Tigurə seeni taanɩ
20
«Á na nuŋi sɩ á zaŋɩ najara dɩ á dʋna, yɩ á na nɛ nɩ ba jar-kərə, dɩ ba tərikooru, dɩ ba siseŋ-nɔɔna daga tɩ dwe abam, yɩ kwarɩ-na fʋʋnɩ. Á Tu Baŋa-Wɛ dɩm na vrɩ abam Ezipi tiinə jɩŋa nɩ tɩn wʋ́ taa wʋ á tee nɩ. 2 Á na nuŋi sɩ á kɩ najara yam, Wɛ kaanɩm tu mʋ wʋ́ nuŋi o zɩgɩ á yigə nɩ o ta dɩ jar-kərə bam o wɩ:3 ‹Cəgi-na, Yisɩrayɛlɩ tiinə bam, á zɩm na lagɩ á zaŋɩ najara dɩ á dʋna tɩn, yɩ kwarɩ-na fʋʋnɩ. Nan yɩ pa-na sɩ á yɩra ta saɩ, naa sɩ á vwana parɩ. 4 Abam Tu Baŋa-Wɛ dɩm mʋ lagɩ DƖ da á yigə DƖ ja najara yam DƖ pa abam, sɩ á wanɩ á dʋna á di.›a
5 Kʋ kwaga nɩ jar-kərə dɩdɛɛra bam wʋ́ zaŋɩ ba ta dɩ nɔɔna bam maama ba wɩ:
‹Abam wʋlʋ maama na lɔgɩ digə yɩ o ta wʋ loori Wɛ yu-yoŋo o yagɩ ka baŋa nɩ, sɩ kʋ tu joori sɔŋɔ! Kʋ tu na zʋ najara wʋnɩ yɩ o tɩ, nɔn-gaa mʋ wʋ́ joŋi-ka o taa te.
6 Abam wʋlʋ nan na puli o vinyə tweeru gaarɩ yɩ o ta wʋ nɛ cwǝŋǝ sɩ o di tiu biə bam ywəəni, sɩ kʋ tu dɩ joori sɔŋɔ! Kʋ tu na zʋ najara wʋnɩ yɩ o tɩ, nɔn-gaa mʋ wʋ́ vu o di tiu biə bam.
7 Abam wʋlʋ dɩ na jɩgɩ bɔɔlʋ, yɩ o ta wʋ di-o o ma o kɩ kaanɩ, sɩ kʋ tu joori sɔŋɔ! Kʋ tu dɩ na zʋ najara wʋnɩ yɩ o tɩ, nɔn-gaa mʋ wʋ́ di kaanɩ wʋm.›
Dɩdɛɛra bam ta wʋ́ ta ba wǝli da ba wɩ:
8 ‹Abam wʋlʋ baarɩ na je yɩ fʋʋnɩ jɩg-o, kʋ tu joori sɔŋɔ, sɩ o yɩ pa nɔɔna badonnǝ bam wʋʋ lɩɩrɩ.› 9 Dɩdɛɛra bam na ŋɔɔnɩ tɩntʋ ba ti, ba laan wʋ́ kuri yigǝ tiinǝ sɩ ba taa nii jar-kərə bam pʋpwara maama baŋa nɩ.
10 Abam na yǝni á lagɩ á zaŋɩ najara dɩ tɩʋ kʋlʋ, pa-na kʋ nɔn-biə bam pwələ sɩ ba loori yibwənə abam tee nɩ. 11 Ba na sɛ ba pa abam yɩ ba pʋrɩ ba tɩʋ kʋm ni sɩ á wanɩ á zʋ, á wʋ́ fɩn tɩʋ kʋm nɔɔna bam maama sɩ ba taa tʋŋɩ tɩtʋŋ-cɛɛra ba pa abam. 12 Kʋ daarɩ tɩʋ kʋm nɔɔna na vɩn, yɩ ba daarɩ ba zaŋɩ najara dɩ abam, kʋ maŋɩ sɩ á kaagɩ-kʋ mʋ á pu. 13 Á Tu Baŋa-Wɛ dɩm na kɩ tɩʋ kʋm kʋntʋ á jɩŋa nɩ sɩ á wanɩ-kʋ, sɩ á gʋ baarʋ wʋlʋ maama na wʋ kʋ wʋnɩ tɩn. 14 Kʋ nan na yɩ kaana bam, dɩ biə bam, dɩ vara bam, á waɩ á kuri ba wʋnɩ sɩ á kwe á pa á tɩtɩ, kʋ wǝli dɩ jɩjɩgɩrʋ tɩlʋ maama na wʋ tɩʋ kʋm nɩ tɩn. Á jɩgɩ cwǝŋǝ sɩ á kwe kʋlʋ maama na yɩ á dʋna nyɩm tɩn á taá jɩga. Kʋ yɩ Baŋa-Wɛ mʋ kwe-tɩ DƖ pa abam. 15 Mʋ abam na wʋ́ tʋŋɩ te dɩ tɩɩnɩ dɩlʋ na yɩ yigə yigə, yɩ dɩ daɩ tɩga kantʋ tɩɩnɩ mɛ nɩ abam na wʋ́ zʋ tɩn.
16 Kʋ daarɩ kʋ na yɩ tɩɩnɩ dɩlʋ á Tu Baŋa-Wɛ dɩm na lagɩ DƖ pa abam sɩ á taá te tɩn, á maŋɩ sɩ á gʋ nɔɔna balʋ maama dɩ vara balʋ maama na wʋ dɩ wʋnɩ tɩn mʋ. 17 Yɔɔrɩ á cɔgɩ ba maama fasɩ Wɛ ŋwaanɩ. Kʋ na yɩ Hɛtɩ tiinə, dɩ Amɔɔrɩ tiinə, dɩ Kaanan tiinə, dɩ Perezi tiinə, dɩ Hevi tiinə, dɩ Yebusi tiinə bam maama, sɩ á cɔgɩ-ba nɩ Baŋa-Wɛ na pɛ abam ni sɩ á kɩ te tɩn. 18 Kʋ na daɩ kʋntʋ, baá pa á kɩ lwarɩm á cɔgɩ á Tu Baŋa-Wɛ yigə yɩ á lwǝni tɩtʋŋ-zɔɔna yalʋ ba na tʋŋɩ ba ma zuli ba jwǝnǝ yam tɩn mʋ.
19 Abam na ve á zaŋɩ najara dɩ tɩʋ kʋdoŋ, yɩ á na kaagɩ-kʋ á pu á daanɩ, yɩ zagɩ-na tweeru tɩlʋ na wʋ tɩʋ kʋm ni nɩ tɩn á dɩ tɩga nɩ. Á jɩgɩ cwǝŋǝ sɩ á di tɩ tiu biə bam, sɩ á yɩ cɔgɩ tweeru tɩm. Tweeru tɩm daɩ á dʋna sɩ á zaŋɩ najara dɩ dɩntʋ. 20 Kʋ nan na yɩ tweeru tɩlʋ á na ye nɩ dɩ ba ləri biə tɩn, á jɩgɩ cwǝŋǝ sɩ á zagɩ-tɩ yɩ á daarɩ á kwe dɛ sɩm á ma á kɩ jara zɩla yalʋ na wʋ́ wǝli abam sɩ á kaagɩ tɩʋ kʋm á pu sɩ á laan wanɩ kʋ nɔn-biə bam tɩn.»