Ba pɔɔrɩ tɩga kadoŋ kam
18
Kʋ na wǝli fɩɩn yɩ Yisɩrayɛlɩ tiinə bam laan joŋi Kaanan tɩga kam maama ba te tɩn, mʋ ba kɔgɔ kʋm maama jeeri Siloo nɩ. Ba ma cwi Baŋa-Wɛ jeerim vwe dɩm daanɩ. 2 Ba ya ta wʋ pɔɔrɩ tɩga ba pa Yisɩrayɛlɩ kɔ-fɔrɔ kʋm wʋ dwiə yarpɛ sɩ ba taa te.3 Zozwe ma bwe Yisɩrayɛlɩ tiinə bam o wɩ: «Dɛ dɔɔ mʋ abam bʋŋɩ sɩ á vu á joŋi tɩga kam á nabaara Baŋa-Wɛ dɩm na maŋɩ o kwe DƖ pa abam tɩn á taá te? 4 Kuri-na nɔɔna batɔ batɔ sɩ ba nuŋi Yisɩrayɛlɩ dwi maama wʋnɩ. Amʋ wʋ́ tʋŋɩ-ba sɩ ba vu ba beeri tɩga kam mɛ dɩ mɛ ba wʋbʋŋa na dɛ tɩn nɩ. Ba na pʋpʋnɩ kʋlʋ maama ba yi na su tɩn ba tiŋi, sɩ ba joori ba ja-tɩ ba ba ba brɩ-nɩ. 5 Zuda dwi dɩm wʋ́ maŋɩ ba tɩga kam na wʋ jagwiə seeni tɩn nɩ. Zʋzɛfʋ dwi tiinə dɩ maa wʋ́ taa wʋ jazɩm baŋa seeni dɩ ba tɩga kam. Dɩ́ wʋ́ pɔɔrɩ tɩga kalʋ na daarɩ tɩn kuni bɩrpɛ mʋ. 6 Abam nan na pʋpʋnɩ tɩga kam pʋpwara bɩrpɛ kam na nyɩ te maama tɩn, sɩ á ja ka mɩmaŋa á ba á pa-nɩ. Amʋ laan wʋ́ ta jɔrɔ a pa abam sɩ Baŋa-Wɛ brɩ tɩga kam nyɩnyʋgʋ. 7 Nan yɩ swe-na nɩ Levi dwi tiinə bam bá tɔgɩ ba joŋi tɩga. Bantʋ kaanɩm tɩtʋŋa yam ba na tʋŋɩ ba pa Baŋa-Wɛ tɩn mʋ yɩ kʋlʋ Wɛ na pɔɔrɩ DƖ pa-ba tɩn. Kʋ nan na yɩ Gadɩ dwi dɩm, dɩ Ruban dwi dɩm dɩdaanɩ Manasɩ dwi cicoro kʋm, Baŋa-Wɛ tɩntʋŋnʋ Moyisi mʋ maŋɩ o pɔɔrɩ tɩga o pa-ba. Ka nan wʋ Zʋrdɛn bubɛ dɩlʋ na jeeri wa-puli seeni tɩn mʋ.»
8 Nɔɔna bam na kwe cwǝŋǝ sɩ ba vu ba maŋɩ tɩga kam tɩn, Zozwe ma ta dɩ ba o wɩ: «Ve-na á maanɩ tɩga kam lanyɩranɩ sɩ á pʋpʋnɩ ka mɩmaŋa na yɩ te tɩn. Abam laan maa wʋ́ joori Siloo yo seeni. Amʋ dɩ wʋ́ ta jɔrɔ Baŋa-Wɛ yigə nɩ a pa abam.»
9 Nɔɔna bam ma sɩɩnɩ ba kɩ kʋntʋ. Ba nɔnɩ tɩga kam ni maama mʋ ba ja, yɩ ba ta pɔɔrɩ-ka laŋa dɩ laŋa kuni bɩrpɛ. Ba ma pʋpʋnɩ ba brɩ laŋa maama na yɩ te tɩn dɩ ka tɩɩnɩ. Ba na ti tɩn, mʋ ba joori Zozwe dɩ nɔn-kɔgɔ kʋm maama te Siloo nɩ. 10 Zozwe ma ta jɔrɔ sɩ o lwarɩ Baŋa-Wɛ na lagɩ sɩ tɩga kam pɔɔrɩ ka pa-ba te tɩn. O laan ma pɔɔrɩ pɔɔrɩ tɩga kam o pa Yisɩrayɛlɩ dwiə yalʋ na daarɩ tɩn maama.
Bɛnzamɛn dwi dɩm tɩga kam
11 Ba na tagɩ jɔrɔ tɩn, Bɛnzamɛn dwi dɩm mʋ puli sɩ ba na ba tɩga kam pʋpwara, sɔ-yuu maama dɩ kʋ nyɩm. Ba tɩga kam dɛɛn wʋ Zuda dwi dɩm dɩ Zʋzɛfʋ dwi dɩm tɩga tɩtarɩ nɩ mʋ.
