Zɩtero
18
Madɩan tiinə kaanɩm-tu wʋdoŋ dɛɛn mʋ wʋra, o yɩrɩ na yɩ Zɩtero. Wʋntʋ maa yɩ Moyisi tɩmbaarʋ. O ma ni Wɛ na kɩ te maama DƖ pa Moyisi dɩdaanɩ Yisɩrayɛlɩ tiinə bam, yɩ DƖ ja-ba DƖ nuŋi Ezipi nɩ tɩn. 2-3 Moyisi dɛɛn nan ya pɛ o kaanɩ Sefora dɩ o biə bale bam vu o tɩmbaarʋ Zɩtero tee nɩ mʋ sɩ ba taa wʋra. Biə bam dɩdʋa yɩrɩ mʋ yɩ ‹Geresom›. Bɛŋwaanɩ, Moyisi dɛɛn wɩ: «Amʋ yɩ vəru mʋ sa-tɩʋ nɩ.»a 4 Wʋdoŋ wʋm yɩrɩ maa yɩ ‹Eliezɛrɩ›.b Bɛŋwaanɩ, o dɛɛn wɩ: «Amʋ ko Wɛ dɩm mʋ wǝli-nɩ. Dɩntʋ mʋ joŋi-nɩ Ezipi Pɛ wʋm jɩŋa nɩ DƖ yagɩ, pa o wʋ gʋ-nɩ.»5 Moyisi dɛɛn maa cwi o vwə yam Wɛ piu kʋmc təŋə nɩ. O tɩmbaarʋ Zɩtero dɛɛn ma vu o te kagʋa kam nɩ. O ma ja Moyisi kaanɩ wʋm dɩ o biə bale bam o wǝli da. 6 Zɩtero ya tʋŋɩ ni mʋ o pa Moyisi o wɩ: «Amʋ maa bɩɩnɩ nmʋ te. N kaanɩ wʋm dɩ n biə bale bam dɩ maa tɔga.» 7 Ba na yi tɩn, Moyisi ma nuŋi sɩ o jeeri-ba. O dɛɛn ma tiiri o tɩmbaarʋ wʋm yigə nɩ, yɩ o daarɩ o kukwǝr-o. Ba ma bwe da-kwaga, yɩ ba laan daarɩ ba zʋ Moyisi vwe dɩm wʋnɩ sɩ ba larɩ. 8 Moyisi ma lwǝni kʋlʋ maama Baŋa-Wɛ na tʋŋɩ Ezipi Pɛ wʋm dɩ o nɔɔna bam yɩranɩ pa DƖ vrɩ Yisɩrayɛlɩ tiinə bam tɩn o brɩ Zɩtero. O ta ma ta dɩd-o ba na jeeri cam dɩlʋ maama cwǝŋǝ kam yuu nɩ tɩn, dɩ Baŋa-Wɛ na kɩ te DƖ vrɩ-ba tɩn.
9 Zɩtero na ni kʋntʋ tɩn, o wʋʋ ma poli dɩ Baŋa-Wɛ na wǝli Yisɩrayɛlɩ tiinə bam tɩn. 10 O ma tee Wɛ yɩ o wɩ: «Baŋa-Wɛ maŋɩ dɩ zulǝ! DƖ vrɩ abam Ezipi tiinə bam dɩ ba Pɛ wʋm jɩŋa nɩ DƖ yagɩ. 11 Amʋ laan lwarɩ nɩ Baŋa-Wɛ mʋ daga DƖ dwe wa yam maama. Bɛŋwaanɩ, DƖ pɛ DƖ nɔɔna bam lu Ezipi tiinə bam dam kuri nɩ, dɩ ba na bɛɛsɩ-ba te maama tɩn.» 12 Zɩtero ma ja varɩm o ba sɩ ba zwɛ ba ma kɩ kaanɩm ba pa Wɛ, yɩ o kwǝri o ja pɛɛra yadonnə o wǝli da sɩ o pa‑o. Arɔn dɩ Yisɩrayɛlɩ nakwa bam maama dɩ ma ba Moyisi dɩ o tɩmbaarʋ wʋm te, sɩ ba tɔgɩ daanɩ ba di wʋdiu kʋm ba ma zuli Wɛ.
13 Tɩga na pʋʋrɩ tɩn, Moyisi ma jǝni sɩ o cəgi nɔɔna balʋ na tu o te ba saŋɩ daanɩ tɩn taanɩ. Nɔɔna bam na daga tɩn ŋwaanɩ, ba zɩgɩ Moyisi yigə nɩ mʋ taan, zɩzɩŋa nɩ sɩ kʋ vu kʋ yi dɩdaan-ni nɩ. 14 Moyisi tɩmbaarʋ Zɩtero na nɛ kʋntʋ tɩn mʋ o bwe‑o wɩ: «Bɛŋwaanɩ mʋ yɩ nmʋ tʋŋɩ tɩtʋŋɩ dɩntʋ n paɩ nɔɔna bam n yɩranɩ? Nii nɔɔna bam na zɩgɩ yo seeni tɩtɩɩtɩ wɛɛnɩ sɩ kʋ yi dɩdaan-ni nɩ, yɩ nmʋ yɩranɩ mʋ bʋrɩ ba taanɩ.» 15 Moyisi ma lǝr-o o wɩ: «Bɛŋwaanɩ, nɔɔna bam yǝni ba tui amʋ te sɩ ba lwarɩ Wɛ wʋbʋŋa na yɩ te ya pa-ba tɩn mʋ. 16 Nɔɔna balʋ na jɩgɩ kantɔgɔ ba tɩtarɩ nɩ, ba yǝni ba tui amʋ te mʋ sɩ a brɩ-ba wʋlʋ na jɩgɩ bʋra tɩn. Amʋ ta wʋ́ daarɩ a brɩ-ba Wɛ niə yam dɩ DƖ kwiə yam maama sɩ ba taa ni ya kuri.»
