Baŋa-Wɛ jero-vwe dɩm taanɩ
26
«Nan pa ba kwe gar-jalɩ-laarʋ fugə na nuŋi gar-fɩfalɩ dɩlʋ na yɩ lanyɩranɩ tɩn ba ma kɩ jero-vwe dɩm. Kwe-na gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn á ma á sɔ-ya. Á maa wʋ́ daarɩ á gɔgɩrɩ Serubɛn nyɩnyʋrʋ á kɩ gar-jala yam yɩra nɩ. 2 Gar-jalɩ dɩdwɩ saŋ-dɩdɔrɔ maŋɩm wʋ́ taa yɩ kantɩ ni maŋɩm kuni fiinle-nana mʋ. Dɩ saŋ-kukugə maa wʋ́ taa yɩ kantɩ ni maŋɩm kuni bɩna. Gar-jala fugə kam maama maŋɩ sɩ ya taa maɩ daanɩ mʋ. 3 Laan toŋi-na gar-jala yanu á kɩ daanɩ, sɩ ya ji garɩ-pum dɩdʋa. Ta kɩ-na kʋntʋ dɩ gar-jala yanu yadonnə yam. 4 Nan kwe-na garyi dɩlʋ nyɩnyʋgʋ na yɩ nazon-pupwiə tɩn á ma á kɩ kunə á lə garɩ-pum ni-dɩdɔrɔ kʋm seeni. Á wʋ́ kɩ kʋntʋ mʋ garɩ-pum dɩdoŋ dɩm nɩ. 5 Kunə fiinnu mʋ á wʋ́ kɩ garɩ-punə yale niə dɩdwaarʋ tɩm na jeeri daanɩ tɩn yɩra nɩ. 6 Á ta wʋ́ kɩ səbu-sɩŋa gwəli fiinnu mʋ sɩ sɩ ja garɩ-punə yale yam sɩ kɩ daanɩ. Kʋntʋ mʋ wʋ́ pa jero-vwe dɩm taa yɩ woŋo dɩdʋ.7 Ta pa ba kwe bʋŋʋ kʋrʋ ba sɔ gar-jala sɩ ba ma-ya ba pu jero-vwe dɩm yuu kʋm seeni. Ya maama wʋ́ kɩ daanɩ sɩ ya taa yɩ fugə-dɩdʋa mʋ. 8 Ya maama maa wʋ́ taa ma daanɩ mʋ. Maŋɩ-na ya saŋ-dɩdɔrɔ nɩ sɩ kʋ taa yɩ nɩnɛɛnɩ kantɩ ni maŋɩm kuni fiintɔ. Saŋ-kukugə maa wʋ́ taa yɩ kantɩ ni maŋɩm kuni bɩna. 9 Laan kwe-na gar-jala yanu á toŋi daanɩ sɩ ya ji garɩ-pum. Á ta wʋ́ kwe gar-jala yardʋ yam na daarɩ tɩn mʋ á toŋi daanɩ sɩ ya dɩ ji garɩ-pum. Abam maa wʋ́ pri gar-jala yardʋ tu wʋm bɩle á jeeri wɛɛnɩ sɩ kʋ maŋɩ dɩ jero-vwe dɩm ni seeni. 10 Kɩ-na kunə fiinnu á le garɩ-pum ni-dɩdɔrɔ kʋm seeni, sɩ á daarɩ á kɩ kʋntʋ garɩ-pum dɩdoŋ dɩm nɩ. 11 Nan ta kwe-na canna á ma á kɩ gwəli fiinnu sɩlʋ na wʋ́ toŋi garɩ-punə yale yam daanɩ sɩ ya ji gɔrɔ dɩdʋa tɩn. 12 Abam maa wʋ́ yagɩ bʋŋʋ kʋrʋ gar-jalɩ dɩm sɩ dɩ daa dɩdʋa daarɩ jero-vwe dɩm kwaga seeni. 13 Bʋŋʋ kʋrʋ gar-jalɩ dɩm maa wʋ́ li jero-vwe dɩm dɩdwarɩm seeni sɩ kʋ dwǝni gar-jalɩ dɩdoŋ dɩm sɩ kʋ maŋɩ dɩ kantɩ ni maŋɩm bɩdwɩ mʋ. Kʋntʋ, kʋʋ́ pa jero-vwe dɩm maama pu dɩ ja lanyɩranɩ. 14 Daa n ta pa ba pwəni pi-bɛ tankwallʋ ba daarɩ ba səni-tɩ nasʋŋʋ sɩ ba maa kwǝli jero-vwe dɩm. Kwe-na dofɛn twaanʋ á daŋɩ pulim twannʋ tɩm baŋa nɩ.
