21
Baŋa-Wɛ dɛɛn ma ta DƖ niə yantʋ taanɩ DƖ brɩ Moyisi sɩ o lwǝni o brɩ Yisɩrayɛlɩ tiinə bam:
Yisɩrayɛlɩ tiinə dɩ ba gambɛ taanɩ
2 Wʋlʋ na yəgi Ebru tu sɩ o ma o ji o gambaa, gambaa kam wʋ́ tʋŋɩ ka pa‑o bɩna yardʋ mʋ. Bɩna yarpɛ bɩnɩ dɩm wʋnɩ, sɩ kʋ tu yag-o sɩ o viiri zaanɩ, yɩ gambaa kam bá ŋwɩ kʋlʋkʋlʋ.a 3 Nɔɔnʋ wʋm na yɩ badəm yɩ o ba o tʋŋɩ o pa‑m, yɩ o na lagɩ o viiri, kʋ yɩ wʋntʋ yɩranɩ mʋ wʋ́ viiri. O ya nan na maŋɩ o jɩgɩ kaanɩ mʋ yɩ o ba n te, o maŋɩ sɩ o ja o kaanɩ wʋm mʋ o wǝli da o viiri. 4 O na tʋŋɩ o paɩ wʋlʋ tɩn na pɛ‑o kaanɩ, yɩ o dɩ kaanɩ wʋm lʋ biə daanɩ, nɔɔnʋ wʋm yɩranɩ mʋ wʋ́ viiri. Kaanɩ wʋm dɩ o biə yɩ o tu wʋm nyɩm mʋ.
5 Gambaa kam nan wʋ́ wanɩ o ta nɩ: «Amʋ soe a tu wʋm, kʋ wǝli dɩ a kaanɩ dɩ a biə bam. A nan bá viiri a daarɩ-ba.» 6 O tu wʋm maa wʋ́ ja-o o vu Wɛ digə kam ni dɩm seenib o pa o salɩ boro kʋm. Dáanɩ mʋ oó kwe lwe o puri gambaa kam zwɛ dɩdʋa. Kʋntʋ brɩ nɩ gambaa kam ŋwɩa maama wʋnɩ, o yɩ o tu wʋm nyɩm mʋ.
7 Nɔɔnʋ na kwe o bukɔ o yəgi o pa o ji gambaa, kʋ daɩ sɩ ka maŋa na yiǝ, sɩ ba yag-o sɩ o viiri nɩnɛɛnɩ ba na kɩ baara bam te tɩn. 8 Gaba-kana kam na cɔgɩ wʋlʋ na yəg‑o tɩn yigə, o tu wʋm wʋ́ wanɩ o joori o yəg‑o o pa. O nan ba jɩgɩ cwǝŋǝ sɩ o yəg‑o o pa dwi-gɛ tiinə. O tu wʋm na kɩ kʋntʋ, kʋ brɩ nɩ o lɔgɩ ba ni-mɔrɔ dɩm kwaga nɩ mʋ. 9 Nɔɔnʋ wʋm nan ya na yəg‑o sɩ o bu mʋ di o ma o kɩ kaanɩ, kʋ maŋɩ sɩ o taa nii gambaa kam baŋa nɩ nɩnɛɛnɩ kʋ yɩ o tɩtɩ bukɔ mʋ. 10 Nɔɔnʋ wʋm na tu o di kaanɩ wʋdoŋ o wǝli o wʋnɩ, kʋ daɩ sɩ o vɩn pulim kaanɩ wʋm o ni-wʋdiu, naa gwaarʋ. O nan daɩ sɩ o van‑o sar-pwəgə. 11 Nɔɔnʋ wʋm na vɩn sɩ o kɩ wǝǝnu tɩntʋ maama o pa kaanɩ wʋm, kaanɩ wʋm wʋ́ wanɩ o viiri zaanɩ, yɩ o bá ŋwɩ kʋlʋkʋlʋ.
Kǝm-balwaarʋ tɩlʋ na maŋɩ dɩ tʋʋnɩ tɩn
12 Wʋlʋ na magɩ o doŋ pa o tɩ, baá gʋ kʋ tu dɩ mʋ.c 13 Kʋ tu nan na wʋ paalɩ o gʋ nɔɔnʋ wʋm, yɩ Wɛ na sɛ sɩ kʋ kɩ kʋntʋ tɩn, nɔɔnʋ wʋm kʋntʋ nan maŋɩ sɩ o duri mʋ o vu je sɩlʋ amʋ na wʋ́ kuri tɩn, sɩ o səgi da.d 14 Kʋ daarɩ, nɔɔnʋ na paalɩ o doŋ mʋ o tiŋi, yɩ o sɩɩnɩ o gʋ-o, kʋ daɩ sɩ o lu! O na maŋɩ o vu o ja amʋ kaanɩm bimbim dɩm, sɩ á vaŋ-o á ja á nuŋi pooni á gʋ.
15 Wʋlʋ maama na magɩ o ko naa o nu, sɩ ba gʋ kʋntʋ tu.
16 Wʋlʋ na zi nabiinu o ja sɩ o yəgi, yɩ kʋ tu na maŋɩ o yəg‑o mʋ dɩ, naa nɔɔnʋ wʋm ta na wʋ o tee nɩ yɩ ba ja-o, sɩ ba gʋ kʋ tu.
