Manasɩ dwi dɩm tɩga kam
17
Ba dɛɛn ma kɩ tɩga kam je sɩdoŋ ba pa Manasɩ dwi dɩm. Manasɩ dɛɛn yɩ Zʋzɛfʋ bu-kwɩan mʋ, o dɩ bu-kwɩan ya maa yɩ Makira. Wʋntʋ dɛɛn yɩ nɔn-babɩa mʋ. O maa yɩ Galadɩ tiinə ko. O ya maŋɩ o joŋi Galadɩ dɩ Basan laŋa kam na wʋ Zʋrdɛn bugə kam wa-puli seeni tɩn mʋ. 2 Kʋ nan na yɩ dwiə yadonnə na nuŋi Manasɩ yɩra nɩ tɩn, ba dɛɛn pɔɔrɩ tɩga Zʋrdɛn bugə kam wa-zʋʋrɩ seeni mʋ ba pa-ba, dwi maama dɩ kʋ nyɩm. Bantʋ maa yɩ: Abizeri, dɩ Heleke, dɩ Asireli, dɩ Sishɛm, dɩ Hefɛrɩ, dɩdaanɩ Semida. Baara balʋ na yɩ Zʋzɛfʋ bu Manasɩ biə tɩn mʋ kʋntʋ.3 Hefɛrɩ bu Zelofadɩ dɛɛn lʋgɩ bukwa banu mʋ yɩ o ba jɩgɩ bəkərə.a O nabaara maa yɩ Galadɩ dɩ Makira. Ba yɩ Manasɩ dwi dɩm tiinə mʋ. Zelofadɩ bukwa bam yɩra mʋ yɩ: Maala, dɩ Nʋa, dɩ Hogɩla, dɩ Milka, dɩdaanɩ Tirisa.
4 Kaana bam kʋntʋ ma zaŋɩ ba vu Yisɩrayɛlɩ nakwa bam te, dɩ Eleyazaarɩ na yɩ Wɛ kaanɩm tu tɩn dɩ Zozwe dɩ te. Ba ma ta dɩ ba ba wɩ: «Baŋa-Wɛ dɛɛn pɛ Moyisi ni sɩ DƖ na lagɩ DƖ kɩ tɩga DƖ pa dɩ́ dwi dɩm baara bam, sɩ DƖ pɔɔrɩ ka wʋnɩ DƖ pa dɩbam dɩ.» Zozwe ma kɩ o tɔgɩ Baŋa-Wɛ ni dɩm. O ma pa-ba tɩga sɩ ba taa te, nɩnɛɛnɩ o dɛɛn na kɩ te dɩ ba baara bam tɩn. 5-6 Manasɩ dwi dɩm dɛɛn nɛ je kuni fugə mʋ tɩga kam pɔɔrɩm baŋa nɩ, sɩ kʋ wǝli dɩ ba ya na maŋɩ ba jɩgɩ tɩga kalʋ Zʋrdɛn bubɛ dɩdoŋ dɩm seeni tɩn. Galadɩ dɩ Basan laŋa kam mʋ kʋntʋ. Kʋ nan yɩ Manasɩ dwi dɩlʋ na yɩ kaana tɩn dɩ dɛɛn na joŋi tɩga nɩnɛɛnɩ ba baara bam na joŋi te tɩn ŋwaanɩ mʋ kʋ yɩ kʋntʋ.
7 Manasɩ dwi dɩm laŋa kam ma zɩgɩ Asɛɛrɩ dwi dɩm sisəm nɩ, sɩ kʋ taa ve Mikimeta na wʋ Sishɛm wa-puli seeni tɩn mʋ. Sisəm dɩm ta zɩgɩ Mikimeta nɩ mʋ dɩ tu jagwiə seeni, dɩ yi Tapua tiinə na zʋʋrɩ mɛ tɩn. 8 Tɩga kalʋ na gilimi Tapua tɩʋ tɩn nan yɩ Manasɩ dwi dɩm nyɩm mʋ, yɩ Tapua tɩʋ kʋm tɩtɩ yɩ Efrayim nyɩm. Kʋ dɛɛn je Manasɩ sisəm baŋa nɩ mʋ. 9 Ba laŋa sisəm dɩm ta tʋlɩ jagwiə seeni mʋ dɩ yi Kana bu-tʋla kam nɩ. Dɩ ma tɔgɩ bu-tʋla kam jazɩm baŋa seeni kʋntʋ kʋ vu kʋ zʋ Mediterane nɩnɩʋ kʋm wʋnɩ. Tɩɩnɩ dɩdonnǝ maa na tɔgɩ bu-tʋla kam jagwiə seeni tɩn dɛɛn yɩ Efrayim tɩɩnɩ mʋ, yɩ dɩ wʋ Manasɩ sisəm wʋnɩ. 10 Efrayim tɩga kam wʋ bu-tʋla kam jagwiə seeni mʋ. Manasɩ tɩga kam maa wʋ kʋ jazɩm baŋa seeni, yɩ Mediterane nɩnɩʋ kʋm je kʋ wa-zʋʋrɩ seeni. Asɛɛrɩ dwi dɩm tɩga wʋ jazɩm baŋa seeni mʋ, yɩ Yisakaarɩ dwi dɩm tɩga wʋ wa-puli seeni.
