Zwɛɛm kaanɩm bimbim dɩm
27
«Pa ba kwe akasɩa dɛ ba kɩ bimbim sɩ á taá zwɛ kaanɩm dɩ baŋa nɩ. Ke-na-dɩ sɩ dɩ sɛn sɩna sɩm taa maɩ daanɩ, kantɩ ni maŋɩm kuni bɩnu. Kʋ daarɩ sɩ wɛ-baŋa maŋɩm dɩm taa yɩ kantɩ ni maŋɩm kuni bɩtɔ. 2 Sarɩ-na wǝǝnu tɩna na nyɩ dɩ nyɩa á kɩ bimbim dɩm gugwəəru tɩna tɩm nɩ. Tɩntʋ dɩ bimbim dɩm maama wʋ́ ji woŋo dɩdʋa mʋ, sɩ á daarɩ á ma canna á taagɩ-dɩ dɩ ka nyɩa yam maama.3 Nan ta kwe-na canna á kɩ kaanɩm bimbim dɩm yɩra tɩtʋŋa zɩla maama. Mɔ-na zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ, dɩ na-zwɩ dɩ mim zʋŋ-tanlɛ, dɩdaanɩ wǝǝnu tɩlʋ ba na wʋ́ taa maɩ ba zɔ nwana ba lɩ kambi wʋnɩ tɩn. 4-5 Maŋɩ-na bimbim dɩm tɩtarɩ nɩ á kɩ wo-daŋɔ á məəli ka yɩra nɩ. Ta kwe-na canna luuru á sɔ á lɛɛnɩ daanɩ sɩ á kwe-kʋ á dɩ wo-daŋɔ kʋm baŋa nɩ. Laan kɩ-na canna kwana yana á məəli-ya bimbim dɩm sɛn sɩm nɩ sɩ ya maŋɩ dɩ canna lɛɛna yam. 6 Ta sarɩ-na akasɩa dɛ sɩlʋ ba na wʋ́ taa maɩ ba zɩŋɩ bimbim dɩm tɩn, sɩ á daarɩ á taagɩ-sɩ dɩdaanɩ canna. 7 Abam nan wʋ́ tʋrɩ dɛ sɩm kʋntʋ mʋ kwana yana yam na wʋ bimbim dɩm sɛn sɩm nɩ tɩn, sɩ á taá waɩ-ka á zɩŋa. 8 Kaanɩm bimbim dɩm kʋntʋ n na wʋ́ kɩ dɩ da-pɩlwarʋ tɩm kʋntʋ tɩn, maŋɩ sɩ dɩ ta jɩgɩ wʋʋ mʋ dɩ nyɩ dɩ daka. Nan pa kʋ maŋɩ dɩ amʋ na brɩ-m te piu kʋm yuu nɩ tɩn.»
Kʋnkɔlɔ kʋlʋ na kaagɩ jero-vwe dɩm tɩn
9 «Abam na kɩ jero-vwe dɩm, sɩ á daarɩ á sɔ gar-fɩfalɩ sɩ sɩ kwǝli dɩ kʋnkɔlɔ kʋm. Kʋnkɔlɔ kʋm jagwiə seeni maŋɩm wʋ́ taa yɩ kantɩ ni maŋɩm kuni bi mʋ saŋ-dɩdɔrɔ nɩ. 10 Daa á ta kwe-na gwaarʋ tɩm á daŋɩ dɛ fiinle baŋa nɩ. Dɛ sɩm nan wʋ́ taa zɩgɩ canna luuru fiinle baŋa nɩ mʋ. Á ta maa wʋ́ kwe səbu-poŋo á mɔ gwəli á məəli dɛ sɩm yɩra nɩ dɩ tɩ lu-vɔɔrʋ tɩm. 11 Kʋ na yɩ kʋnkɔlɔ kʋm jazɩm baŋa seeni saŋa kam, pa-na sɩ ka taa yɩ bɩdwɩ dɩ jagwiə saŋa kam.
