Efrayim dwi dɩ Manasɩ dwi taanɩ
16
Ba dɛɛn na kuri tɩga kalʋ ba pa Zʋzɛfʋ dwi dɩm tɩn puli Zʋrdɛn bugə kam nɩ, ka na bwələ dɩ Zeriko mɛ tɩn mʋ. Ka zɩgɩ Zeriko buli-yiə yam wa-puli seeni mʋ, ka tɔgɩ kagʋa kam nɩ ka kɛ ka yi Betɛlɩ tɩʋ kʋm na wʋ pweeru laŋa kam nɩ tɩn. 2 Ka na zɩgɩ Betɛlɩ nɩ tɩn, ka tɔgɩ Luuzi yɩ ka tʋlɩ ka zʋ Atarɔtɩ, Ariki tiinə bam na zʋʋrɩ mɛ tɩn mʋ. 3 Ka laan ma tu wa-zʋʋrɩ seeni ka yi Yafeleti tiinə je sɩm, sɩ kʋ taa ve Bɛte-Horon jagwiə seeni. Ka daa ta ma kɛ ka vu Gezɛrɩ, sɩ ka vu ka kweeli Mediterane nɩnɩʋ kʋm ni nɩ.4 Kʋ dɛ kʋntʋ mʋ yɩ Manasɩ dɩ Efrayim joŋi ba tɩga kam pɔɔrɩm dɩm. Zʋzɛfʋ biə bale bam mʋ kʋntʋ.
Efrayim dwi dɩm tɩga kam
5 Laŋa kantʋ mʋ ba dɛɛn pɔɔrɩ ba pa Efrayim dwi dɩm, dwi maama dɩ kʋ nyɩm:
Ba tɩga kam na jeeri wa-puli seeni tɩn zɩgɩ Atarotɩ-Adara nɩ mʋ. Ka laan ma tʋlɩ kʋntʋ, ka di Bɛte-Horon jazɩm baŋa seeni, 6 yɩ kʋ kɛ kʋ yi Mediterane nɩnɩʋ kʋm. Sɩ kʋ na yɩ jazɩm baŋa seeni sisəm dɩm, tɩga kam yi Mikimeta mʋ. Ka laan ma gugwǝli wa-puli seeni ka kɛ ka yagɩ Tanata-Silo, ka gaalɩ daanɩ ka yi Yanoa na wʋ wa-puli seeni tɩn. 7 Tɩga kam daa zɩgɩ Yanoa nɩ kʋntʋ ka vu Atarɔtɩ dɩ Naara seeni mʋ. Ka ma daarɩ ka yi Zeriko, yɩ ka laan vu ka kweeli Zʋrdɛn bugə kam nɩ. 8 Kʋ na zɩgɩ Tapua nɩ tɩn, tɩga kam sisəm yalɩ mʋ dɩ vu wa-zʋʋrɩ seeni. Dɩ ma tɔgɩ Kana bu-tʋla kam dɩ vu dɩ kweeli Mediterane nɩnɩʋ kʋm ni nɩ. Mʋ tɩga kalʋ Efrayim dwi dɩm dɛɛn na joŋi sɩ ba taa te tɩn mʋ kʋntʋ, dwi maama dɩ kʋ nyɩm. 9 Efrayim tiinə bam dɛɛn ta joŋi tɩɩnɩ dɩdonnǝ na wʋ Manasɩ dwi dɩm laŋa kam wʋnɩ mʋ.
10 Kaanan tiinə dɛɛn ya zʋʋrɩ Gezɛrɩ tɩʋ wʋnɩ yɩ Efrayim tiinə bam wʋ zəli-ba. Bantʋ dɩ Efrayim tiinə bam maa zʋʋrɩ daanɩ dɩ zɩm maama. Efrayim tiinə bam dɛɛn za fɩn-ba mʋ, sɩ ba taa tʋŋɩ tɩtʋŋ-cɛɛra.