Andu kuu sa kunaꞌnu
18
San ndidaa kii yukua ndidaa tsa nchiko ñaꞌan xi Jesús nduyachi tsa jnu ia san ndukutoꞌon tsa xi ia:—Andu kuu sa kunaꞌnu sa io ñayii tastuni Ndios?a
—Kachitoꞌon ndaa ntsu yo sa tu ma kininchisa yo kuenta en daꞌyiki san ma ku kuu yo ndidaa ñayii tastuni Ndios.b 4 Juandiku, da nu na kininchisa kuenta nuyiki yaꞌa, nu yukua kuu nu kunaꞌnu sa io ndidaa ñayii tastuni Ndios. 5 San andu na kinimani ñaꞌan xi en nuyiki yaꞌa san ntsuꞌu xinimani nu.
Sa ii io sa kada sa en ñayii na kada kuachi
6 San andu na kada sa na ndugua en nuyiki xininchisa ñaꞌan ku ntsu, guaꞌa ka tu na kiꞌni en yuu kaꞌnu molinu d̶uku xi san na dakananiꞌno ñaꞌan xi xiti mar. 7 Ndaꞌvi ñayii kuan kuaꞌa ntseꞌe sa io ñuyii ya sa kida sa kikagua ñayii kuachi, doko ¡Ndaꞌvi ñayii na kada sa enka ñayii na kada kuachi!
8 Juandiku tu kida yo kuachi xiꞌin ndaꞌa yo adi xiꞌin saꞌa yo, diti san dakana. Guaꞌa ka tu nayii yo vida ma ndeꞌe xiꞌin eni saꞌa yo adi xiꞌin eni ndaꞌa yo, san adii sa xiín nduu ndaꞌa yo adi nduu saꞌa yo san koꞌno ñaꞌan yo xiti ñuꞌu ma ndaꞌua.c 9 San tu kida yo kuachi xiꞌin nduchinuu yo, tagua san dakana. Guaꞌa ka tu nayii yo sa io Ndios xiꞌin endini nduchinuu yo, san adi sa koo nduu san dakana ñaꞌan yo xiti antsaya sa io ñuꞌu ti ndaꞌua.d
Toꞌon dadaguataꞌan sa kuu ndikachi yiki xita
10 Ntsaꞌa ka, ma kachi yo sa ti nandeꞌe en nuyiki yaꞌa, Kuan kachi ntsu sa ndidaa ángel ntsaa ñaꞌan nu ndidaa tiempu ndatoꞌon xiꞌin ku Tata ntsu sa saꞌa nu. 11 Kuan ia nduu ñayii ñuyii yaꞌa vaj nu kada nu sa na nanitaꞌvi ñayii io xika xi Ndios.e
12 Ncha tuj yo ndidaa yo? Tu en tsayee io en cientu ndikachi tsa san xita te en te, ama ti taxuku tsa ndi kumi diko saꞌun kumi ka kitiukua san saꞌan tsa sa nanduku tsa kiti xita kuan ña? 13 San ora naniꞌi tsa te, kachitoꞌon ndaa ntsu yo san ku-iꞌni ntseꞌe ka tsa sa saꞌa kitiukua sa kuxi ndi kumi diko saꞌun kumi kiti ti xita. 14 San duꞌua, Ku Tata ntsu ia io andivi ti nchoxi ia sa kuita dakaa nuyiki yaꞌa.
Nandeꞌe sa koo sakaꞌnu-ini
15 Juandiku tu dakaa xani yo kida kuachi yo, kuaꞌan, san ndatoꞌon yo nduu ni yo sa kadaa nasa kuu sa kuiꞌia kida nu. San tu na nakininchisa nu sa io x-kuachi nu, san naniꞌi yo xani yo kuan nduu mani yo xiꞌin nu.f 16 Doko tu ti tedoꞌo nu, kana en adi ubi ka ñayii,g ndasa na kunaꞌa tsa. 17 San tu ti tsaku d̶oꞌo nu xi tsa yaꞌa tuku, san kadaa xi x-congregacion Ndios; san tu ti tediki nu ndidaa ñayii yaꞌa, san na ku kuu nu na en ñayii ti xini Ndios adi en ñayii dataka tuini sa kuxi Roma duꞌua na nakini ñaꞌan nu.