17 Wʋlʋ maama na sɔɔlɩ lwarɩm o yagɩ o ko naa o nu yuu nɩ, sɩ ba gʋ kʋ tu dɩ.
18 Nɔɔna bale na jaanɩ daanɩ, yɩ dɩdʋa kwe kandwɛ o ma o dʋlɩ o doŋ wʋm, asawɛ o mɛ o jɩŋa mʋ o mag-o o pogili yɩ o wʋ tɩgɩ, yɩ o tigi mʋ, 19 o na tu o ba o waɩ o zaŋɩ wɛɛnɩ o nuŋi cicwəŋə o zi nacəgə o beerə, sɩ á yagɩ taalɩ á ma á cɛ wʋlʋ na mag-o tɩn. Kʋ tu wʋ́ ŋwɩ nɔɔnʋ wʋm dɩ o na cɔgɩ o tɩtʋŋa tɩn. O ta wʋ́ taa nii o baŋa nɩ mʋ sɩ o na yazurə lanyɩranɩ.
20 Nɔɔnʋ na jɩgɩ gaba-baarʋ naa gaba-kana, yɩ o mag-o pa o tɩ kʋ nɛ sɩm ni nɩ, sɩ ba waarɩ kʋ tu. 21 Gambaa kam nan na zaŋɩ yɩ ka yi da yale naa yatɔ wɛɛnɩ, ba daa bá kɩ ka tu wʋm kʋlʋkʋlʋ, gambaa kam na yɩ o nyɩm tɩn ŋwaanɩ.
22 Baara bale najara baŋa nɩ, ba na magɩ ka-puə pa o pugə kam cɔgɩ, wo-gaa na wʋ daanɩ ka-puə kam, o barʋ wʋ́ goni jɩnɩ mʋ o pa wʋlʋ na pɛ o kaanɩ wʋm pugə kam cɔgɩ tɩn, nɩnɛɛnɩ nakwa bam na sɛ nɩ kʋ maŋɩ te tɩn. 23 Kʋ nan na tiini kʋ camma kʋ pa kaanɩ wʋm, waarɩm dɩm dɩ wʋ́ taa camma: ŋwɩa mʋ baá cɔgɩ ba ma ba ləni ŋwɩa, 24 yi mʋ baá lɩ ba ma ləni yi, yəli mʋ baá guri ba ma ləni yəli, jɩŋa mʋ baá lɩ ba ma ləni jɩŋa, naa naga mʋ ba ma ləni naga.e 25 Mim dɩ maa ləni mim, fufwələ maa ləni fufwələ, ya-sʋŋa dɩ maa ləni ya-sʋŋa yuu nɩ.
26 Wʋlʋ na magɩ o gambaa kam yi pa dɩ cɔgɩ, sɩ kʋ tu pa gambaa kam cwǝŋǝ sɩ ka viiri zaanɩ ka yi dɩm cɔgɩm ŋwaanɩ. 27 O nan na magɩ gambaa kam yəli mʋ o guri, sɩ o pa ka viiri zaanɩ, ka yəli dɩm na guri tɩn ŋwaanɩ.
28 Na-bɩa na cugi nɔɔnʋ ka gʋ, ba maŋɩ sɩ ba dʋlɩ-ka dɩ kandwa ba gʋ mʋ. Nɔɔn-nɔɔnʋ bá dʋnɩ ka nwana yam. Ka tu wʋm dɩ nan bá na waarɩm. 29 Na-bɩa kam nan na maŋɩ ka kaagɩ ka cu nɔɔna mʋ, sɩ ba kaanɩ ka tu wʋm sɩ o lə-ka. O na vɩn yɩ ka cu nɔɔnʋ ka gʋ, sɩ ba dʋlɩ na-bɩa kam dɩ ka tu wʋm maama ba gʋ. 30 Tʋʋ wʋm yɩra nɔɔna nan na sɛ, na-bɩa kam tu wʋm wʋ́ wanɩ o kwe səbu o ləri o ŋwɩa kam sɩ kʋ maŋɩ dɩ ba na lagɩ te tɩn. 31 Kʋ nan ta yɩ bɩdwɩ mʋ dɩ na-bɩa na cugi nɔɔnʋ wʋdoŋ bu-baarʋ naa o bukɔ dɩ. 32 Nɔɔnʋ na-bɩa nan na gʋ o doŋ gambaa, baá kwe kandwa ba dʋlɩ na-bɩa kam ba gʋ mʋ. Na-bɩa kam tu wʋ́ jeeli səbu-poŋo səbu-dala fiintɔ mʋ o pa wʋlʋ na te gambaa kam tɩn.
33 Nɔɔnʋ maa na gwaarɩ goŋo naa o kʋgɩ bɔɔnɩ yɩ o wʋ joori o sɩɩrɩ-kʋ, pa o doŋ na-bɩa naa o bɩnaga tʋ kʋ wʋnɩ ka tɩ, 34 goŋo kʋm tu wʋ́ ŋwɩ varɩm wʋm jɩnɩ mʋ o pa varɩm wʋm tu. O na ŋwɩ o ti, sɩ o laan taa te varɩm wʋm na tɩgɩ tɩn.
35 Nɔɔnʋ na-bɩa nan na cugi o doŋ na-bɩa ka gʋ, sɩ ba kwe na-bɩa kalʋ ta na ŋwɩ tɩn ba yəgi ba daarɩ ba pɔɔrɩ ka səbu kʋm ba pa daanɩ. Ba ta wʋ́ maŋɩ kalʋ na tɩgɩ tɩn nwana yam mʋ ba pa daanɩ, sɩ səbu kʋm dɩ nwana yam taa maɩ daanɩ. 36 Kʋ daarɩ na-bɩa kam na maŋɩ ka kaagɩ ka cu mʋ yɩ ka tu wʋ ləgi-ka, ka na gʋ nɔɔnʋ na-bɩa, ka tu wʋm maŋɩ sɩ o ŋwɩ na-bɩa kam jɩnɩ maama mʋ o pa nɔɔnʋ wʋm. Nabɩ-tɩka kam laan wʋ́ taa yɩ o nyɩm.