Yisɩrayɛlɩ tiinə bam kaanɩm cullu tɩm
Dɛ dɛ wʋnɩ pɛɛra
28
Baŋa-Wɛ dɛɛn ma ta dɩ Moyisi DƖ wɩ:2 «Kwe amʋ ni dɩm n pa Yisɩrayɛlɩ tiinə bam nɩ: Kʋ na yǝni kʋ yi ka maŋa sɩ á zuli-nɩ, sɩ á ja wʋdiu pɛɛra yalʋ lwəm dɩm na ywəmmə amʋ tee nɩ tɩn á ja á ba á pa-nɩ.
3 Ta ta dɩ ba nɩ: Dɛ maama, á na lagɩ á kwe á wʋdiu pɛɛra á pa Baŋa-Wɛ, sɩ á ja pi-balɩ sɩle na yɩ bɩnɩ bɩnɩ yɩ sɩ ba jɩgɩ gɛɛrɩ sɩ yɩra nɩ tɩn á ba á ma á kɩ dɛ dɛ zwɛɛm kaanɩm. 4 Á nan wʋ́ kwe peeni sɩm dɩdʋa mʋ á kaanɩ zɩzɩŋa nɩ, sɩ dɩdaan-ni maŋa nɩ, sɩ á daa kaanɩ kadoŋ kam. 5 Á ta wʋ́ lagɩ mun-bwe bwɛn sɩlea mʋ na viiri dɩdaanɩ Olivi nugə kalʋ na yɩ lanyɩranɩ tɩn bwaŋa dɩdʋa sɩ kʋ taa yɩ wʋdiu pɛɛrɩ yɩ á wǝli-dɩ kaanɩm dɩm wʋnɩ. 6 Pɛɛrɩ dɩntʋ doŋ mʋ yɩ dɛ dɛ wʋnɩ zwɛɛm kaanɩm dɩm yɩ dɩ lwəm dɩm ywəmmə dɩ paɩ Baŋa-Wɛ. Sinayi piu kʋm nɩ mʋ Baŋa-Wɛ dɛɛn pɛ ni sɩ ba puli ba kɩ zwɛɛm kaanɩm dɩm kʋntʋ. 7 Á maŋɩ sɩ á kɩ wo-nyɔɔrʋ pɛɛrɩ mʋ á wǝli piə maama kaanɩm wʋnɩ. Kwe-na sana bwaŋa dɩdʋa á ja á vu á lo-ka jero-vwe dɩm wʋnɩ á pa Baŋa-Wɛ. 8 Dɩdaan-ni maŋa nɩ, sɩ á kaanɩ pi-bala kadoŋ kam. Á ta wʋ́ kɩ ka wʋdiu pɛɛrɩ dɩm dɩ ka wo-nyɔɔrʋ pɛɛrɩ dɩm á wǝli da sɩ kʋ maŋɩ dɩ á na kɩ te zɩzɩŋa nɩ tɩn mʋ. Á na yǝni á kɩ zwɛɛm kaanɩm kʋntʋ doŋ, dɩ lwəm dɩm ywəmmə dɩ paɩ Baŋa-Wɛ mʋ.
Wɛ siun dɛ pɛɛra
9 Kʋ na yǝni kʋ yɩ Wɛ siun dɛ, á pɛɛra yam wʋ́ taa yɩ pi-balɩ sɩle na yɩ bɩnɩ bɩnɩ yɩ sɩ ba jɩgɩ gɛɛrɩ sɩ yɩra nɩ tɩn, dɩdaanɩ wo-nyɔɔrʋ pɛɛrɩ, dɩ wʋdiu pɛɛrɩ dɩlʋ na yɩ mun-bwe bwɛn sɩle na viiri dɩ nugə tɩn. 10 Siun dɛ maama nɩ mʋ á maŋɩ sɩ á kɩ zwɛɛm kaanɩm kʋntʋ doŋ á wǝli á dɛ dɛ zwɛɛm kaanɩm dɩm dɩ dɩ wo-nyɔɔrʋ pɛɛrɩ dɩm wʋnɩ.
