Baŋa-Wɛ kɔgɔ kʋm cullu
23
«Nɔɔnʋ wʋlʋ ba na lwɩ tɩn dɩ wʋlʋ ba na goni o fwəl-yi ba yagɩ tɩn ba jɩgɩ cwǝŋǝ sɩ o tɔgɩ o taa wʋ Baŋa-Wɛ nɔn-kɔgɔ kʋm wʋnɩ.2 Biə balʋ dɩ ba na wʋ lʋgɩ kadri wʋnɩ tɩn dɩ ba naarʋ sɩ kʋ taa ve kuni fugə laŋa nɩ tɩn dɩ bá tɔgɩ ba taa wʋ Baŋa-Wɛ nɔn-kɔgɔ kʋm wʋnɩ.
3 Kʋ ta na yɩ Amɔn dɩ Moabɩ tiinə bam, bantʋ dɩ ba jɩgɩ cwǝŋǝ sɩ ba tɔgɩ ba taa wʋ Baŋa-Wɛ nɔn-kɔgɔ kʋm wʋnɩ, kʋ wǝli dɩ ba naarʋ sɩ kʋ taa ve kuni fugə laŋa nɩ. 4 Bɛŋwaanɩ á dɛɛn na nuŋi Ezipi nɩ á maa kɛa tɩn, ba vɩn sɩ ba wǝli abam dɩ na dɩ wʋdiu, yɩ ba kwǝri ba yəgi Bewɔrɩ bu Balam dɩ səbu sɩ o sɔɔlɩ lwarɩm o yagɩ á baŋa nɩ. Bewɔrɩ dɛɛn zʋʋrɩ Mezopotami tɩʋ Petɔrɩ nɩ mʋ. 5 Abam Tu Baŋa-Wɛ dɩm dɛɛn maa wʋ sɛ Balam sɔɔla yam, DƖ na tiini DƖ soe abam tɩn ŋwaanɩ. DƖ ma pipiri sɔɔla yam DƖ pa ya ji yu-yoŋo ya pa abam.a 6 Maŋa kalʋ maama abam dwi dɩm na wʋ́ taa wʋra tɩn, sɩ á yɩ zaŋɩ á tʋŋɩ tɩtʋŋa á ma á zǝni Amɔn dɩ Moabɩ tiinə bam sɩ á pa ba taa zʋʋrɩ dɩ yazurə.
7 Nan yɩ gooni-na Edɔm tiinə, sɩ ba yɩ á cʋrrʋ mʋ. Á ta yɩ gooni Ezipi tiinə bam, sɩ á dɛɛn yɩ vərə mʋ ba tɩʋ kʋm nɩ. 8 Bantʋ naarʋ tɩm kʋ zɩgɩ dwi kuni bɩtɔ laŋa nɩ sɩ kʋ taa tuǝ jɩgɩ cwǝŋǝ sɩ ba tɔgɩ ba taa wʋ Baŋa-Wɛ nɔn-kɔgɔ kʋm wʋnɩ.
Jar-kərə bam tigisim jǝgǝ kwɛɛm
9 Á na kikili daanɩ sɩ á zaŋɩ najara dɩ á dʋna, sɩ á taá cʋ-na á tɩtɩ dɩ kʋlʋ maama na jɩgɩ digiru Wɛ cullu tɩm seeni tɩn.
10 Nɔɔnʋ wʋlʋ nywannʋ tɩm na logi tɩtɩɩ nɩ, kʋ tu maŋɩ sɩ o nuŋi dáa mʋ sɩ o daa yɩ joori nɔn-kɔgɔ kʋm wʋnɩ dɛ dɩm kʋntʋ nɩ, o na cɔgɩ o tɩtɩ dɩ Wɛ cullu tɩm tɩn ŋwaanɩ. 11 Dɩdaan-ni nɩ mʋ oó swɛ o yɩra, yɩ wɛ na zʋa, o laan jɩgɩ cwǝŋǝ sɩ o joori o pəni jar-kərə bam tigisim jǝgǝ kam nɩ.
12 Lagɩ-na je na yɩ dáa dáa dɩ á tigisim jǝgǝ kam tɩn sɩ á taá ve á zɩgɩ nɛ da. 13 Á na lagɩ á vu á zɩgɩ nɛ sɩm, lɩ-na vɔrɔ á zɩla yam nɩ á ja vu sɩ á kʋ goŋo. Á na zɩgɩ á ti, sɩ á daarɩ á suli bəənu tɩm. 14 Pa-na sɩ á tigisim jǝgǝ kam taa yɩ lanyɩranɩ fasɩ, á Tu Baŋa-Wɛ dɩm na kaagɩ DƖ cʋa abam sɩ DƖ pa á wanɩ á dʋna á di tɩn ŋwaanɩ. Kʋ daɩ sɩ DƖ na wo-zɔɔnɩ á tɩtarɩ nɩ sɩ DƖ viiri DƖ daarɩ abam.
Wɛ niə dwi dwi
15 Dwi-gɛ tu gambaa na duri ka yi á tɩʋ kʋm sɩ ka dalɩ á tee nɩ, yɩ zǝl-o á pa o joori o tu te. 16 Pa‑o cwǝŋǝ sɩ o kuri á tɩɩnɩ dɩm wʋnɩ mɛ o na wʋ́ taa zʋʋrɩ tɩn. Á ba maŋɩ sɩ á bɛɛs-o.
17 Yisɩrayɛlɩ tu, baarʋ naa kaanɩ, ba maŋɩ sɩ o boori jwǝnǝ zulim ŋwaanɩ. 18 Á nan ba maŋɩ sɩ á kwe boorim kikiə səbu á ja á vu Baŋa-Wɛ jero-vwe dɩm sɩ á ŋwɩ kampwələ jɩnɩ. Abam Tu Baŋa-Wɛ dɩm culi boorim kikiə dwi maama.
19 N na mɛ wʋdiu mʋ naa səbu naa woŋo kʋlʋ maama mʋ n jɩnɩ n pa n doŋ Yisɩrayɛlɩ tu, yɩ ta n lagɩ nyɔɔrɩ kʋ baŋa nɩ. 20 Kʋ nan na yɩ vərə, n jɩgɩ cwǝŋǝ sɩ n na nyɔɔrɩ ba jɩna baŋa nɩ, sɩ n yɩ tan lagɩ nyɔɔrɩ n doŋ Yisɩrayɛlɩ tu tee nɩ. Á na tu á zʋ tɩga kam á te, tɔgɩ-na ni dɩm kʋntʋ sɩ á Tu Baŋa-Wɛ dɩm wʋ́ kɩ abam yu-yoŋo sɩ kʋlʋ maama á na jɩgɩ á tʋŋɩ tɩn kɩ lanyɩranɩ kʋ pa abam.
21 N na goni ni n pa Baŋa-Wɛ, yɩ daanɩ sɩ n kwe n ni dɩm.b Á Tu Baŋa-Wɛ dɩm wʋ́ bwe‑m n lwarɩm dɩm kʋntʋ ŋwaanɩ. 22 N nan na wʋ goni ni n pa Wɛ, lwarɩm dɩ bá taa wʋra. 23 N na goni ni, kʋ yɩ n tɩtɩ wʋbʋŋa ŋwaanɩ mʋ pɛ n pooli. Kʋntʋ tɩn, nii kʋ baŋa nɩ sɩ n kwe n ni dɩm lɩla.