Dɩpɛ dɩ nwana
16
Yisɩrayɛlɩ tiinə kɔgɔ kʋm maama dɛɛn zɩgɩ Elim nɩ mʋ ba vu ba yi kagʋa, ka yɩrɩ mʋ Sin. Je sɩm kʋntʋ nan wʋ Elim dɩdaanɩ Sinayi Piu kʋm tɩtarɩ laŋa nɩ mʋ. Ba na nuŋi Ezipi tɩn, canɩ sɩle sɩm da fugə-yanu dɛ nɩ mʋ ba ve ba yi da. 2 Ba na wʋ kagʋa kam nɩ tɩn, mʋ nɔɔna bam maama sɩŋɩ sɩ ba taa pʋʋna yɩ ba bwɛ Moyisi dɩ Arɔn. 3 Ba maa wɩ: «Baŋa-Wɛ ya na maŋɩ DƖ pa dɩ́ tɩ Ezipi nɩ kʋ garɩ tɩntʋ! Dáanɩ, dɩ́ naɩ wʋdiu dɩ́ di, yɩ dɩ́ dʋnɩ nwana dɩ́ sui. Abam ma ja dɩbam á pa dɩ́ nuŋi da dɩ́ ba kagʋa kantʋ nɩ, sɩ kana gʋ dɩ́ kɔgɔ kʋm maama.»a4 Baŋa-Wɛ ma ta dɩ Moyisi DƖ wɩ: «Amʋ wʋ́ pa dɩpɛ nuŋi wɛyuu nɩ, nɩnɛɛnɩ dʋa na nɩ te tɩn.b Dɛ maama nɔɔna bam maŋɩ sɩ ba nuŋi pooni mʋ ba pɛ wʋdiu kʋlʋ na wʋ́ maŋɩ dɩ ba dɛ wʋnɩ dim tɩn. Amʋ lagɩ a maŋɩ-ba mʋ a nii, baá sɛ a ni dɩm naa ba bá sɛ-dɩ. 5 Nan ta dɩ ba sɩ, da yardʋ dɛ dɩm nɩ sɩ ba pɛ ba dɛ wʋnɩ wʋdiu kuni bɩle, sɩ ba ja ba zʋ ba sam dɩm wʋnɩ.»
6 Moyisi dɩ Arɔn ma ta dɩ Yisɩrayɛlɩ tiinə bam maama ba wɩ: «Zɩm dɩdaan-ni nɩ mʋ abam wʋ́ lwarɩ nɩ Baŋa-Wɛ mʋ jaanɩ abam DƖ ja DƖ nuŋi Ezipi tɩʋ kʋm nɩ DƖ ba yo seeni. 7 Tɩga na pʋʋrɩ, á lagɩ á na Baŋa-Wɛ paarɩ-zulǝ yam na tiini kʋ nyɩɩnɩ tɩn mʋ. Bɛŋwaanɩ, DƖ ni abam na pʋʋna yɩ á bwɛ‑DƖ te maama tɩn. Abam na pʋʋna kʋntʋ tɩn, kʋ yɩ Wɛ mʋ á jɩgɩ á bwɛa. Dɩbam daɩ kʋlʋkʋlʋ sɩ á bwɛ dɩbam.» 8 Moyisi laan ma ta o wɩ: «Tɩga na lagɩ ka yi, Baŋa-Wɛ wʋ́ pa abam nwana sɩ á dʋnɩ. Tɩga na pʋʋrɩ, DƖ ta wʋ́ pa abam dɩpɛ sɩ á di á su. Abam na pʋʋnɩ te tɩn, kʋ yɩ Baŋa-Wɛ mʋ á jɩgɩ á bwɛa, yɩ kʋ daɩ dɩbam. Baŋa-Wɛ nan mʋ ni á pʋmpʋna kam.»
