Sinayi Piu kʋm
19
1-2 Yisɩrayɛlɩ tiinə bam dɛɛn zɩgɩ Refidim nɩ ba vu ba yi Sinayi kagʋa kam. Ba na nuŋi Ezipi tɩʋ kʋm nɩ tɩn, kʋ yɩ canɩ sɩtɔ pulim dɛ nɩ mʋ ba yi da. Ba ma cwi ba vwə yam Sinayi Piu kʋm təŋə nɩ. 3 Moyisi ma di piu kʋm yuu sɩ o vu Wɛ te.a Baŋa-Wɛ ma zɩgɩ piu kʋm yuu nɩ DƖ bǝŋ-o yɩ DƖ wɩ: «Ta tɩntʋ n brɩ Yisɩrayɛlɩ tiinə bam na yɩ Zakɔbɩ dwi dɩm tɩn:4 ‹Abam tɩtɩ yi nɛ amʋ Baŋa-Wɛ na kɩ kʋlʋ sɩ kʋ zʋ Ezipi tiinə bam yɩra tɩn. Á ta nɛ amʋ na kwe abam a daŋɩ a bakalɩ baŋa nɩ nɩnɛɛnɩ kaloŋo na yǝni kʋ kɩ te dɩ kʋ biə tɩn. A kɩ abam kʋntʋ mʋ a ja a yi amʋ te yo seeni. 5 Tɔ. Lʋgʋ baŋa maama yɩ amʋ nyɩm mʋ. Abam nan na sɛ amʋ ni sɩ á taá kɩ kʋlʋ maama amʋ na wʋ́ brɩ abam tɩn, amʋ wʋ́ kuri abam nabiinǝ maama wʋnɩ sɩ á taá yɩ amʋ tɩtɩ nɔɔna.b 6 Abam nan wʋ́ taá yɩ amʋ kaanɩm tiinə, yɩ á tʋŋɩ amʋ paarɩ yɩranɩ ŋwaanɩ mʋ. Abam dwi dɩm wʋ́ taa yɩ á yɩra amʋ ŋwaanɩ.›c Ta kʋntʋ maama n brɩ Yisɩrayɛlɩ tiinə bam.»
7 Moyisi ma zɩgɩ piu kʋm yuu nɩ o tu. O ma bəŋi Yisɩrayɛlɩ nakwa bam yɩ o daarɩ o tʋlɩ Baŋa-Wɛ kwǝrǝ kam maama o brɩ-ba. 8 Nɔɔna bam ma sɛ yɩ ba ləri ba wɩ: «Dɩ́ wʋ́ kɩ kʋlʋ maama Baŋa-Wɛ na tagɩ tɩn.» Moyisi daa ma ja nɔɔna bam kwǝrǝ kam o vu o tʋlɩ o brɩ Baŋa-Wɛ.
9 Baŋa-Wɛ dɛɛn ma ta dɩ Moyisi DƖ wɩ: «Amʋ lagɩ a ba nmʋ te, yɩ kunkwən-luluru mʋ wʋ́ kwəli-nɩ. Kʋʋ́ pa, amʋ na tu a ŋɔɔnɩ dɩ nmʋ, nɔɔna bam wʋ́ ni amʋ kwǝrǝ yɩ ba daarɩ ba kɩ ba wʋ-dɩdʋa dɩ nmʋ maŋa maama.»
Moyisi daa ma ta nɔɔna bam taanɩ dɩm maama o brɩ Baŋa-Wɛ. 10 Baŋa-Wɛ ma ta dɩd-o DƖ wɩ: «Joori n tu nɔɔna bam te n daarɩ n pa ba kwe zɩm dɩ jwa dɛ dɩm ba ma kwɛ ba bɩcara ba pa amʋ. Ba maŋɩ sɩ ba zarɩ ba gwaarʋ 11 sɩ ba ti ba yigə sɩ, da yatɔ dɛ na yiǝ, sɩ a laan ba ba te. Amʋ Baŋa-Wɛ wʋ́ tu a ba Sinayi Piu kʋm yuu nɩ sɩ nɔɔna bam maama taa nii ba na-nɩ. 12 Nan lɔ sisəm n kaagɩ piu kʋm maama sɩ nɔɔna bam yɩ lɛɛnɩ-dɩ. Ta dɩ nɔɔna bam nɩ: ba yɩ diini piu kʋm yuu naa ba twɛ kʋ təŋə kam. Nɔɔnʋ wʋlʋ naga na nɔnɩ piu kʋm baŋa nɩ, ba maŋɩ sɩ ba gʋ kʋntʋ tu mʋ. 13 Ba na lagɩ ba gʋ-o, ba jɩŋa yɩ dwe‑o. Ba nan wʋ́ dʋl-o mʋ dɩ kandwa naa ba ta dɩ cɩna sɩ o tɩ. Kʋ na yɩ nabiinu naa varɩm mʋ yɩ o naga na nɔnɩ piu kʋm, o maŋɩ sɩ o tɩ mʋ. Tɔ. Ba nan na wugi nabɔnɔ kʋm, nɔɔna bam laan jɩgɩ cwǝŋǝ sɩ ba fʋfɔ ba yi piu kʋm.»
