Ka-taa-jege-cɩga taanɩ
23
Yɩ zaŋɩ n pa vwan taanɩ jagɩ. Nan yɩ bʋrɩ vwan bʋra n wǝli nɔn-balɔrɔ.2 Yɩ tɔgɩ kɔgɔ kʋm sɩ n sɛ kǝm-balwaarʋ tɩtʋŋa. Taanɩ na wʋra yɩ n jɩgɩ maana, sɩ n yɩ kwɩɩlɩ cɩga kam, nɔɔna zanzan na maŋɩ ba fɔ vwan te maama dɩ. 3 Yɩ pa nɔɔnʋ di bʋra o na yɩ yinigə tu tɩn ŋwaanɩ.a
4 Nmʋ na beeri n yi n dʋnʋ na-bɩa, naa o bɩnaga, sɩ n ja-ka n joori n vu n pa ka tu. 5 Nmʋ na nɛ nɩ n sɩbarʋ bɩnaga na zɩŋɩ zɩlɩ-kadunnu ka vu ka tʋ, yɩ zaŋɩ n ywəri n da daa n kɛ n daar-o. Ve n vu n tɔgɩ n wəli-o sɩ á zəŋi bɩnaga kam á pa ka zaŋɩ.
6 Yɩ zaŋɩ n ta n wɩ n vɩn yinigə tu o bʋra, sarɩya dim wʋnɩ. 7 Yɩ zaŋɩ n fɔ vwan n pa nɔɔnʋ sɩ n ma n dɩ‑o taanɩ dim baŋa nɩ. Nɔɔnʋ na jɩgɩ cɩga, sɩ n yɩ gʋ-o. Nmʋ na kɩ kʋntʋ doŋ, a bá ma a cɛ‑m. 8 Yɩ sɛ sɩ n joŋi dim bʋra bʋrɩm ŋwaanɩ. Kǝm dɩm kʋntʋ yǝni dɩ dwe dɩdɛɛra yiǝ mʋ pa sɩ cɩga ba tɛa. Nɔn-ŋʋna dɩ maa gugwǝli ba ni-taanɩ.
9 Kʋ daɩ sɩ á yaarɩ vərə, bɛŋwaanɩ abam dɩ dɛɛn yɩ vərə mʋ Ezipi tɩʋ nɩ, yɩ á ye ŋwɩa kam kʋntʋ na yɩ te tɩn.
Ka-tʋŋɩ-ka-daarɩ cullu
10 Kwe-na bɩna yardʋ maama á du wʋdiiru á karɩ nɩ sɩ á taá zagɩ-tɩ. 11 Bɩnɩ dɩlʋ maama na wʋ́ kɩ yarpɛ tɩn, sɩ á yagɩ á karɩ sɩ sɩ taa tigi da kafɛ.b Bɩnɩ dɩm kʋntʋ nɩ, yinigə tiinə balʋ na zʋʋrɩ á tɩtarɩ nɩ tɩn laan wʋ́ zʋ sɩ wʋʋ ba larɩ wʋdiiru tɩm ba di. Ba ma na daarɩ kʋlʋ, sɩ á yagɩ-na sɩ ga-vara dɩ zʋ ba di. Ta kɩ-na kʋntʋ doŋ dɩ karɩ sɩlʋ á na jəri vinyə tweeru dɩ olivi tweeru sɩ wʋnɩ tɩn dɩ.
12 Abam jɩgɩ da yardʋ mʋ sɩ á ma á tʋŋɩ. Da yarpɛ dɛ dɩm nɩ, yɩ tʋŋɩ-na kɔtaa! Kʋntʋ wʋ́ pa á na siun, dɩ á nabɛ, dɩ á bɩnɛ, dɩ á gambɛ, dɩdaanɩ vərə balʋ na zʋʋrɩ á tɩtarɩ nɩ tɩn. Kʋntʋ wʋ́ taa paɩ á jɩgɩ dam.c
13 Yɔɔrɩ á taá kɩ á tɔgɩ a na brɩ abam te maama tɩn. Yɩ zuli-na wɛ dɩdoŋ, yɩ kʋ daɩ amʋ. Yɩ bəŋi-na wɛ dɩdoŋ naa jwəm dɩdoŋ yɩrɩ.
Bɩnɩ maama wʋ candi yatɔ
14 Bɩnɩ maama wʋnɩ abam maŋɩ sɩ á yǝni á di candiə kuni bɩtɔ mʋ sɩ á ma á zuli amʋ:
15 Bɩnɩ maama Abibi cana kamd da yadonnə wʋnɩ, sɩ á di Dɩpɛ dɩlʋ na ba jɩgɩ dabɩlɩ dɩ wʋnɩ tɩn candiə kam. Kwe-na da yarpɛ á di dɩpɛ dɩlʋ na ba jɩgɩ dabɩlɩ dɩ wʋnɩ tɩn. Kantʋ cana kam nɩ mʋ á dɛɛn nuŋi Ezipi tɩʋ kʋm nɩ.e Á na yǝni á zuli amʋ kʋntʋ tɩn, nɔɔn-nɔɔnʋ yɩ ba amʋ yigə nɩ yɩ o ba ze kaanɩm pɛɛrɩ.
