Wɛ jero-vwe dɩm taanɩ
25
Baŋa-Wɛ ma ta dɩ Moyisi DƖ wɩ:2 «Ta n brɩ Yisɩrayɛlɩ tiinə bam sɩ ba ja pɛɛra ba ba ba pa-nɩ. Nmʋ nan mʋ wʋ́ joŋi-ya sɩ kʋ tɔgɩ dɩ nɔɔnʋ maama wʋbʋŋa na jaanɩ sɩ o pa te tɩn.a 3 Nan joŋi pɛɛra yantʋ dwi ba tee nɩ:
Səbu-sɩŋa, dɩ səbu-poŋo, dɩ canna, 4 dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn, dɩ gar-fɩfalɩ, dɩdaanɩ bʋŋʋ kʋrʋ, 5 dɩ pi-bɩa twannʋ tɩlʋ ba na taŋɩ sɩna tɩn, dofɛnb vara balʋ twannʋ na dana tɩn, dɩ akasɩa dɛ, 6 dɩ min-zwǝǝnu nugə, dɩ wǝǝnu tɩlʋ lwǝm na ywǝmmǝ tɩn tɩlʋ ba na wʋ́ ma ba kɩ Wɛ swəlim nugə kam tɩn, dɩ kalʋ ba na wʋ́ zwɛ jero-tantɩ-vwe dɩm tɩtʋŋa ŋwaanɩ tɩn, 7 dɩ Onikisi kandwa, dɩ kandwa-ŋʋna ya dwi ya dwi, sɩ ba kɩ-ya kaanɩm nakwɩ tu wʋm gɔrɔ kʋm nɩ, ba daarɩ ba kɩ yadonnə o nyɔɔnɩ gɔrɔ kʋm yɩra nɩ.c
8 Amʋ lagɩ sɩ a nɔɔna bam cwi jero-vwe mʋ ba pa-nɩ, sɩ a taa zʋʋrɩ ba tɩtarɩ nɩ. 9 Jero-vwe dɩm á na wʋ́ cwi tɩn, dɩdaanɩ dɩ wʋʋ wǝǝnu maama maŋɩ sɩ tɩ maŋɩ dɩ amʋ na wʋ́ brɩ-m te tɩn mʋ.
Wɛ ni-gonim daka kamd
10 Pa nɔɔna bam kwe akasɩa dɛ ba ma kɩ daka. Ka wʋ́ taa yɩ kantɩ ni maŋɩm kuni bɩle dɩ cicoro mʋ dɩdwarɩm baŋa nɩ. Yalɩm baŋa maa wʋ́ taa yɩ kantɩ ni maŋɩm dɩdʋa dɩ cicoro. Ka jazɩm baŋa seeni dɩ maa wʋ́ taa yɩ kantɩ ni maŋɩm dɩdʋa dɩ cicoro. 11 Pa ba kwe səbu-sɩŋa na tiini ka yɩ lanyɩranɩ tɩn ba ma kwǝli ka yigə dɩ ka kwaga maama, sɩ səbu-sɩŋa tɔgɩ ka niə yam maama. 12 Á daarɩ á ma səbu-sɩŋa kam á ma á lu bɛn sɩna, á laan kɩ-sɩ daka kam dɛ sɩna sɩm nɩ. Bɛn sɩle ta wʋ daka kam saŋa dɩdʋa nɩ, kʋ daarɩ sɩ sɩle dɩ ta wʋ saŋa kadoŋ nɩ. 13 Ba ta wʋ́ goni akasɩa dɛ sɩle ba daarɩ ba kwe səbu-sɩŋa ba kwǝli dɛ sɩm kʋntʋ maama. 14 Laan pa ba kwe dɛ sɩm ba tʋrɩ daka kam bɛn sɩm wʋnɩ, sɩ ba daarɩ ba ja dɛ sɩm ba ma zɩŋɩ daka kam. 15 Maŋa maama dɛ sɩm kʋntʋ wʋ́ maŋɩ bɛn sɩm nɩ mʋ. Ba ba maŋɩ sɩ ba daa lɩ-sɩ.