17 Zɩtero ma ləri o wɩ: «Nmʋ na kɩ te tɩn ba tɔgɩ cwǝŋǝ. 18 Nmʋ na lagɩ n tan kɩ kʋntʋ, kʋ bá daanɩ dɩ n yɩra na cɛ. Nɔɔna bam yɩra dɩ maa wʋ́ cɛ. Tɩtʋŋɩ dɩntʋ daga dɩ dwe nmʋ yɩranɩ jam. 19 Cəgi amʋ kwiə yantʋ a na lagɩ a pa‑m tɩn, sɩ Wɛ wʋ́ taa wʋra nmʋ tee nɩ. Nɔɔna bam na yǝni ba jɩgɩ kantɔgɔ, kʋ lana sɩ n kwe ba taanɩ dɩm n ja n vu Wɛ yigə nɩ mʋ. 20 Nmʋ ta maŋɩ sɩ n brɩ-ba Wɛ niə yam, dɩdaanɩ DƖ kwiə yam na brɩ kʋlʋ tɩn, sɩ ba lwarɩ ba na wʋ́ tɔgɩ cwǝŋǝ kalʋ tɩn. 21 Kʋ daarɩ, beeri nɔɔna bam maama wʋnɩ n kuri balʋ na yɩ yawalɩ-nyɩna yɩ ba kwarɩ Wɛ tɩn. Bantʋ wʋ́ taa yɩ balʋ nɔɔna na jɩgɩ ba cɩga yɩ ba ba tɔgɩ səbu-laga cwǝŋǝ tɩn mʋ. Nmʋ laan wʋ́ tiŋi nɔɔna bam kʋntʋ sɩ ba taa yɩ yigǝ tiinǝ yɩ ba nii nɔɔna baŋa nɩ. Badonnǝ wʋ́ taa nii nɔɔna mʋrʋ baŋa nɩ, badonnǝ maa nii bi bi, badonnǝ maa nii fiinnu fiinnu, yɩ badaara nii nɔɔna fugə fugə baŋa nɩ. 22 Maŋa maama baá taa cəgi balʋ na jɩgɩ taanɩ tɩn sɩ ba bʋrɩ ba bʋra. Kʋ na yɩ wo-cɛɔ, kʋ maŋɩ sɩ ba kwe taanɩ dɩm ba ja ba nmʋ yigə nɩ mʋ sɩ n bʋrɩ-dɩ. Kʋ nan na yɩ ta-balaŋa, ba tɩtɩ mʋ wʋ́ bʋrɩ.d Kʋntʋ wʋ́ pa tɩtʋŋa yam kɩ mwalɩ ya pa‑m, yigǝ tiinǝ bam na tɔgɩ ba zɩŋɩ nmʋ zɩlɩ dɩm tɩn ŋwaanɩ. 23 Nmʋ na kɩ kʋntʋ doŋ nɩnɛɛnɩ Baŋa-Wɛ na brɩ-m tɩn, kʋ daa bá ni‑m. Nɔɔna bam dɩ nan wʋ́ joori ba sam nɩ dɩdaanɩ bɩcar-zuru.»
24 Moyisi dɛɛn ma cəgi Zɩtero kwiə yam yɩ o sɛ-ya. 25 O ma beeri Yisɩrayɛlɩ tiinə bam maama wʋnɩ o kuri yawalɩ-nyɩna sɩ ba taa yɩ yigǝ tiinǝ yɩ ba nii nɔɔna mʋrʋ mʋrʋ baŋa nɩ, sɩ badonnǝ taa nii bi bi, sɩ badonnǝ nii fiinnu fiinnu, yɩ badaara nii fugə fugə baŋa nɩ.e 26 Maŋa maama bantʋ mʋ yǝni ba bʋrɩ Yisɩrayɛlɩ tiinə bam taanɩ. Kʋ na yɩ wo-cɛɔ, baá kwe taanɩ dɩm ba ja vu Moyisi yigə nɩ mʋ sɩ o bʋrɩ-dɩ. Kʋ nan na yǝni kʋ yɩ ta-balaŋa, ba tɩtɩ mʋ wʋ́ bʋrɩ-dɩ.
27 Kʋ kwaga nɩ mʋ Moyisi banɩ o tɩmbaarʋ Zɩtero o yagɩ cwǝŋǝ nɩ pa o joori o vu o tɩtɩ tɩʋ.