Ba pʋpʋnɩ Wɛ niə yam kandwa baŋa nɩ
27
Moyisi dɩ Yisɩrayɛlɩ nakwa bam laan ma ta dɩ nɔɔna bam ba wɩ: «Taá tɔgɩ-na Wɛ ni dɩm maama a na brɩ abam zɩm tɩn. 2 Á na tu á bɛ Zʋrdɛn bugə kam á zʋ tɩga kalʋ á Tu Baŋa-Wɛ dɩm na lagɩ DƖ pa abam tɩn, á maŋɩ sɩ á cwi kandwa-kamunə, á laan daarɩ á ma kandwa-poŋo á turi-ya. 3 Á laan wʋ́ daarɩ á pʋpʋnɩ Wɛ niə yantʋ maama á kɩ da. Á na bɛ á zʋ tɩga kalʋ Baŋa-Wɛ na lagɩ DƖ pa abam tɩn, á maŋɩ sɩ á kɩ kʋntʋ mʋ. Ka maa yɩ tɩ-ŋʋŋa na ywəmmə dɩ varɩm dɩ kɔnɔ, nɩnɛɛnɩ á nabaara Baŋa-Wɛ dɩm na pooli sɩ DƖ pa abam te tɩn. 4 Á na bɛ Zʋrdɛn bugə kam á kɛ á vu á yi Ebalɩ piu kʋm, sɩ á cwi kandwa yam kʋntʋ á daarɩ á ma kandwa-poŋo á turi-ya, nɩ a zɩm na brɩ abam sɩ á kɩ te tɩn. 5 Á ta wʋ́ kwe kandwa yadonnə á ma lɔ bimbim á pa á Tu Baŋa-Wɛ dɩm. Á nan yɩ ma-na luuru á sarɩ kandwa yam á ma á lɔ-dɩ. 6 Beeri-na kandwa yalʋ na wʋ sarɩ tɩn sɩ á ma á lɔ bimbim dɩm, sɩ á daarɩ á kɩ zwɛɛm kaanɩm dɩ baŋa nɩ á pa Baŋa-Wɛ. 7 Á ta wʋ́ kɩ yazurə kaanɩm da, yɩ á tɔgɩ daanɩ á di yɩ á kɩ wʋpolo á Tu Baŋa-Wɛ dɩm yigə nɩ. 8 Á maŋɩ sɩ á pʋpʋnɩ Wɛ niə yantʋ maama á kɩ kandwa yalʋ á na cwi tɩn baŋa nɩ mʋ, sɩ bɩtarɩ sɩm taa naɩ jaja.»aZwabaniə wʋ́ ja Kampwəl-balwara ka ba
9 Moyisi dɩ Levi dwi tiinə balʋ na yɩ Wɛ kaanɩm tiinə tɩn dɛɛn ma ta dɩ Yisɩrayɛlɩ tiinə bam maama ba wɩ: «Yisɩrayɛlɩ tiinə bam, cəgi-na sɔɔ sɩ á ni a taanɩ dɩm. Abam zɩm jigi á Tu Baŋa-Wɛ tɩtɩ nɔɔna mʋ. 10 Kʋntʋ tɩn, sɛ-na DƖ kwǝrǝ kam sɩ á taá tʋŋɩ á tɔgɩ DƖ niə yam dɩ DƖ kwiə yam nɩ a zɩm na pɛ abam te tɩn.»
11 Dɛ dɩm kʋntʋ nɩ mʋ Moyisi dɛɛn tagɩ dɩ Yisɩrayɛlɩ tiinə bam o wɩ:
12 «Á na bɛ Zʋrdɛn bugə kam á ti, Yisɩrayɛlɩ dwiə yantʋ mʋ maŋɩ sɩ ya zɩgɩ Gerizim piu yuu nɩ sɩ ba tɔɔlɩ Wɛ yu-yoŋo kʋm ba pa nɔɔna bam: Simeyon, dɩ Levi, dɩ Zuda, dɩ Yisakaarɩ, dɩ Zʋzɛfʋ, dɩ Bɛnzamɛn. 13 Sɩ dwiə yantʋ dɩ zɩgɩ Ebalɩ piu yuu nɩ sɩ ba tɔɔlɩ kampwəl-balwaarʋ tɩm ba kɩ da: Ruban, dɩ Gadɩ, dɩ Asɛɛrɩ, dɩ Zabulɔn, dɩ Dan, dɩ Nɛfitali.
Kampwəl-balwaarʋ fugə tɩle tɩm
14 Levi tiinə bam mʋ maa maŋɩ sɩ ba tɔɔlɩ bɩtarbiǝ bantʋ dɩ kwǝr-dɩa ba ta wɩ:
15 ‹Nɔɔnʋ wʋlʋ na kwe daa o ma sarɩ jwəm, naa o mɔ kamɔgɔ, sɩ o səgi o taa zuli-dɩ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ, Baŋa-Wɛ na culi woŋo kʋlʋ gɔgɔ na kɩ o zuli tɩn ŋwaanɩ.›
Nɔɔna bam maama maa wʋ́ ləri nɩ: ‹Amina›.
16 ‹Nɔɔnʋ wʋlʋ na ba nɩgɩ o ko dɩ o nu, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
17 ‹Nɔɔnʋ wʋlʋ na fʋfɔ o doŋ sisəm, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
18 ‹Nɔɔnʋ wʋlʋ na ganɩ lilwe sɩ o tusi o cwǝŋǝ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
19 ‹Nɔɔnʋ wʋlʋ na kwɩɩlɩ vəru, naa bɩtarʋ, naa kadəm cɩga kam, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
20 ‹Nɔɔnʋ wʋlʋ na yáalɩ o ko yuu yɩ o pəni dɩ o ko kaanɩ wʋdoŋ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
21 ‹Nɔɔnʋ wʋlʋ na lagɩ varɩm yɩ o pəni dɩd-o, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
22 ‹Nɔɔnʋ wʋlʋ na lagɩ o nakɔ yɩ o pəni dɩd-o, o na maŋɩ o yɩ o ko bu naa o nu bu dɩ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
23 ‹Nɔɔnʋ wʋlʋ na pəni dɩ o tɩnkaanɩ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
24 ‹Nɔɔnʋ wʋlʋ na səgi o gʋ nɔɔnʋ, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
25 ‹Nɔɔnʋ wʋlʋ na joŋi səbu sɩ o gʋ nɔɔnʋ wʋlʋ na wʋ maŋɩ sɩ o tɩ tɩn, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.
26 ‹Nɔɔnʋ wʋlʋ na vɩn Wɛ niə yantʋ sɩ o taa tʋŋɩ o tɔgɩ-ya, Wɛ wʋ́ sɔɔlɩ lwarɩm DƖ yagɩ kʋ tu baŋa nɩ.› Nɔɔna bam maama maa wʋ́ ləri nɩ: ‹Amina›.»