Nɔn-gʋra taanɩ
21
«Abam na tu á zʋʋrɩ tɩga kalʋ wʋnɩ á Tu Baŋa-Wɛ dɩm na lagɩ DƖ pa abam sɩ á taá te tɩn, á na nɛ ba na gʋ nɔɔnʋ gaa wʋnɩ yɩ á yǝri wʋlʋ na gʋ-o tɩn, 2 á nakwa dɩ balʋ na nii taana baŋa nɩ tɩn mʋ wʋ nuŋi ba vu ba maŋɩ tʋʋ wʋm na tigi mɛ tɩn sɩ kʋ vu yi tɩɩnɩ dɩlʋ na bwələ dɩ ka jǝgǝ kam tɩn. 3 Tɩʋ kʋlʋ na yɩ bwələ bwələ dɩ jǝgǝ kam tɩn nakwa bam laan maa wʋ́ lagɩ na-cwɛn dɩlʋ ba ta na wʋ mɛ ba tʋŋɩ tɩn. 4 Ba maŋɩ sɩ ba ja naa kʋm ba vu bolo kʋlʋ nɔɔna ta na wʋ vagɩ naa ba du wʋdiiru da yɩ bugə kalʋ na na buri tɩn wʋra. Dáanɩ mʋ baá jujugi kʋ ban ba bwəri. 5 Levi dwi kaanɩm tiinə dɩ maŋɩ sɩ ba taa wʋra mʋ sɩ ba nii tɩtʋŋɩ dɩm. Bɛŋwaanɩ á Tu Baŋa-Wɛ dɩm kuri bantʋ mʋ sɩ ba taa tʋŋɩ ba pa‑DƖ ba daarɩ ba taa loori Wɛ sɩ DƖ kɩ DƖ nɔɔna bam lanyɩranɩ. Baŋa-Wɛ pɛ-ba dam sɩ ba kwɛ taanɩ dɩlʋ maama na jɩgɩ ni-kantɔgɔ naa zʋnnɩ kǝm tɩn. 6 Tɩʋ kʋlʋ na bwələ dɩ jǝgǝ kam tɩn nakwa bam laan maa wʋ́ sanɩ ba jɩan na-tɩkʋ kʋm baŋa nɩ, 7 yɩ ba ta jaja ba wɩ: ‹Kʋ daɩ dɩbam mʋ gʋ nɔɔnʋ wʋm. Dɩ́ yiǝ nan wʋ nɛ wʋlʋ na tʋŋɩ dɩntʋ tɩtʋŋɩ dɩm tɩn. 8 Baŋa-Wɛ, dɩ́ loori‑m sɩ n yagɩ Yisɩrayɛlɩ tiinə tusim n ma n cɛ-ba, sɩ dɩ́ yɩ nmʋ nɔɔna mʋ nmʋ na vrɩ n yagɩ tɩn. Nɔɔnʋ wʋntʋ na wʋ kɩ kʋlʋkʋlʋ yɩ ba gʋ-o tɩn, yɩ pa kʋ taa wʋ dɩbam yuu nɩ.› Ba na tagɩ kʋntʋ, Baŋa-Wɛ wʋ́ yagɩ kǝm-balɔrɔ kʋm DƖ ma cɛ abam. 9 Á na tɔgɩ ni dɩlʋ Baŋa-Wɛ na pɛ abam tɩn, á wʋ́ saarɩ lwarɩm dɩm á tɩtarɩ nɩ, yɩ o tʋʋnɩ dɩm bá taa wʋ á yuu nɩ.Kaana balʋ ba na vrɩ najara baŋa nɩ tɩn taanɩ
10 Abam na zaŋɩ najara dɩ á dʋna yɩ á Tu Baŋa-Wɛ dɩm kwe-ba DƖ kɩ á jɩŋa nɩ pa á wanɩ-ba yɩ á ja ba badonnǝ á ja viiri, 11 abam wʋlʋ na nɛ kaanɩ na lamma ba wʋnɩ yɩ n lagɩ sɩ n di n ma n kɩ kaanɩ, 12 n jɩgɩ cwǝŋǝ sɩ n ja kʋ tu n vu sɔŋɔ. O laan wʋ́ ceeri o yuu, yɩ o daarɩ o dɔɔrɩ o jafwa. 13 O maŋɩ sɩ o lɩ gwaarʋ tɩlʋ o ya na zʋ o tɩtɩ tɩʋ nɩ tɩn yɩ o ləri o zʋ tɩdonnǝ. O maa wʋ́ maŋɩ nmʋ sɔŋɔ nɩ cana dɩdʋa o keeri o ko dɩ o nu. Cana dɩdʋa kam kwaga nɩ n laan jɩgɩ cwǝŋǝ sɩ n pəni dɩd-o, n na pɛ o ji n kaanɩ tɩn ŋwaanɩ.
