9
Sadaa ia tuku:—Kachitoꞌon ndaa ntsu xo sa dagua ñayii io jaꞌa ma ndeꞌe ntsa nakini nu sa tastuni Ndios xanaa ñayii.
Sa nadama jnu Jesús
2 Yaꞌia iñu kii, san Jesús kuaꞌan ia xiꞌin Pedru, Jacobo xiꞌin Juan, en tinduu duku san nadama sa kaa ia sa io ndidaa tsa yaꞌa. 3 D̶oꞌno ia ndu kuixi kachi san oni sandutsa, nduu kuixi ntseꞌe san nisa en ñayii ti kachi duꞌua nakatsa. 4 San nanuu Elías xiꞌin Moisés, san ndatoꞌon tsa xiꞌin Jesús. 5 San kaꞌan Pedru san sadaa tsa xi Jesús:
—Maestru, guaꞌa kida sa io ndo jaꞌa, na kada guaꞌa ndo uni veꞌe tuvixi: en kuj ni, enka na kuxi Moisés san enka na kuxi Elías.
6 San tsa yaꞌa duꞌua kachi tsa kuan ti xini tsa nasa kaꞌan tsa kuan yuꞌu tsa xiꞌin ndidaa ka tsa io xiꞌin tsa juan. 7 San en viko chindati ñaꞌan s-tsa, san xiti viko kuan kaꞌan Ndios san kachi ia:
—Nu yaꞌa kuu ku Daꞌa ntsu nu xinimani ntsu; nuyaꞌa kunini.
8 San nonoo ni ti en ka xíni tsa io juan meni ka Jesús io.
9 Neni nonoo tsa tinduu, san Jesús táꞌvichiion ia sa ma nakani tsa xi nisa en ñayii sa xíni tsa, ntsa na nandoto ia nduu ñayii ñuyii yaꞌa. 10 San ndidaa tsa yaꞌa ti kaꞌan tsa sa táꞌan, san ndatoꞌon tsa naku kachi ia sa kuu ia san danduu nandoto ia. 11 San ndukutoꞌon tsa ndidaa tsa san sadaa tsa:
—Kachitoꞌon ni, naku kachi ndidaa tsa dakuaꞌa ñaꞌan ley sa diꞌna ka Elías nandeꞌe sa kixi?
12 San sadaa ia:
—Kachi ndaa ntsu sa diꞌna ka Elías kixi san danuna tsa ichi. Doko ama ti xini yo sa yodotuni sa ia nduu ñayii ñuyii yaꞌa, taꞌan ntseꞌe nu san ma en kinimani ñaꞌan jnu ña? 13 Doko ntsuꞌu kachi ntsu sa Elías sa kíj s-tsa san taꞌan ntseꞌe tsa kída ndidaa tsa yaꞌa kuan duꞌua yodotuni sa taꞌan tsa.
Jesús ndadaguaꞌa ia en nuyee neꞌe tachi kuiꞌia
14 San nasaa ia sa io uu ka tsa nchiko ñaꞌan xi ia, san sa xuku kuaꞌa ntseꞌe ñayii sa io tsa, san uu tsa dadana ñaꞌan ley naa toꞌon xiꞌin tsa ndidaa tsa. 15 San xíni ñaꞌan ndidaa ñayii xi ia san ku-iꞌni ntseꞌe tsa ndidaa tsa san xino tsa ndidaa tsa kuaꞌan jnu ia san káꞌan tsa ndidaa tsa xi ia. 16 San ndukutoꞌon ia:
—Nasa na toꞌon yo xiꞌin ndidaa tsa yukua?
17 San kaꞌan en tsa in sa xuku ndidaa ñayii yukua:
—Maestru, ntsaka da d̶aꞌa da ya kuan neꞌe nu en tachi kuiꞌia san ti kachi kaꞌan nu, 18 san ora teñaꞌan nu san dakana ñaꞌan nu. San kee ti iñu xuꞌu nu san oni kida ruꞌu nuꞌu nu, san kida yutu ñaꞌan nu. Xíka da xi ndidaa tsa nchiko ñaꞌan ni ya sa na kineꞌen tsa. Doko ti kachi kada tsa.
