Sa ii io sa kada kuachi
17
San Jesús sadaa ia xi ndidaa tsa nchiko ñaꞌan xi ia:—Sa ndakuiti ndikii io sa kuiꞌia nchu kada sa na kada yo ndidaa yo kuachi; doko, ¡ndaꞌvi kuxi ñayii na kada sa na kikagua enka ñayii kuachi! 2 Guaꞌa ka tu na kiꞌni en xuu molinu d̶uku xi san na dakananiꞌno ñaꞌan xi xiti mar san adi sa kada sa dakaa nuliin yaꞌa na kada nu kuachi. 3 Guaꞌa yo ndidaa yo:
Kuan tu xani yo kida nu kuachi san nduden jnu; san tu na nata uꞌu nu, koo sakaꞌnu-ini jnu. 4 San tu na kada nu kuachi yo usa guelta kii, san usa guelta kachi nu yo: Na ta-uꞌu ntsu; koo sa kaꞌnu-ini sa saꞌa nu.
Sa taꞌan ora xininchisa
5 San ndi uxi-uu apóstol sadaa tsa xi ia:
—Toꞌo, kada ni sa kininchisa ñaꞌan ka da ndidaa da ni.
6 San sadaa Jesús:
—Tu taꞌa dii na kininchisa ñaꞌan yo ku ntsu kuani kuenta kaa en ndiki yiki en yutu nani mostaza, san tu na kadaa yo xi yutu xan: “¡Ti kana san kukuin niꞌno xiti ndutsa kaꞌnu xan!”, San duꞌua kada.
Na chiion kida tsa xinokuachi
7 Daa yo io en nu kidachiion xi san nasa nu ndee nu kidachiion nu xiꞌin ndikutu adi nasa nu nde nu xiꞌin ndikachi sadaa yo jnu: “Yaꞌia san kukoo” 8 Adii sadaa yo: “Kadaguaꞌa sa na kaj dini ntsu san kuntsatu nee ni nakaj dini ntsu xiꞌin na koꞌo ntsu san na tuꞌu dana kaj dini mee yo.” 9 San nisa taxaꞌvi jnu ti sañaꞌan yo ndasa kida nu sa táꞌvichiion yo. 10 San duꞌua yoꞌo ndidaa yo, tu tuꞌu kida yo sa táꞌvichiion Ndios sa kada yo, san káchi yo: Ti ku ndo en tsa kidachiion guaꞌa kuan ti kida ndo vaa ka; ndani táꞌvichiion ku ndo kída ndo.
Jesús ndadaguaꞌa ia uxi tsayee tsaꞌyu niꞌno mee
11 San kuaꞌan Jesús Jerusalén san yaꞌia ia ichi Samaria xiꞌin Galilea. 12 San saa ia en ñuu san uxi tsayee kuꞌu s-tsa tsaꞌyu niꞌno tsa ndidaa tsa san xika xuku tsa 13 san kana tsa:
—Jesús, Maestru, ¡kunda-ini ñaꞌan ni daa ndidaa da!
14 San xíni ñaꞌan Jesús s-tsa san sadaa ia:
—Kuaꞌan ni jnu dutu ndasa na kini ñaꞌan tsa jni.
San ichi ni kuaꞌan tsa ndidaa tsa ndundoo tsa san nduguaꞌa tsa. 15 San en tsa kuaa xíni tsa sa nduguaꞌa tsa san naxikokagua tsa sa io Jesús san kana ntseꞌe tsa kidakaꞌnu tsa Ndios. 16 San sa kuinxiti tsa jnu Jesús san sañaꞌan taxaꞌvi xi ia san tsa yaꞌa ku tsa ñayii io Samaria. 17 San Jesús sadaa ia:
—Adii uxi ni kuu sa nduguaꞌa ña? Ami io ndi éen ka tsa yukua tan? 18 Meni tsa yaꞌa tsa ti kuu ñayii Israel naxikokagua sa kadakaꞌnu ñaꞌan xi Ndios ña?
