba mʋ kʋntʋ), dɩ Molada, 3 dɩ Hazara-Suwala, dɩ Bala, dɩ Ezem, 4 dɩ Eletolada, dɩ Betula, dɩ Horama, 5 dɩ Zikalagɩ, dɩ Bɛtɩ-Marakabɩta, dɩ Hazara-Susa, 6 dɩ Bɛtɩ-Lebayɔtɩ, dɩ Saruyen.
Dɩntʋ yɩ tɩɩnɩ fugə-dɩtɔ mʋ, dɩdaanɩ dɩ nawuurə yam.
7 Kʋ ta wǝli dɩ Ayin, dɩ Rimɔn, dɩ Etɛɛrɩ, dɩ Asan. Ba tɩɩnɩ dɩm kʋntʋ yɩ dɩna mʋ dɩ dɩ nawuurə yam maama. 8 Tɩ-balwa na gilimi tɩɩnɩ dɩm kʋntʋ tɩn dɛɛn tʋlɩ jagwiə seeni mʋ dɩ yi Baalatɩ-Beya mʋ. Rama mʋ kʋntʋ.
Tɩga kam kʋntʋ mʋ ba dɛɛn pɛ Simeyon dwi dɩm, sɔ-yuu maama dɩ kʋ nyɩm.
9 Zuda pʋpwara kam dɛɛn daga ka dwe ba nɔn-biə bam. Kʋntʋ ŋwaanɩ mʋ Simeyon dwi tiinə dɛɛn joŋi Zuda tɩga kam kadoŋ ba jɩga.
Zabulɔn dwi dɩm tɩga kam
10 Tɩga kam pʋpwara batɔ tu mʋ ba dɛɛn pɛ Zabulɔn dwi dɩm, sɔ-yuu maama dɩ kʋ nyɩm:
Ba tɩga kam dɛɛn tʋlɩ ka vu ka yi Saridi mʋ. 11 Ka sisəm dɩm tɔgɩ wa-zʋʋrɩ seeni ka yi Marala. Ka dɛɛn ta ma vu ka dwe Dabesɛtɩ, sɩ kʋ laan yi bu-tʋla kʋlʋ na wʋ Yokenɩam wa-puli seeni tɩn. 12 Kʋ nan na yɩ ba tɩga kam daa kakam kam, ka zɩgɩ Saridi nɩ mʋ ka yɔɔrɩ wa-puli seeni ka yi Kisilotɩ-Tabora sisəm, ka daarɩ ka ta yi Daberata dɩdaanɩ Yafɩa. 13 Ka ta tʋlɩ wa-puli seeni mʋ ka yi Gata-Hefera dɩdaanɩ Efakazina, yɩ ka laan pipiri ka da Nea seeni ka vu ka yi Rimɔn. 14 Ka sisəm dɩm jazɩm baŋa seeni pipiri mʋ dɩ jeeri Hanatona, sɩ dɩ vu dɩ kweeli Ifitah-Eli bolo kʋm nɩ.
15 Zabulɔn tɩɩnɩ dɛɛn yɩ fugə-dɩle mʋ dɩdaanɩ dɩ nawuurə yam maama. Ba tɩɩnɩ dɩm dɩdonnǝ mʋ tɩntʋ:
Katatɩ, dɩ Nahalali, dɩ Simirɔnɩ, dɩ Idala, dɩ Betelɩhɛm.
16 Tɩɩnɩ dɩm kʋntʋ dɩ dɩ nawuurə yam mʋ ba dɛɛn pɛ Zabulɔn dwi dɩm, dwi maama dɩ kʋ nyɩm.
Yisakaarɩ dwi dɩm tɩga kam
17 Kʋ na yɩ tɩga kam pʋpwara bana tu wʋm, ba dɛɛn kwe-ka ba pa Yisakaarɩ dwi dɩm mʋ, sɔ-yuu maama dɩ kʋ nyɩm. 18 Bantʋ laŋa kam ba dɛɛn na joŋi tɩn mʋ tɩntʋ:
Zizreyɛlɩ, dɩ Kesulɔtɩ, dɩ Sunem, 19 dɩ Hafarayim, dɩ Sion, dɩ Anaharata, 20 dɩ Rabita, dɩ Kision, dɩ Ebeza, 21 dɩ Remeta, dɩ En-Ganim, dɩ En-Hada, dɩ Bɛtɩ-Pazeza. 22 Ba sisəm dɩm ta ve dɩ dwe Tabɔɔrɩ piu kʋm, dɩ Sahazuma, dɩdaanɩ Bɛtɩ-Sɩmesa. Ka laan ma vu ka kweeli Zʋrdɛn bugə kam nɩ.