14 Kʋ na wʋra kʋ wʋra yɩ n daa n ba lag‑o, sɩ n yag-o sɩ o viiri zaanɩ. O jɩgɩ cwǝŋǝ sɩ o vu mɛ o na lagɩ tɩn. N na fɩ‑o pa o pəni dɩ nmʋ tɩn ŋwaanɩ, n bá wanɩ n yəg‑o n joŋi səbu naa n bɛɛs-o nɩ n gambaa te.
Bu-kwɩan taanɩ
15 Nɔɔnʋ wʋlʋ na jɩgɩ kaana bale pa ba maama lʋ bəkəri ba pa‑o, yɩ bu-kwɩan kam na maŋɩ o daɩ o ka-sono kʋm bu, 16 o na wʋ́ pɔɔrɩ o jɩjɩgɩrʋ tɩm o pa o biə bam te tɩn, o ba jɩgɩ cwǝŋǝ sɩ o kwe-tɩ o wǝli o ka-sono kʋm bu wʋm dɩ pɛɛrɩ dɩlʋ na yɩ bu-kwɩan kam nyɩm tɩn. 17 O nan maŋɩ sɩ o zɩgɩ wʋlʋ na yɩ o bu-kwɩan kam cɩga cɩga tɩn kwaga nɩ, yɩ o pa‑o o jɩjɩgɩrʋ tɩm maama wʋnɩ pʋpwara kuni bɩle, nɩ kʋ na maŋɩ sɩ bu-kwɩan joŋi te tɩn, kʋ na maŋɩ kʋ daɩ o ka-sono kʋm bu dɩ.
Zwabani-nyɩm taanɩ
18 Nɔɔnʋ wʋlʋ na jɩgɩ bu na yɩ yi-dɛɛrɩ dɩ zwabani-nyɩm yɩ o ba sɛ o ko dɩ o nu, nɩ ba na maŋɩ ba waar‑o te maama dɩ, 19 o tiinə bam maŋɩ sɩ ba ja-o mʋ ba vu o tɩʋ kʋm manco-pɩɩna yam ni nɩ ba jeeri tɩʋ kʋm nakwa bam sɩ ba di o taanɩ. 20 Baá ta dɩ nakwa bam ba wɩ: ‹Dɩ́ bu yɩ yi-dɛɛrɩ dɩ zwabani-nyɩm mʋ. O yǝni o ba sɛ dɩbam ni-taanɩ. O ta kwǝri o yɩ nɔn-kolo dɩ sa-nyɔrʋ.› 21 Tɩʋ kʋm baara bam maama laan maŋɩ sɩ ba la mʋ ba dʋl-o dɩ kandwa ba gʋ. Á na kɩ kʋntʋ, á wʋ́ saarɩ lwarɩm dɩm á tɩtarɩ nɩ. Yisɩrayɛlɩ tiinə bam maama na ni kʋlʋ na kɩ tɩn, fʋʋnɩ wʋ́ ja-ba.
Cullu tɩdonnǝ
22 Nɔɔnʋ na kɩ kǝm-lɔŋɔ kʋlʋ na maŋɩ dɩ tʋʋnɩ tɩn, yɩ ba na gʋ-o ba daarɩ ba lə o yɩra daa baŋa nɩ, 23 kʋ daɩ sɩ á pa tʋʋ wʋm taa pagɩ daa kam baŋa nɩ sɩ tɩga ba ka pʋʋrɩ. Á maŋɩ sɩ á kɩ tʋʋ wʋm dɛ dɩm kʋntʋ nɩ mʋ. Wʋlʋ ba na lǝgi daa yuu nɩ ba gʋ, Wɛ mʋ cɔgɩa kʋntʋ tu.b Á nan maŋɩ sɩ á kɩ-o mʋ tɩga nɩ sɩ kʋ yɩ cɔgɩ tɩga kalʋ á Tu Baŋa-Wɛ dɩm na lagɩ DƖ pa abam sɩ á taá te tɩn.»