Moyisi ləŋə kam
15
Moyisi dɩdaanɩ Yisɩrayɛlɩ tiinə kɔgɔ kʋm ma leeni ləŋə kantʋ sɩ ba zuli Baŋa-Wɛ:aAmʋ wʋ́ leeni a zuli Baŋa-Wɛ,
DƖ na pɛ DƖ yɩrɩ zaŋɩ wɛɛnɩ tɩn ŋwaanɩ.
DƖ jaanɩ sisǝŋǝ dɩdaanɩ wʋlʋ na diini-ka tɩn
DƖ dʋlɩ DƖ dɩ nɩnɩʋ kʋm wʋnɩ.
2 Baŋa-Wɛ mʋ yɩ dɩlʋ na pa-nɩ dam tɩn,
yɩ Dɩntʋ ŋwaanɩ mʋ a leenə.
DƖ ma brɩ DƖ tɩtɩ nɩ DƖ yɩ amʋ vɩrnʋ wʋm.
DƖ yɩ amʋ Tu Wɛ mʋ yɩ amʋ wʋ́ taa tee‑DƖ.
Amʋ ko Wɛ mʋ kʋntʋ.
Amʋ wʋ́ zǝŋi DƖ yɩrɩ wɛɛnɩ.
3 Baŋa-Wɛ yɩ babɩa mʋ.
DƖ yɩrɩ mʋ yɩ ‹Yuutu Baŋa-Wɛ›.
4 DƖ vuvugi Ezipi Pɛ wʋm jar-kərə bam
dɩ ba tərikooru tɩm
DƖ dɩ Nanɩ-sʋŋʋ kʋm wʋnɩ.
Na bam ma pu Pɛ wʋm jar-kərə dɩdɛɛra bam pa ba tɩ.
5 Nɩnɩʋ kʋm na-luŋə kam ma kwǝli-ba.
Ba ma miisi ba zʋ kuri kuri nɩnɛɛnɩ kandwa mʋ te.
6 Dɩbam Yuutu Baŋa-Wɛ,
nmʋ jɩŋa jɩgɩ dam-fɔrɔ cɩga cɩga!
Nmʋ jazɩm dɩm magɩ dɩ́ dʋna pa n wanɩ-ba.
Dɩbam Yuutu Baŋa-Wɛ, nmʋ jɩŋa jɩgɩ dam!b
7 Nmʋ ma n wanɩ n dʋna pa n yɩrɩ tiini dɩ zaŋɩ.
Nmʋ banɩ tiini dɩ zaŋɩ ba baŋa nɩ,
nɩnɛɛnɩ n na tarɩgɩ mim n zwɛ ga-kʋrrʋ te tɩn.
8 Nmʋ mʋmwa viu yɩranɩ mʋ pɛ
nɩnɩʋ kʋm na bam daŋɩ da-baŋa nɩ.
Ba zɩgɩ mʋ cɛpɩ nɩnɛɛnɩ kəbrə doŋ mʋ tɩn.
Na-luŋə kam ma ləri ka ji tɩ-dɛa.
9 Dɩbam dʋna bam ya bʋŋɩ ba wɩ:
«Pa-na dɩ́ duri dɩ́ pu ba kwaga sɩ dɩ́ ja-ba.
Dɩ́ wʋ́ kwe sʋ-lwaanʋ dɩ́ cɔgɩ-ba,
yɩ dɩ́ vrɩ ba wǝǝnu dɩ́ pɔɔrɩ dɩ́ pa daanɩ.
Dɩ́ wʋ́ na kʋlʋ maama dɩ́ na lagɩ tɩn.»
10 Nmʋ nan na sin viu n yagɩ nɩnɩʋ kʋm baŋa nɩ tɩn,
na bam pugi Ezipi tiinə bam mʋ
yɩ ba miisi na-luŋə kam kuri nɩ,
nɩnɛɛnɩ luu na miisi te tɩn.
11 Baŋa-Wɛ!
Wa yam maama wʋnɩ nmʋ doŋ tǝrǝ!
Nmʋ zulə yam gaalɩ! Nmʋ yɩrɩ zaŋɩ wɛɛnɩ!
Nmʋ ma n maɩ n dam-fɔrɔ n kɩ wo-kɩnkagɩla
yɩ n doŋ tǝrǝ!c
12 Nmʋ twɩ n jazɩm dɩm yɩranɩ mʋ,
yɩ tɩga kam puri ka li dɩ́ dʋna bam.
13 Nmʋ dɛ n sono kʋm ŋwaanɩ mʋ,
n joŋi n nɔɔna bam cam wʋnɩ.
N ma n tɔgɩ n dam dɩm ŋwaanɩ n kalɩ-ba
n ja n vu nmʋ tɩtɩ jǝgǝ kam.
14 Dwi-gɛ tiinə bam ma ni kǝm dɩntʋ ŋwa,
pa ba yɩra saɩ.
Liǝ maa jɩgɩ Filisi tiinə bam yɩ ba yɩra cɛ.
15 Edɔm tiinə pwa bam laan fʋm mʋ.
Moabɩ dɩdɛɛra bam yɩra maa saɩ.
Kaanan tiinə bam baarɩ maama ma je.