Cana maama pɛɛra yam
11 Cana maama pulim dɛ nɩ sɩ á yǝni á ja na-balɩ sɩle, dɩ pi-bɩa, dɩ pi-balɩ sɩrpɛ na yɩ bɩnɩ bɩnɩ tɩn á ja á ba á ma á kɩ zwɛɛm kaanɩm á pa Baŋa-Wɛ. Vara bam maama nan ba maŋɩ sɩ ba taa jɩgɩ gɛɛrɩ ba yɩra nɩ. 12 Na-bala maama kaanɩm ŋwaanɩ sɩ á kwe wʋdiu pɛɛrɩ na yɩ mun-bwe bwɛn sɩrdʋ na viiri dɩdaanɩ nugə tɩn á wǝli da. Ta kwe-na mun-bwe bwɛn sɩna na viiri dɩ nugə tɩn á ma á kɩ wʋdiu pɛɛrɩ á wǝli pi-bɩa kam kaanɩm wʋnɩ. 13 Kʋ nan na yɩ pi-bala maama kaanɩm mʋ, sɩ á kwe wʋdiu pɛɛrɩ na yɩ mun-bwe bwɛn sɩle na viiri dɩ nugə tɩn á wǝli da. Pɛɛra yantʋ maa yɩ zwɛɛm kaanɩm á na kɩ á pa Baŋa-Wɛ yɩ dɩ lwəm dɩm ywəmmə dɩ pa‑DƖ tɩn. 14 Á ta wʋ́ kwe sana bwɛn sɩle mʋ á ma á kɩ wo-nyɔɔrʋ pɛɛrɩ á wǝli na-bala maama kaanɩm wʋnɩ. Kʋ ta na yɩ pi-bɩa kam kaanɩm, wo-nyɔɔrʋ pɛɛrɩ dɩm wʋ́ taa yɩ sana bwaŋa dɩdʋa dɩ cicoro. Wo-nyɔɔrʋ pɛɛrɩ dɩlʋ á na wʋ́ wǝli pi-bala maama kaanɩm wʋnɩ tɩn wʋ́ taa yɩ sana bwaŋa dɩdʋa. 15 Cana maama pulim dɛ nɩ á ta maŋɩ sɩ á beeri bʋ-bala mʋ á ma á kɩ lwarɩm saarɩm kaanɩm á pa Baŋa-Wɛ á wǝli dɛ dɛ zwɛɛm kaanɩm dɩm dɩdaanɩ dɩ wo-nyɔɔrʋ pɛɛrɩ dɩm wʋnɩ.
Pakɩ candiə kam pɛɛra
16 Bɩnɩ maama wʋnɩ pulim cana kam da fugə-yana dɛ dɩm nɩ mʋ á wʋ́ kɩ kaanɩm á pa Baŋa-Wɛ Pakɩ candiə kam ŋwaanɩ. 17 Dɛ dɩm na saŋɩ tɩn wʋnɩ á wʋ́ puli sɩ á di candiə da yarpɛ. Ya da yam wʋnɩ á wʋ́ taá di dɩpwa yalʋ dabɩlɩ na tǝri ya wʋnɩ tɩn mʋ. 18 Candiə kam dim pulim dɛ dɩm nɩ, sɩ á yagɩ á dɛ dɛ tɩtʋŋa yalʋ á na yǝni á tʋŋa tɩn, sɩ á daarɩ á jeeri daanɩ á zuli Wɛ. 19 Á maŋɩ sɩ á kɩ zwɛɛm kaanɩm mʋ sɩ dɩ taa yɩ wʋdiu pɛɛrɩ dɩ pa Baŋa-Wɛ. Á wʋ́ ja na-balɩ sɩle, dɩ pi-bɩa dɩdʋa, dɩ pi-balɩ sɩrpɛ na yɩ bɩnɩ bɩnɩ tɩn á ma á kɩ zwɛɛm kaanɩm dɩm. Vara bam maama nan ba maŋɩ sɩ ba taa jɩgɩ gɛɛrɩ ba yɩra nɩ. 20 Na-bala kalʋ maama á na wʋ́ ma á kɩ kaanɩm tɩn, sɩ á kwe wʋdiu pɛɛrɩ na yɩ mun-bwe bwɛn sɩrdʋ yɩ á viiri dɩdaanɩ nugə tɩn á wǝli da. Kʋ na yɩ pi-bɩa kam kaanɩm, wʋdiu pɛɛrɩ dɩm wʋ́ taa yɩ mun-bwe bwɛn sɩna mʋ. 21 Wʋdiu pɛɛrɩ dɩm wʋ́ taa yɩ mun-bwe bwɛn sɩle pi-bala maama kaanɩm ŋwaanɩ. 