Baarʋ dɩ o kaanɩ taanɩ
24
«Abam wʋlʋ na di o kaanɩ yɩ o laan ba o ba lagɩ kaanɩ wʋm, o na kɩ kʋlʋ na jɩgɩ cavɩɩra tɩn ŋwaanɩ, kʋ tu wʋ́ wanɩ o pʋpʋnɩ kaanɩ yagɩm tɔnɔ o pa‑o yɩ o zǝl-o sɩ o viiri.a 2 O na kɩ kʋntʋ yɩ kaanɩ wʋm vu o zʋ baarʋ wʋdoŋ, 3 pa wʋntʋ dɩ laan ba o bʋŋɩ nɩ o daa ba lagɩ kaanɩ wʋm yɩ o dɩ pʋpʋnɩ kaanɩ yagɩm tɔnɔ o ma zǝl-o o sɔŋɔ nɩ, naa o barʋ bale tu wʋm na tɩga, 4 o dayigə barʋ wʋm ba jɩgɩ cwǝŋǝ sɩ o joori o soe‑o maŋa dɩ maŋa, kaanɩ wʋm na cɔgɩ o tɩtɩ dɩ baarʋ wʋdoŋ wʋm tɩn ŋwaanɩ. O na joori o soe‑o, o cugi Baŋa-Wɛ yi mʋ. Yɩ ja-na lwarɩm dɩm kʋntʋ doŋ á vu á cɔgɩ tɩga kalʋ á Tu Baŋa-Wɛ dɩm na lagɩ DƖ pa abam sɩ á taá te tɩn.5 Nɔɔnʋ na di ka-dʋʋrʋ yɩ ba ta wʋ kɩ bɩnɩ dɩdʋa daanɩ, o daɩ sɩ ba wəl‑o jar-kərə wʋnɩ, naa sɩ ba pa o tʋŋɩ kɔgɔ wʋʋ tɩtʋŋa. Pa-na sɩ o kwɛ tɩtʋŋa bɩnɩ dɩdwɩ sɩ o wanɩ o maŋɩ sɔŋɔ nɩ o pa o kaanɩ wʋm wʋʋ poli.
Wɛ niə yadonnə
6 N na kwe woŋo n jɩnɩ n pa nɔɔnʋ yɩ o lagɩ sɩ o tiŋi daarɩ, nan yɩ kwe o digə kam namim n ja n viiri, kʋ na yɩ kʋlʋ o dɩ o digə tiinə na maɩ ba kɩ ba ni-wʋdiu tɩn ŋwaanɩ.
7 Nɔɔnʋ wʋlʋ maama na zi o ja o doŋ Yisɩrayɛlɩ tu sɩ o fɩ‑o sɩ o ji o gambaa naa o yəg‑o mʋ o pa gabɛɛm nɩ, kʋ tu maŋɩ sɩ o tɩ mʋ. Kɩ-na kʋntʋ sɩ á saarɩ lwarɩm dɩm kʋntʋ á tɩtarɩ nɩ.
8 Nanyaanʋb yawɩʋ kʋm na jɩgɩ-m, fɔgɩ n ta n ye sɩ n kɩ nɩ Wɛ kaanɩm tiinə bam na wʋ́ brɩ-m te maama tɩn. Tɔgɩ-na kwiə yalʋ amʋ na maŋɩ a pa-ba tɩn lanyɩranɩ. 9 Guli-na á Tu Baŋa-Wɛ dɩm na tʋŋɩ te dɩ Miriyam maŋa kalʋ á na nuŋi Ezipi nɩ á maa kɛ tɩn.
10 N na kwe woŋo n jɩnɩ n pa nɔɔnʋ, yɩ tɔgɩ n zʋ o digə sɩ n joŋi gɔrɔ kʋlʋ o na lagɩ o ma tiŋi daarɩ tɩn. 11 N wʋ́ maŋɩ cicwəŋə nɩ mʋ n ta n zɩga, kʋ daarɩ yɩ wʋlʋ n na pɛ-o jɩm dɩm tɩn kwe woŋo kʋm, o ja o nuŋi o pa-m. 12 O na yɩ yinigə tu, yɩ pa o gɔrɔ kʋm pəni n sɔŋɔ nɩ. 13 Wɛ na lagɩ dɩ zʋ, sɩ n joori n kwe o gɔrɔ kʋm n pa‑o sɩ o ma o kwǝli o tɩtɩ. Kǝm dɩm kʋntʋ wʋ́ pa o kɩ nmʋ le kʋ ŋwaanɩ. N Tu Baŋa-Wɛ dɩm dɩ wʋ́ pa kʋ taa yɩ tɩtʋŋ-laa mʋ n kɩa.
14 Nabwəm na tʋŋɩ o pa‑m səbu ŋwaanɩ, sɩ n yɩ zaŋɩ n pɩɩn‑o, o ya zɩ yɩ n cʋrʋ Yisɩrayɛlɩ tu, naa vəru mʋ na zʋʋrɩ n tɩʋ kʋm wʋnɩ tɩn. 15 Dɛ maama ŋwɩ o səbu n pa‑o sɩ wɛ laan zʋ. O na yɩ yinigə tu tɩn, o tɩɩna wʋ səbu kʋm baŋa nɩ mʋ. N na wʋ ŋwɩ‑o, oó kaasɩ o loori Baŋa-Wɛ mʋ n ŋwaanɩ, pa kʋ ji lwarɩm n yuu nɩ.
16 Kwə ba maŋɩ sɩ ba tɩ ba biə kikiə ŋwaanɩ. Biə dɩ nan ba maŋɩ sɩ ba tɩ ba kwə kikiə ŋwaanɩ. Nɔɔnʋ na maŋɩ sɩ o tɩ, kʋʋ́ taa yɩ o tɩtɩ yuu lwarɩm ŋwaanɩ mʋ.
17 Kʋ na yɩ bɩtara dɩ vərə balʋ na zʋʋrɩ á wʋnɩ tɩn, yɩ vanɩ-na ba cɩga sɩ ba yɩ na bʋra. Nan yɩ kwe kadəm gar-jalɩ n ma n tiŋi daarɩ. 18 Guli-na nɩ abam dɛɛn yɩ gambɛ mʋ Ezipi nɩ, yɩ á Tu Baŋa-Wɛ dɩm laan ba DƖ joŋi abam DƖ yagɩ. Kʋntʋ ŋwaanɩ a tagɩ Wɛ ni dɩm kʋntʋ a pa abam sɩ á taá tɔga.
19 Abam na wʋra á gwe á wʋdiiru tɩm yɩ á na pɛ á daarɩ mɩn-poə yadonnə á yagɩ kara nɩ, daa yɩ joori-na á vu á pɛ-ya. Yagɩ-na-ya á pa vərə, dɩ bɩtara, dɩ kadənə sɩ á Tu Baŋa-Wɛ zaanɩ taa wʋ á baŋa nɩ dɩ kʋlʋ maama á na lagɩ á tʋŋɩ tɩn.c 20 Á na sugi á olivi tweeru tɩm sɩ dɩ tiu biə bam tʋ yɩ á pɛ-ba, su-na bɩdwɩ yɩranɩ. Balʋ laan na daarɩ tɩn wʋ́ taa yɩ vərə, dɩ bɩtara, dɩ kadənə nyɩm mʋ sɩ ba vu ba larɩ.