16 Amʋ na pɛ‑m amʋ ni-gonim kandwa yale yame, sɩ n kwe-ya n kɩ daka kam wʋnɩ.
17 Kwe-na səbu-sɩŋa kalʋ na tiini ka yɩ lanyɩranɩ tɩn á ma á kɩ lwarɩm saarɩm nipuguf sɩ kʋ pu daka kam. Ka saŋ-dɩdɔrɔ nan wʋ́ taa yɩ kantɩ ni maŋɩm bɩle dɩ cicoro mʋ, sɩ saŋ-kukugə taa yɩ kantɩ ni maŋɩm dɩdʋa dɩ cicoro. 18 Á daarɩ á kwe səbu-sɩŋa á ma á lu Serubɛn malɛsɩ sɩle, á kwe á kwaarɩ daka kam ni-pugu kʋm dɛ sɩm sɩle tɩm kweelim je sɩm nɩ. 19 Serubɛn malɛsɩ sɩm kʋntʋ sɩle dɩ ni-pugu kʋm wʋ́ lu tɩ tanɩ daanɩ mʋ, tɩ ta yɩ woŋo dɩdʋa ni-pugu kʋm dɛ sɩm sɩle nɩ. 20 Serubɛn sɩm wʋ́ jeeri daanɩ mʋ, yɩ sɩ yibiyə cɔɔlɩ tɩga nɩ sɩ sɩ taa nii daka kam nipugu kʋm seeni. Sɩ vwana dɩ maa wʋ́ yarɩgɩ wɛɛnɩ, yɩ sɩ laan kwaarɩ sɩ vwana yam daanɩ sɩ ma-ya sɩ kwǝli nipugu kʋm. 21 Laan kwe-na amʋ ni-gonim kandwa yale yam á kɩ daka kam wʋnɩ, sɩ á daarɩ á kwe nipugu kʋm á pu ka ni. 22 Amʋ wʋ́ taa tui ni-gonim daka kam baŋa seeni a jeeri‑m Serubɛn sɩle sɩm tɩtarɩ laŋa nɩ.g Dáanɩ mʋ amʋ wʋ́ brɩ-m a niə yam maama sɩ Yisɩrayɛlɩ tiinə bam taa tɔgɩ-ya.
Taabʋlʋ Kʋm
23 Ta kwe-na akasɩa dɛ á ma á kɩ taabʋlʋ. Kʋ saŋ-dɩdɔrɔ maŋɩm wʋ́ taa yɩ kantɩ ni kuni bɩle mʋ, sɩ saŋ-kukugə maŋɩm dɩm taa yɩ kantɩ ni maŋɩm bɩdwɩ. Nan pa-na sɩ taabʋlʋ kʋm wɛ-baŋa seeni maŋɩm taa yɩ kantɩ ni maŋɩm dɩdʋa dɩ cicoro. 24 Kwe-na səbu-sɩŋa na yɩ lanyɩranɩ tɩn á kwǝli kʋ yigə dɩ kʋ kwaga maama, sɩ á daarɩ á pa səbu-sɩŋa kam tɔgɩ kʋ niə yam. 25 Səbu-sɩŋa kam na wʋ́ tɔgɩ taabʋlʋ kʋm niə yam tɩn wʋ́ taa yɩ dayigǝ nʋa maŋɩm mʋ. 26 Nan mɔ-na səbu-sɩŋa bɛn sɩna á məəli taabʋlʋ kʋm nɛ sɩna sɩm na wʋ mɛ tɩn. 27 Bɛn sɩm wʋ́ məəli ya taa bwələ dɩ taabʋlʋ kʋm niə yam mʋ, sɩ dɛ sɩlʋ ba na wʋ́ taa maɩ ba zɩŋɩ taabʋlʋ kʋm tɩn tʋrɩ ya wʋnɩ. 28 Kʋ nan wʋ́ taa yɩ akasɩa dɛ mʋ nmʋ wʋ́ kwǝli dɩ səbu-sɩŋa, sɩ ba taa maa zɩŋɩ-kʋ. 29 Nan ta kwe-na səbu-sɩŋa na yɩ lanyɩranɩ tɩn á ma á kɩ zʋŋ-tanlɛ, dɩ zwɩ dwi dwi, dɩ kabǝli, dɩ kambi sɩlʋ na wʋ́ taa tʋŋɩ sana-pɛɛra kaanɩm tɩtʋŋa tɩn. 30 Taabʋlʋ kʋm wʋ́ taa wʋ amʋ jero-vwe di-laa kʋm nɩ mʋ maŋa maama, yɩ dɩpɛ dɩlʋ na yɩ kʋ yɩra kʋ tigi amʋ yigə nɩ tɩn taa wʋ kʋ baŋa nɩ.