12 Kʋnkɔlɔ kʋm saŋa kalʋ na jeeri wa-zʋʋrɩ seeni tɩn maŋɩm wʋ́ taa yɩ kantɩ ni maŋɩm kuni fiinnu mʋ saŋ-dɩdɔrɔ nɩ. Daŋɩ-na gwaarʋ tɩm dɛ fugə dɩ sɩ luuru fugə kam baŋa nɩ sɩ á ma á kwǝli saŋa kam kʋntʋ. 13 Kʋnkɔlɔ kʋm wa-puli seeni saŋa kam maŋɩm dɩ wʋ́ taa yɩ kantɩ ni maŋɩm kuni fiinnu mʋ saŋ-dɩdɔrɔ nɩ. 14 Jero-vwe kʋnkɔlɔ kʋm ni dɩm wʋ́ taa wʋ wa-puli seeni saŋa kam nɩ mʋ. Ni dɩm jazɩm seeni mʋ á wʋ́ lə gwaarʋ tɩlʋ dɩdwarɩm na yɩ kantɩ ni maŋɩm kuni fugə-bɩnu yɩ tɩ daŋɩ dɛ sɩtɔ dɩ sɩ luuru tɩtɔ tɩm baŋa nɩ tɩn. 15 Ni dɩm jagwiə seeni dɩ wʋ́ taa yɩ kʋntʋ mʋ. 16 Sɩ kʋ na yɩ kʋnkɔlɔ kʋm ni dɩm tɩtɩ, kwe-na gar-fɩfalɩ sɩlʋ na yɩ lanyɩranɩ tɩn, dɩ gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn á ma á sɔ gar-jalɩ dɩlʋ na wʋ́ lə ni dɩm nɩ tɩn. Á ta wʋ́ daarɩ á gɔgɩrɩ nyɩnyʋrʋ gar-jalɩ dɩm yɩra nɩ. Dɩ dɩdwarɩm maŋɩm wʋ́ taa yɩ kantɩ ni kuni fiinle mʋ yɩ á daŋɩ-dɩ dɛ sɩna dɩ sɩ luuru tɩna tɩm baŋa nɩ.
17 Dɛ sɩlʋ sɩm na wʋ́ kaagɩ kʋnkɔlɔ kʋm maama tɩn maŋɩ sɩ ba ma səbu-poŋo mʋ ba ma kɩ sɩ lu-vɔɔrʋ tɩm dɩdaanɩ sɩ gwəli sɩm ba na wʋ́ məəli sɩ yɩra nɩ tɩn. Luuru tɩlʋ dɛ sɩm kʋntʋ na cwi tɩ baŋa nɩ tɩn maa wʋ́ taa yɩ canna mʋ baá ma ba kɩ-tɩ. 18 Kʋnkɔlɔ kʋm maama wʋ́ taa yɩ kantɩ ni maŋɩm kuni bi mʋ saŋ-dɩdɔrɔ nɩ yɩ kʋ saŋ-kukugə maŋɩm maa wʋ́ taa yɩ kantɩ ni maŋɩm kuni fiinnu. Gar-jala yalʋ na lǝgi ya kwǝli kʋnkɔlɔ kʋm tɩn wʋ́ nuŋi gar-fɩfalɩ sɩlʋ na yɩ lanyɩranɩ tɩn wʋnɩ mʋ. Ya dɩdɔrɔ wɛ-baŋa maŋɩm maa wʋ́ taa yɩ kantɩ ni maŋɩm kuni bɩnu. Ya nan wʋ́ palɩ dɛ sɩlʋ na cwi canna luuru baŋa nɩ tɩn mʋ.
19 Á ta wʋ́ kwe canna mʋ á ma á kɩ zɩla yalʋ maama na maŋɩ dɩ jero-vwe dɩm tɩtʋŋa tɩn. Paara yalʋ á na wʋ́ kɩ sɩ ya taa jaanɩ vwe dɩm dɩ kʋnkɔlɔ kʋm gar-jala yam tɩn dɩ wʋ́ taa yɩ canna mʋ á wʋ́ ma á kɩ-ya.»
Min-zwǝǝnu tɩm nugə
20 «Nan ta dɩ Yisɩrayɛlɩ tiinə bam sɩ ba ja Olivi nugə kalʋ na yɩ lanyɩranɩ tɩn ba ba ba pa‑m min-zwǝǝnu tɩm ŋwaanɩ. Kʋntʋ mʋ wʋ́ pa tɩ mim taa di taan, yɩ dɩ ba dweə. 21 Kʋ na yɩ min-zwǝn-zɩgʋ kʋm, sɩ á zɩgɩ-ka Wɛ jəro-vwe di-laa kʋm nɩ mɛ gar-jalɩ dɩm na kwǝli ni-gonim daka kam tɩn mʋ. Arɔn dɩ o biə bam nan wʋ́ nii mʋ sɩ min-zwǝǝnu tɩm taa di Baŋa-Wɛ yigə nɩ taan, sɩ tɩ yɩ dwe wa-zʋʋrɩ maŋa nɩ sɩ kʋ yi tɩ-pʋra dɛ maama wʋnɩ. Yisɩrayɛlɩ tiinə bam dɩ ba dwi dɩm nan wʋ́ taa tɔgɩ ni dɩntʋ mʋ taan wuu.»