Wɛ ni-kaana fugə kam
20
Wɛ dɛɛn mʋ ŋɔɔnɩ taanɩ dɩntʋ maama:2 «Amʋ mʋ yɩ abam Tu Baŋa-Wɛ dɩm. Amʋ maa yɩ dɩlʋ na jaanɩ abam a ja nuŋi Ezipi tɩʋ kʋm nɩ pa a vrɩ abam á gabɛɛm dɩm nɩ a yagɩ tɩn. 3 Daa á yɩ zuli-na wɛ dɩdoŋ á wǝli amʋ wʋnɩ.
4 Yɩ zaŋɩ-na á mɔ nyɩnyʋgʋ sɩ kʋ taa yɩ jwəm kʋ pa abam. Á yɩ mɔ woŋo sɩ kʋ lwǝni wɛyuu wǝǝnu, naa tɩga baŋa wǝǝnu, naa tɩga kuri na bam wʋʋ wǝǝnu.a 5 Abam ba maŋɩ sɩ á tiiri tɩ yigə nɩ naa á zuli-tɩ. Bɛŋwaanɩ, amʋ mʋ yɩ abam Tu Baŋa-Wɛ. Amʋ yi pagɩ abam baŋa nɩ mʋ. Kʋ na yɩ balʋ na vɩn amʋ tɩn, a yǝni a waarɩ-ba dɩ ba biə maama sɩ kʋ vu kʋ yi ba dwi dɩm kuni bɩtɔ naa bɩna laŋa nɩ mʋ. 6 Kʋ nan na yɩ balʋ na soe-nɩ yɩ ba sɛ a niə yam tɩn, a maa yǝni a jɩgɩ ba sono taan, sɩ kʋ yi ba dwi dɩm kuni mʋrʋ laŋa nɩ.
7 Yɩ zaŋɩ-na á bəŋi á Tu Baŋa-Wɛ yɩrɩ kafɛ yɩranɩ, sɩ Baŋa-Wɛ wʋ́ waarɩ wʋlʋ maama na kɩ kʋntʋ tɩn.
8 Taá guli-na Wɛ siun dɛ dɩm sɩ á pɔɔrɩ-dɩ da yam maama wʋnɩ á pa Wɛ. 9 Da yarpɛ maama wʋnɩ, abam jɩgɩ da yardʋ mʋ sɩ á ma á tʋŋɩ tɩtʋŋa dwi maama. 10 Kʋ nan na yɩ da yarpɛ dɛ dɩm, abam Tu Baŋa-Wɛ pɔɔrɩ-dɩ mʋ DƖ pa DƖ tɩtɩ, sɩ dɩ taa yɩ siun dɛ. Dɩ dɛ nɩ, nɔɔn-nɔɔnʋ ba maŋɩ sɩ o tʋŋɩ kʋlʋkʋlʋ. Kʋ maa yɩ abam, dɩ á biə, dɩ á bukwa, dɩ á gambɛ, dɩ á tɩntʋŋ-kaana maama mʋ bá taa tʋŋa. Kʋ wǝli da, abam vara bam, dɩ vərə balʋ na zʋʋrɩ á tɩʋ wʋnɩ tɩn dɩ bá taa tʋŋɩ tɩtʋŋa dɛ dɩm kʋntʋ nɩ.b 11 Bɛŋwaanɩ, Baŋa-Wɛ dɛɛn kwe da yardʋ mʋ DƖ naanɩ wɛyuu dɩ tɩga baŋa, dɩ nanɩɩrʋ tɩm, dɩdaanɩ wǝǝnu tɩlʋ na wʋ tɩntʋ maama wʋnɩ tɩn. DƖ laan ma sin da yarpɛ dɛ dɩm nɩ.c Baŋa-Wɛ ma kɩ yu-yoŋo siun dɛ dɩm baŋa nɩ DƖ pa dɩ yɩ dɩ yɩra.d
12 Taá nɩgɩ-na á kwə dɩ á niinə, sɩ kʋ pa á taá jɩgɩ mʋmwɛ-dɛɛrɩ maŋa kalʋ á na wʋ́ taá zʋʋrɩ tɩga kalʋ abam Tu Baŋa-Wɛ na lagɩ DƖ pa abam tɩn wʋnɩ.e
