Na nuŋi piu yɩra nɩ
17
Yisɩrayɛlɩ kɔ-fɔrɔ kʋm dɛɛn ma zɩgɩ Sin kagʋa kam nɩ, yɩ ba laan kaagɩ ba beeri, nɩnɛɛnɩ Baŋa-Wɛ na yǝni DƖ brɩ-ba sɩ ba vu mɛ tɩn. Ba ma vu ba yi je sɩdoŋ ba na bǝi nɩ Refidim tɩn yɩ ba cwi ba vwə dáanɩ. Je sɩm kʋntʋ nɩ, na dɛɛn tǝrǝ sɩ nɔɔna bam nyɔ. 2 Ba ma puli sɩ ba taa bwɛ Moyisi yɩ ba wɩ: «Pa dɩbam na sɩ dɩ́ nyɔ!» Moyisi ma ləri o wɩ: «Bɛɛ mʋ kɩ yɩ á bwɛ amʋ kʋntʋ? Bɛɛ mʋ yɩ abam lagɩ sɩ á maŋɩ Baŋa-Wɛ á nii?» 3 Na-nyɔm dɩm nan na jɩgɩ nɔɔna bam tɩn, ba dɛɛn ta pʋʋnɩ yɩ ba bwɛ Moyisi ba wɩ: «Bɛɛ mʋ maŋɩ kʋ ba n yuu nɩ yɩ n ja dɩbam n nuŋi Ezipi nɩ n ba yo seeni? Nmʋ lagɩ sɩ na-nyɔm mʋ gʋ dɩbam dɩdaanɩ dɩ́ biə dɩdaanɩ dɩ́ vara maama na?»4 Moyisi ma kaasɩ o loori Baŋa-Wɛ yɩ o wɩ: «Amʋ brɩ a lagɩ a kɩ nɔɔna bantʋ tɩta mʋ? Ba laan bʋŋɩ sɩ ba dʋlɩ-nɩ dɩ kandwa mʋ ba gʋ.» 5 Baŋa-Wɛ ma ləri Moyisi DƖ wɩ: «Kuri Yisɩrayɛlɩ nakwa bam badonnǝ sɩ á da nɔɔna bam yigə á kɛ. Kwe n nacəgə kalʋ n na mɛ n magɩ Nili bugə kam tɩn n wǝli da n vu. 6 Amʋ wʋ́ zɩgɩ Sinayi piu kʋm yuu nɩ sɩ a jeeri abam. Á na yi da, nmʋ laan wʋ́ ma n nacəgə kam n magɩ piu kʋm. Nmʋ na kɩ kʋntʋ, na wʋ́ nuŋi kʋ yɩra nɩ sɩ nɔɔna bam nyɔ.» Moyisi ma kɩ kʋntʋ Yisɩrayɛlɩ nakwa bam yigə nɩ.
7 Moyisi dɛɛn pɛ je sɩm kʋntʋ yɩrɩ nɩ ‹Meriba›a, dɩ ‹Masa›b. Bɛŋwaanɩ, dáanɩ mʋ Yisɩrayɛlɩ tiinə bam pʋʋnɩ yɩ ba maŋɩ Baŋa-Wɛ sɩ ba nii. Ba dɛɛn wɩ: «Baŋa-Wɛ wʋ dɩ́ tee nɩ naa DƖ tǝrǝ mʋ?»c
Amalɛkɩ tiinə kɩ najara dɩ Yisɩrayɛlɩ tiinə bam
8 Yisɩrayɛlɩ tiinə bam na wʋ Refidim nɩ tɩn, Amalɛkɩ tiinə bam ma da ba zaŋɩ ba baŋa nɩ sɩ ba kɩ najara dɩ ba.d 9 Moyisi ma ta dɩ Zozwe o wɩ: «Kuri nɔɔna bam badonnǝ sɩ á vu á jeeri Amalɛkɩ tiinə bam dɩ najara. Jwaanɩ, amʋ dɩ wʋ́ taa zɩgɩ piu kʋm yuu nɩ, yɩ a ze Wɛ nacəgə kam.»e
10 Zozwe ma kɩ kʋlʋ Moyisi na brɩ-o tɩn. O ma vu o jeeri Amalɛkɩ tiinə bam sɩ o kɩ najara dɩ ba. Sɩ kʋ na yɩ Moyisi dɩ Arɔn dɩdaanɩ Huuri, bantʋ dɛɛn diini piu kʋm yuu mʋ ba zɩgɩ da. 11 Maŋa kalʋ maama Moyisi jɩan yam na yǝni ya wʋ wɛɛnɩ tɩn, Yisɩrayɛlɩ tiinə bam yǝni ba dana mʋ najara yam wʋnɩ. O jɩan yam nan na yǝni ya parɩ ya maa tu tɩga, Amalɛkɩ tiinə bam dɩ daa maa dana najara yam yigə nɩ. 12 Moyisi jɩan yam dɛɛn ma bugi. Arɔn dɩ Huuri ma tiŋi kandwɛ, yɩ ba pa o jǝni dɩ baŋa nɩ. Ba dɛɛn ma təli o jɩan yam pa ya lɛɛrɩ ya wʋ wɛɛnɩ. Dɩdʋa ze jazɩm dɩm, yɩ wʋdoŋ wʋm dɩ ze jagwiə kam. Ba ze Moyisi jɩan yam wɛɛnɩ kʋntʋ mʋ taan sɩ kʋ yi wa-zʋʋrɩ maŋa. 13 Kʋ dɛ cwǝŋǝ kam kʋntʋ mʋ yɩ Zozwe dɩ o nɔɔna bam ja najara ba wanɩ Amalɛkɩ tiinə bam.
14 Baŋa-Wɛ laan ma ta dɩ Moyisi DƖ wɩ: «Pʋpʋnɩ kǝm dɩntʋ n tiŋi tɔnɔ nɩ sɩ nɔɔna guli kʋ gulə. Ta pʋpʋnɩ nɩ: Amʋ wʋ́ ba a pa Amalɛkɩ tiinə yɩrɩ saarɩ lʋgʋ baŋa nɩ, sɩ n daarɩ n pa Zozwe taa ye kʋ ni nɩ.»f 15 Moyisi ma lɔ kaanɩm bimbim je sɩm kʋntʋ nɩ yɩ o bəŋi-dɩ o wɩ: ‹Baŋa-Wɛ mʋ yɩ amʋ Cɩ-tɔgɔ kʋm tug.›h 16 O maa wɩ: «Ba zǝŋi jɩan mʋ wɛɛnɩ sɩ ya jeeri Baŋa-Wɛ. Baŋa-Wɛ wʋ́ ja najara dɩdaanɩ Amalɛkɩ tiinə bam mʋ dɩ ba kwaga kam maŋa maama.»