11 Tɩɩnɩ dɩdonnǝ dɛɛn yɩ Manasɩ dwi dɩm nyɩm mʋ, yɩ dɩ wʋ Yisakaarɩ dɩdaanɩ Asɛɛrɩ dwiə yam tɩga baŋa nɩ. Dɩ maa yɩ: Bɛtɩ-San, dɩ Ibɩleyam, dɩ Dora tiinə (Nafɔtɩ-Dora mʋ kʋntʋ), dɩ Eyin-Dɔɔrɩ, dɩ Taanakɩ dɩdaanɩ Megido, kʋ ta wǝli dɩ dɩntʋ nawuurə yam dɩ.
12 Manasɩ dwi tiinə nan wʋ wanɩ ba zəli balʋ na zʋʋrɩ tɩɩnɩ dɩm kʋntʋ nɩ tɩn. Kʋ ma pa Kaanan tiinə bam dɩ yɔɔrɩ ba zʋʋrɩ dɩ wʋnɩ. 13 Yisɩrayɛlɩ tiinə bam maa na tu ba dana maŋa kalʋ tɩn, ba ta wʋ zəli Kaanan tiinə bam. Ba dɛɛn jɩgɩ-ba ba pa ba tʋŋɩ tɩtʋŋ-cɛɛra mʋ ba pa-ba.
Zʋzɛfʋ dwi tiinə loori Zozwe ba tɩga kam ŋwaanɩ
14 Kʋ na wʋra kʋ wʋra tɩn, Zʋzɛfʋ dwi tiinə ma vu ba loori Zozwe ba wɩ: «Bɛɛ mʋ kɩ yɩ n pa dɩbam tɩga kam pɔɔrɩm dɩdʋa yɩranɩ sɩ dɩ́ taa te? Nii Baŋa-Wɛ na tiini DƖ kɩ dɩbam yu-yoŋo pa dɩ́ kɔgɔ kʋm daga te!»
15 Zozwe dɩ ma lǝri-ba o wɩ: «Abam na daga kʋntʋ yɩ á maanɩ nɩ Efrayim pweeru laŋa kam muri sɩ á pɔɔrɩ-ka á pa daanɩ tɩn, nan zʋ-na Perezi tiinə dɩdaanɩ Refayim tiinə kagʋa kam wʋnɩ. Dáanɩ mʋ abam wʋ́ wanɩ á dɩ tweeru yɩ á daarɩ á cɛ gulə sɩ tɩga taa wʋra ka pa abam.» 16 Ba daa ma lǝr-o ba wɩ: «Pweeru laŋa kam sɩɩnɩ ka muri dɩbam zanzan. Dɩ́ ta maa bá wanɩ dɩ́ jeeri Kaanan tiinə balʋ na zʋʋrɩ bwəəlu tɩm nɩ tɩn dɩ́ zəli. Bantʋ maɩ luuru mʋ ba ma kɩ tərikooru ba jɩgɩ ba kɩ ba najara, kʋ na yɩ balʋ na zʋʋrɩ Bɛtɩ-San seeni dɩ balʋ na wʋ Zizreyɛlɩ bwəəlu tɩm nɩ tɩn maama dɩ.»
17 Zozwe ma ta dɩ Efrayim dwi dɩm dɩ Manasɩ dwi dɩm o wɩ: «Abam sɩɩnɩ á yɩ nɔn-kɔgɔ mʋ yɩ á jɩgɩ dam. Abam nan wʋ́ wanɩ á na tɩga a wǝli a tɩga kam nɩ. 18 Pweeru seeni laŋa kam na yɩ kagʋa tɩn maŋɩ sɩ á kwe á pɔɔrɩ á pa daanɩ mʋ. Ve-na daanɩ á zagɩ gulə á na lagɩ te maama tɩn. Kʋ nan na yɩ Kaanan tiinə balʋ na zʋʋrɩ je sɩm kʋntʋ nɩ yɩ ba jɩgɩ dam, pa ba taa jɩgɩ jara-kǝm tərikooru tɩn maama dɩ, á wʋ́ wanɩ-ba á zəli á daarɩ ba tɩga kam á taá te.»