19 San kaꞌan ia san sadaa ia:
—Ñayii ti xininchisa ñaꞌan ku ntsu, ama duꞌua ni koo ntsu xiꞌin yo sani-ini yo ndidaa yo ña? ama duꞌua ni ku yakui ñaꞌan ntsu yo ndidaa yo ña. ¡Taj nu ichaꞌa!
20 San ntsaka tsa nu kuaꞌan san kuenta xini ñaꞌan tachi kuiꞌia xi ia san kidiniꞌno ñaꞌan jnu yee san dakana ñaꞌan jnu nuꞌu san nchiniꞌno nu san kee ti iñu xuꞌu nu. 21 San Jesús ndukutoꞌon ia xi s-tata nu yaꞌa:
—Na daa kuia ku sa duꞌua kuu nu?
San sadaa tsa:
—Ntsa luchi nu. 22 Kuaꞌa guelta dakana niꞌno ñaꞌan jnu xiti yunuꞌun adi xiti ndutsa ndasa na kuu nu; doko tu na kuu ndada guaꞌa ni nu, san kunda-ini ñaꞌan ni d̶a san chintsee ñaꞌan ni.
23 Sadaa Jesús:
—Naku kachi yo tu na kuu kada ni? nu xininchisa ñaꞌan ku ntsu, ndidaa guaꞌa ni kada ntsu sa saꞌa nu.
24 San nonoo ni kachi s-tata nuyee:
—Xininchisa ñaꞌan da jni, chintsee ñaꞌan ni d̶a sa na kininchisa ñaꞌan ka da jni.
25 Doko kuenta xíni Jesús sa táka kuaꞌa ntseꞌe ñayii, san nduden ia xi tachi kuiꞌia san sadaa ia:
—Yoꞌo tachi kida sa ku doꞌo xiꞌin tachi kida sa ku ñeꞌe, ¡ntsuꞌu taꞌvichiion ntsu xo, sa na dandoo yo nuyee xan san ma naxikokagua ka yo sa io nu!
26 San danduu nuyee kuan kána nu niꞌi ntseꞌe, san kuiꞌia ntseꞌe kída nu, san niꞌi ntseꞌe kídi niꞌno ñaꞌan tachi kuiꞌia kuan jnu, san kee san ti kani ka nu, san kuaꞌa ntseꞌe ñayii xuku juan kachi: ¡Xíꞌi nu! 27 Doko Jesús teen ia ndaꞌa nu san ndaneꞌe ñaꞌan ia, san ndukuin nu.
28 San kuenta kuyii ia veꞌe san ndukutoꞌon ndi uxi-uu tsa nchiko ñaꞌan xi ia:
—Naku ti kachi kineꞌen mee da ndidaa da tachi kuiꞌia yukua?
29 Sadaa ia:
—Tu ti sakoo nchitsa yo xiꞌin ti xikataꞌvi yo xi Ndios san ma kachi kineꞌen yo, kuan kuiꞌia ntseꞌe tachi kuu.
Jesús kaꞌan nituku ia sa kuu ia
30 San kee ia juan san yaꞌia ia Galilea doko Jesús ti nchóxi ia sa na nitoꞌon ñayii ami kuaꞌan ia, 31 kuan dakuaꞌa ñaꞌan ia xi ndi uxi-uu tsa nchiko ñaꞌan xi ia, san sadaa ia: ia nduu ñayii ñuyii yaꞌa nayii nu ndaꞌa ñayii, san kaꞌni ñaꞌan jnu. San kuu nu, san nandoto nu nduu uni kii. 32 Doko ndidaa tsa yaꞌa ti sákuintuni xanaa tsa ndidaa toꞌon yaꞌa, san yuꞌu tsa sa ndukutoꞌon tsa xi ia.
