Jesús dadana ñaꞌan ia nasa kuu sa dandoo taꞌan ñayii
19
Tuꞌu kaꞌan Jesús toꞌon yaꞌa, kee ia Galilea san kuaꞌan ia ndidaa ka ndaꞌa ñuu io Judea, ntsa enka ndodo yutsa Jordán. 2 San kuaꞌa ntseꞌe ñayii nchiko ñaꞌan xi ia, san ndadaguaꞌa ñaꞌan ia xi ndidaa ñayii kuꞌu xi io jukua.3 Danduu ndidaa fariseu kuyachi tsa san xítotuni ñaꞌan tsa, tu na kaꞌan ia en toꞌon ti kuu, san ndukutoꞌon tsa:
—Guaꞌa ni dandoo taꞌan tsayee ya xiꞌin d̶eꞌe tsa kuani nasa kuu mee en sa taꞌan tsa ña?
4 San Jesús sadaa ia:
—Ama ti kaꞌvi yo sa yodotuni s-toꞌon Ndios sa kachi sa kuenta kesaꞌa ñuyii ya san Ndios kídaguaꞌa ia nuyee xiꞌin nudeꞌe ña,a 5 san kachi ia: “Sa saꞌa xi jaꞌa juandiku nuyee dandoo nu s-tata nu xiꞌin nana nu, san kukoo nu xiꞌin d̶eꞌe nu; san nduu nu nduu eni ka ñayii.”b 6 Juandiku ti kuu ka nu ubi nu, kuan eni ka ñayii kuu nu. San duꞌua, sa sakintsaa taꞌan Ndios, san ma dandentsaa taꞌan ñayii.
7 San ndidaa tsa yaꞌa ndukutoꞌon xi Jesús:
—Naku táꞌvichiion Moisés sa ñayii dandoo taꞌan na kuañaꞌan carta sa dandoo taꞌan tuda?c
8 San Jesús sadaa ia:
—Sa ntsee xanaa yo ndidaa yo, juandiku Moisés semani tsa sa na dandoo taꞌan ñayii; doko adii duꞌua ío diꞌna kuenta kesaꞌa ñuyii ya. 9 San ntsuꞌu kachi ntsu andu kuu mee sa dandoo taꞌan xiꞌin d̶eꞌe xi, san tu ti kuu sa io ña xiꞌin enka tsayee, san tandaꞌa xiꞌin enka ña deꞌe, san sa xidokuachi jnu Ndios sa io x-kuachi xi xiꞌin ñadeꞌe san andu nakoo xiꞌin ñadeꞌe dandoo taꞌan san xidokuachi tuku.d
10 Sadaa ndidaa tsa nchiko ñaꞌan xi ia:
—Tu duꞌua kuu sa io tsayee ya xiꞌin ñadeꞌe ya, san guaꞌa ka tu ma en koo d̶eꞌe xi adi xee xi tuda.
11 Danduu Jesús sadaa ia:
—Adii ndidaa tsa guaꞌani kuyakui toꞌon yaꞌa, ndidaa ni tsa sa ñaꞌan Ndios sa na kuu kuyakui. 12 Kuan io tsie ti kachi koo d̶aꞌa xi kuan duꞌua kuguaꞌa nu ntsa ñoꞌon nu xiti nana nu, san io tsie ti kachi koo d̶aꞌa xi kuan ñayii kida sa ma kachi koo d̶aꞌa nu, san io tsie ti nchu koo d̶aꞌa xi kuan nchu chintsee ñaꞌan ndasa kuaꞌa ka ñayii nayii sa tastuni Ndios ndidaa ñayii, kuan nchoj ka nu sa tastuni Ndios sa kuxi sa koo d̶aꞌa nu. Andu sa kukuituni xanaa xi san na tediki.
Jesús xika ia sa saꞌa nuliin
13 Danduu ntsaka tsa ndidaa tsa nuliin kuaꞌan jnu Jesús ndasa na kukoꞌon ñaꞌan ia jnu ndidaa nu xiꞌin na kakataꞌvi ia xi Ndios sa saꞌa nu. Doko dagua tsa nchiko ñaꞌan xi ia nduden tsa xi ndidaa tsa ntsaka ñaꞌan jnu. 14 Danduu Jesús sadaa ia:
—Kodaa ndidaa nuyiki xan nakij nu sa io ntsu san ma dadaꞌan yo, kuan ñayii ñoꞌon xanaa xi Ndios kuenta ndidaa nuliin yaꞌa ñoꞌon xanaa nu s-tadeꞌe nu duꞌua ndidaa ñayii yaꞌa tastuni Ndios.