18 Kachitoꞌon ndaa ntsu yo sa ndidaa sa na kiꞌni yo nuꞌu ya san ntsuꞌu kiꞌni ntsu andivi san ndidaa sa na dayaa yo nuꞌu ya san ntsuꞌu dayaa ntsu andivi.h
19 San kachi nituku ntsu yo sa tu ubi yo na ndatoꞌon nuꞌu ya san na kaka xi ku Tata ntsu, san kada ia io andivi. 20 Kuan ami io ubi adi uni ñayii san xininchisa ñaꞌan ñayii yaꞌa ku ntsu san juan io ntsu dagua dagua sa io ndidaa ñayii yaꞌa.
21 Danduu kuyachi Pedru san sadaa tsa:
—Toꞌo, nada guelta nandeꞌe sa koo da sakaꞌnu-ini sa saꞌa xani da tu na kada nu sa kuiꞌia d̶a? Ntsa usa guelta ña?
22 San Jesús kachi ia:
—Adii usa ni guelta kachi ntsu, sa kachi ntsu ku sa unidiko uxi guelta san duꞌua kada usa guelta.i
Toꞌon dadaguataꞌan tsa kidachiion san ti nchu koo tsa sakaꞌnu-ini xi tsa neyeka s-tsa
23 Sa tastuni Ndios ñayii ndee sa kida en tsayee kuu rey, tsa na kaꞌvi s-tuini xi xiꞌin ndidaa tsa kidachiion jnu tsa nadaa neyeka ñayii s-tsa. 24 San kuenta kesaꞌa tsa na kaꞌvi tsa s-tuini tsa, ki ntsaka ñaꞌan xi en tsa neyeka xi rey ya, uxi mil moneda plata. 25 San tsa yaꞌa ti kachi na chaꞌvi tsa ndidaa tuini yaꞌa, san rey táꞌvichiion tsa sa na diko ñaꞌan s-tsa xiꞌin d̶eꞌe tsa, d̶aꞌa tsa xiꞌin ndidaa sa io s-tsa, ndasa na naniꞌi tsa ndaa neyeka s-tsa. 26 Danduu tsa kidachiion jnu tsa sa kuinxiti tsa san sakundaꞌvi tsa san sadaa tsa: “Kuntsatu ni d̶a, san na chaꞌvi da ndidaa ni.” 27 San rey yukua kunda-ini ñaꞌan tsa s-tsa, san dayaa ñaꞌan tsa san io tsa sakaꞌnu-ini xi sa neyeka tsa yaꞌa 28 Doko kee tsa kidachiion san naniꞌi tsa enka tsa kidachiion xiꞌin tsa veꞌe yukua, san tsa yaꞌa neyeka tsa en cientu ni moneda plata s-tsa, san tsa yaꞌa teen ñaꞌan tsa san chokuaꞌna ñaꞌan tsa san sadaa tsa: “Na chaꞌvi ndidaa sa neyeka yo ku ntsu vita kudii.” 29 Danduu tsa kidachiion xiꞌin tsa, sa kuinxiti tsa, san sakundaꞌvi tsa san sadaa tsa: “Kuntsatu ni d̶a san nachaꞌvi da ndidaa ni.” 30 Doko tsa yaꞌa ti nataꞌan xanaa tsa san saꞌan tsa san chiñaꞌan tsa vekaa ntsa na nachaꞌvi tsa yaꞌa ndidaa sa neyeka tsa. 31 San xini uu ka tsa kidachiion xiꞌin tsa sa duꞌua taꞌan tsa ya, san ta-uꞌu ntseꞌe tsa; san saꞌan tsa sa kadaa tsa xi rey kuaan ndidaa sa taꞌan yaꞌa. 32 Danduu rey kana ñaꞌan tsa san sadaa tsa: “¡Yoꞌo nu kuiꞌia! Ndidaa sa neyeka yo ío ntsu sakaꞌnu-ini yo, kuan sakondaꞌvi yo ku nuu ntsu. 33 Adii duꞌua nandeꞌe sa kunda-ini yo tsa kidachiion ku nuu ntsu kuaan tuku ña, kuan duꞌua kunda-ini ñaꞌan ntsu yo” 34 San rey kuaan, nadiko ntseꞌe s-tsa san na chiñaꞌan tsa ndaꞌa ndidaa policia ntsa na na chaꞌvi tsa ndidaa sa neyeka tsa.
35 —Duꞌua kada ku Tata ntsu ia io andivi xoꞌo ndidaa yo, tu ma koo yo sakaꞌnu-ini xiꞌin nee xanaa yo xi xani yo.