Wo-kwɩn sɩm
13
Baŋa-Wɛ dɛɛn laan ma ta dɩ Moyisi DƖ wɩ: 2 «Yisɩrayɛlɩ tiinə wʋnɩ wo-bɛ dwi maama na yɩ bu-kwɩn: sɩ á pɔɔrɩ-sɩ á pa amʋ. Kʋ na yɩ nabiinǝ wʋnɩ, naa vara wʋnɩ wo-kwɩn sɩlʋ na yɩ baara tɩn maama yɩ amʋ nyɩm mʋ.»Moyisi kwiə yam
3 Moyisi dɛɛn ma ta o brɩ nɔɔna bam o wɩ:
«Taá guli-na dɛ dɩntʋ gulə sɩ kʋ taa ve maŋa maama. Dɩ yɩ dɛdoŋ abam na nuŋi Ezipi tɩʋ kʋm nɩ tɩn mʋ. Dáanɩ, á dɛɛn yɩ gambɛ mʋ. Baŋa-Wɛ ma kwe DƖ dam-fɔrɔ DƖ ma DƖ vrɩ abam DƖ ja DƖ nuŋi je sɩm kʋntʋ nɩ. Abam na yǝni á guli-dɩ, kʋ ba maŋɩ sɩ á di dɩpɛ dɩlʋ na jɩgɩ dabɩlɩ dɩ wʋnɩ tɩn. 4 Zɩm mʋ abam lagɩ á nuŋi Ezipi nɩ. Kʋ yɩ pulim cana kam mʋ, kʋ yɩrɩ maa yɩ Abibi cana kam. 5 Baŋa-Wɛ nan maŋɩ DƖ goni ni dɩ á nabaara bam nɩ DƖ wʋ́ pa abam zʋ tɩga kadoŋ mʋ sɩ á taá te-ka. Kʋ nan yɩ tɩga kalʋ Kaanan tiinə bam na zʋʋrɩ da tɩn, dɩ Hɛtɩ tiinə bam, dɩ Amɔɔrɩ tiinə bam, dɩ Hevi tiinə bam, dɩdaanɩ Yebusi tiinə bam mʋ. Tɩga kam kʋntʋ ywəmmə mʋ dɩ varɩm dɩ kɔnɔ. Abam na yi da, bɩnɩ maama nɩ, sɩ á di candiə kantʋ Abibi cana kam nɩ. 6 Abam na yǝni á di candiə kam, á wʋ́ kwe da yarpɛ mʋ á ma á di dɩpɛ dɩlʋ dabɩlɩ na tǝrǝ dɩ wʋnɩ tɩn. Ya kweelim dɛ dɩm nɩ, á wʋ́ di candiə kam á ma á zuli Baŋa-Wɛ. 7 Da yarpɛ yam kʋntʋ maama wʋnɩ, á wʋ́ taá di dɩpɛ dɩlʋ dabɩlɩ na tǝrǝ dɩ wʋnɩ tɩn mʋ. Da yam kʋntʋ maama wʋnɩ, sɩ á yɩ sɛ sɩ dɩpɛ dɩlʋ na jɩgɩ dabɩlɩ tɩn taa wʋ abam tee nɩ. Abam na zʋʋrɩ mɛ maama tɩn, dabɩlɩ bá taa wʋra á tee nɩ.
8 Da yam kʋntʋ nɩ, sɩ á taá tɛ á brɩ á biə nɩ ‹Dɩ́ wʋra dɩ́ kɩ tɩntʋ sɩ dɩ́ guli Baŋa-Wɛ na kɩ DƖ pa dɩbam maŋa kalʋ DƖ na pɛ dɩ́ nuŋi Ezipi tɩʋ nɩ tɩn mʋ.› 9 Candiə kam kʋntʋ wʋ́ taa yɩ mɩmaŋɩ mʋ dɩ paɩ abam, nɩnɛɛnɩ á na vɔgɩ woŋo á jɩan nɩ naa á trǝ nɩ sɩ á yɩ swe te tɩn. Kʋntʋ tɩn, Baŋa-Wɛ taanɩ wʋ́ taa wʋ á wʋbʋŋa nɩ dɩdaanɩ á niə nɩ, sɩ á yɩ swe-dɩ. Bɛŋwaanɩ, Baŋa-Wɛ mʋ mɛ DƖ dam-fɔrɔ DƖ ma DƖ vrɩ abam DƖ ja nuŋi Ezipi nɩ. 10 Bɩnɩ maama wʋnɩ, abam wʋ́ taá di candiə kantʋ mʋ ka maŋa nɩ.
11 Baŋa-Wɛ wʋ́ sɩɩnɩ DƖ ja abam DƖ zʋ tɩga kalʋ Kaanan tiinə bam na zʋʋrɩ mɛ lele yɩ DƖ goni ni dɩ abam dɩ á nabaara bam nɩ DƖ wʋ́ pa abam sɩ á taá te tɩn. 12 Á na zʋ da, á maŋɩ sɩ á lɩ wo-bɛ dwi maama na dɛ yigə sɩ nuŋi sɩ niinə pugə nɩ tɩn á pɔɔrɩ-sɩ á pa Baŋa-Wɛ. Abam vara bam wʋnɩ wo-kwɩn sɩlʋ na yɩ baara tɩn yɩ Baŋa-Wɛ nyɩm mʋ. 13 Kʋ nan na yɩ bɩna-bɩa kalʋ na dɛ yigə ka nuŋi ka nu pugə nɩ tɩn, á wʋ́ kwe pǝlbu mʋ á ma á ləri ka yuu nɩ á pɔɔrɩ á pa Wɛ. Abam nan na ba lagɩ sɩ á kɩ kʋntʋ á ləri bɩnaga kam yuu nɩ, sɩ á bwəri ka ban á gʋ-ka. Kʋ na yɩ á tɩtɩ biə, á maŋɩ sɩ á kwe wǝǝnu mʋ á ləri bu-kwɩn sɩm yuu nɩ á pa Baŋa-Wɛ.