16 Mɩna zagɩm maŋa nan na yiǝ, sɩ á di Faa wo-vallʋ candiə kam. Kwe-na mɩna yalʋ á na dɛ yigə á zagɩ tɩn, á ba á pa-nɩ.f
Kʋ wǝli da, abam na yǝni á tʋŋɩ á karɩ tɩtʋŋa maama á ti, sɩ á laan di Faa candiə kam.g
17 Kuni bɩtɔ bɩnɩ maama wʋnɩ á baara bam maŋɩ sɩ ba jeeri amʋ wʋlʋ na yɩ Yuutu Baŋa-Wɛ dɩm tɩn yigə nɩ mʋ kʋntʋ doŋ.
18 Abam na lagɩ á gʋ varɩm sɩ á ma o jana bam á kɩ kaanɩm á pa amʋ, sɩ á yɩ wǝli dɩpɛ dɩlʋ na jɩgɩ dabɩlɩ dɩ wʋnɩ tɩn. Nan lwarɩ-na sɩ á zwɛ varɩm wʋm lara kam maama dɛ dɩm kʋntʋ nɩ. 19 Bɩnɩ maama wʋnɩ sɩ á ja á karɩ wʋdiiru tɩlʋ na loori yigə tɩ kɩ yɩ tɩ lamma tɩn á ja á jeeri abam Tu Baŋa-Wɛ digə kam wʋnɩ.h
Nɔɔn-nɔɔnʋ yɩ kwe bʋ-bala dɩ ka nu nayɩla o saŋɩ mim wʋnɩ.
Baŋa-Wɛ zaasɩm
20 Nii-na! Amʋ lagɩ a tʋŋɩ amʋ malɛka mʋ sɩ ka yɩrɩ abam ka ja ka yi je sɩlʋ amʋ na kwɛ sɩ a pa abam tɩn. 21 Taá nɩgɩ-na malɛka kam sɩ á daarɩ á sɛ ka taanɩ dɩm maama. Amʋ pɛ-ka dam sɩ ka taa tʋŋɩ amʋ tɩtʋŋa. Abam wʋlʋ na vɩ-ka, ka bá yagɩ ka ma cɛ kʋ tu. 22 Abam nan na sɛ ka ni yɩ á daarɩ á kɩ a na wɩ á kɩ te tɩn cɩga cɩga, amʋ laan wʋ́ sɛ sɩ abam dʋna taa yɩ amʋ dʋna, sɩ a daarɩ a culi balʋ na zɩgɩ abam zɩga tɩn. 23 Kʋ na yɩ Amɔɔrɩ tiinə bam, dɩ Hɛtɩ tiinə bam, dɩ Perezi tiinə bam, dɩ Kaanan tiinə bam, dɩ Hevi tiinə bam dɩdaanɩ Yebusi tiinə bam, amʋ malɛka kam wʋ́ ja abam sɩ á zʋ ba tɩga kam á joŋi, yɩ a daarɩ a cɔgɩ-ba pa ba je.i 24 Abam nan na yi-da, yɩ tɔgɩ á tiiri tɩɩnɩ dɩm kʋntʋ jwǝnǝ yam yigə nɩ á zuli-ya. Nan yɩ lwəni-na ba tɩtʋŋ-balwaarʋ tɩm. Cɔgɩ-na ba jwǝnǝ yam dɩdaanɩ kandwa yalʋ ba na cwi ya ŋwaanɩ tɩn.
25 Taá zuli-na amʋ na yɩ á Yuutu Baŋa-Wɛ tɩn yɩranɩ. Abam na kɩ kʋntʋ, amʋ wʋ́ kɩ yu-yoŋo a yagɩ á wʋdiu dɩdaanɩ á na bam baŋa nɩ. Amʋ wʋ́ taa cʋ sɩ yawɩɩrʋ yɩ ja abam. 26 Abam kaana bam dɩ wʋnɩ, ba wʋlʋwʋlʋ bá ja pugə sɩ ka cɔgɩ. Ka-dʋgʋ maa bá taa wʋra. Á maama ŋwɩa maa wʋ́ tiini ka daanɩ lanyɩranɩ.
27 Amʋ wʋ́ pa fʋʋnɩ tiini dɩ ja balʋ maama abam na wʋ́ jeeri tɩn, pa vuvugə tʋ ba tɩtarɩ nɩ.j Amʋ wʋ́ pa á dʋna maama pipiri ba duri ba daarɩ abam. 28 Amʋ ta wʋ́ pa kalmuni taa tɔgɩ á yigə yɩ sɩ daarɩ sɩ zəli Hevi tiinə bam, dɩ Kaanan tiinə bam, dɩ Hɛtɩ tiinə bam na cɩgɩ abam cwǝŋǝ tɩn. 29 A nan bá zəli ba maama abam yigə nɩ bɩnɩ dɩdʋa wʋnɩ. Amʋ na kɩ kʋntʋ, tɩga kam wʋ́ ji kagʋa yɩranɩ mʋ. Kʋʋ́ pa ga-vara tiini ba gaalɩ sɩ ba daanɩ abam. 30 A lagɩ a taa zəli-ba fɩnfɩɩn mʋ sɩ ba nuŋi abam yigə nɩ, sɩ kʋ yi maŋa kalʋ abam na wʋ́ puli á su lʋgʋ kʋm maama tɩn. 31 Abam tɩga kam laŋa wʋ́ zɩgɩ Nanɩ-sʋŋʋ kʋm ni nɩ mʋ sɩ ka taa ve Mediterane nɩnɩʋ kʋm seeni. Ka ta maa wʋ́ zɩgɩ kagʋa kam seeni ka vu ka yi Efratɩ bugə kam nɩ. Kʋ na yɩ balʋ na zʋʋrɩ je sɩm kʋntʋ nɩ lele tɩn, amʋ wʋ́ kɩ-ba abam dam kuri nɩ. Abam maa wʋ́ zəli-ba sɩ ba nuŋi á yigə nɩ.