Wɛ niə yadonnə
25
«Abam nɔɔna bale na saŋɩ daanɩ sɩ ba di taanɩ, baá bʋrɩ bʋra ba pa dɩdʋa yɩ wʋwʋm wʋm tʋ. 2 Wʋlʋ na tʋ tɩn na maŋɩ sɩ ba mag-o, dɩdɛɛrʋ wʋm wʋ́ pa o pəni o pugə baŋa nɩ mʋ sɩ ba laan frɩ‑o. Fɩrɩm dɩm na wʋ́ taa maɩ te tɩn nan maŋɩ sɩ dɩ maŋɩ dɩ lwarɩm dɩlʋ o na kɩ tɩn mʋ. 3 Ba jɩgɩ cwǝŋǝ sɩ ba frɩ‑o sɩ kʋ yi kuni fiinna mʋ. Kʋ ba maŋɩ sɩ kʋ dwǝni kʋntʋ. Kʋ na dwǝni kʋntʋ, á wʋ́ tiini á gooni kʋ tu mʋ.a4 N na jɩgɩ na-bɩa n ma n tʋŋɩ n faa, yɩ vɔ ka ni sɩ ka yɩ wanɩ mɩn-biə bam ka di.
5 Cʋrrʋ tɩle na zʋʋrɩ daanɩ sɔŋɔ dɩdʋa nɩ yɩ dɩdʋa na tɩga yɩ o ba jɩgɩ bəkərə, o kadəm wʋm ba maŋɩ sɩ o zʋ pooni yigə nɔɔnʋ. Tʋʋ wʋm cʋrʋ kʋm mʋ maŋɩ sɩ o di kadəm wʋm, nɩ kʋ na maŋɩ sɩ o kɩ te tɩn. 6 Ba na wʋ́ lʋ dayigǝ bəkərə kalʋ tɩn wʋ́ taa yɩ tʋʋ wʋm bu mʋ, sɩ o dwi dɩm yɩ saarɩ Yisɩrayɛlɩ dwi tiinə bam wʋnɩ.
7 Tʋʋ wʋm cʋrʋ kʋm nan na ba lagɩ sɩ o soe‑o, kadəm wʋm wʋ́ vu tɩʋ kʋm manco-pɩɩna yam ni nɩ o jeeri nakwa bam mʋ yɩ o ta dɩ ba nɩ: ‹Amʋ barʋ cʋrʋ kʋm ba lagɩ sɩ o tʋŋɩ kʋlʋ na wʋ́ pa o cʋrʋ kʋm na dwi Yisɩrayɛlɩ dwiə yam wʋnɩ tɩn.› 8 Tɩʋ kʋm nakwa bam laan maa wʋ́ bǝŋ-o sɩ o ba yɩ ba ŋɔɔnɩ dɩd-o. O ta na vɩn sɩ o di kadəm wʋm, 9 kaanɩ wʋm laan wʋ́ fʋfɔ o yi o te mʋ nakwa bam yigə nɩ, yɩ o lɩ nɔɔnʋ wʋm natrɩ dɩdwɩ o daarɩ o twɩ lileeru o kɩ o yibiyə nɩ, yɩ o ta o wɩ: ‹Tɩntʋ mʋ ba maŋɩ sɩ ba kɩ dɩ wʋlʋ na vɩn sɩ o pa o cʋrʋ kʋm lʋ dwi tɩn.› 10 Yisɩrayɛlɩ dwi tiinə bam laan wʋ́ taa bǝi nɔɔnʋ dwi dɩm kʋntʋ nɩ: ‹Ba na lɩ nɔɔnʋ wʋlʋ natrɩ dɩdwɩ tɩn sɔŋɔ tiinə›.
11 Baara bale na jɩgɩ daanɩ yɩ ba dɩdʋa kaanɩ yi sɩ o zǝni o barʋ wʋm, o na jaanɩ baarʋ wʋwʋm wʋm mancala seeni mʋ o vaŋɩ, 12 yɩ duri-na kaanɩ wʋm ŋwaŋa. Nan goni-na o jɩŋa.
13-14 Yɩ zaŋɩ n pini nɔɔna dɩ n na maŋɩ wǝǝnu te n yəgi tɩn. Kʋ daɩ sɩ n tan jɩgɩ luuru tɩle n tampɔgɔ wʋnɩ n ma n maŋɩ wǝǝnu duuni, naa n jɩgɩ bwɛn sɩle na daɩ bɩdwɩ tɩn. 15 Nan ma luuru dɩ bwɛn sɩlʋ na yɩ cɩga cɩga tɩn yɩranɩ n tan ma n maŋɩ wǝǝnu n yǝgǝ. Kɩ kʋntʋ sɩ n wanɩ n daanɩ tɩga kalʋ á Tu Baŋa-Wɛ dɩm na lagɩ DƖ pa abam tɩn wʋnɩ dɩ mʋmwɛ-dɛɛrɩ. 16 Bɛŋwaanɩ, abam Tu Baŋa-Wɛ dɩm culi balʋ na tʋŋɩ yantʋ tɩtʋŋa yɩ ba pini ba donnǝ tɩn.
Amalɛkɩ tiinə bam cɔgɩm
17 Guli-na Amalɛkɩ tiinə bam dɛɛn na kɩ abam te maŋa kalʋ á na nuŋi Ezipi nɩ á maa kɛ tɩn.b 18 Á dɛɛn na bugi yɩ á bwǝnǝ maŋa kalʋ tɩn, ba jeeri abam cwǝŋǝ nɩ yɩ ba gʋ abam balʋ na wʋ kwaga nɩ ba walɩmɩ ba ve tɩn maama. Kʋntʋ mʋ ba mɛ ba brɩ nɩ ba ba kwarɩ Wɛ. 19 Kʋntʋ ŋwaanɩ, á Tu Baŋa-Wɛ dɩm na tu DƖ pa á dʋna maama daa yɩ daanɩ abam yɩ á sin dɩ wʋ-zuru tɩga kalʋ DƖ na lagɩ DƖ pa abam sɩ á taá te tɩn wʋnɩ, sɩ á laan saarɩ Amalɛkɩ tiinə bam lʋgʋ baŋa maama nɩ sɩ nɔɔn-nɔɔnʋ daa yɩ guli ba gulə. Yɩ swe-na sɩ á kɩ kʋntʋ!»