14 Moyisi ma zɩgɩ piu kʋm yuu nɩ o tu o vu nɔɔna bam te. O ma pa ba kwɛ ba bɩcara ba pa Wɛ yɩ ba daarɩ ba zarɩ ba gwaarʋ. 15 Moyisi ma ta dɩ ba o wɩ: «Ti-na á yigə da yatɔ dɛ dɩm ŋwaanɩ. Da yam kʋntʋ nɩ, nɔɔn-nɔɔnʋ yɩ pəni dɩ kaanɩ.»
16 Da yatɔ dɛ dɩm tɩtɩɩtɩ mʋ dʋa tiini ka pɩpɩlɩ yɩ ka bagɩ pɩna-pɩna. Kunkwən-liluru ma tu kʋ ba kʋ kwǝli piu kʋm yuu. Nabɔnɔ laan ma tiini ka wuuri sɔɔ zanzan. Nɔɔna bam na ni sɔɔ kʋm tɩn, ba yɩra maa tiini ya saɩ yɩ fʋʋnɩ zʋ-ba.d 17 Moyisi ma tɔgɩ nɔɔna bam yigə o ja-ba o nuŋi ba vwə yam wʋnɩ sɩ ba vu ba jeeri Wɛ. Ba ma vu ba zɩgɩ piu kʋm təŋə nɩ. 18 Nyʋa dɛɛn maa kwǝli Sinayi piu kʋm yuu maama. Bɛŋwaanɩ, Baŋa-Wɛ dɛɛn cugi kʋ baŋa nɩ yɩ mim gilimi‑DƖ. Nyʋa kam ma zaŋɩ tʋgɩ-tʋgɩ ka di wɛyuu, nɩnɛɛnɩ min-vʋgʋ te. Piu kʋm maama ma tiini kʋ sisiŋi. 19 Nabɔnɔ kam kwǝri laan maa tiini dɩ dana. Moyisi dɛɛn maa ŋɔɔnɩ dɩ Wɛ, yɩ Wɛ dɩ ləri o taanɩ dɩm nɩ dʋa na bagɩ te tɩn.
20 Baŋa-Wɛ ma tu DƖ ba Sinayi Piu kʋm yuu nɩ. DƖ ma bəŋi Moyisi sɩ o din o ba piu kʋm yuu. Moyisi ma din Wɛ te. 21 Baŋa-Wɛ ma ta dɩd-o DƖ wɩ: «Joori n tu tɩga n kaanɩ nɔɔna bam sɩ ba yɩ lɛɛnɩ sisəm dɩm. Ba ba maŋɩ sɩ ba fɩn ba din sɩ ba na amʋ Baŋa-Wɛ. Ba na fɩn ba kɩ kʋntʋ, ba zanzan lagɩ ba tɩ mʋ. 22 Kʋ na maŋɩ kʋ yɩ amʋ kaanɩm tiinə balʋ na yǝni ba tui amʋ te tɩn, ba maŋɩ sɩ ba kwɛ ba bɩcara mʋ amʋ ŋwaanɩ. Kʋ na daɩ kʋntʋ, amʋ wʋ́ cɔgɩ-ba mʋ.»
23 Moyisi ma ta dɩ Baŋa-Wɛ o wɩ: «Nɔɔna bam ba jɩgɩ cwǝŋǝ sɩ ba din piu kʋm. Nmʋ pɛ amʋ lɔ sisəm mʋ a tiŋi sɩ nɔɔna bam yɩ lɛɛnɩ-dɩ, nmʋ na pwɛ piu kʋm pa kʋ yɩ kʋ yɩra tɩn ŋwaanɩ.» 24 Baŋa-Wɛ ma lǝr-o DƖ wɩ: «Nan tu tɩga n ja Arɔn sɩ á tɔgɩ daanɩ á din yo seeni. Sɩ kʋ na yɩ kaanɩm tiinə bam dɩdaanɩ nɔɔna bam maama, ba na fɩn ba lɛɛnɩ sɩ ba twɛ yo seeni, amʋ banɩ wʋ́ zaŋɩ dɩ ba mʋ, yɩ a cɔgɩ-ba.»
25 Moyisi ma tu o vu nɔɔna bam te yɩ o ta dɩ ba kʋlʋ Baŋa-Wɛ na tagɩ tɩn.