13 Yɩ zaŋɩ-na á gʋ nɔɔnʋ.
14 Yɩ kɩ-na kabwəŋə dɩ nɔɔnʋ wʋdoŋ kaanɩ.f
15 Yɩ ŋɔ-na kʋlʋkʋlʋ.
16 Yɩ zaŋɩ-na á bʋrɩ vwan bʋra á ma á vanɩ á donnǝ.g
17 Yɩ kwe-na á wʋbʋŋa á daŋɩ á donnǝ sam baŋa nɩ. Nan yɩ pa-na sɩ á wʋbʋŋa taa wʋ ba kaana baŋa nɩ. Yɩ pa-na sɩ á fra zʋ ba gambɛ naa ba tɩntʋŋ-kaana wʋnɩ. Yɩ pa-na sɩ á yi su á donnǝ nabɛ, naa ba bɩnɛ, naa woŋo kʋlʋ maama na yɩ ba nyɩm tɩn.»
18 Nɔɔna bam maama dɛɛn ma na dʋa kam na tiini ka bagɩ yɩ ka ta pɩpɩlɩ te maama tɩn. Ba ta ma ni nabɔnɔ kʋm kwǝri, yɩ ba daarɩ ba na piu kʋm maama na kwǝli dɩdaanɩ nyʋa te maama tɩn. Ba yɩra maa saɩ yɩ fʋʋnɩ tiini dɩ jɩgɩ-ba. Ba dɛɛn ma fʋfɔ ba kɛ dáa. 19 Ba ma ta dɩ Moyisi ba wɩ: «A loori-m! Nmʋ na ŋɔɔnɩ taanɩ n brɩ dɩbam, dɩ́ wʋ́ cəgi. Nan yɩ pa Wɛ tɩtɩ ŋɔɔnɩ dɩdaanɩ dɩbam, sɩ dɩ́ wʋ́ tɩ.» 20 Moyisi ma ləri nɔɔna bam o wɩ: «Yɩ taá kwarɩ-na fʋʋnɩ. Bɛŋwaanɩ, Wɛ tu abam te sɩ DƖ maŋɩ abam mʋ DƖ nii, sɩ á taá kwarɩ-DƖ yɩ á yɩ tusi DƖ cwǝŋǝ kam nɩ.» 21 Nɔɔna bam dɛɛn zɩgɩ yigə yigə mʋ, yɩ Moyisi fʋfɔ o twɛ kunkwən-liluru kʋm mɛ Wɛ na wʋra tɩn.
Cullu tɩdonnǝ
22 Baŋa-Wɛ ma ta dɩ Moyisi DƖ wɩ: «Ta tɩntʋ dɩ Yisɩrayɛlɩ tiinə bam:
‹Abam tɩtɩ yiǝ nɛ nɩ amʋ Baŋa-Wɛ mʋ zɩgɩ wɛyuu nɩ a ŋɔɔnɩ dɩ abam. 23 Abam nan ba maŋɩ sɩ á zuli wo-gaa á wǝli amʋ nɩ. Á yɩ zaŋɩ á kwe səbu-sɩŋa naa səbu-poŋo á ma á kɩ jwəm.› »
24 Baŋa-Wɛ daa ta ma ta dɩ Moyisi DƖ wɩ: «Kwe tɩga kam tɩɩrʋ n ma n lɔ kaanɩm bimbim n pa-nɩ. Abam na lagɩ á kɩ zwɛɛm kaanɩm naa yazurə kaanɩm, á laan wʋ́ yǝni á ja á peeni, dɩ á bʋnɩ, dɩdaanɩ á naanɩ á ba á kaanɩ dɩ baŋa nɩ á pa-nɩ. Je sɩlʋ maama amʋ na wʋ́ pa á zuli amʋ yɩrɩ kʋntʋ doŋ tɩn, amʋ tɩtɩ wʋ́ ba abam te sɩ a kɩ abam yu-yoŋo. 25 Nmʋ nan na bʋŋɩ sɩ n kwe kandwa sɩ n sɩɩnɩ bimbim n pa-nɩ, sɩ n yɩ ma kʋlʋkʋlʋ n ma n sarɩ kandwa yam naa n lɔ-ya. Nmʋ na kɩ kʋntʋ doŋ, kʋʋ́ pa bimbim dɩm ji kafɛ mʋ amʋ yigə nɩ. 26 Á yɩ zaŋɩ á lɔ kaanɩm bimbim dɩlʋ ba na tɔgɩ natənə mʋ ba diini dɩ yuu tɩn, sɩ nɔɔnʋ yɩ zaŋɩ o ba o ta o wɩ o zɩgɩ tɩga nɩ o na wʋlʋ na maa diini tɩn cavɩɩra.»