14
Baŋa-Wɛ laan ma ta dɩ Moyisi DƖ wɩ:2 «Ta n brɩ Yisɩrayɛlɩ tiinə bam sɩ ba pipiri ba vu Pi-Ayirɔtɩ seeni sɩ ba cwi ba vwə yam da. Kʋ maa wʋ Migidɔla dɩdaanɩ nɩnɩʋ kʋm tɩtarɩ laŋa nɩ, yɩ kʋ jeeri Baal-Zefɔnɩ mʋ.3 Ezipi Pɛ wʋm nan wʋ́ bʋŋɩ nɩ Yisɩrayɛlɩ tiinə bam kaagɩ ba beeri mʋ je maama ba yǝri cwǝŋǝ. O maa wʋ́ ta nɩ: kagʋa kam mʋ cɩgɩ ba cwǝŋǝ.4 Amʋ nan daa ta wʋ́ pa o bɩcarɩ taa dana. Oó zəli abam sɩ o ja o joori. Tɩntʋ mʋ amʋ wʋ́ na cwǝŋǝ a wanɩ Pa-farʋ wʋm dɩ o jar-kərə bam pa a laan joŋi a zulə. Ezipi tiinə bam wʋ́ lwarɩ nɩ amʋ mʋ yɩ Baŋa-Wɛ.» Nɔɔna bam dɛɛn ma sɛ ba kɩ Wɛ na brɩ-ba kʋlʋ tɩn.
5 Nɔɔna ma ta ba brɩ Ezipi Pɛ nɩ Yisɩrayɛlɩ tiinə bam duri mʋ ba viiri. O dɩ o nakwa bam ma ləni ba wʋbʋŋa yɩ ba wɩ: «Bɛŋwaanɩ mʋ dɩ́ wʋ́ pa Yisɩrayɛlɩ tiinə bam cwǝŋǝ sɩ ba lu dɩ́ jɩŋa nɩ? Dɩbam gɛ dɩ gambɛ sɩm mʋ kʋntʋ!» 6 Pɛ wʋm dɛɛn ma pa ba ja o jara-kǝm təriko kʋlʋ siseŋ-nɔɔna na vaŋɩ tɩn ba ba ba pa‑o, yɩ o daarɩ o la o jar-kərə bam o kɩ daanɩ. 7 O ma kwe o jara-kǝm tərikooru maama dɩ balʋ na diini-sɩ tɩn. Tɩ maama wʋnɩ biə-yardʋ (600) mʋ tiini tɩ lamma zanzan. Təriko maama jɩgɩ kʋ dɩdɛɛrʋ mʋ.
8 Baŋa-Wɛ dɛɛn ya pɛ Ezipi Pa-farʋ wʋm bɩcarɩ tiini kʋ dana mʋ, yɩ o pɛ Yisɩrayɛlɩ tiinə bam o pu sɩ o zəli o ja-ba. Kʋ nan na yɩ Yisɩrayɛlɩ tiinə bam, bantʋ dɛɛn ve dɩdaanɩ baarɩ mʋ. 9 Ezipi tiinə bam ma zəli-ba sɩ ba ja. Kʋ maa yɩ Pɛ jar-kərə bam, dɩ ba sise sɩm, dɩ ba tərikooru tɩm, dɩdaanɩ balʋ na diini-sɩ tɩn maama mʋ zəli Yisɩrayɛlɩ tiinə bam ba vu ba yi mɛ ba dɛɛn na cwi ba vwə yam da tɩn. Je sɩm kʋntʋ dɛɛn wʋ nɩnɩʋ kʋm təŋə nɩ mʋ. Kʋ maa bwələ dɩdaanɩ Pi-Ayirɔtɩ, yɩ kʋ jeeri Baal-Zefɔnɩ. 10 Yisɩrayɛlɩ tiinə bam ma nii ba na Pa-farʋ wʋm dɩ o nɔɔna bam na ve ba maa zaŋɩ ba baŋa nɩ. Fʋʋnɩ ma tiini dɩ ja-ba. Ba ma kaasɩ ba loori Baŋa-Wɛ sɩ DƖ zǝni-ba. 11 Ba ma bwɛ Moyisi ba wɩ: «Nmʋ jaanɩ dɩbam n ba yo seeni sɩ dɩ́ tɩ kagʋa kantʋ nɩ mʋ na? Yibeelǝ mʋ tǝrǝ Ezipi nɩ sɩ ba kɩ dɩbam ya wʋnɩ na? Bɛɛ mʋ yɩ n ja dɩbam n nuŋi Ezipi nɩ? 12 Dɩ́ ta na wʋ je sɩm kʋntʋ nɩ tɩn, dɩ́ lwarɩ kʋntʋ mʋ yɩ dɩ́ ta dɩ́ brɩ-m. Dɩ́ tagɩ dɩ nmʋ sɩ n yagɩ dɩbam cɩmm, sɩ dɩ́ taa tʋŋɩ dɩ́ paɩ Ezipi tiinə bam. Dɩ́ ya na maŋɩ dɩ́ gabɛɛm dɩm wʋnɩ, kʋ yaá taa garɩ dɩ́ na lagɩ dɩ́ tɩ kagʋa kam nɩ tɩntʋ tɩn!»