Yisakaarɩ dwi dɩm tɩɩnɩ dɩm nan yɩ fugə-dɩrdʋ mʋ, dɩ dɩ nawuurə yam. 23 Tɩɩnɩ dɩm kʋntʋ dɩ dɩ nawuurə yam mʋ ba dɛɛn pɛ Yisakaarɩ dwi dɩm, dwi maama dɩ kʋ nyɩm.
Asɛɛrɩ dwi dɩm tɩga kam
24 Asɛɛrɩ dwi dɩm dɛɛn ma joŋi tɩga kam pʋpwara banu tu, sɔ-yuu maama dɩ kʋ nyɩm. 25 Ba tɩɩnɩ dɩm nan ya yɩ:
Tɩga kam wa-zʋʋrɩ seeni sisəm dɩm dɛɛn yi Karmɛlɩ piu kʋm dɩdaanɩ Sihora-Libinata. 27 Ka ta ma gugwǝli ka vu wa-puli seeni ka yi Bɛtɩ-Dagon sɩ ka laan vu ka dwe Zabulɔn dwi dɩm laŋa kam ka daarɩ ka yi Ifitah-Eli bolo kʋm. Ba tɩga kam ta ve jazɩm baŋa seeni ka yi Bɛtɩ-Emeke, dɩ Neyɛli. Ka ma kɛ ka vu Kabuli, 28 dɩ Eboron, dɩ Rehɔbɩ, dɩ Hamon, dɩdaanɩ Kana, sɩ ka kɛ ka vu ka yi Sidɔn tɩʋ kamunu. 29 Ba sisəm ta ma pipiri dɩ yɔɔrɩ Rama seeni, dɩ tʋlɩ dɩ yi Tiiri, dɩ na yɩ tɩʋ kʋlʋ na lɔgɩ kʋ pɩ dɩ dam tɩn. Sisəm dɩm laan ma gugwǝli dɩ vu Hosa seeni, dɩ vu dɩ kweeli Mediterane nɩnɩʋ kʋm nɩ. Ba laŋa kam dɛɛn ta yi Mahalaba, dɩ Akisiba, 30 dɩ Wuma, dɩ Afɛkɩ, dɩ Rehɔbɩ.
Tɩɩnɩ dɩm dɛɛn yɩ fiinle-dɩle mʋ, dɩ dɩ nawuurə yam maama. 31 Tɩɩnɩ dɩm kʋntʋ dɩ dɩ nawuurə yam mʋ ba dɛɛn pɛ Asɛɛrɩ dwi dɩm, sɔ-yuu maama dɩ kʋ nyɩm.
Nɛfitali dwi dɩm tɩga kam
32 Nɛfitali dwi dɩm mʋ dɛɛn joŋi tɩga kam pʋpwara bardʋ tu wʋm, sɔ-yuu maama dɩ kʋ nyɩm.
33 Ba sisəm dɩm ma zɩgɩ Helefa nɩ dɩ yi tiu kʋlʋ na zɩgɩ Zaananim nɩ tɩn. Dɩ ta tʋlɩ dɩ vu Adami-Nɩkebɩ dɩ Yabenelɩ mʋ sɩ dɩ yi Lakum, yɩ dɩ laan kweeli Zʋrdɛn bugə kam nɩ. 34 Dɩ daa ma gugwǝli wa-zʋʋrɩ seeni dɩ vu Azanotɩ-tabora, dɩ Hukoka. Ba tɩga kam jagwiə seeni dɛɛn dwe Zabulɔn dwi dɩm laŋa kam mʋ. Asɛɛrɩ laŋa kam ma jeeri ka wa-zʋʋrɩ seeni. Zʋrdɛn bugə kam dɩ jeeri wa-puli seeni.