16 Fʋʋnɩ dɩ liǝ mʋ laan jɩgɩ-ba,
ba na nɛ nmʋ dam-fɔrɔ kʋm tɩn ŋwaanɩ.
Ba zɩgɩ ba nii mʋ dɩ fʋʋnɩ
yɩ n nɔɔna bam da ba yigə nɩ ba kɛ.
Baŋa-Wɛ!
Nmʋ vrɩ n nɔɔna bam n ja nuŋi ba gabɛɛm wʋnɩ,
yɩ ba dʋna bam zɩgɩ ba niə!
17 Nmʋ jaanɩ-ba n zʋ n tɩtɩ tɩga kam nɩ,
pa ba zʋʋrɩ nmʋ piu kʋm yuu nɩ.
Amʋ Yuutu Baŋa-Wɛ!
Je sɩm kʋntʋ mʋ n kuri sɩ n ta n zʋʋrɩ da.
Kʋ maa yɩ n sɔŋɔ kʋm, n tɩtɩ jɩan na lɔgɩ tɩn.
18 Baŋa-Wɛ paarɩ dɩm wʋ́ taa wʋra wuu mʋ.
19 Cɩga ŋwaanɩ tɩn, Yisɩrayɛlɩ tiinə bam dɛɛn ve tɩ-kʋra baŋa nɩ ba bɛ nɩnɩʋ kʋm mʋ. Kʋ nan na yɩ Ezipi tiinə jar-kərə tərikooru tɩm, dɩdaanɩ ba sise diinə bam, bantʋ na kwaanɩ sɩ ba bɛ tɩn, Baŋa-Wɛ pɛ na bam joori ba kɩ daanɩ ba pu-ba.
20 Arɔn nakɔ Miriyam dɛɛn yɩ Wɛ nijoŋnu mʋ. O ma kwe sɩnyɔŋɔ sɩ o ma o leeni ləŋə. Kaana bam maama dɩ tɔgɩ dɩd-o ba maa jɩgɩ sɩnywaanʋ ba wɔɩ yɩ ba saɩ.d 21 Miriyam dɛɛn leeni ləŋə kantʋ mʋ o brɩ-ba:
«Leeni-na á zuli Baŋa-Wɛ,
DƖ na pɛ DƖ yɩrɩ zaŋɩ wɛɛnɩ tɩn ŋwaanɩ.
DƖ jaanɩ sisǝŋǝ dɩdaanɩ wʋlʋ na diini-ka tɩn
DƖ dʋlɩ DƖ dɩ nɩnɩʋ kʋm wʋnɩ.»
Na-cɛɛra
22 Moyisi dɛɛn ma ja Yisɩrayɛlɩ tiinə bam o zɩgɩ Nanɩ-sʋŋʋ kʋm nɩ o vu o zʋ kagʋa wʋ, ka yɩrɩ na yɩ Suuri tɩn. Ba dɛɛn kaagɩ ba ve kagʋa kam wʋnɩ da yatɔ maama mʋ, yɩ ba wʋ nɛ na sɩ ba nyɔ. 23 Ba ma vu ba yi Mara je sɩm. Na maa wʋra, ba na yɩ na-cɛɛra yɩ nɔɔna bam warɩ ba nyɔ tɩn. (Kʋntʋ mʋ pa ba bǝi je sɩm kʋntʋ yɩrɩ nɩ Marae).
24 Nɔɔna bam ma puli sɩ ba taa pʋʋna yɩ ba ta bwɛ Moyisi ba wɩ: «Bɛɛ mʋ dɩbam lagɩ dɩ nyɔ yɩ na bam camma tɩntʋ?» 25 Moyisi ma kaasɩ o loori Baŋa-Wɛ. Wɛ ma brɩ-o tiu kʋdoŋ naga. O ma kaarɩ-ka o dɩ na bam wʋnɩ. Na bam ma ləri ba ji na-ywənə.
Dáanɩ mʋ Baŋa-Wɛ kwe DƖ ni dɩm DƖ tiŋi DƖ pa nɔɔna bam sɩ ba taa tɔga, yɩ DƖ daarɩ DƖ maŋɩ nɔɔna bam DƖ nii. 26 DƖ ma ta dɩ ba DƖ wɩ: «Nɩnɛɛnɩ abam na wʋ́ sɛ á cəgi amʋ kwǝrǝ lanyɩranɩ, yɩ á tɔgɩ cwə-laa amʋ yigə nɩ, yɩ á daarɩ á kɩ á tɔgɩ amʋ niə yalʋ maama a na brɩ abam tɩn, amʋ bá sɛ sɩ yawɩɩrʋ tɩlʋ dwi na daanɩ Ezipi tiinə bam tɩn ja abam. Amʋ mʋ yɩ Baŋa-Wɛ, dɩlʋ dɩm na zuri á yawɩɩrʋ tɩn.»
27 Ba ma zɩgɩ dáanɩ ba vu ba yi jǝgǝ kadoŋ, ka yɩrɩ mʋ Elim. Je sɩm kʋntʋ nɩ mʋ buli-yiə fugə-yale dɩdaanɩ kʋrrʋ tweeru fusɩrpɛ wʋra. Nɔɔna bam dɛɛn ma cwi ba vwə buli-yiə yam təŋə nɩ.