9 Moyisi dɛɛn ma ta dɩ Arɔn o wɩ: «Ŋɔɔnɩ dɩdaanɩ Yisɩrayɛlɩ tiinə kɔ-fɔrɔ kʋm nɩ: ‹Baŋa-Wɛ ni á pʋmpʋna kam. Á ba á la daanɩ DƖ yigə nɩ.› » 10 Arɔn dɛɛn ta na ŋɔɔnɩ dɩdaanɩ nɔɔna bam tɩn, ba kwǝni ba yum ba nii kagʋa kam seeni mʋ. Ba ma na Baŋa-Wɛ paarɩ-zulǝ na tiini ka nyɩɩnɩ kunkoŋo kʋm wʋnɩ te tɩn. 11 Baŋa-Wɛ laan ma ta dɩ Moyisi DƖ wɩ: 12 «Amʋ ni Yisɩrayɛlɩ tiinə bam pʋmpʋna kam maama. Nan ta dɩ ba nɩ ‹Tɩga na lagɩ ka yi, abam wʋ́ dʋnɩ nwana, sɩ tɩ-pʋra nɩ á di dɩpɛ á su. Kʋntʋ mʋ wʋ́ pa á lwarɩ nɩ amʋ mʋ yɩ abam Tu Baŋa-Wɛ.› »
13 Dɩdaan-ni dɩm kʋntʋ nɩ, lwi zanzan ma zaŋɩ sɩ ba sɩ faarɩ mɛ nɔɔna bam na zʋʋrɩ tɩn. Tɩga daa na pʋʋrɩ tɩn, nyɔnɔ ma tʋ kʋ gilimi ba vwə yam maama. 14 Nyɔnɔ kʋm ma wɩ, kʋ daarɩ wo-mɩɩna yalʋ na yɩ fɩfala yɩ ya bwǝnǝ tɩn maa faarɩ tɩga kam maama kagʋa kam nɩ. 15 Yisɩrayɛlɩ tiinə bam na nɛ-ya tɩn, ba wʋ lwarɩ ya na yɩ woŋo kʋlʋ. Ba maa bwe daanɩ ba wɩ: «Bɛɛ mʋ tɩntʋ?» Moyisi ma lǝri-ba o wɩ: «Dɩpɛ dɩlʋ Baŋa-Wɛ na pɛ abam sɩ á taá di tɩn mʋ kʋntʋ. 16 Baŋa-Wɛ nan wɩ á taá kɩ tɩntʋ mʋ: ‹Nɔɔnʋ maama maŋɩ sɩ o pɛ te na wʋ́ maŋɩ o dim dɩ o digə tiinə dim tɩn mʋ. Nɔɔnʋ maama wʋ́ wanɩ o na bwaŋa dɩdʋa.› »
17 Yisɩrayɛlɩ tiinə bam ma vu ba kɩ kʋntʋ. Badonnǝ dɛɛn pɛ zanzan mʋ yɩ babam pɛ fɩnfɩɩn. 18 Ba dɛɛn na mɛ bwaŋa ba maŋɩ nɔɔnʋ maama na pɛ kʋlʋ tɩn mʋ ba maanɩ nɩ balʋ na pɛ zanzan tɩn daa wʋ nɛ sɩ kʋ dwǝni ba dim. Kʋ nan wʋ muri kʋ pa balʋ na pɛ fɩnfɩɩn yɩranɩ tɩn. Ba maama dɛɛn nɛ tɩte na maŋɩ dɩ ba tɩn mʋ.
19 Moyisi ma ta dɩ ba o wɩ: «Nɔɔn-nɔɔnʋ yɩ pa wʋdiu kʋntʋ pəni o tee nɩ kʋ pʋʋrɩ tɩga.» 20 Nɔɔna badonnǝ ma vɩn sɩ ba sɛ Moyisi taanɩ dɩm. Ba dɛɛn ma di ba daarɩ pa kʋ pʋʋrɩ tɩga. Wʋdiu kʋm ma ji kanzwa yɩ kʋ laan lwe. Moyisi banɩ ma zaŋɩ dɩ nɔɔna bam kʋntʋ. 21 Dɛ maama tɩtɩɩtɩ, ba maa yǝni ba pɛ tɩte na wʋ́ maŋɩ dɩ ba dim tɩn. Wɩa na yǝni ka di wɛɛnɩ, kʋlʋ maama na daarɩ tɩga nɩ tɩn wʋ́ nyɩɩnɩ mʋ.