Min-zwǝn-zɩgʋ kʋm
31 Kwe-na səbu-sɩŋa na yɩ lanyɩranɩ tɩn á ma á kɩ woŋo kʋlʋ min-zwǝǝnu na wʋ́ taa zɩgɩ kʋ baŋa nɩ tɩn. Ma-na səbu-sɩŋa kamɔgɔ dɩdʋa á magɩ sɩ á mɔ kʋ kuri, dɩ kʋ daa kam, dɩ zwɩ sɩlʋ min-zwǝǝnu tɩm na wʋ́ zɩgɩ sɩ wʋnɩ tɩn. Zwɩ sɩm wʋ́ taa nyɩ dɩ pun-kʋgɩla mʋ. 32 Laan kɩ nɛ sɩrdʋ sɩ sɩ nuŋi daa kam yɩra nɩ. Nɛ sɩtɔ wʋ́ taa wʋ jazɩm baŋa nɩ sɩ sɩtɔ taa wʋ jagwiə baŋa nɩ. 33 Nɩnwaŋa punnu tɩtɔ mʋ wʋ́ taa wʋ naga maama nɩ, sɩ tɩ taa nyɩ dɩ amandiə pun-kʋgɩla dɩ tɩ vɔɔrʋ. Nɛ sɩrdʋ sɩm maama wʋ́ taa yɩ kʋntʋ mʋ. 34 Kʋ daa kam tɩtɩ wʋ́ taa jɩgɩ nɩnwaŋa punnu tɩna mʋ na nyɩ dɩ Amandiə pun-kʋgɩla dɩ tɩ vɔɔrʋ tɩn. 35 Pun-kʋgɩlɩ dɩdwɩ maama na wʋ daa kam yɩra nɩ tɩn wʋ́ təli nɛ sɩle sɩlʋ maama na jeeri daanɩ ka yɩra nɩ tɩn. Kʋntʋ tɩn, pun-kʋgɩla yatɔ mʋ wʋ́ təli nɛ sɩrdʋ sɩm. 36 Pun-kʋgɩla yam, dɩ nɛ sɩrdʋ sɩm, dɩ daa kam tɩtɩ maama maŋɩ sɩ ba magɩ səbu-sɩŋa kamɔgɔ dɩdʋa mʋ ba ma kɩ-tɩ.
37 Nan pa ba kɩ min-zwǝǝnu tɩrpɛ sɩ tɩ taa zɩgɩ nɛ sɩrdʋ sɩm yuni nɩ dɩ daa kam yuu nɩ. Kwe-na-tɩ á zɩgɩ sɩ tɩ taa di tɩ paɩ pooni min-zwǝn-zɩgʋ kʋm yigə seeni. 38 Á ta wʋ́ kwe səbu-sɩŋa kam na yɩ lanyɩranɩ tɩn á ma á kɩ wǝǝnu tɩlʋ na wʋ́ fɔgɩ tɩ kwɛ mim dɩm tɩn, dɩdaanɩ zʋŋ-tanlɛ sɩlʋ ba na wʋ́ taa maɩ ba pɛ tɩntwarɩm dɩm tɩn. 39 Kwe-na səbu-sɩŋa kalʋ duuni na maŋɩ dɩ kilo fiintɔ-tɩnu yɩ ka yɩ lanyɩranɩ tɩn á kɩ min-zwǝn-zɩgʋ kʋm dɩ kʋ zɩla yam dwi dwi. 40 Nan pa ba kɩ woŋo maama sɩ kʋ maŋɩ dɩ tɩte amʋ na brɩ-m piu kʋm yuu nɩ tɩn.»