15 Pa ba beeri akasɩa da-pʋlwarʋ tɩlʋ na zɩgɩ cɛpɩ tɩn, sɩ ba kwe-tɩ ba kɩ jero-vwe dɩm. 16 Da-pɩlɔgɔ maama saŋ-dɩdɔrɔ maŋɩm wʋ́ taa yɩ kantɩ ni kuni fugə mʋ, sɩ dɩ saŋ-kukugə seeni taa yɩ kantɩ ni maŋɩm dɩdʋa dɩ cicoro. 17 Abam maa wʋ́ sarɩ nwa bale da-pɩlɔgɔ maama yɩra nɩ. Kʋntʋ wʋ́ pa da-pɩlɔgɔ maama wanɩ kʋ toŋi dɩdaanɩ kʋdoŋ na saŋɩ-kʋ tɩn. Nan kɩ-na dɛ sɩm maama kʋntʋ. 18 Da-pɩlwarʋ fiinle mʋ wʋ́ zɩgɩ sɩ kʋ maŋɩ dɩ jero-vwe dɩm jagwiə seeni saŋa kam. 19 Nan kwe-na səbu-poŋo á ma á kɩ wǝǝnu tɩlʋ dɛ sɩm na wʋ́ zɩgɩ tɩ baŋa nɩ tɩn fiinna. Luuru tɩle wʋ́ taa təli da-pɩlɔgɔ maama. Tɩ wʋ́ taa jɩgɩ cwiim je sɩle mʋ sɩ da-pɩlɔgɔ nwa bam wanɩ ba zɩgɩ sɩ wʋnɩ. 20 Kɩ-na kʋntʋ sɩ kʋ maŋɩ dɩ jero-vwe dɩm baŋa seeni saŋa kam, sɩ da-pɩlwarʋ fiinle taa zɩgɩ da. 21 Səbu-poŋo wǝǝnu fiinna mʋ á wʋ́ kɩ sɩ da-pɩlwarʋ tɩm taa zɩgɩ tɩ baŋa nɩ. Wǝǝnu tɩle maa wʋ́ taa wʋra da-pɩlɔgɔ maama ŋwaanɩ. 22 Kʋ na yɩ saŋa kalʋ na wʋ bri-kwaga nɩ yɩ ka jeeri wa-zʋʋrɩ seeni tɩn, sɩ á cwi da-pɩlwarʋ tɩrdʋ dáanɩ. 23 Nan ta wǝli-na da-pɩlwarʋ tɩle sɩ á cwi-tɩ vwe dɩm kwaga saŋa kam gugwəəru tɩle tɩm nɩ. 24 Abam maa wʋ́ toŋi gugwəəru da-pɩlwarʋ tɩm kʋntʋ sɩ tɩ məəli daanɩ. Kʋʋ́ zɩgɩ tɩga kam nɩ mʋ kʋ məəli sɩ kʋ taa diini baŋa kam mɛ səbu-sɩŋa baŋa kam na lǝgi da tɩn. 25 Bri-kwaga kam seeni da-pɩlwarʋ tɩm laan maa wʋ́ taa yɩ nana mʋ, yɩ ya laan jɩgɩ səbu-poŋo wǝǝnu fugə-tɩrdʋ tɩlʋ na wʋ́ təli-tɩ tɩn.