14 Jwa seeni, abam biə na bwe abam sɩ ba lwarɩ cullu tɩm kuri na yɩ te tɩn, sɩ á ta dɩ ba nɩ ‹Dɩ́ dɛɛn yɩ gambɛ mʋ Ezipi tɩʋ kʋm nɩ. Baŋa-Wɛ ma kwe DƖ dam-fɔrɔ DƖ vrɩ dɩbam DƖ ja DƖ nuŋi dɩ́ gabɛɛm dɩm wʋnɩ. 15 Ezipi Pa-farʋ wʋm bɩcarɩ dɛɛn dana mʋ yɩ o vɩn sɩ o pa dɩbam cwǝŋǝ sɩ dɩ́ viiri. Kʋntʋ ŋwaanɩ, Baŋa-Wɛ dɛɛn gʋ bu-kwɩn sɩm dwi maama Ezipi nɩ, vara dɩdaanɩ nabiinǝ maama. Kʋntʋ ŋwaanɩ mʋ dɩbam yǝni dɩ́ kwe varɩ-kwɩn sɩm dɩ́ ma kɩ kaanɩm dɩ́ pa Baŋa-Wɛ. Kʋ daarɩ kʋ na yɩ dɩbam tɩtɩ bəkər-kwɩn sɩm, dɩ́ yǝni dɩ́ ma wǝǝnu dɩ́ ləri ba yuu nɩ dɩ́ pa Baŋa-Wɛ.›
16 Cullu tɩntʋ wʋ́ taa yɩ mɩmaŋɩ mʋ tɩ paɩ abam nɩnɛɛnɩ á na vɔgɩ woŋo á jɩan nɩ naa á trǝ nɩ sɩ á yɩ swe nɩ Baŋa-Wɛ mʋ mɛ DƖ dam-fɔrɔ DƖ ja dɩbam DƖ nuŋi Ezipi nɩ tɩn.»
Yisɩrayɛlɩ tiinə bam kwe cwǝŋǝ ba nuŋi Ezipi nɩ
17 Ezipi Pa-farʋ wʋm na pɛ nɔɔna bam cwǝŋǝ sɩ ba viiri tɩn, Wɛ dɛɛn wʋ pɛ ba kwe cwǝŋǝ kalʋ na tɔgɩ Filisi tiinə laŋa kam tɩn, dɩ ka na maŋɩ ka yɩ cwə-kukuə tɩn dɩ. Wɛ dɛɛn bʋŋɩ DƖ tɩtɩɩ nɩ DƖ wɩ: «Nɔɔna na jeeri Yisɩrayɛlɩ tiinə bam dɩ najara, baá wanɩ ba ləri ba wʋbʋŋa yɩ ba pipiri ba joori Ezipi nɩ.» 18 Kʋntʋ ŋwaanɩ, Wɛ ma pa ba joori ba gugwǝli ba kwe cwǝŋǝ kalʋ na tɔgɩ kagʋa kam wʋʋ ka maa ve Nanɩ-sʋŋʋ kʋm seeni tɩn. Yisɩrayɛlɩ tiinə bam maa ve yɩ ba vɔ ba tɩtɩ kəri-kəri, sɩ najara na yi-ba, sɩ ba kɩ-ya.
19 Moyisi dɛɛn kwe Zʋzɛfʋ kwi sɩm mʋ o wǝli da sɩ ba ja ba viiri. Bɛŋwaanɩ, Zʋzɛfʋ dɛɛn pɛ Yisɩrayɛlɩ biə bam du durə mʋ, yɩ o ta dɩ ba nɩ: «Wɛ wʋ́ ba DƖ vrɩ abam DƖ yagɩ. Kʋ nan na kɩ kʋntʋ, sɩ á ja amʋ kwi sɩm á nuŋi da je sɩntʋ nɩ.»
20 Yisɩrayɛlɩ tiinə bam ma zɩgɩ Sukɔtɩ nɩ ba vu ba yi Etam. Je sɩm kʋntʋ wʋ kagʋa kam ni nɩ mʋ. Ba ma cwi ba vwə dáanɩ. 21 Ba na maa ve tɩn, Baŋa-Wɛ dɛɛn yǝni DƖ tɔgɩ ba yigə mʋ. Wɩa nɩ DƖ yǝni DƖ nyɩ dɩ kunkoŋo mʋ, kʋ na zɩgɩ dəki ba yigə nɩ sɩ ba lwarɩ cwǝŋǝ. Kʋ daarɩ tɩtɩɩ nɩ, DƖ maa nyɩ dɩ mim na zɩgɩ dəki mʋ yɩ dɩ tɔgɩ ba yigə kʋ brɩ-ba cwǝŋǝ pa ba veǝ. Kʋntʋ ma wǝli sɩ wɩa dɩ tɩtɩ maama ba ta waɩ ba veǝ. 22 Wɩa maama wʋnɩ, kunkoŋo kʋm dɛɛn wʋ nɔɔna bam yigə nɩ mʋ. Mim dɩm dɩ maa wʋ ba yigə nɩ tɩtɩɩ maama nɩ.a