Cullu tɩdonnǝ
22
«N na nɛ n doŋ naa naa o piə na maa jeə, yɩ pu n yiǝ n yagɩ sɩ varɩm wʋm je. Nan ja-kʋ n joori n vu n pa kʋ tu. 2 Kʋ tu nan na wʋ yigə yigə naa n na yǝri wʋlʋ na te varɩm wʋm, ja-kʋ n vu n sɔŋɔ sɩ n tan nii-kʋ. Kʋ tu laan na tu o beeri o varɩm wʋm, sɩ n kwe n pa‑o. 3 Kʋ ta na yɩ n doŋ bɩnaga, naa o gɔrɔ, naa o woŋo kʋlʋ maama mʋ na je, sɩ n kɩ kʋntʋ doŋ. Yɩ pu n yiǝ n yagɩ sɩ kʋ je. 4 N na wʋ cwǝŋǝ nɩ, yɩ n na nɛ n doŋ bɩnaga naa o naa na tʋa, yɩ gaalɩ n kɛ. Zən‑o sɩ o ja-kʋ o zɩgɩ.5 Kaana daɩ sɩ ba zʋ baara gwaarʋ. Baara dɩ nan ba maŋɩ sɩ ba zʋ kaana gwaarʋ. Abam Tu Baŋa-Wɛ dɩm culi balʋ na tʋŋɩ yantʋ tɩtʋŋa tɩn.
6 N na nɛ zuŋə na je ka pogo nɩ tiu yuu nɩ naa tɩga nɩ, yɩ ka na vɔgɩ cɩcara baŋa nɩ mʋ naa ka wʋra dɩ ka biə mʋ, kʋ daɩ sɩ n kwe zuŋ-nu wʋm. 7 N jɩgɩ cwǝŋǝ sɩ n ja ka biə bam, naa cɩcara yam n viiri sɩ n daarɩ nu wʋm sɩ o kɛ. Kɩ kʋntʋ sɩ n ŋwɩa kɩ lanyɩranɩ yɩ n wanɩ n daanɩ tɩga kam baŋa nɩ.
8 Abam wʋlʋ na lagɩ o lɔ digə, kʋ tu maŋɩ sɩ o lɔ nawarɩ mʋ o kaagɩ ka nayuu kʋm o cɩ. N na kɩ kʋntʋ, yɩ nɔɔnʋ na zɩgɩ kʋ yuu nɩ o tʋ tɩga nɩ, kʋ tu jana bá taa wʋ n yuu nɩ.
9 Abam wʋlʋ na dugi vinyə tweeru o gaarɩ nɩ, kʋ tu yɩ du wo-gaa o wǝli o gaarɩ dɩm kʋntʋ nɩ. N na kɩ kʋntʋ, wʋdiiru dwi dwi dɩm kʋntʋ bá taa yɩ nmʋ nyɩm. N maŋɩ sɩ n pɔɔrɩ-tɩ mʋ n pa Wɛ.
10 Yɩ pa na-bɩa dɩ bɩnaga salɩ daanɩ sɩ vaŋɩ vɔrɔ.
11 Nan yɩ zʋ gɔrɔ kʋlʋ ba na mɛ gar-ŋʋnɩ yɩra yɩra ba ma sɔ-kʋ tɩn, nɩ kʋ na yɩ lɔŋɔ dɩdaanɩ peeni kʋrʋ gar-ŋʋnɩ.
12 Kʋ na yɩ gwar-daŋɔ kʋlʋ n na wʋ́ zʋ tɩn, sɩ n nyaanɩ zalaa kʋ niə yana yam nɩ.
Barʋ dɩ o kaanɩ taanɩ
13 Nɔɔnʋ na di kaanɩ o pəni dɩd-o yɩ kʋ kwaga nɩ o daa ba lag‑o, 14 oó wanɩ o fɔ vwan o daŋɩ o baŋa nɩ o wɩ: o na tu o pəni dɩ kaanɩ wʋm tɩn, o lwarɩ nɩ o maŋɩ o lwarɩ baara yɩ o laan soe‑o. O na pɛ kaanɩ wʋm tiini o na cavɩɩra kʋntʋ doŋ, 15 bukɔ wʋm ko dɩ o nu mʋ maŋɩ sɩ ba kwe gɔrɔ kʋlʋ na brɩ nɩ bukɔ wʋm lwarɩ baara o barʋ wʋm tee nɩ tɩn mʋ ba ja vu tɩʋ kʋm manco-pɩɩna yam ni ba brɩ tɩʋ kʋm nakwa. 16 Bukɔ wʋm ko wʋ́ ta wɩ: ‹A kwe a bukɔ a pa nɔɔnʋ wʋntʋ sɩ o di o ma kɩ o kaanɩ, yɩ lele o daa ba lag‑o. 17 O nan fɔgɩ vwan o pa‑o nɩ: o lwarɩ baara yɩ o laan zʋ-o. Nii-na ba pulim sar-pwəgə gɔrɔ na taŋɩ dɩ jana tɩn mʋ tɩntʋ. Kʋntʋ nan brɩ nɩ a bukɔ wʋm lwarɩ baara wʋntʋ tee nɩ mʋ.›
18 Tɩʋ kʋm nakwa bam laan wʋ́ ja nɔɔnʋ wʋm mʋ ba waar‑o lanyɩranɩ. 19 Ba ta maŋɩ sɩ ba joŋi səbu-poŋo səbu-dala bi mʋ baarʋ wʋm tee nɩ sɩ ba kwe ba pa bukɔ wʋm ko, baarʋ wʋm na cɔgɩ Yisɩrayɛlɩ tiinə bukɔ tɩn ŋwaanɩ. Bukɔ wʋm daa ta wʋ́ taa yɩ o kaanɩ sɩ kʋ taa nii o tʋʋnɩ mʋ. O ba jɩgɩ cwǝŋǝ sɩ o yag-o.