19 San sadaa ia:
—Ndukuin ni san kunuꞌu ni kuan sa xininchisa ñaꞌan ni d̶a kída sa nduguaꞌa ni.
Duꞌua kada sa kixi sa tastuni Ndios
(Mt 24.23-28, 36-41)
20 Uu fariseu ndukutoꞌon tsa na kii kixi sa tastuni ñaꞌan Ndios xi ndidaa ñayii, san Jesús sadaa ia:
—Ti en xini na modo tastuni ñaꞌan Ndios xi ndidaa ñayii. 21 Nisa ma en kachi, ntsaꞌa “adi yaꞌa” ña “adi yukua”; kuan sa tastuni ñaꞌan Ndios xi ndidaa ñayii sa io jaꞌa dagua dagua sa io ni ndidaa ni.
22 San danduu sadaa Jesús xi ndidaa tsa nchiko ñaꞌan xi ia:
—Kixi kii sa oni nchu kini ñaꞌan yo ku ntsu kuani en kii san ma kini ñaꞌan yo. 23 San kachi ñayii: “Adi tsa io yukua” ña “adi tsa io yaꞌa.” Ma kininchisa yo san nisa ma kiꞌin yo ku nanduku ñaꞌan yo ku ntsu. 24 Duꞌua kuenta kida sa sandutsa andivi dayeꞌe ntsa saꞌa andivi xiꞌin ntsa enka saꞌa andivi duꞌua kada sa ndixi ia nduu ñayii ñuyii yaꞌa. 25 Doko diꞌna ka nchoxi sa taꞌa ntseꞌe nu san ndidaa ñayii yaꞌa kini-uꞌu ñaꞌan nu. 26 Duꞌua kuenta táꞌan ndidaa kii ío Noé duꞌua kada kii na ndij nituku ia nduu ñayii ñuyii yaꞌa: 27 Kuan xu kaj s-tsa xu koꞌo tsa, san xu tandaꞌa tsa, ntsa kii kunayii Noé barku, san kíxi davi kaꞌnu san oni dandeꞌe ndidaa. 28 San duꞌua ni kada, kuenta táꞌan ndidaa kii ío Lot: Kuan xu kaj s-tsa, xu koꞌo tsa, xu kueen tsa, xu diko tsa, xu chóꞌon tsa tata xiꞌin xu kadaguaꞌa tsa veꞌe; 29 doko kii kée Lot ñuu Sodoma, san kóon ñuꞌu xiꞌin azufre ntsaa andivi, san dandeꞌe ñaꞌan xi ndidaa ñayii ío juan. 30 Duꞌua kada kii na ndixi ia nduu ñayii ñuyii yaꞌa.
31 Kii yukua andu io d̶iki veꞌe san ndaꞌachiion tsa io xiti veꞌe ma noo tsa ku nakeꞌen tsa. San andu io yuku ma naxikokagua xeꞌe xi. 32 Nakaꞌan ndidaa yo nasa táꞌan d̶eꞌe Lot. 33 Kuan andu nchu kada sa nanitaꞌvi mee, san kuu, san andu na kuu sa saꞌa ntsu, san nanitaꞌvi.
34 Kachi ntsu yo sa niñu yukua ubi ñayii katuu eni xito; san en tsa kuntsaka ñaꞌan Ndios xi kiꞌin, san enka tsa kendoo. 35 Ubi ñadeꞌe nchiko san en ña kuntsaka ñaꞌan Ndios xi kiꞌin san enka ña kendoo. 36 Ubi tsa koo yuku; san en tsa kuntsaka ñaꞌan Ndios xi kiꞌin sa enka tsa kendoo.
37 San ndukutoꞌon ndidaa tsa nchiko ñaꞌan xi ia:
—Toꞌo, ami taꞌan ndidaa jaꞌa?
San Jesús sadaa ia:
—Ami katuu ndii, juan taka ndixii.