Ba fɔgɩ ba sɛ Wɛ ni-gonim dɩm
24
Baŋa-Wɛ ma ta dɩ Moyisi DƖ wɩ:«Diini piu kʋm yuu sɩ n ba amʋ te. Nan ja Arɔn, dɩ Nadabɩ, dɩ Abiyu dɩdaanɩ Yisɩrayɛlɩ nakwa fusɩrpɛ n wǝli da.a Abam ta na wʋ yigə yigə, sɩ á tiiri á zuli-nɩ. 2 Nmʋ yɩranɩ mʋ wʋ́ wanɩ n fʋfɔ n yi amʋ yigə. Kʋ daarɩ Yisɩrayɛlɩ nɔn-kɔgɔ kʋm maama ba maŋɩ sɩ ba din piu kʋm yuu.»
3 Moyisi dɛɛn ma tu o maŋɩ Baŋa-Wɛ niə yam dɩ DƖ cullu tɩm maama o brɩ nɔɔna bam. Ba maama ma ləri dɩ kwǝrǝ dɩdʋa ba wɩ: «Baŋa-Wɛ na wɩ dɩbam kɩ kʋlʋ maama tɩn, dɩ́ wʋ́ kɩ.» 4 Moyisi ma pʋpʋnɩ Baŋa-Wɛ taanɩ dɩm maama o tiŋi.
Tɩga na pʋʋrɩ tɩn, o ma lɔ kaanɩm bimbim piu kʋm təŋə nɩ. O dɛɛn ta ma kwe kandwa fugə-yale o cwi, sɩ kandwɛ maama taa zɩgɩ dɩ paɩ Yisɩrayɛlɩ dwiə fugə-yale yam. 5 O ma tʋŋɩ Yisɩrayɛlɩ tiinə nɔn-dʋnnʋ tɩdonnǝ mʋ sɩ ba kwe vara ba ma kɩ kaanɩm ba zwɛ ba pa Baŋa-Wɛ. Ba ma daarɩ ba kwe nabɛ-pwalɩ ba ma kɩ yazurə kaanɩm ba pa Baŋa-Wɛ. 6 Moyisi dɛɛn ma pwəri vara bam jana o kɩ zwɩ wʋnɩ. O laan ma kwe jana balʋ na daarɩ tɩn o miisi o yagɩ kaanɩm bimbim dɩm yɩra nɩ. 7 O ma daarɩ o kwe Wɛ Ni-gonim tɔnɔ kʋm o karɩmɩ o brɩ nɔɔna bam. Ba maama daa maa ləri ba wɩ: «Baŋa-Wɛ na wɩ dɩbam kɩ kʋlʋ maama tɩn, dɩ́ wʋ́ kɩ. Dɩ́ wʋ́ sɛ DƖ ni dɩm.»
8 Moyisi laan ma kwe jana balʋ na wʋ zwɩ sɩm wʋnɩ tɩn, o miisi-ba o yagɩ nɔɔna bam yɩra nɩ yɩ o wɩ: «Jana bantʋ mʋ brɩ nɩ: ni-gonim dɩlʋ Baŋa-Wɛ na kɩ dɩ abam kwiə yantʋ baŋa nɩ tɩn jɩgɩ bu.»b
9 Moyisi ma ja Arɔn, dɩ Nadabɩ dɩ Abiyu dɩdaanɩ Yisɩrayɛlɩ nakwa fusɩrpɛ yɩ ba din piu kʋm yuu. 10 Dáanɩ mʋ ba dɛɛn nɛ Yisɩrayɛlɩ tiinə Wɛ dɩm. DƖ nɛ sɩm kuri nɩ kʋ nyɩ dɩ pwələ mʋ tiini ka pɩɩrɩ nɩ Safiiri kandwɛc tɩn, ka ta yɩ napon-poŋo mʋ nɩnɛɛnɩ wɛyuu kʋm. 11 Yisɩrayɛlɩ yigǝ tiinǝ bam dɛɛn nɛ Baŋa-Wɛ kʋntʋ, yɩ DƖ wʋ cɔgɩ-ba. Ba ma di yɩ ba daarɩ ba nyɔ dáanɩ.
12 Baŋa-Wɛ ma ta dɩ Moyisi DƖ wɩ: «Diini n ba amʋ te piu kʋm yuu nɩ. Nmʋ wʋ́ maŋɩ yo seeni mʋ sɩ a kwe kandwa-pɩlɛ sɩlʋ baŋa nɩ a na pʋpʋnɩ a kwiə yam dɩ a niə yam sɩ a nɔɔna bam taa tɔgɩ tɩn a pa‑m.»d
13 Moyisi ma zaŋɩ dɩdaanɩ o zənnu Zozwe sɩ ba ti ba yigə ba nuŋi.e Moyisi laan ma din piu kʋm yuu sɩ o jeeri Baŋa-Wɛ. 14 O nan ya wuuri o ta dɩ nakwa bam mʋ o wɩ: «Abam maŋɩ-na yo seeni á taá cəgi dɩbam sɩ dɩ́ joori dɩ́ ba. Arɔn dɩ Huuri wʋ́ maŋɩ á tee nɩ sɩ wʋlʋ maama na jɩgɩ ni-kantɔgɔ dɩ o doŋ, sɩ ba kwɛ-kʋ ba pa abam.»
15 Moyisi dɛɛn na diini Sinayi piu kʋm yuu tɩn, kunkoŋo ma kwǝli-kʋ. 16-17 Baŋa-Wɛ paarɩ-zulǝ kʋlʋ na nyɩɩnɩ tɩn ma tu kʋ jǝni piu kʋm yuu nɩ. Yisɩrayɛlɩ tiinə bam na nii ba na Baŋa-Wɛ paarɩ-zulǝ yam kʋntʋ tɩn, kʋ nyɩ dɩ mim mʋ na di bugi-bugi piu kʋm yuu nɩ. Kunkoŋo kʋm ma kwǝli piu kʋm da yardʋ. Da yarpɛ dɛ dɩm nɩ, Baŋa-Wɛ ma bəŋi Moyisi sɩ o ba DƖ te. 18 Moyisi dɛɛn ma sɩɩnɩ o din piu kʋm yuu o zʋ kunkoŋo kʋm wʋnɩ. O ma maŋɩ dáanɩ da fiinna wɩa dɩ tɩtɩ maama.f