Jesús tsandaꞌa ia ndi uxi-uu tsa yaꞌa sa na kaꞌan tsa s-toꞌon Ndios
9
Na dataka ia ndi uxi-uu tsa nchiko ñaꞌan xi ia, san sañaꞌan ia sa tastuni tsa sa kineꞌen tsa ndidaa tachi kuiꞌia xiꞌin sa ndada guaꞌa tsa ñayii. 2 San tsandaꞌa ñaꞌan ia sa na kaꞌan tsa s-toꞌon Ndios xiꞌin na ndada guaꞌa tsa tsa kuꞌu xi. 3 Sadaa ia:—Nisa en sa ma kuneꞌe yo kiꞌin, nisa yutu ketuu yo, nisa ñono, nisa ita-stila, nisa mediu san nisa doꞌno nadama yo. 4 San kendoo eni veꞌe san juan ni koo ntsaa na kee yo ñuu yukua. 5 San ami ti semani ñaꞌa ñayii san ora na kee yo ñuu yukua kidi tiachi ndaꞌa saꞌa yo ndasa na kini ñayii sa Ndios diko ini ñaꞌan ia s-tsa ndidaa tsa.
6 San kee ndi uxi-uu tsa nchiko ñaꞌan xi ia san kuaꞌan tsa veꞌe xiꞌin veꞌe ku kaꞌan tsa s-toꞌon guaꞌa Ndios xiꞌin ndadaguaꞌa tsa tsa kuꞌu xi.
Duꞌua taꞌan sa xiꞌi Juan tsa dakuendutsa ñaꞌan
7 San Herodes tsaku s-tsa ndidaa sa naꞌnu kida Jesús san yuꞌu tsa kuan kachi ndidaa ñayii ñuu yukua sa Juan tsa dakuendutsa ñaꞌan nandoto tsa. 8 San uu ka tsa kachi sa Jesús kuu Elías, san dagua ka tsa kachi sa Jesús kuu dakaa x-profeta Ndios tsa io antes san ndikuu xanaa tsa. 9 San Herodes kachi tsa:
—Ntsuꞌu táꞌvichiion sa na diti d̶uku Juan. Andu kuu nuyaꞌa, nu ndaa tsa yaꞌa ndidaa tsa s-toꞌon xi ya tuda?
San nchu kini ñaꞌan tsa.
Jesús sañaꞌan ia sa kaxi oꞌon mil tsayee
10 Nasa ndidaa tsa nchiko ñaꞌan xi Jesús, san nakani tsa ndidaa sa kída tsa. San kuaꞌan ia xiꞌin tsa ndidaa tsa en ñuu nani Betsaida. 11 Doko niꞌitoꞌon ndidaa ñayii io jukua, san nchiko ñaꞌan tsa ndidaa tsa kuaꞌan san nakuaka ñaꞌan ia san kaꞌan ia s-toꞌon Ndios xiꞌin ndada guaꞌa ia ñayii kuꞌu xi.
12 San sa ñini san tuꞌua ñaꞌan ndi uxi-uu tsa nchiko ñaꞌan xi ia san sadaa tsa:
—Kada ni xi ndidaa ñayii xan sa na kiꞌin tsa ñuu io yachi xiꞌin veꞌe io yachi san na ndexavi tsa xiꞌin na nduku tsa sa kaj s-tsa kuan jaꞌa atuu dana sa io.
13 San Jesús sadaa ia:
—Kuañaꞌan mee yo ndidaa yo sa nakaj nu ndidaa nu.
Doko ndi uxi-uu tsa nchiko ñaꞌan xi ia sadaa tsa:
—Atuu sa neꞌe da ndidaa da vaxi ubi ni chaka xiꞌin oꞌon ni ita-stila neꞌe da, enika tu na kiꞌin da ndidaa da ku kueen da sa kaj s-tsa ndidaa tsa.
14 San ndaa oꞌon mil tsayee io. Danduu Jesús sadaa ia:
—Kadaa na kukoo tsa daguacientu daguacientu ni tsa.
