Zelofadɩ bukwa bam taanɩ
27
Maala, dɩ Nowe, dɩ Hogɩla, dɩ Milka, dɩdaanɩ Tirisa dɛɛn yɩ Hefɛrɩ bu Zelofadɩ bukwa mʋ. Hefɛrɩ maa yɩ Galadɩ bu. Galadɩ dɩ maa yɩ Makira bu. Makira maa yɩ Manasɩ bu. Manasɩ maa yɩ Zʋzɛfʋ bu. 2 Bukwa bantʋ dɛɛn ma zaŋɩ ba vu jero-vwe dɩm ni nɩ ba yi Moyisi, dɩ kaanɩm tu Eleyazaarɩ, dɩ Yisɩrayɛlɩ yigǝ tiinǝ, dɩ ba kɔ-fɔrɔ kʋm maama te. Ba ma zɩgɩ ba yigə nɩ yɩ ba ta ba wɩ: 3 «Dɩbam ko dɛɛn tɩgɩ kagʋa kam nɩ, yɩ o ba jɩgɩ bəkəri. O nan ya tɔgɩ o tǝri Kʋra kwaga tɔgɩna bam wʋnɩ. Bantʋ dɛɛn kɩ ni daanɩ sɩ ba lɔ Baŋa-Wɛ kwaga nɩ. Dɩ́ ko nan tɩgɩ o tɩtɩ lwarɩm baŋa nɩ mʋ. 4 Abam nan wʋ́ sɛ sɩ dɩbam ko yɩrɩ je o sɔ-yuu kʋm wʋnɩ, dɩ o na ba jɩgɩ bəkərə tɩn ŋwaanɩ na? Pa-na sɩ dɩbam balʋ na yɩ o bukwa tɩn joŋi tɩga kalʋ na wʋ́ taa yɩ dɩ́ nyɩm tɩn, nɩ dɩ́ ko cʋrrʋ tɩm na wʋ́ joŋi ba nyɩm te tɩn.»5 Moyisi ma ja ba taanɩ dɩm o vu Baŋa-Wɛ yigə. 6 Baŋa-Wɛ ma ta dɩd-o DƖ wɩ: 7 «Zelofadɩ bukwa bam wʋ ba cɩga wʋnɩ. Pɔɔrɩ-na tɩga ba ko cʋrrʋ tɩga kam wʋnɩ á pa-ba. Bantʋ mʋ maŋɩ sɩ ba joŋi tɩga kalʋ na yɩ ba ko nyɩm tɩn.a 8 Nan ta n brɩ Yisɩrayɛlɩ tiinə bam nɩ: ‹Nɔɔnʋ na tɩga yɩ o ba jɩgɩ bəkərə, sɩ o bukɔ lɛɛrɩ o joŋi o tɩga o ta te. 9 O nan na tɩga yɩ o ba jɩgɩ bukɔ dɩ, sɩ o cʋrrʋ joŋi o tɩga kam. 10 O nan na maŋɩ o ba jɩgɩ cʋrrʋ dɩ, sɩ o ko cʋrrʋ tɩm joŋi o tɩga kam. 11 O na yɔɔrɩ o ba jɩgɩ cʋrrʋ naa o ko cʋrrʋ, sɩ wʋlʋ dɩ daa na yɩ o yɩra nɔɔnʋ yɩ kʋntʋ tu bwələ dɩd-o tɩn joŋi-ka o taa te. Amʋ ni mʋ kʋntʋ a na kwe a pa Yisɩrayɛlɩ tiinə bam sɩ kʋ taa ve maŋa maama. Kʋ maa yɩ ni dɩlʋ amʋ Baŋa-Wɛ na pɛ nmʋ, Moyisi tɩn mʋ.› »
Zozwe ləri Moyisi yuu nɩ
12 Baŋa-Wɛ ma ta dɩ Moyisi DƖ wɩ: «Amʋ wʋ́ pa n vu Abarim pweeru tɩm wʋnɩ, yɩ n din piu kʋlʋ na wʋra tɩn yuu. Nmʋ na diinə, sɩ n nii n na tɩga kalʋ a na lagɩ a kwe a pa Yisɩrayɛlɩ tiinə bam tɩn. 13 Nmʋ nan na nii-ka n ti, n dɩ lagɩ n tɩ mʋ nɩnɛɛnɩ n zɩmbaarʋ Arɔn na tɩgɩ te tɩn. 14 Bɛŋwaanɩ, á dɛɛn na wʋ Zin kagʋa kam wʋnɩ yɩ Yisɩrayɛlɩ tiinə kɔgɔ kʋm jɩgɩ-nɩ ba pʋʋna tɩn, abam bale nuŋi a ni dɩm kwaga nɩ yɩ á wʋ pɛ Yisɩrayɛlɩ tiinə bam maanɩ ba lwarɩ nɩ: amʋ mʋ yɩ Wɛ dɩlʋ na yɩ wʋ-poŋo tu tɩn.»b (Kʋntʋ dɛɛn kɩ Meriba-Kadesɩ na wʋ Zin kagʋa kam wʋnɩ tɩn mʋ, mɛ na na nuŋi piu kʋm yɩra nɩ tɩn.)
15 Moyisi ma ləri Baŋa-Wɛ o wɩ: 16 «Nabiinǝ maama Ŋwɩa Tu Baŋa-Wɛ, nan beeri nɔɔnʋ n ləri amʋ yuu nɩ, sɩ o taa nii nɔn-kɔgɔ kʋntʋ baŋa nɩ. 17 Wʋntʋ wʋ́ taa tɔgɩ nɔɔna bam yigə yɩ ba taa nuŋi ba kɩ najara, yɩ ba daarɩ ba joori ba sam wʋnɩ. Kʋ na daɩ kʋntʋ, nmʋ Baŋa-Wɛ nɔn-kɔgɔ kʋm wʋ́ taa nyɩ dɩ pe-kɔgɔ na wʋra yɩ sɩ ba jɩgɩ nayɩrʋ te tɩn mʋ.»
18 Baŋa-Wɛ ma ta dɩ Moyisi DƖ wɩ: «Nun bu Zozwe nan yɩ wʋlʋ amʋ Joro na wʋ o tee nɩ sɩ o wanɩ o tʋŋɩ n tɩtʋŋɩ dɩm tɩn mʋ. Kwe n jɩŋa n daŋɩ o yuu nɩ sɩ o ləri n yuu nɩ o taa tʋŋa. 19 Pa o vu o zɩgɩ kaanɩm tu Eleyazaarɩ, dɩ Yisɩrayɛlɩ kɔ-fɔrɔ kʋm maama yigə nɩ, sɩ n tiŋ‑o o tɩtʋŋɩ dɩm ŋwaanɩ yɩ nɔɔna bam maama zɩgɩ ba niə. 20 Kwe ni dɩlʋ nmʋ na jɩgɩ ba baŋa nɩ tɩn n pa-o, sɩ Yisɩrayɛlɩ tiinə kɔgɔ kʋm taa sɛ‑o.c 21 O dɩ nan maŋɩ sɩ o taa ve Eleyazaarɩ te mʋ, sɩ wʋntʋ wanɩ o tɔgɩ Yurim mɩmaŋa kandwɛ dɩm baŋa nɩ o lwarɩ amʋ Baŋa-Wɛ wʋbʋŋa na yɩ te tɩn.d Kʋntʋ tɩn, Eleyazaarɩ wʋ́ brɩ-o amʋ ni dɩm sɩ o yǝni ja nɔɔna bam o nuŋi sɩ ba zaŋɩ najara, naa sɩ ba joori ba sam wʋnɩ.»