22 Á ta wʋ́ kwe bʋ-bala dɩdʋa mʋ á wǝli da sɩ á ma á kɩ lwarɩm saarɩm kaanɩm sɩ á lɩ nɔɔna bam lwarɩm Wɛ yigə nɩ. 23 Á maŋɩ sɩ á kwe pɛɛra yam kʋntʋ maama mʋ á kɩ kaanɩm á wǝli zɩzɩŋa maama zwɛɛm kaanɩm dɩm wʋnɩ. 24 Candiə kam dim da yarpɛ yam maama wʋnɩ mʋ á maŋɩ sɩ á kɩ wʋdiu pɛɛra yam kʋntʋ doŋ á zwɛ á pa Baŋa-Wɛ sɩ ya lwəm dɩm taa ywəmmə dɩ pa‑DƖ. Á wʋ́ wǝli-ya dɛ dɛ zwɛɛm kaanɩm dɩm dɩdaanɩ dɩ wo-nyɔɔrʋ pɛɛrɩ dɩm wʋnɩ mʋ. 25 Candiə kam tiim dɛ dɩm nɩ, sɩ á daa yagɩ á dɛ dɛ tɩtʋŋa yalʋ á na yǝni á tʋŋa tɩn, sɩ á daarɩ á jeeri daanɩ á zuli Wɛ.
Faa wo-vallʋ candiə kam pɛɛra
26 Faa wo-vallʋb candiə kam na yǝni dɩ yi, yɩ á na lagɩ á ja á dayigǝ wʋdiiru pɛɛra á ba á pa Baŋa-Wɛ, dɩntʋ dɛ dɩm nɩ á maŋɩ sɩ á yagɩ á dɛ dɛ tɩtʋŋa yalʋ á na yǝni á tʋŋa tɩn mʋ, sɩ á jeeri daanɩ á zuli Wɛ. 27 Á nan wʋ́ kwe na-balɩ sɩle mʋ, dɩ pi-bɩa dɩdʋa, dɩ pi-balɩ sɩrpɛ na yɩ bɩnɩ bɩnɩ tɩn á ma á kɩ zwɛɛm kaanɩm sɩ dɩ lwəm dɩm taa ywəmmə dɩ paɩ Baŋa-Wɛ. Vara bam maama nan ba maŋɩ sɩ ba taa jɩgɩ gɛɛrɩ ba yɩra nɩ. 28 Na-bala maama kaanɩm ŋwaanɩ sɩ á kwe wʋdiu pɛɛrɩ na yɩ mun-bwe bwɛn sɩrdʋ na viiri dɩdaanɩ nugə tɩn á wǝli da. Kʋ na yɩ pi-bɩa kam kaanɩm, wʋdiu pɛɛrɩ dɩm wʋ́ taa yɩ mun-bwe bwɛn sɩna mʋ. 29 Wʋdiu pɛɛrɩ dɩm wʋ́ taa yɩ mun-bwe bwɛn sɩle pi-bala maama kaanɩm ŋwaanɩ. 30 Á ta wʋ́ kwe bʋ-bala dɩdʋa mʋ á wǝli da sɩ á ma á lɩ á lwarɩm Wɛ yigə nɩ. 31 Pɛɛra yam kʋntʋ maama dɩdaanɩ ya wo-nyɔɔrʋ pɛɛra yam á maŋɩ sɩ á ma á kɩ kaanɩm á wǝli dɛ dɛ zwɛɛm kaanɩm dɩm dɩdaanɩ dɩ wʋdiu pɛɛrɩ dɩm wʋnɩ mʋ. Taá ye-na sɩ vara bam yɩ taa jɩgɩ gɛɛrɩ ba yɩra nɩ.