Kaanɩm tiinə gwaarʋ tɩm
28
«Pa n zɩmbaarʋ Arɔn dɩ o biə, Nadabɩ, dɩ Abiyu, dɩ Eleyazaarɩ, dɩ Itamarɩ ba nmʋ te sɩ n pɔɔrɩ-ba sɩ ba taa yɩ ba yɩra dɩ nɔɔna bam maama. Bantʋ mʋ wʋ́ taa yɩ amʋ kaanɩm tiinə sɩ ba taa tʋŋɩ ba pa-nɩ. 2 Nan kɩ-na zulə gwaarʋ sɩ tɩ maŋɩ dɩ n zɩmbaarʋ Arɔn dɩ o kaanɩm tɩtʋŋɩ dɩm á pa‑o. Pa-na sɩ tɩ taa jɩgɩ nɩnwaŋa lanyɩranɩ. 3 Abam na wʋ́ pɔɔrɩ Arɔn sɩ o taa yɩ amʋ kaanɩm tu tɩn ŋwaanɩ, nan kuri-na gwarʋ sɩ amʋ pa-ba swan sɩ ba sɔ o gwaarʋ tɩm. 4 Nan pa ba sɔ zulə gwaarʋ tɩntʋ dwi: Nyɔɔnɩ gwar-palɩ, dɩ gwar-wʋgʋ, dɩ gwar-bwərə, dɩ gwar-dɩdɔrɔ kʋlʋ ba na mɛ nyɩnyʋrʋ zanzan ba ma gɔgɩrɩ-kʋ tɩn, dɩ təŋə garyi, dɩdaanɩ yuu garyi. Ba maa wʋ́ kɩ gwaarʋ tɩntʋ doŋ, sɩ ba pa n zɩmbaarʋ Arɔn dɩ o biə bam sɩ ba yǝni ba zʋ-tɩ ba taa tʋŋɩ kaanɩm tɩtʋŋa ba pa-nɩ. 5 Pa gwarʋ tɩm kwe gar-fɩfalɩ sɩlʋ na yɩ lanyɩranɩ tɩn, yɩ ba laan wǝli dɩ gar-ŋʋnɩ sɩlʋ nyɩnyʋrʋ na yɩ səbu-sɩŋa, dɩ nazon-pupwiə, dɩ nasʋŋ-pupwiə dɩ nasʋŋʋ cwɛ-cwɛ tɩn ba ma sɔ-tɩ.Gwar-wʋgʋ kʋm
6 Pa ba kwe gar-fɩfalɩ sɩlʋ na yɩ lanyɩranɩ tɩn ba ma sɔ gwar-wʋgʋ kʋm, sɩ ba daarɩ ba ma gar-ŋʋnɩ sɩlʋ nyɩnyʋrʋ na yɩ səbu-sɩŋa, dɩ nazon-pupwiə, dɩ nasʋŋ-pupwiə dɩ nasʋŋʋ cwɛ-cwɛ tɩn ba ma gɔgɩrɩ-kʋ lanyɩranɩ. 7 Baá pa vʋvwɩ sɩle mʋ tɔgɩ vwana yam seeni sɩ kʋ pa gɔrɔ kʋm yigə dɩ kwaga toŋi daanɩ. 8 Ba ta wʋ́ kɩ təŋə vʋvʋa sɩ ka dɩ taa yɩ bɩdwɩ dɩ gwar-wʋgʋ kʋm. Baá kwe garyi dɩlʋ ba na mɛ ba kɩ gwar-wʋgʋ kʋm tɩn mʋ ba ma kɩ vʋvʋa kam.