15 San duꞌua kída tsa, san ndidaa tsa sakuntsaku. 16 Danduu Jesús teen ia ndi oꞌon ita-stila xiꞌin nduu chaka san ndaneꞌe ia jnu ia ichi andivi san sañaꞌan ia taxaꞌvi xi Ndios. Danduu taꞌvi ia san sañaꞌan ia xi ndi uxi-uu tsa nchiko ñaꞌan xi ia sa nakua ñaꞌan tsa xi ndidaa ñayii io juan. 17 Ndidaa tsa sáxi san nachitu tsa, san nakeꞌen tsa uxi-uu yeka pedasu kendoo.
Sa naꞌma Pedru
18 San en kii xikataꞌvi ia, ndi uxi-uu tsa nchiko ñaꞌan xi ia xuku yachi tsa san ndukutoꞌon Jesús:
—Andu kachi ñayii sa kuu ntsu?
19 San sadaa tsa yaꞌa ndidaa tsa:
—Uu tsa kachi sa kuu ni Juan tsa xu dakuendutsa ñaꞌan, san dagua tsa kachi sa kuu ni Elías, san uu ka tsa kachi sa kuu ni dakaa tsa tsándaꞌa Ndios io antes, san ndikuu xanaa xi.
20 San Jesús sadaa ia:
—San yoꞌo ndidaa yo kin, andu kachi yo sa kuu ntsu?
Danduu Pedru sadaa tsa:
—Dini kuu x-Cristu Ndios ia kida sa nanitaꞌvi.
Jesús kaꞌan ia sa ndeꞌe ia
—Diꞌnanuu taꞌan ntseꞌe ia nduu ñayii ñuyii yaꞌa san kini uꞌu ñaꞌan ndidaa tsa kunaꞌnu io ñuu xiꞌin ndidaa dutu xiꞌin ndidaa tsa dakuaꞌa ñaꞌan ley, san kaꞌni ñaꞌan tsa ndidaa tsa doko nduu uni kii nandoto nu.
23 San sadaa ia xi ndidaa tsa yaꞌa:
—Andu nchu kunchiko ñaꞌan ntsu, sa na kaꞌntsa-ini mee, san na kuido x-cruz xi ndikii sa na kunchiko ñaꞌan ku ntsu. 24 Kuan nu nchu niꞌi vida xi, dakuita nu; doko nu na dakuita vida xi sa saꞌa ntsuꞌu, san na niꞌi nu. 25 Kuan, nasa niꞌi nu na niꞌi nee ñuyii sa da kuita nu mee nu? 26 Kuan andu na kukaꞌan jnu xi sa saꞌa ntsu xiꞌin sa saꞌa ku toꞌon ntsu, san ia nduu ñayii ñuyii yaꞌa kukaꞌan jnu nu ora na ndij nu xiꞌin sa sandutsa nu xiꞌin s-tata nu xiꞌin ndidaa x-ángel nu. 27 Kachitoꞌon ndaa ntsu xo, sa kuaꞌa tsa ma ndeꞌe ntsa na kini tsa sa tastuni Ndios ñayii.
Sa nadama jnu Jesús
28 San yaꞌia kuenta una kii sa kaꞌan ia toꞌon yaꞌa, san kuaꞌan ia en tinduu ku kaꞌan ia xiꞌin Ndios san ntsaka ia Pedru, Juan xiꞌin Jacobo. 29 San neni xikataꞌvi ia, san jnu ia nadáma san d̶oꞌno ia nduu kuixi ntseꞌe nika oni sandutsa. 30 San danduu, ubi tsayee nanuu jnu ia san ndatoꞌon tsa xiꞌin ia, en tsa kuu Elías san enka tsa kuu Moisés, 31 san nduu tsa yaꞌa nanuu tsa xiꞌin sa sandutsa ntseꞌe san sadaa tsa sa xinotaꞌan sa taꞌan ia Jerusalén. 32 Pedru xiꞌin uu ka tsa ntsaka taꞌan xiꞌin tsa nchu kudu ntseꞌe tsa; doko ntsaꞌa tsa sa xíni tsa nduu tsayee yaꞌa xiꞌin Jesús. 33 San neni kunuꞌu nduu tsayee yaꞌa, Pedru sadaa tsa xi Jesús:
—Toꞌo guaꞌa ntseꞌe kída sa io ndo jaꞌa. Na kadaguaꞌa da uni veꞌe tuvixi, en kuu jni, enka na kuxi Moisés, san enka na kuxi Elías.