20 Baarʋ wʋm nan na tagɩ te tɩn na yɩ cɩga mʋ yɩ kʋlʋkʋlʋ tǝrǝ sɩ kʋ brɩ nɩ bukɔ wʋm maŋɩ o wʋ lwarɩ baara, 21 ba maŋɩ sɩ ba ja bukɔ wʋm mʋ ba nuŋi o ko sɔŋɔ nɩ, yɩ ba zɩg-o pooni yigə nɩ sɩ tɩʋ kʋm baara bam dʋl-o dɩ kandwa ba gʋ. O ta na zʋʋrɩ o ko sɔŋɔ nɩ tɩn o kɩ ka-boro tɩtʋŋ-zɔɔna pa cavɩɩra di Yisɩrayɛlɩ tiinə bam. Kʋntʋ ŋwaanɩ, á maŋɩ sɩ á saarɩ lwarɩm dɩm kʋntʋ mʋ á tɩtarɩ nɩ.
22 Baarʋ na pəni dɩ nɔɔnʋ wʋdoŋ kaanɩ yɩ á pɩɩrɩ-ba, á maŋɩ sɩ á gʋ ba maama bale mʋ, sɩ á wanɩ á saarɩ lwarɩm dɩm kʋntʋ Yisɩrayɛlɩ laŋa kam nɩ.
23 Ba na kwe bukɔ ba pa o zʋ barʋ yɩ kʋ tu ta wʋ pəni dɩd-o, nɔɔnʋ wʋdoŋ na nɛ‑o tɩʋ wʋnɩ o ja o pəni, 24 á wʋ́ ja-ba á nuŋi tɩʋ kʋm dáa mʋ á dʋlɩ-ba dɩ kandwa á gʋ. Bukɔ wʋm maŋɩ sɩ o tɩ, o na wʋ tɩʋ wʋnɩ yɩ o wʋ kaasɩ sɩ ba joŋ-o ba yagɩ tɩn ŋwaanɩ. Kʋ daarɩ baarʋ wʋm maŋɩ sɩ o tɩ dɩ o na cɔgɩ bukɔ wʋlʋ na yɩ nɔɔnʋ wʋdoŋ kaanɩ tɩn mʋ. Kʋntʋ ŋwaanɩ, á maŋɩ sɩ á saarɩ lwarɩm dɩm kʋntʋ mʋ á tɩtarɩ nɩ.
25 Nɔɔnʋ nan na wʋ pwələ nɩ mʋ yɩ o zi bukɔ wʋlʋ na lagɩ o zʋ barʋ tɩn, baarʋ wʋm yɩranɩ mʋ maŋɩ sɩ o tɩ. 26 Á ba maŋɩ sɩ á kɩ bɩsankana kam kʋlʋkʋlʋ. O wʋ kɩ o tusi sɩ kʋ maŋɩ dɩ o tʋʋnɩ. Kǝm kʋntʋ doŋ nyɩ dɩ nɔɔnʋ na li o doŋ o gʋ tɩn mʋ, 27 sɩ baarʋ wʋm zi bukɔ wʋm pwələ nɩ mʋ yoo. Nɔɔn-nɔɔnʋ tǝrǝ sɩ o joŋi bukɔ wʋm o yagɩ, dɩ o na maŋɩ o kaasɩ te tɩn dɩ.
28 Nɔɔnʋ na jeeri bukɔ wʋlʋ ta na yǝri baara tɩn o zi‑o, yɩ ba na pɩɩrɩ-ba, 29 oó ŋwɩ bukɔ wʋm kwaga kwǝrǝ mʋ o pa bukɔ wʋm ko sɩ kʋ maŋɩ dɩ səbu-poŋo səbu-dala fiinnu. O ta maŋɩ sɩ o di‑o o ma kɩ o kaanɩ mʋ, o na zi‑o o pəni dɩd-o tɩn ŋwaanɩ. O ŋwɩa maama wʋnɩ pwələ tǝrǝ sɩ o yag-o maŋa dɩ maŋa.b
30 Nɔɔn-nɔɔnʋ yɩ fɔgɩ o kɩ o ko cavɩɩra sɩ o pəni dɩ o ko kaanɩ wʋdoŋ.»