9 Laan beeri-na Onisi kandwa-ŋʋna tɩle sɩ á sarɩ Yisɩrayɛlɩ dwi maama yɩrɩ á kɩ tɩ baŋa nɩ. 10 Sarɩ-na nabaara bam yɩra yardʋ á kɩ kandwɛ maama baŋa nɩ, sɩ kʋ maŋɩ dɩ ba lʋra kam dɛɛn na ve te tɩn. 11 Pa-na sɩ gɔgɔ kwaanɩ o sarɩ yɩra yam kandwa yam baŋa nɩ, sɩ o laan kwe səbu-sɩŋa o tɔgɩ kandwa yam niə. 12 Laan məəli-na kandwa yale yam á le gwar-wʋgʋ kʋm vwana vʋvwɩ sɩm yɩra nɩ. Ya yɩ kandwa-gulə mʋ sɩ ya guli Yisɩrayɛlɩ tiinə bam ba dwiə yam yɩra. Arɔn na yǝni o tui amʋ Baŋa-Wɛ yigə nɩ, oó taa yǝni o zɩŋɩ ba yɩra yam kʋntʋ mʋ, sɩ o yɩ swe ba swiə maŋa dɩ maŋa. 13 Abam ta wʋ́ kwe səbu-sɩŋa mʋ á mɔ kunə yale á wǝli da. 14 Nan ta kwe-na səbu-sɩŋa na yɩ lanyɩranɩ tɩn á kɩ capʋnnʋ tɩle nɩnɛɛnɩ ŋʋnɩ doŋ tɩn. Vɔ-na capʋnnʋ tɩm kunə yale yam yɩra nɩ sɩ tɩ ja gwar-wʋgʋ kʋm yigə dɩ kwaga.
Nyɔɔnɩ gwar-palɩ dɩm
15 Abam ta wʋ́ beeri gar-fɩfalɩ sɩlʋ na yɩ lanyɩranɩ tɩn á ma kɩ garyi dɩlʋ na wʋ́ palɩ Arɔn nyɔɔnɩ nɩ tɩn. O nan wʋ́ ma gwar-palɩ dɩm kʋntʋ mʋ o maanɩ sɩ o lwarɩ amʋ wʋbʋŋa na yɩ te tɩn. Á wʋ́ ma gar-ŋʋnɩ sɩlʋ nyɩnyʋrʋ na yɩ səbu-sɩŋa, dɩ nazon-pupwiə, dɩ nasʋŋ-pupwiə dɩ nasʋŋʋ cwɛ-cwɛ tɩn á gɔgɩrɩ-dɩ, nɩnɛɛnɩ gwar-wʋgʋ kʋm dɩ na yɩ te tɩn mʋ. 16 Maŋɩ-na dayigǝ nʋa maŋɩm á ma á kɩ-dɩ. Nan pa-na sɩ dɩ niə yana yam maama taa maɩ daanɩ, sɩ á pri-dɩ kuni bɩle. 17 Abam laan wʋ́ tigisi kandwa-ŋʋna dwi dwi sɩ ya pəni gɩnɩ sɩna dɩ kandwa-ŋʋna tɩtɔ. Pulim gɩna kam kandwa-ŋʋna tɩm wʋ́ taa yɩ Sardʋanɩ, dɩ Topazɩ, dɩdaanɩ Bɛrili. 18 Gɩna bɩle tu kandwa-ŋʋna tɩm maa wʋ́ taa yɩ Dɩama, dɩ Safiiri, dɩdaanɩ Emɛrɔdɩ. 19 Gɩna bɩtɔ tu wʋm maa wʋ́ taa jɩgɩ kandwa-ŋʋna tɩntʋ: Opalɩa, dɩ Agatɩ, dɩdaanɩ Ametisti. 20 Sɩ gɩna bɩna tu wʋm kandwa-ŋʋna tɩm taa yɩ Bɛrili, dɩ Onisi dɩdaanɩ Zasɩpɩ.b Abam maa wʋ́ kwe səbu-sɩŋa á tɔgɩ kandwa yam kʋntʋ maama niə yam. 21 Nan ta sarɩ-na Yisɩrayɛlɩ dwi maama yɩra fugə-yale yam kandwa yam baŋa nɩ. Kandwɛ maama wʋ́ brɩ yɩrɩ dɩdwɩ sɩ dɩ taa yɩ maana.