13 Moyisi ma ta dɩ ba o wɩ: «Yɩ taá kwarɩ-na fʋʋnɩ! Taá zɩgɩ-na dɩ baarɩ, sɩ á wʋ́ na Baŋa-Wɛ na wʋ́ kɩ te DƖ vrɩ abam zɩm dɛ dɩm nɩ tɩn. Ezipi tiinə bantʋ abam na nɛ ba na maa bɩɩnɩ zɩm tɩn, á daa bá na-ba maŋa dɩ maŋa.a 14 Baŋa-Wɛ mʋ lagɩ DƖ ja najara DƖ pa abam. Abam wʋ́ taá zɩgɩ da cɩmm mʋ yɩ á niə.»b
15 Baŋa-Wɛ ma ta dɩ Moyisi DƖ wɩ: «Bɛŋwaanɩ mʋ yɩ nmʋ zɩgɩ n kaasɩ n loori-nɩ? Ta dɩ nɔɔna bam sɩ ba taa titwəni ba ve yigə! 16 Sɩ nmʋ zǝŋi n nacəgə kam!c Twɩ-ka nɩnɩʋ kʋm baŋa nɩ, sɩ na bam pɔɔrɩ bɩle. Cwǝŋǝ wʋ́ pəni na bam tɩtarɩ nɩ sɩ Yisɩrayɛlɩ tiinə bam nɔnɩ tɩ-kʋra baŋa nɩ ba bɛ bubɛ dɩdɩm dɩm nɩ. 17 Amʋ laan wʋ́ pa Ezipi tiinə bam bɩcara taa dana. Baá tɔgɩ abam kwaga ba zʋ nɩnɩʋ kʋm wʋnɩ. Dáanɩ mʋ amʋ wʋ́ wanɩ Pa-farʋ wʋm dɩ o jar-kərə bam, dɩ ba tərikooru, dɩ ba sise diinə maama pa a laan joŋi a zulə. 18 Amʋ na wanɩ Pɛ wʋm dɩ o jar-kərə bam kʋntʋ, Ezipi tiinə bam wʋ́ lwarɩ nɩ amʋ mʋ yɩ Baŋa-Wɛ.»
19 Wɛ malɛka kam dɛɛn na yǝni ka tɔgɩ Yisɩrayɛlɩ tiinə jar-kərə bam yigə tɩn laan ma titwəni ka vu ka zɩgɩ ba kwaga nɩ. Kunkoŋo kʋm dɩ ma kɛ kʋ vu kʋ zɩgɩ dəki ba kwaga nɩ. 20 Kʋ dɛɛn zɩgɩ Ezipi tiinə kɔgɔ kʋm dɩdaanɩ Yisɩrayɛlɩ tiinə kɔgɔ kʋm tɩtarɩ laŋa nɩ mʋ. Kunkoŋo kʋm ma pa kʋ yɩ lim Ezipi tiinə bam tee nɩ tɩtɩɩ dɩm kʋntʋ maama nɩ. Sɩ kʋ na yɩ Yisɩrayɛlɩ tiinə bam, bantʋ dɛɛn jɩgɩ pooni mʋ. Tɩtɩɩ dɩm kʋntʋ nɩ ba kɔgɔ kʋm dɛɛn warɩ sɩ ba yi da-te.
