Yisɩrayɛlɩ tiinə dɩ ba jɩjɩgɩrʋ
22
Nɔɔnʋ na ŋɔgɩ na-bɩa yɩ o gʋ-ka naa o kwe-ka o yəgi, ba na jaanɩ kʋ tu, oó kwe nabɛ sɩnu mʋ o joori o ŋwɩ na-bɩa kalʋ o na ŋɔgɩ tɩn. Kʋ nan na yɩ piə mʋ o ŋɔga, sɩ o kwe peeni sɩna o ma o ŋwɩ piə kalʋ o na ŋɔgɩ tɩn yuu nɩ.2-4 Ŋwɩɩnʋ maŋɩ sɩ o joori o ŋwɩ kʋlʋ o na ŋɔgɩ tɩn mʋ. O daa na warɩ o ŋwɩ: sɩ ba ja-o ba yəgi sɩ o taa yɩ gambaa jɩnɩ dɩm ŋwaanɩ. Kʋ daarɩ, ba na jaanɩ ŋwɩɩnʋ wʋm yɩ o ta jɩgɩ varɩm wʋlʋ o na ŋɔgɩ tɩn, sɩ o ŋwɩ-kʋ kuni bɩle o pa kʋ tu, nɩnɛɛnɩ kʋ na yɩ na-bɩa naa bɩnaga naa piə mʋ dɩ. Ŋwɩɩnʋ na bwəri nɔɔnʋ sɔŋɔ tɩtɩɩ nɩ yɩ ba ja-o ba magɩ ba gʋ, wʋlʋ na gʋ-o tɩn bá tɩ kʋ ŋwaanɩ. Sɩ kʋ na yɩ wɩa nɩ mʋ ba jaanɩ ŋwɩɩnʋ wʋm, wʋlʋ na gʋ-o tɩn maŋɩ sɩ o dɩ tɩ mʋ.
5 Nɔɔnʋ na pɛ o vara vrɩ ba zʋ nɔɔnʋ wʋdoŋ kara naa o kadugə wʋnɩ ba ja o wʋdiiru tɩm ba cɔgɩ, vara bam tu wʋ́ kwe o tɩtɩ wʋdiiru tɩm o ma o ŋwɩ wʋdoŋ wʋm wǝǝnu tɩm na cɔgɩ tɩn mʋ, nɩnɛɛnɩ kʋ na yɩ mɩna naa tiu biə mʋ dɩ.
6 Nɔɔnʋ na puli mim kuri pa dɩ di dɩ vu dɩ tʋ o doŋ kara wʋnɩ dɩ cɔgɩ o mɩna yalʋ ba na maŋɩ ba zagɩ naa yalʋ ba na wʋ zagɩ tɩn dɩ, o maŋɩ sɩ o ŋwɩ wʋlʋ kara na cɔgɩ tɩn mʋ.
7 Nɔɔnʋ na kwe o səbu naa o jɩjɩgɩrʋ o pa o doŋ sɩ o taa nii-tɩ o digə wʋnɩ o pa‑o, yɩ ŋwɩɩnʋ na tu o ŋɔ sɔŋɔ kʋm, ba na jaanɩ ŋwɩɩnʋ wʋm, o maŋɩ sɩ o ŋwɩ kʋlʋ o na ŋɔgɩ tɩn kuni bɩle mʋ. 8 Sɩ ba na wʋ jaanɩ ŋwɩɩnʋ wʋm, wʋlʋ ya na jɩgɩ o doŋ wʋm wǝǝnu tɩm o nii tɩn wʋ́ vu Wɛ digə kam mʋ sɩ nakwa bam bwe‑o ba lwarɩ, wʋntʋ mʋ ŋɔgɩ naa kʋ daɩ wʋntʋ.
9 Nɔɔna bale na magɩ ni-kantɔgɔ woŋo dɩdʋa ŋwaanɩ, kʋ na yɩ na-bɩa, naa bɩnaga, naa piə, naa gɔrɔ, naa woŋo kʋlʋ maama, sɩ ba vu ba jeeri Wɛ digə kam nɩ. Nakwa bama laan wʋ́ brɩ wʋlʋ na gɛ bʋra tɩn, sɩ kʋntʋ tu ŋwɩ o na tʋ kʋlʋ baŋa nɩ tɩn o pa wʋdoŋ wʋm kuni bɩle.
10 Nɔɔnʋ na kwe o bɩnaga, naa o na-bɩa, naa o piə, naa o varɩm dwi dɩlʋ maama o pa o doŋ sɩ o taa nii o pa‑o, yɩ varɩm wʋm na tɩga, naa o na nɛ zʋnnɩ, naa o na je, nɔɔn-nɔɔnʋ na tǝrǝ sɩ o na kʋlʋ na kɩ tɩn, 11 wʋlʋ ba na kwe varɩm wʋm ba kɩ o jɩŋa nɩ tɩn mʋ wʋ́ vu digə kam o pooli Baŋa-Wɛ yigə nɩ nɩ wʋntʋ wʋ pɛ varɩm wʋm cɔgɩ. Varɩm wʋm tu dɩ nan maŋɩ sɩ o sɛ kʋntʋ mʋ, sɩ o doŋ wʋm yɩ ŋwɩ kʋlʋkʋlʋ. 12 Kʋ daarɩ, nɔɔna na ŋɔgɩ varɩm wʋm wʋlʋ na nii-kʋ tɩn tee nɩ, wʋlʋ na nii-kʋ tɩn maŋɩ sɩ o ŋwɩ kʋ jɩnɩ dɩm mʋ. 13 Ga-varɩm nan na jaanɩ varɩm wʋm o tʋrɩ tʋrɩ, sɩ wʋlʋ na nii varɩm wʋm baŋa nɩ tɩn ja kʋ yɩra yam na tʋrɩ tɩn o ba o brɩ varɩm wʋm tu. Kʋntʋ mʋ yɩ maana sɩ o yɩ ŋwɩ kʋlʋkʋlʋ.