35 Ba tɩɩnɩ dɩntʋ mʋ lɔgɩ dɩ pɩ dɩ dam: Zidim, dɩ Zara, dɩ Hammatɩ, dɩ Rakatɩ, dɩ Kinɩretɩ, 36 dɩ Adam, dɩ Rama, dɩ Hazora, 37 dɩ Kedɛsɩ, dɩ Ederi, dɩ En-Hazora, 38 dɩ Yiron, dɩ Migadal-Eli, dɩ Horem, dɩ Bɛtɩ-Anata, dɩ Bɛtɩ-Sɩmesa.
Dɩ dɛɛn yɩ tɩɩnɩ fugə-nʋgʋ mʋ, dɩdaanɩ dɩ nawuurə yam maama. 39 Tɩɩnɩ dɩm kʋntʋ dɩ dɩ nawuurə yam mʋ ba dɛɛn pɛ Nɛfitali dwi dɩm, sɔ-yuu maama dɩ kʋ nyɩm.
Dan dwi dɩm tɩga kam
40 Dan dwi dɩm nan mʋ joŋi tɩga kam pʋpwara barpɛ tu wʋm, sɔ-yuu maama dɩ kʋ nyɩm. 41 Tɩɩnɩ dɩntʋ wʋ bantʋ laŋa nɩ mʋ:
Zʋra, dɩ Esatola, dɩ Irasemesa, 42 dɩ Saalabin, dɩ Ayalɔn, dɩ Itala, 43 dɩ Elɔnɩ, dɩ Timna, dɩ Ekoron, 44 dɩ Elɩtekɩ, dɩ Gibeton, dɩ Baalatɩ, 45 dɩ Yehudi, dɩ Bene-Berakɩ, dɩ Gatɩ-Rimɔn, 46 dɩ Yarkɔn, dɩ Rakon, dɩ je sɩlʋ maama na jeeri Zope tɩn.
47 Dan dwi dɩm nan ya gɛ ba tɩga kam mʋ. Kʋ ma pa ba fɩn ba vu ba jeeri Lesem tiinə bam dɩ najara. Ba ma di-ba yɩ ba joŋi ba tɩga kam ba zʋʋrɩ ka wʋnɩ. Dan dwi tiinə laan maa bǝi tɩga kam yɩrɩ nɩ Dan, sɩ kʋ maŋɩ dɩ ba nabaarʋ wʋm yɩrɩ dɩm.
48 Tɩɩnɩ dɩm kʋntʋ dɩ dɩ nawuurə yam mʋ ba dɛɛn pɛ Dan dwi dɩm, sɔ-yuu maama dɩ kʋ nyɩm.
Zozwe tɩga kam
49 Yisɩrayɛlɩ tiinə bam nan ya na pɔɔrɩ tɩga kam ba pa daanɩ tɩn, ba dɛɛn daarɩ laŋa kadoŋ mʋ ba pa Nun bu Zozwe sɩ o taa te. 50 Baŋa-Wɛ nan maŋɩ DƖ pa-ba ni mʋ sɩ ba kwe mɛ maama Zozwe na wʋ́ kuri tɩn ba pa‑o. O ma kuri Timinatɩ-Sɩra na wʋ Efrayim pweeru laŋa kam nɩ tɩn, yɩ ba kwe-kʋ ba pa‑o. O ma fɔgɩ o lɔ tɩʋ kʋm kʋntʋ o zʋʋrɩ kʋ wʋnɩ.
51 Kʋ dɛɛn na kɩ te Wɛ jeerim vwe dɩm na wʋ Siloo nɩ kʋntʋ tɩn, kʋ nan yɩ Wɛ kaanɩm tu Eleyazaarɩ, dɩ Zozwe, dɩ Yisɩrayɛlɩ sɔ-yuni yigǝ tiinǝ bam mʋ zɩgɩ Baŋa-Wɛ yigə nɩ ba pɔɔrɩ pɔɔrɩ tɩga kam ba pa daanɩ.a Ba ma pɔɔrɩ-ka ba ti, pa Yisɩrayɛlɩ dwi maama joŋi ba tɩga.