Andu ku naꞌnu
33 Saa ia xiꞌin tsa ndidaa tsa Capernaúm. San ío tsa en veꞌe san Jesús ndukutoꞌon ia xi ndi uxi-uu tsa nchiko ñaꞌan xi ia:
—Nasa na toꞌon yo ichi vaj ndo kuaan?
34 Doko ndidaa tsa yaꞌa ti kaꞌan tsa kuan sa naa toꞌon tsa ku andu kuu sa kunaꞌnu. 35 Danduu kukoo ia, san kána ñaꞌan ia xi ndi uxi-uu tsa yaꞌa, san sadaa ia:
—Tu andu nchu kunaꞌnu, san nandeꞌe sa ku kuu nu danduu xiꞌin nu na kuinokuachi xo ndidaa yo.
36 San teen ia en nuyee luchi san sani ñaꞌan ia jnu dagua dagua; san nonontsaa ñaꞌan ia, san sadaa ia s-tsa ndidaa tsa:
37 —Andu na taꞌan-ini ñaꞌan xi en nuyee yiki kuenta nuyiki yaꞌa kuan kuu nu ku kiaꞌan ntsu san ntsuꞌu taꞌan-ini nu, san andu taꞌan-ini ñaꞌan ku ntsuꞌu san taꞌan-ini ñaꞌan xi Ndios ia tsandaꞌa ñaꞌan ku ntsu.
Andu ti xini-uꞌu ñaꞌan ku ndo sa xiniguaꞌa ñaꞌan ku ndo
38 Sadaa Juan:
—Maestru, xíni da ndidaa da en tsa kineꞌen tachi kuiꞌia xiꞌin sa nani ni, san dadaꞌan da ndidaa da tsa kuan ti ndinoo tsa xiꞌin ndo.
39 Doko Jesús sadaa ia:
—Ma dadaꞌan yo nu kuan nisa en ñayii kida sa naꞌnu xiꞌin sa nani ntsu kaꞌan kuiꞌia ku ntsu. 40 Kuan nu ti xini-uꞌu ñaꞌan ku ndo, xiniguaꞌa ñaꞌan nu ku ndo. 41 Andu kuu mee en ñayii na taxi en yaxi ndutsa xo kuan kuu yo ku kiaꞌan ntsu, san kachi ndaa ntsu yo sa ma kuita xaꞌvi ñayii duꞌua na kada.
Sa ii io sa kada sa na kada ñayii kuachi
42 San andu na kada sa dakaa nuliin yaꞌa, na kikagua nu kuachi ndidaa nu kuan xininchisa ñaꞌan nu ku ntsu, san guaꞌa ka tu nakiꞌni en yuu molinu d̶uku nu san na dakananiꞌno ñaꞌan nu xiti mar. 43 Tu kida yo kuachi xiꞌin ndaꞌa yo, diti. Kuan guaꞌa ka tu nayii yo xiꞌin eni ndaꞌa yo vida ma ndeꞌe san adi xiꞌin ubi ndaꞌa yo kiꞌin yo antsaya, sa io ñuꞌu ma ndaꞌua, 44 sa ti ndeꞌe tikudi, xiꞌin sa ti ndaꞌua ñuꞌun. 45 Tu kida yo kuachi xiꞌin saꞌa, diti kuan guaꞌa ka tu na yii yo xiꞌin eni saꞌa yo vida ma ndeꞌe san adi sa kiꞌin yo antsaya xiꞌin nduu saꞌa yo, 46 sa ti xiꞌi tikudi xiꞌin sa ti ndaꞌua ñuꞌu. 47 Tu kida yo kuachi xiꞌin nduchinuu yo, tagua kuan guaꞌa ka tu nayii yo sa tastuni Ndios ñayii xiꞌin eni nduchinuu yo san adi sa kiꞌin yo antsaya xiꞌin nduu nduchinuu yo, 48 sa ti xiꞌi tikudi xiꞌin sa ti ndaꞌua ñuꞌu.