22 Da yardʋ dɛ dɩm nɩ, ba dɛɛn pɛ wʋdiu kʋm kuni bɩle mʋ, bwɛn sɩle nɔɔnʋ maama ŋwaanɩ. Ba nakwa tiinə bam ma vu Moyisi te ba ta ba brɩ-o kʋ na kɩ te tɩn. 23 O ma ta dɩ ba o wɩ: «Baŋa-Wɛ na tagɩ kʋlʋ tɩn mʋ tɩntʋ: ‹Baŋa-Wɛ mʋ pɔɔrɩ jwa dɛ dɩm sɩ dɩ taa yɩ dɩ yɩra da maama wʋnɩ. DƖ nan kɩ-dɩ sɩ dɩ taa yɩ siun dɛ mʋ sɩ á ma á zuli‑DƖ. Kʋntʋ ŋwaanɩ, wɔ-na woŋo kʋlʋ maama na maŋɩ dɩ wɔɔm tɩn sɩ á saŋɩ kʋlʋ maama na maŋɩ dɩ saŋɩm tɩn. Kɩ-na kʋntʋ zɩm sɩ woŋo kʋlʋ na daarɩ, sɩ á tiŋi-kʋ jwa ŋwaanɩ.› » 24 Nɔɔna bam ma kɩ te Moyisi na tagɩ tɩn. Ba dɛɛn zɩgɩ wʋdiu kʋlʋ na daarɩ tɩn pa sɩ tɩga pʋʋrɩ. Kʋ maa wʋ zʋ kanzwa, yɩ kʋ ba lwe dɩ.
25 Tɩga na pʋʋrɩ tɩn, Moyisi ma ta o wɩ: «Di-na wʋdiu kʋm kʋntʋ zɩm, sɩ zɩm dɛ dɩm yɩ siun dɛ mʋ sɩ á ma á zuli Baŋa-Wɛ. Abam zɩm bá na wʋdiu je dɩ je tɩga kam baŋa nɩ. 26 Da yardʋ mʋ abam wʋ́ taá pɛ wʋdiu kʋm. Kʋ daarɩ da yarpɛ dɛ dɩm wʋ́ taa yɩ siun dɛ mʋ kʋ paɩ abam. Wʋdiu bá taa wʋra sɩ á pɛ-kʋ.»
27 Kʋ nan na kɩ te tɩn, nɔɔna badonnǝ mʋ nuŋi da yarpɛ dɛ dɩm nɩ ba beeri wʋdiu sɩ ba pɛ, yɩ ba wʋ nɛ kʋlʋkʋlʋ. 28 Baŋa-Wɛ ma ta dɩ Moyisi DƖ wɩ: «Abam wʋ́ vɩn sɩ á sɛ amʋ niə yam dɩ a kwiə yam taan sɩ á vu á maŋɩ yən mʋ? 29 Á wʋ nɛ? Baŋa-Wɛ tiŋi siun dɛ dɩm DƖ pa abam.c Kʋntʋ ŋwaanɩ mʋ da yardʋ dɛ dɩm nɩ Wɛ wʋ́ pa da yale wʋdiu sɩ á pɛ. Nɔɔn-nɔɔnʋ ba maŋɩ sɩ o nuŋi pooni da yarpɛ dɛ dɩm nɩ. Oó maŋɩ sɔŋɔ nɩ mʋ.» 30 Kʋ ma pa da yarpɛ dɛ dɩm nɩ nɔɔna bam dɛɛn sin dɩ ba tɩtʋŋa.
31 Yisɩrayɛlɩ tiinə bam ma bəŋi wʋdiu kʋm yɩrɩ nɩ ‹Maanɩ.› Kʋ dɛɛn nyɩ dɩdaanɩ mɩna mʋ. Kʋ maa yɩ napoŋo, yɩ kʋ ywəmmə nɩnɛɛnɩ ba mɛ tʋʋrʋ mʋ ba fɔgɩ maasa te tɩn. 32 Moyisi ta ma ta o wɩ: «Baŋa-Wɛ pɛ DƖ ni dɩm mʋ sɩ á kwe Maanɩ yam bwaŋa dɩdʋa á tiŋi jwa ŋwaanɩ. Abam biə jwa wʋ́ lwarɩ wʋdiu kʋlʋ Wɛ na pɛ abam kagʋa kam yuu nɩ, maŋa kalʋ DƖ na jaanɩ abam DƖ nuŋi Ezipi nɩ tɩn.»
33 Moyisi laan ma ta dɩ Arɔn o wɩ: «Kwe zʋŋa n daarɩ n zwɛ Maanɩ n kɩ ka wʋnɩ sɩ ka maŋɩ dɩ bwaŋa dɩdʋa. Laan ja-ka n vu n zɩgɩ Baŋa-Wɛ yigə nɩ. Á biə jwa wʋ́ taa naɩ Maanɩ yam dáanɩ maŋa maama.» 34 Arɔn dɛɛn ma kɩ kʋlʋ maama Baŋa-Wɛ na brɩ Moyisi tɩn. O kwe Maanɩ yam mʋ o zɩgɩ Wɛ ni-gonim kandwa yale yam yigə nɩ sɩ ya taa wʋ dáanɩ.