12 Ka jazɩm baŋa seeni sisəm dɩm zɩgɩ Zʋrdɛn bugə kam nɩ mʋ dɩ din Zeriko baŋa. Ba tɩga kam daa ma tɔgɩ wa-zʋʋrɩ seeni ka kwe pweeru laŋa kam ka vu ka yi Bɛt-Avɛn kagʋa kam. 13 Sisəm dɩm zɩgɩ dáanɩ dɩ vu dɩ kɛ Luuzi jagwiə seeni mʋ. Betɛlɩ mʋ kʋntʋ. Ka ta kɛ ka yi Atarotɩ-Adara mʋ. Tɩʋ kʋm kʋntʋ wʋ piu baŋa nɩ mʋ, kʋ na wʋ Bɛte-Horon jagwiə seeni tɩn. 14 Ka ma pipiri ka kwe piu kʋm wa-zʋʋrɩ seeni daa kam ka duri ka vu jagwiə seeni, ka maa ve Kiriatɩ-Baal. Kiriaf-Jeerim mʋ kʋntʋ. Kʋ maa yɩ Zuda dwi tiinə nyɩm. Bɛnzamɛn wa-zʋʋrɩ seeni sisəm dɩm mʋ kʋntʋ.
15 Kʋ nan na yɩ ba jagwiə seeni sisəm dɩm, dɩ dɛɛn puli Kiriaf-Jeerim ni nɩ mʋ dɩ vu dɩ yi Nefatʋa buli-yiə yam seeni. 16 Ka ta vu ka yi piu kʋlʋ na wʋ Refayim bolo kʋm jazɩm baŋa seeni yɩ kʋ tʋlɩ kʋ nii Hinom bolo kʋm təŋə tɩn. Sisəm dɩm ta tu dɩ tɔgɩ bolo kʋm dɩ tu jagwiə dɩ kɛ Yebusi tiinə tɩʋ kʋm jagwiə seeni, dɩ yi En-Rogelɩ. 17 Ba tɩga kam zɩgɩ dáanɩ ka diini jazɩm baŋa seeni mʋ yɩ sisəm dɩm gugwǝli dɩ yi En-Sɩmesa, dɩ Gelilɔtɩ. Je sɩm kʋntʋ lɛɛnɩ Adumim zɔŋɔ kʋm mʋ. Sisəm dɩm daa ta ma kɛ dɩ yi Bohan Kandwɛ dɩm. Bohan dɛɛn yɩ Ruban bu mʋ. 18 Sisəm dɩm ma kɛ Bɛtɩ-Araba zɔŋɔ kʋm jazɩm baŋa seeni dɩ tu dɩ zʋ Zʋrdɛn bolo kʋm wʋnɩ. 19 Tɩga kam laan ma tʋlɩ ka gaalɩ Bɛtɩ-Hogɩla jazɩm baŋa seeni zɔŋɔ kʋm, ka vu ka kweeli Yɛ nɩnɩʋ kʋma jazɩm baŋa seeni bubɛ dɩm nɩ, Zʋrdɛn bugə kam na ve ka guri mɛ tɩn mʋ. Dɩntʋ nan mʋ yɩ Bɛnzamɛn kuri seeni sisəm dɩm.
20 Zʋrdɛn bugə kam tɩtɩ mʋ yɩ Bɛnzamɛn tɩga kam wa-puli seeni sisəm dɩm. Sisənə yalʋ ba dɛɛn na pɔɔrɩ sɩ Bɛnzamɛn dwi dɩm taa jɩgɩ tɩn mʋ kʋntʋ.
21 Bɛnzamɛn dwi dɩm dɛɛn joŋi tɩɩnɩ dɩntʋ mʋ, sɔ-yuu maama dɩ kʋ nyɩm:
Zeriko, Bɛtɩ-Hogɩla, Emeki-Kesizi, 22 Bɛtɩ-Araba, Zemarayim, Betɛlɩ, 23 Awim, Zəli, Ofera, 24 Kefarɩ-Amoni, Ofini, Geba. Dɩ dɛɛn yɩ tɩɩnɩ fugə-dɩle mʋ dɩdaanɩ dɩ nawuurə yam.
25 Kʋ ta wǝli dɩ Gabawɔn, Rama, Beerotɩ, 26 Mitspa, Kefira, Moza, 27 Rekem, Irapeela, Tarala, 28 Zɩla, Hayelefa, Yebusi tiinə tɩʋ Zeruzalɛm, Gibea, Kiriaf-Jeerim.
Dɩntʋ nan ya yɩ tɩɩnɩ fugə-dɩna mʋ dɩdaanɩ dɩ nawuurə yam maama. Tɩga kam kʋntʋ mʋ ba dɛɛn pɛ Bɛnzamɛn dwi dɩm, pa sɔ-yuu maama na kʋ nyɩm.