14 Nɔɔnʋ na jɩnɩ varɩm o doŋ tee nɩ, yɩ varɩm wʋm na tɩga, naa o na nɛ zʋnnɩ, varɩm wʋm tu na tǝrǝ sɩ o na, wʋlʋ na jɩnɩ varɩm wʋm tɩn mʋ wʋ́ joori o ŋwɩ varɩm wʋm tu. 15 Kʋ daarɩ varɩm wʋm tu na nɛ kʋlʋ na kɩ tɩn, nɔɔnʋ wʋlʋ na jɩnɩ varɩm wʋm tɩn daa bá ŋwɩ kʋlʋkʋlʋ. Bɛŋwaanɩ, o na jɩnɩ varɩm wʋm tɩn, o jɩnɩ dɩm ti.
Kɔgɔ wʋ zʋʋrɩm
16 Nɔɔnʋ na ganɩ bukɔ wʋlʋ ta na wʋ zʋ barʋ tɩn o pəni dɩd-o, o maŋɩ sɩ o ŋwɩ o kwaga kwərə mʋ o pa o ko, o daarɩ o di-o o ma o kɩ o kaanɩ.b 17 Bukɔ wʋm ko nan na vɩn sɩ o pa nɔɔnʋ wʋm o bukɔ sɩ o ji o kaanɩ, wʋlʋ na kɩ-o pugə kam tɩn ta wʋ́ ŋwɩ kʋlʋ maama na yɩ bukwa kwaga wǝǝnu tɩn mʋ o pa ko wʋm.
18 Á yɩ zaŋɩ á ta á wɩ á yagɩ kaanɩ wʋlʋ na jɩgɩ yi-nɛɛrɩ tɩtʋŋa o tʋŋɩ tɩn, sɩ o ta o ŋwɩ abam tɩtarɩ nɩ.c
19 Wʋlʋ na pəni dɩ varɩm, sɩ á gʋ-o.
20 Wʋlʋ na zuli wɛ-gaa yɩ kʋ daɩ Baŋa-Wɛ yɩranɩ, sɩ á yɔɔrɩ á cɔgɩ kʋ tu.
21 Yɩ daanɩ-na vərə, á nan yɩ bɛɛsɩ-ba. Guli-na nɩ abam dɩ dɛɛn yɩ vərə mʋ Ezipi tɩga baŋa nɩ.
22 Yɩ pa-na sɩ kʋ zʋ kadəm yɩra, naa bɩtarʋ yɩra.d 23 Abam na yaarɩ-ba pa ba keeri ba loori-nɩ, amʋ wʋ́ cəgi ba kərə kam. 24 A banɩ maa wʋ́ zaŋɩ abam baŋa nɩ, yɩ a daarɩ a gʋ abam dɩ sʋ-lɔŋɔ mʋ. Kʋntʋ maa wʋ́ pa á kaana bam ji kadənə, yɩ á biə bam dɩ ji bɩtara.
25 Amʋ nɔɔna bam wʋnɩ, nmʋ na jɩnɩ səbu n pa wʋlʋ na yɩ nabwəm tɩn, sɩ n yɩ kɩ sǝbu-lǝnnǝ kikiə dɩ kʋ tu. Á yɩ zaŋɩ á pa o ŋwɩ o daŋɩ nyɔɔrɩ o pa abam. 26 Nɔɔnʋ nan na kwe o gɔrɔ o ma tiŋi daarɩ n tee nɩ, sɩ n yǝni n kwe-kʋ n pa‑o dɛ maama dɩdaan-ni maŋa nɩ. 27 O na lagɩ o pəni tɩtɩɩ nɩ, gɔrɔ kʋm kʋntʋ yɩranɩ mʋ o yǝni o jɩga sɩ o taa maɩ o kwǝli o tɩtɩ. O nan na keeri o loori-nɩ, amʋ wʋ́ cəgi o kərə kam. Bɛŋwaanɩ, amʋ tiini a duri nɔɔna yibwənə mʋ.
28 Yɩ ŋɔɔnɩ Wɛ n ja n cɔgɩ. Nan yɩ sɔɔlɩ lwarɩm n yagɩ wʋlʋ na yɩ nakwɩ tu tɩn yuu nɩ.
29 Kʋlʋ na maŋɩ sɩ n pɔɔrɩ n wʋdiiru tɩm wʋnɩ n pa amʋ tɩn, kʋ na yɩ mɩna, naa wo-nyɔɔrʋ tɩm, sɩ n yɩ vɩn sɩ n kɩ kʋntʋ.
Nan kwe-na á bəkər-kwɩn sɩm á pa amʋ.e 30 Kʋ ta wǝli da, wo-kwɩn sɩlʋ na nuŋi á naanɩ dɩm wʋnɩ, dɩ á peeni sɩm wʋnɩ tɩn maŋɩ sɩ á pa-nɩ mʋ. Varɩ-kwɩn sɩlʋ na yɩ wo-bɛ tɩn wʋ́ maŋɩ sɩ niinə tee nɩ mʋ da yarpɛ. Da nana kam dɛ nɩ, á maa wʋ́ pɔɔrɩ-sɩ á pa-nɩ.
31 Abam maŋɩ sɩ á ji nɔɔna balʋ na pwɛ ba tɩtɩ ba pa amʋ tɩn mʋ. Kʋntʋ ŋwaanɩ, á ba maŋɩ sɩ á di nwana yalʋ ga-vara na jaanɩ ba tʋrɩ tʋrɩ tɩn. Kwe-na nwana yam kʋntʋ á pa kakuri.