22 Á ta wʋ́ ma səbu-sɩŋa kam na yɩ lanyɩranɩ tɩn á jujugi á ma á kɩ capʋnnʋ nɩnɛɛnɩ ŋʋna doŋ, sɩ tɩ toŋi dɩ gwar-palɩ dɩm, 23 sɩ á daarɩ á kɩ səbu-sɩŋa kwana yale na wʋ́ lə gwar-palɩ dɩm baŋa seeni gugwəəru tɩle tɩm nɩ. 24 Laan tʋrɩ-na capʋnnʋ tɩm kwana yalʋ na lǝgi gwar-palɩ dɩm yɩra nɩ tɩn, 25 sɩ á ta ja capʋnnʋ tɩm niə yadonnə yam á vu á kuni dɩdaanɩ kunə yale yam sɩ tɩ ja gwar-wʋgʋ kʋm vwana vʋvwɩ sɩm. 26 Nan ta kɩ-na səbu-sɩŋa kwana yale sɩ ya məəli gwar-palɩ dɩm kuri dɩm seeni. Yaá taa wʋ dɩ kwaga seeni na salɩ dɩ gwar-wʋgʋ kʋm tɩn mʋ. 27 Nan ta kɩ-na kwana yale yayam á məəli-ya gwar-wʋgʋ kʋm yɩra nɩ sɩ ya taa bwələ dɩ kʋ vwana vʋvwɩ sɩm kuri seeni. Yaá taa wʋ kʋ təŋə garyi kam baŋa seeni, garyiə yam na toŋi daanɩ mɛ tɩn. 28 Kʋ kwaga nɩ, sɩ á kwe gar-ŋʋna kalʋ nyɩnyʋgʋ na yɩ nazon-pupwiə tɩn á ma á vɔ kwana yale yam na wʋ gwar-palɩ dɩm kuri nɩ tɩn, dɩ yalʋ na wʋ gwar-wʋgʋ kʋm vwana yam seeni tɩn á kɩ daanɩ. Kʋntʋ wʋ́ pa gwar-palɩ dɩm yɩ taa bibigə.
29 Á na kɩ gwar-palɩ dɩm kʋntʋ doŋ, Arɔn dɩ wʋ́ yǝni o zɩŋɩ Yisɩrayɛlɩ tiinə bam dwi maama dɩ dɩ yɩrɩ o bɩcarɩ nɩ, yɩ o zʋ Wɛ di-laa kʋm. Kʋ maa wʋ́ pa amʋ Baŋa-Wɛ taa guli ba gulə maŋa maama. 30 Á wʋ́ bɔɔrɩ gwar-fwɛɛlɩ mʋ gwar-palɩ dɩm wʋnɩ, sɩ á kwe Yurim dɩdaanɩ Tumimc á kɩ dɩ wʋnɩ.d Arɔn wʋ́ yǝni o ja-tɩ mʋ o zʋ o zɩgɩ amʋ yigə nɩ sɩ o taa ma-tɩ o lwarɩ amʋ Baŋa-Wɛ wʋbʋŋa Yisɩrayɛlɩ tiinə bam ŋwaanɩ. Kʋntʋ ŋwaanɩ o maŋɩ sɩ o zʋ gwar-palɩ dɩm maŋa kalʋ maama o na wʋ́ zʋ amʋ tee nɩ tɩn mʋ.»