26-27 Ta pa ba kwe akasɩa dɛ sɩ ba ma-sɩ ba garɩ jero-vwe dɩm sɛn sɩm maama. Dɛ sɩnu mʋ wʋ́ garɩ da-pɩlwarʋ tɩm na wʋ saŋa kalʋ maama nɩ tɩn, sɩ tɩ ja daanɩ lanyɩranɩ. Jagwiə seeni saŋa kam, dɩ baŋa seeni saŋa kam dɩ bri-kwaga seeni saŋa kam mʋ kʋntʋ. 28 Kʋ daarɩ, tɩtarɩ dagara kam wʋ́ tʋlɩ ka zɩgɩ saŋa kam daa dɩdʋa nɩ ka vu ka yi daa kadoŋ kam nɩ, ka toŋi da-pɩlwarʋ tɩm maama ka kɩ daanɩ. 29 Laan kwe-na səbu-sɩŋa á kwǝli da-pɩlwarʋ tɩm, sɩ á daarɩ á ma á kɩ kwana á məəli da-pɩlwarʋ tɩm yɩra nɩ sɩ dagarɩ sɩm taa tʋrɩ ya wʋnɩ. Dagarɩ sɩm dɩ maŋɩ sɩ á taagɩ-sɩ dɩ səbu-sɩŋa mʋ.
30 Laan pa ba cwi jero-vwe dɩm sɩ dɩ zɩgɩ nɩ amʋ na brɩ-m tɩte piu kʋm yuu nɩ tɩn.
Wɛ-di-laa cɩga cɩga gar-jalɩ dɩm
31-33 Abam ta kɩ-na gar-jalɩ dɩlʋ na wʋ́ lə dɩ pwɛ Wɛ di-laa kʋm dɩ di-laa cɩga cɩga kam daanɩ tɩn sɩ pʋpwara taa wʋra. Kwe-na gar-fɩfalɩ dɩlʋ na yɩ lanyɩranɩ tɩn á ma á kɩ gar-jalɩ dɩm kʋntʋ. Abam wʋ́ kwe gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn mʋ á ma á sɔ-dɩ. Á maa wʋ́ daarɩ á gɔgɩrɩ Serubɛn nyɩnyʋrʋ á kɩ gar-jalɩ dɩm yɩra nɩ. Nan kwe-na akasɩa da-ywə yana á kwǝli-sɩ dɩ səbu-sɩŋa, yɩ á daarɩ á kɩ səbu-sɩŋa gwəli á məəli sɩ yɩra nɩ. Laan kwe-na-ya á cwi səbu-poŋo wǝǝnu tɩna tɩm baŋa nɩ. Abam na kɩ kʋntʋ, sɩ á kwe gar-jalɩ dɩm á lə gwəli sɩm yɩra nɩ pa dɩ cɩ dɩ kwǝli Wɛ ni-gonim daka kam.a 34 Nan ta kwe-na lwarɩm saarɩm nipugu kʋm á ma pu ni-gonim daka kam na zɩgɩ Wɛ-di-laa cɩga cɩga kam nɩ tɩn. 35 Yigə digə kam na yɩ Wɛ di-laa kʋm tɩn mʋ á wʋ́ zɩgɩ taabʋlʋ kʋm sɩ kʋ taa wʋ vwe dɩm jagwiə saŋa kam seeni. Min-zwǝn-zɩgʋ kʋm maa wʋ́ taa wʋ vwe dɩm jazɩm saŋa kam seeni.
36 Kʋ nan na yɩ vwe dɩm ni, sɩ á kɩ tɩntʋ: Kwe-na gar-fɩfalɩ sɩlʋ na yɩ lanyɩranɩ tɩn dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn á ma á sɔ gar-jalɩ dɩlʋ na wʋ́ lə ni dɩm nɩ tɩn. Á ta wʋ́ daarɩ á gɔgɩrɩ nyɩnyʋrʋ gar-jalɩ dɩm yɩra nɩ. 37 Abam na sɔgɩ gar-jalɩ dɩm kʋntʋ, á laan wʋ́ kwe akasɩa ywə yanu á taagɩ-ya dɩ səbu-sɩŋa yɩ á daarɩ á kɩ səbu-sɩŋa gwəli á məəli ya yɩra nɩ. Laan mɔ-na canna wǝǝnu tɩnu sɩ á cwi ywə yam tɩ baŋa nɩ, yɩ á daarɩ á lə gar-jalɩ dɩm da.»