Wʋdiiru zagɩm pɛɛra
26
«Abam na tu á zʋ tɩga kalʋ á Tu Baŋa-Wɛ dɩm na lagɩ DƖ pa abam sɩ á taá te tɩn yɩ á na jǝni da, 2 nɔɔnʋ maama maŋɩ sɩ o lɩ wʋdiiru tɩlʋ na loori yigə tɩ kɩ o tɩga kam nɩ tɩn o kɩ tɩtɔgɔ wʋnɩ, sɩ o ja o vu jǝgǝ kalʋ Baŋa-Wɛ na wʋ́ kuri sɩ nɔɔna zuli DƖ yɩrɩ da tɩn mʋ. 3 Nmʋ wʋ́ vu n ta dɩ Wɛ kaanɩm tu wʋlʋ na wʋra o nii je sɩm da yam kʋntʋ nɩ tɩn n wɩ:‹A tɛ cɩga Baŋa-Wɛ dɩlʋ nmʋ na tʋŋɩ n pa‑DƖ tɩn yigə nɩ nɩ amʋ sɩɩnɩ a zʋ tɩga kalʋ Baŋa-Wɛ na goni ni dɩ dɩ́ nabaara bam nɩ DƖ wʋ́ pa dɩbam tɩn wʋnɩ.› 4 Kaanɩm tu wʋm wʋ́ joŋi n tɩtɔgɔ kʋm o zɩgɩ Baŋa-Wɛ kaanɩm bimbim dɩm yigə nɩ. 5 Nmʋ laan wʋ́ ta taanɩ dɩntʋ nmʋ Tu Baŋa-Wɛ dɩm yigə nɩ n wɩ:
‹Amʋ nabaarʋ dɛɛn yɩ Aram tu na yǝni o beeri tɩn mʋ. O dɛɛn ma ja o digə tiinə o vu Ezipi o zʋʋrɩ dáanɩ. Ba dɛɛn na ve da tɩn, ba yɩ fɩnfɩɩn yɩranɩ mʋ, yɩ ba laan ba ba puli ba ji dwi dɩlʋ na dana lanyɩranɩ.a 6 Ezipi tiinə bam ma bɛɛsɩ dɩbam dɩ jɩ-dɩa yɩ ba fɩn dɩbam pa dɩ́ tʋŋɩ tɩtʋŋ-dɛɛra dɩ́ pa-ba. 7 Dɩ́ laan ma kaasɩ dɩ́ loori dɩ́ nabaara Baŋa-Wɛ dɩm sɩ DƖ zǝni dɩbam dɩ́ cam dɩm wʋnɩ. DƖ dɛɛn ma maanɩ dɩ́ yaara yam dɩdaanɩ dɩ́ wʋ-cɔgɔ kʋm, yɩ DƖ daarɩ DƖ sɛ dɩ́ wɛ-loro kʋm. 8 Baŋa-Wɛ ma tɔgɩ DƖ dam baŋa nɩ DƖ tʋŋɩ wo-kamunnu dɩdaanɩ wo-kɩnkagɩla sɩ DƖ ma fugi Ezipi tiinə bam yɩ DƖ daarɩ DƖ vrɩ dɩbam ba jɩŋa nɩ. 9 DƖ ma ja dɩbam DƖ ja ba yo seeni yɩ DƖ pa dɩbam tɩ-ŋʋŋa kantʋ na ywəmmə dɩ varɩm dɩ kɔnɔ tɩn. 10 Kʋntʋ ŋwaanɩ amʋ laan kwe wʋdiiru tɩlʋ na loori yigə tɩ kɩ tɩga kam nɩ tɩn sɩ a pa‑DƖ. Baŋa-Wɛ, kʋ yɩ nmʋ mʋ pɛ-nɩ wʋdiiru tɩm kʋntʋ.›
Laan kwe tɩtɔgɔ kʋm n zɩgɩ Baŋa-Wɛ bimbim dɩm yigə nɩ sɩ n daarɩ n tiiri n zuli‑DƖ da. 11 Nmʋ dɩdaanɩ n sɔŋɔ tiinə wʋ́ di ywəəni lanyɩranɩ, wo-laarʋ tɩlʋ Baŋa-Wɛ na kɩ DƖ pa abam tɩn ŋwaanɩ. Levi tiinə dɩ vərə balʋ na zʋʋrɩ á tɩtarɩ nɩ tɩn dɩ́ wʋ́ tɔgɩ dɩ abam ba di ywəəni.