Doko Pedru ti xini tsa sa kaꞌan tsa. 34 San neni kaꞌan daa tsa toꞌon yaꞌa, san kixi en viko san chindati ñaꞌan s-tsa. San tsa yaꞌa yuꞌu ntseꞌe tsa ndidaa tsa sa kuyii tsa xiti viko ya. 35 Danduu xiti viko kaꞌan Ndios san kachi ia:
—Nu yaꞌa kuu ku daꞌa ntsu. Nu xinimani ntsu nu yaꞌa kunini.
36 San tuꞌu kaꞌan, san kendoo meni ka Jesús san ndidaa tsa yaꞌa ti kida vaa tsa sa xíni tsa.
Jesús ndadaguaꞌa ia en nuyee neꞌe tachi kuiꞌia
37 San nduu enka kii, noo ia tinduu yukua, san kuaꞌa ntseꞌe ñayii kée sa natañaꞌa xi ia. 38 San en tsayee saꞌan tsa sakondaꞌvi tsa xi Jesús:
—Toꞌo, nuyaꞌa ku en dini d̶aꞌa da. 39 En tachi kuiꞌia ñoꞌon ñaꞌan nu, san kana nu sa kidi ñaꞌan nu san kee ti-iñu xuꞌu nu; san tsanuꞌu ñaꞌan nu san uꞌu ntseꞌe dayaa ñaꞌan nu. 40 San sakundaꞌvi da xi ndidaa tsa nchiko ñaꞌan ni xan sa na ndadaguaꞌa ñaꞌan tsa, doko ti káchi kada tsa.
41 Sadaa Jesús:
—Naku ntseꞌe da ntsee d̶iki yo yoꞌo ñayii kuiꞌia ti xininchisa ñaꞌan ku ntsu io ndidaa kii yaꞌa, ama duꞌua ni koo ntsu xiꞌin yo ndidaa yo ama sani-ini yo sa duꞌua ni kuyakui ñaꞌan ntsu yo ndidaa yo? Taj ni d̶aꞌa ni xan jaꞌa.
42 San neni kuyachi tsa xiꞌin d̶aꞌa tsa kuan san dákana ñaꞌan ni jnu, san oni kee ti iñu xuꞌu nu. Doko Jesús ndadaguaꞌa ñaꞌan ia san nduden ia xi tachi kuiꞌia, san tachi kuiꞌia dandoo ñaꞌan xi nuyee san nakuaka ñaꞌan s-tata nu kuaan nu kída Jesús. 43 San ndidaa ñayii dayuꞌu ñaꞌan xi sa xíni ndidaa sa naꞌnu kída Ndios.
Jesús kaꞌan nituku ia sa kuu ia
San neni duꞌua ku ndidaa ñayii yaꞌa, san Jesús sadaa ia xi ndi uxi-uu tsa nchiko ñaꞌan xi ia:
44 —Kunini guaꞌa ndidaa yo san ma dana yo, ia nduu ñayii ñuyii yaꞌa nachiꞌi ñaꞌan ñayii nu ndaꞌa ndidaa ñayii xini uꞌu ñaꞌan nu.
45 Doko tsa yaꞌa ti sakuituni xanaa tsa sa nchu kachi Jesús, kuan Ndios vitañaꞌa ka kada ia sa na kukuituni xanaa tsa yaꞌa ndidaa tsa. San ti kuu yee tsa sa ndukutoꞌon tsa nasa nchukachi toꞌon yaꞌa.