Kaanɩm tiinə gwaarʋ tɩdonnǝ tɩm
31 «Á ta wʋ́ kwe gar-ŋʋnɩ sɩlʋ nyɩnyʋgʋ na yɩ nazon-pupwiə tɩn yɩranɩ mʋ á ma á sɔ gwar-bwərə kalʋ kaanɩm tu wʋm na wʋ́ zʋ yɩ o daarɩ o zʋ gwar-wʋgʋ kʋm o daŋɩ ka baŋa nɩ tɩn. 32 Nan bɔɔrɩ-na kʋ tɩtarɩ dɩm, sɩ nɔɔnʋ yuu wanɩ kʋ tɔgɩ da kʋ zʋ. Bɛɛrɩ-na ban dɩm seeni maama sɩ kʋ yɩ kaarɩ. 33-34 Kwe-na gar-ŋʋnɩ sɩlʋ nyɩnyʋrʋ na yɩ nazon-pupwiə, dɩ nasʋŋ-pupwiə, dɩ nasʋŋʋ cwɛ-cwɛ tɩn á gɔgɩrɩ grɩnadɩnɩ tiu biə nyɩnyʋrʋ pa tɩ kaagɩ gɔrɔ kʋm kuri niə yam maama tɩ pu. Á ta wʋ́ daarɩ á lagɩ səbu-sɩŋa loŋnə balwa sɩ á məəli-ya á kɩ da. Loŋni dɩdʋa wʋ́ taa wʋra grɩnadɩnɩ tiu biə bale maama tɩtarɩ nɩ mʋ sɩ ba taa saŋɩ daanɩ. 35 Arɔn na yǝni o lagɩ o tʋŋɩ kaanɩm tɩtʋŋa, sɩ o zʋ gwar-bwərə kam kʋntʋ. O na lagɩ o zʋ amʋ di-laa kʋm naa o na nuŋi da, loŋnə yam sɔɔ kwǝri wʋ́ taa ni, sɩ o yɩ tɩ.
36 Nan kwe-na səbu-sɩŋa na yɩ lanyɩranɩ tɩn á kɩ wo-pɩlɔgɔ. Laan sarɩ-na kʋ baŋa nɩ: ‹O pɔɔrɩ o yɩ o yɩra mʋ Baŋa-Wɛ ŋwaanɩ›. 37 Á ta wʋ́ kwe gar-ŋʋna kalʋ nyɩnyʋgʋ na yɩ nazon-pupwiə tɩn á ma á məəli wo-pɩlɔgɔ kʋm o yuu garyi dɩm yigə seeni. 38 Kʋʋ́ maŋɩ Arɔn tri nɩ mʋ maŋa maama. Yisɩrayɛlɩ tiinə bam na yǝni ba ja pɛɛra ba jeeri sɩ ba pa-nɩ, yɩ tusim na wʋra ba tɩtʋŋa yam nɩ, amʋ wʋ́ da Arɔn ŋwaanɩ a yagɩ a ma cɛ-ba, pa a sɛ a joŋi ba pɛɛra yam kʋntʋ.
39 Abam wʋ́ kwe gar-fɩfalɩ mʋ á ma kɩ Arɔn gwar-dɩdɔrɔ kʋm dɩ o yuu garyi dɩm. Nan ta pa-na sɩ ba tiini ba gɔgɩrɩ o təŋə vʋvʋa kam lanyɩranɩ. 40 Kʋ na yɩ Arɔn biə bam, sɔ-na nɩnwaŋa gwaarʋ, dɩ yipwi, dɩdaanɩ təŋə vʋvwɩ á pa-ba. Kʋntʋ mʋ wʋ́ zuli ba kaanɩm tɩtʋŋɩ dɩm.
41 Pa Arɔn dɩ o biə bam zʋ ba gwaarʋ tɩm, sɩ n daarɩ n kwe swəlim nugə n lo ba yum nɩ amʋ ŋwaanɩ n ma n pwɛ-ba sɩ ba taa yɩ a kaanɩm tiinə. 42 Ta kwe-na gar-fɩfalɩ á sɔ gar-kuri-kukwi á pa-ba sɩ ba yǝni ba zʋ. Sɩ maa wʋ́ zɩgɩ ba təŋə nɩ sɩ yi ba cwə mʋ. Kʋntʋ wʋ́ pa ba yɩ taa yɩ bwəri. 43 Maŋa kalʋ maama Arɔn dɩ o biə bam na yǝni ba zʋ amʋ jero-vwe dɩm, naa ba na lagɩ ba yi amʋ kaanɩm bimbim dɩm ba tʋŋɩ ba pa-nɩ, ba maŋɩ sɩ ba zʋ gar-kuri-kukwi sɩm kʋntʋ mʋ. Kʋ na daɩ kʋntʋ, baá na ba cavɩɩra yɩ ba tɩ kʋ ŋwaanɩ. Arɔn dɩ o dwi dɩm maama maŋɩ sɩ ba taa tɔgɩ a ni dɩm kʋntʋ mʋ sɩ kʋ taa ve maŋa maama.»