Wʋdiiru Wɛ-təri
12 Bɩna yatɔ bɩnɩ dɩm maama wʋnɩ, á na lɩ pʋpwara dɩdʋa á wʋdiiru tɩm pɔɔrɩm fugə wʋnɩ sɩ á pa Wɛ, kwe-na Wɛ-təri dɩm kʋntʋ á pa Levi tiinə, dɩ vərə, dɩ bɩtara, dɩ kadənə. Á na kɩ kʋntʋ, balʋ na zʋʋrɩ á tɩɩnɩ dɩm nɩ tɩn wʋ́ na wʋdiu ba di ba su. 13 Á laan maa wʋ́ daarɩ á warɩ á Tu Baŋa-Wɛ dɩm á ta wɩ:
‹Amʋ sɩɩnɩ a tɔgɩ n ni dɩm yɩ a lɩ Wɛ-təri dɩlʋ na yɩ nmʋ nyɩm tɩn a sɔŋɔ nɩ a kwe a pa Levi tiinə, dɩ vərə, dɩ bɩtara, dɩ kadənə mʋ. A brɩ a wʋ lɔgɩ n kwiə yam kwaga nɩ naa a swe ya swiə dɩ fɩnfɩɩn dɩ. 14 Kʋ na yɩ Wɛ-təri dɩm, maŋa kalʋ a na wʋ luə wʋnɩ tɩn dɩ, a wʋ di wʋdiiru tɩm kʋntʋ kʋlʋkʋlʋ. A na digimi Wɛ cullu tɩm seeni tɩn, a wʋ lɩ kʋlʋkʋlʋ tɩ wʋnɩ a ja nuŋi. A nan wʋ kwe-tɩ a ma zuli twa. Amʋ Tu Baŋa-Wɛ, a tɔgɩ nmʋ ni dɩm lanyɩranɩ yɩ a kɩ nmʋ na brɩ-nɩ te tɩn maama. 15 Kʋntʋ tɩn, zɩgɩ n wɛyuu sɔŋɔ kʋm nɩ n tiiri n nii n nɔɔna Yisɩrayɛlɩ tiinə bam sɩ n kɩ dɩbam yu-yoŋo, sɩ n daarɩ n nii tɩga kalʋ n na pɛ dɩbam nɩ n na goni ni dɩ dɩ́ nabaara bam sɩ n kɩ te tɩn. Ka maa yɩ tɩ-ŋʋŋa na ywəmmə dɩ varɩm dɩ kɔnɔ tɩn.›
Baŋa-Wɛ nɔɔna na maŋɩ sɩ ba tʋŋɩ te tɩn
16 Abam Tu Baŋa-Wɛ dɩm zɩm brɩ abam sɩ á tʋŋɩ á tɔgɩ DƖ niə yantʋ dɩ DƖ cullu tɩntʋ lanyɩranɩ. Taá sɛ-na-ya dɩ á wʋbʋŋa maama dɩ á bɩcarɩ maama. 17 Á zɩm tagɩ jaja nɩ Baŋa-Wɛ mʋ yɩ abam Tu Wɛ, sɩ á taá tɔgɩ DƖ cwe sɩm lanyɩranɩ. Á nan ta wʋ́ tʋŋɩ á tɔgɩ DƖ niə yam, dɩ DƖ kwiə yam, dɩ DƖ cullu tɩm maama, yɩ á sɛ DƖ kwǝrǝ kam. 18 Baŋa-Wɛ dɩ zɩm tagɩ jaja nɩ DƖ kuri abam sɩ á taá yɩ DƖ tɩtɩ nɔɔna balʋ DƖ na jɩga lʋnnɩ ŋwaanɩ tɩn, nɩ DƖ na maŋɩ DƖ pooli te tɩn. Abam nan maŋɩ sɩ á taá sɛ DƖ niə yam mʋ. 19 DƖ ta wʋ́ pa á yɩrɩ zaŋɩ dɩ dwǝni dwiə yalʋ maama DƖ na kɩ tɩn, pa á na zulə dɩ tiə ba tee nɩ. Abam wʋ́ taá yɩ nɔɔna balʋ á Tu Baŋa-Wɛ dɩm na pwɛ DƖ pa DƖ tɩtɩ, nɩ DƖ na maŋɩ DƖ pooli sɩ DƖ kɩ te tɩn.»