21 Moyisi dɛɛn ma twɩ o jɩŋa nɩnɩʋ kʋm baŋa nɩ. Tɩtɩɩ dɩm maama nɩ, Baŋa-Wɛ ma pa vu-dɩʋ nuŋi wa-puli seeni kʋ ba kʋ dʋlɩ bugə kam baŋa nɩ. Na bam dɛɛn ma pɔɔrɩ bɩle yɩ tɩ-kʋra pəni ba tɩtarɩ nɩ. 22 Yisɩrayɛlɩ tiinə bam dɛɛn ve tɩ-kʋra baŋa nɩ mʋ ba bɛ nɩnɩʋ kʋm. Na bam dɛɛn nyɩ dɩ kəbrə mʋ na cɩgɩ ba jazɩm dɩdaanɩ jagwiə maama.d 23 Ezipi tiinə bam dɛɛn ma duri ba pu Yisɩrayɛlɩ tiinə bam kwaga ba tu bugə kam wʋnɩ. Ba dɛɛn jaanɩ ba sise, dɩ ba tərikooru tɩm mʋ, kʋ wǝli dɩ ba sise diinə bam maama ba tu da. 24 Tɩ-pʋra ni nɩ mʋ Baŋa-Wɛ zɩgɩ kunkoŋo kʋm na jɩgɩ mim tɩn wʋnɩ DƖ guni DƖ nii Ezipi jar-kərə bam yɩ DƖ pa vuvugə tʋ ba tɩtarɩ nɩ. 25 DƖ dɛɛn ma pa ba tərikooru tɩm nɛ sɩm mʋʋrɩ pa kʋ camma sɩ ba wanɩ ba vu ba bɛ. Ezipi tiinə bam laan ma ta ba wɩ: «Pa-na sɩ dɩ́ duri dɩ́ joori-na sɩ dɩ́ lu Yisɩrayɛlɩ tiinə jɩŋa nɩ! Bɛŋwaanɩ Baŋa-Wɛ mʋ wʋra DƖ jaanɩ najara DƖ wǝli-ba sɩ ba wanɩ dɩbam.»
26 Baŋa-Wɛ ma ta dɩ Moyisi DƖ wɩ: «Twɩ n jɩŋa nɩnɩʋ kʋm baŋa nɩ sɩ na bam joori ba pu Ezipi tiinə bam, dɩ ba tərikooru tɩm, dɩ ba sise diinə bam maama.» 27 Moyisi ma twɩ o jɩŋa nɩnɩʋ kʋm baŋa nɩ. Tɩga na jɩgɩ ka pʋʋrɩ tɩn, na bam ma joori ba kɩ daanɩ nɩnɛɛnɩ kʋ ya na maŋɩ kʋ yɩ te tɩn. Ezipi tiinə bam nan ya kwaanɩ mʋ sɩ ba lu, yɩ Baŋa-Wɛ kalɩ bantʋ o dɩ nɩnɩʋ kʋm wʋnɩ. 28 Na bam na joori ba kɩ daanɩ tɩn, ba ma pu Ezipi tiinə kɔgɔ kʋm maama, dɩ ba tərikooru tɩm, dɩ ba sise diinə bam. Nɔɔnʋ dɩ dɩdʋa tɩtɩ dɩ wʋ wanɩ sɩ o lu. 29 Sɩ Kʋ daarɩ Yisɩrayɛlɩ tiinə bam, bantʋ ya ve tɩ-kʋra baŋa nɩ mʋ ba vu ba bɛ nɩnɩʋ kʋm. Na bam dɛɛn nyɩ dɩ kəbrə mʋ na cɩgɩ ba jazɩm dɩdaanɩ jagwiə maama. 30 Dɛ dɩm kʋntʋ nɩ mʋ Baŋa-Wɛ vrɩ Yisɩrayɛlɩ tiinə bam Ezipi tiinə bam jɩŋa nɩ DƖ yagɩ. Yisɩrayɛlɩ tiinə bam dɛɛn ma tʋlɩ ba na Ezipi tiinə bam na tɩgɩ ba tigə bubɛ dɩm baŋa nɩ. 31 Ba dɛɛn nɛ Baŋa-Wɛ na kwe DƖ dam-fɔrɔ kʋm o kɩ tɩtʋŋ-kamunnu DƖ ma DƖ wanɩ Ezipi tiinə bam tɩn. Ba laan ma kwarɩ Baŋa-Wɛ yɩ ba daarɩ ba kɩ ba wʋ-dɩdʋa dɩ DƖ. Ba ta ma kɩ ba wʋ-dɩdʋa dɩ Wɛ tɩntʋŋnʋ Moyisi.