15 San tuꞌu kukoꞌon ñaꞌan ia jnu ndidaa nu san kuaꞌan ia.
Jesús kaꞌan ia xiꞌin en nuyee kuika ntseꞌe
16 Saꞌan en nuyee sa io Jesús san sadaa nu:
—Maestru guaꞌa kuu ni, nasa kuu sa guaꞌa kada da ndasa na niꞌi da sa koo da ñuyii ma ndeꞌe.
17 San Jesús sadaa ia:
—Naku kaꞌan yo sa guaꞌa ntsu, ti io nisa en ñayii guaꞌa mee ni Ndios kuu ia guaꞌa. Doko tu nchu niꞌi yo vida, kada sa yodotuni taꞌvichiion Ndios.
18 Nu yaꞌa sadaa nu:
—Nasa kuu ndidaa sa yodotuni?
Jesús sadaa ia:
—Ma kaꞌni yo ndii,e ma koo s-tsani yo,f ma duꞌu yo,g ma kaꞌan yo kuachinañuu,h 19 chiñuꞌu s-tata yo xiꞌin j-nana yo,i san kada-ini ñayii kuenta kida-ini yo mee yo.j
20 San nuyee sadaa nu:
—Ndidaa jaꞌa kida da ntsa lin da. Nasa ka kada da?
21 Jesús sadaa ia:
—Tu nchu ku kuu yo en ñayii ndaa jnu Ndios, kuaꞌan san diko ndidaa sa io yo san kuañaꞌan xi ndidaa ñayii kundaꞌvi; san koo kuaꞌa ntseꞌe ka sa kuika yo andivi. San naꞌa san kunchiko ñaꞌan ku ntsu.
22 Doko kuenta tsaku xi nuyee yaꞌa toꞌon yaꞌa, san kunuꞌu nu san ndaꞌvi ntseꞌe nika io xanaa nu, kuan kuika ntseꞌe nu.
23 Danduu sadaa Jesús xi ndidaa tsa nchiko ñaꞌan xi ia:
—Kachitoꞌon ndaa ntsu xo, vixi ntseꞌe sa nduu en tsa kuika tsa tastuni Ndios. 24 Kachi toꞌo nituku ntsu yo san kama ka yaꞌia en camellu xavi en yiki na kiku, sa kuxi en tsa kuika sa nduu tsa tsa tastuni Ndios.
25 San kuenta tsaku xi ndidaa tsa nchiko ñaꞌan xi ia, san yuꞌu ntseꞌe tsa san kachi tsa:
—Andu niꞌi sa koo ndidaa tiempu tuda?
26 Jesús ntsaꞌa ñaꞌan ia san sadaa ia:
—Ndidaa jaꞌa vixi ntseꞌe tuj ñayii, doko atuu dana sa vixi sa ma kachi kada Ndios.
27 Danduu kaꞌan Pedru san ndukutoꞌon tsa:
—Toꞌo san dan ndidaa da dandoo da ndidaa san nchiko ñaꞌan da ni. Nasa io sa kuj d̶a ndidaa da tuda?
28 Jesús sadaa ia:
—Kachitoꞌon ndaa ntsu yo sa nasaa taꞌan kii na ndada saa Ndios ndidaa, sa ia nduu ñayii ñuyii yaꞌa na na kuntsaku nu sa tastuni nu,k san yoꞌo ndidaa yo nu nchiko ñaꞌan ku ntsu kuntsaku yo sata uxi-uu trono sa kaꞌntsa yo kuachi xi ndi uxi-uu tribu Israel.l 29 San ndidaa nu dandoo veꞌe, xani xi, x-kuaꞌa xi, s-tata xi, nana xi, d̶eꞌe xi, d̶aꞌa xi, xuꞌun xi, sa saꞌa sa xininchisa ñaꞌan ñayii ku ntsu, naniꞌi en cientu viaji vaa ka ñuyii yaꞌa, xiꞌin niꞌi nu vida ma ndeꞌe. 30 Doko ndidaa nu kuu nu diꞌna nandeꞌe sa koo jnu Ndios, nduu nu nu danduu, san nu danduu nduu nu, nu diꞌna koo jnu Ndios.m