Andu kuu sa kunaꞌnu
46 Danduu naa toꞌon ndidaa tsa nchiko ñaꞌan xi ia san kachi tsa: Andu kuu sa kunaꞌnu. 47 Doko Jesús xiniguaꞌa ia sa ñoꞌon xanaa tsa ndidaa tsa, sa teen ia en nuyee yiki san sani ia nu d̶in ia, 48 san sadaa ia:
—Andu na taꞌan-ini en nu luchi yaꞌa kuan kuu nu nu xini nchisa ñaꞌan ku ntsu san taꞌan-ini ñaꞌan ku ntsu; san andu na taꞌan-ini ñaꞌan kuntsu san taꞌan-ini ñaꞌan xi ia tsandaꞌa ñaꞌan kuntsu. Nu ku luchi ntseꞌe ka sa kuj yo ndidaa yo nu yukua kuu nu kunaꞌnu.
Andu ti xini-uꞌu ñaꞌan ku ndo san xinimani ñaꞌan ku ndo io
49 Danduu sadaa Juan:
—Toꞌo, xíni da ndidaa da sa en tsayee kineꞌen tsa tachi kuiꞌia xiꞌin sa nani ni san dadaꞌan da s-tsa kuan ti ndinoo tsa xiꞌin ndo.
50 Jesús sadaa ia:
—Kodaa nu san ma dadaꞌan yo nu. Kuan nu ti xini-uꞌu ñaꞌan ku ndo xinimani ñaꞌan nu ku ndo.
Jesús ndudeen ia xi Santiagu ndutsa Juan
51 Kuyachi kii sa nuꞌu ia andivi, san Jesús ti yuꞌu ia sa kiꞌin ia, san ten ichi ia kuaꞌan ia Jerusalén. 52 Tsandaꞌa ia uu tsa ndodonuu kuaꞌan ku nduku veꞌe ñuu Samaria sa kendoo ia xiꞌin tsa ndidaa tsa, 53 doko ti kachi ndidaa ñayii ñuu yukua kuan neꞌe-nuu ia kuaꞌan ichi Jerusalén. 54 San Jacobo xiꞌin Juan xini tsa sa duꞌua taꞌan ya san sadaa tsa:
—Toꞌo, nchoj ni sa na kada da sa kída Elías san na taꞌvichiion da sa na koꞌio ñuꞌu andivi san na kayu tsa ndidaa tsa ña?
55 San nadiko xi Jesús san sadaa ia:
—Yoꞌo ti xini yo nasa kuu sa kida sa duꞌua kaꞌan yo 56 kuan ia nduu ñayii ñuyii yaꞌa ti vaj nu sa na kuita ñayii, vaj nu sa nanitaꞌvi ñayii, san kuaꞌan ia enka ñuu.
Ndidaa tsa nchu kunchiko ñaꞌan xi Jesús
57 Neni kuaꞌan ia ichi, san en tsayee sadaa tsa:
—Toꞌo ¡Kunchiko ñaꞌan da ami na kiꞌin ni!
58 Jesús sadaa ia:
—Ndidaa ñukuii io xavi te, san tidaa xiko andivi io s-taka te, doko ia nduu ñayii ñuyii yaꞌa ti io nisa ami katuu ndodo d̶iki nu.
59 Sadaa ia xi enka tsa:
—Kunchiko ñaꞌan ku ntsu.
Doko tsa yaꞌa sadaa tsa:
—Toꞌo, kuntsatu ni na kiꞌin da ku chinduj d̶a s-tata da diꞌna ka.
60 Doko Jesús sadaa ia:
—Kodaa ndidaa ndii na chiduj s-tsa ndii tsa; doko yoꞌo, ¡kuaꞌan sa kaꞌan sa tastuni Ndios ñayii!
61 Danduu sadaa enka tsayee:
—Kunchiko ñaꞌan da jni doko kuntsatu ni diꞌna ka na kiꞌin da ku kaꞌan da xi ndidaa xayii da io xeꞌe da.
62 Doko Jesús sadaa ia:
—Ñayii teen ndaꞌa yata san nan ntsaꞌa ni on ichi sata xi ti nandeꞌe sa koo sa tastuni Ndios.