En tsayee maña ntseꞌe sa kadachiion xi s-toꞌo xi
16
San Jesús sadaa ia toꞌon dadaguataꞌan yaꞌa xi ndidaa tsa nchiko ñaꞌan xi ia:—Ío en tsayee kuika san ío en tsa xu kadachiion jnu tsa san tsa yaꞌa xídokuachi tsa sa dativi dagua tsa s-tuini s-toꞌo tsa. 2 San s-toꞌo tsa sadaa tsa “Nasa kuu sa nitoꞌon ntsu sa kida yo? Kada x-kuenta yo na modo ku gastu ku tuini ntsu, kuan ma kadachiion ka yo ku ntsu.” 3 Danduu sani-ini tsa yaꞌa san kachi tsa “Nasa kada ndo? Kii na kuiko ñaꞌan ku toꞌo ndo ya ku ndo. Ti yakui ndo sa katsa ndo, ti nchu kaka ndo obra kuan kukaꞌan ku nuu ndo. 4 Aan jaꞌa kada ndo kuan nakoo ñayii nakaan xeꞌe xi ku ndo tu na kuiko ñaꞌan ku ndo.” 5 San kana tsa ndidaa tsa neyeka xi s-toꞌo tsa, san sadaa tsa xi en tsa neyeka kuan: “Nadaa neyeka yo xi ku toꞌo ntsu?” 6 San tsa yaꞌa kachi tsa: “En cientu yoo aceite.” San sadaa tsa: “Kama kukoo san chidotuni daguacientu.” 7 Danduu sadaa tsa xi enka tsa: “Yoꞌo kin, Nada neyeka yo?” San tsa yaꞌa sadaa tsa: “En cientu mangochi trigu.” San tsa yaꞌa sadaa tsa: “Teen recibu yo ya san chidotuni sa neyeka yo kumidiko.” 8 San nitoꞌon S-toꞌo tsa yaꞌa san kixi sa sani ni tsa sa ntseꞌe da mii tsa kidachiion jnu tsa ya kuan mii ntseꞌe tsa, kuan ñayii ñuyii yaꞌa mii ka tsa sa kada tsa sa niꞌi tsa sa nchoj tsa sa kuxi ñayii kida sa nchoxi Ndios.
9 Doko ntsuꞌu kachi ntsu: Kuenchiion sa kuika io ñuyii yaꞌa sa kada sa guaꞌa xi ñayii, kuan kii nandeꞌe ndidaa jaꞌa san na kuemani sa yii yo veꞌe sa koo yo ndidaa tiempu.
10 Nu xinokuachi ndaa xiꞌin en taꞌa ni, san kuenchiion guaꞌa nu vaa ntseꞌe, sa nu ti senchiion guaꞌa taꞌa ni sa ma kachi kuenchiion nu vaa ntseꞌe. 11 Kuan tu sa kuika io ñuyii yaꞌa ti xinokuachi ndaa yo xiꞌin, Andu kukaꞌnu-ini sa taxi sa kuu xaꞌan Ndios yo? 12 Kuan tu ti xini yo kuenchiion guaꞌa yo tuini ti kuu xaꞌan yo, san vika s-tuini mee yo kuan ku kuenchiion guaꞌa yo.
13 Kuan nisa en ñayii ma kachi kuinokuachi xi ubi tsa toꞌo kuan kini uꞌu tsa en tsa, san enka tsa kinimani tsa, ña kuinokuachi tsa xi en tsa san enka tsa ma kuinokuachi tsa xi, juandiku ma kachi kuinokuachi yo xi Ndios xiꞌin kunchiko yo sa kuika.
14 Ndidaa fariseu tsa nchoj ntseꞌe tuini tsaku s-tsa toꞌon yaꞌa san sakuntsaa ñaꞌan tsa xi Jesús. 15 San Jesús sadaa ia:
—Dini kuu sa kaꞌan jnu ndidaa ñayii sa guaꞌa ntseꞌe ni. Doko Ndios xini ia nasa ñoꞌon xanaa ni; kuan ndidaa sa ku sa xaꞌvi xi ndidaa ñayii ya san Ndios ti na taꞌan xanaa ia.
Sa chidotuni Moisés xiꞌin sa tastuni Ndios
16 Ley xiꞌin ndidaa profeta ío ntsa kuenta kixi Juan tsa dakuendutsa ñaꞌan. San ntsa kii yukua kaꞌan toꞌon guaꞌa sa kuu sa tastuni Ndios ñayii san kuaꞌa ntseꞌe ñayii ndukuntsee sa yii.
17 Kama ka sa ndeꞌe nuꞌu ya xiꞌin andivi ya sa kuxi sa ma xinotaꞌan sa kachi ley.
Jesús kaꞌan ia nasa kuu sa da kendoo taꞌa ñayii tandaꞌa
18 Andu dandoo d̶eꞌe xi san nakoo xiꞌin enka ñadeꞌe xidokuachi tsa nduu tsa sa io x-kuachi tsa jnu Ndios. Sa andu na nakoo xiꞌin ñadeꞌe kendoo san xidokuachi ña xiꞌin tsa sa io x-kuachi ña jnu Ndios tuku.
Tsa kuika xiꞌin Lazaro
19 Ío en tsayee kuika ntseꞌe san xu kuiꞌno tsa doꞌno púrpura xiꞌin linu finu san ndikii xu kada tsa viko naꞌnu. 20 San ío en tsa inani Lazaro, tsa yaꞌa xu kundaꞌvi ntseꞌe tsa san intsaku tsa ndieꞌe tsa kuika ya, chitu tsa choꞌon san takueꞌe, 21 san tsa yaꞌa sani-ini tsa sa kuntsaku kuani saꞌa mesa sa intsaku tsa kuika ya san na nachitu tsa xiꞌin ndidaa xuchi xi sa koꞌio. San ndidaa ina xu kiꞌin te ku nayuu te sa takueꞌe xi Lazaro ya. 22 San taꞌan kii xiꞌi tsa kundaꞌvi ya sa ntsaka ñaꞌan ndidaa ángel kuaꞌan san sakuntsaku tsa diin Abraham. Xiꞌi tsa kuika kuaan tuku, san chiduj xaꞌan s-tsa. 23 San taꞌan ntseꞌe tsa kaniꞌno tsa antsaya san ndaneꞌe nuu tsa san xini tsa sa xika io Abraham, intsaku tsa xiꞌin Lazaro. 24 Dandu kana tsa: “Abraham, Taa, kunda-ini ñaꞌan ni da tsandaꞌa ni Lazaro xan na dachii nu dikindaꞌa nu xan san na kij nu na chido nu xaa da ya kuan taꞌan ntseꞌe da xiti ñuꞌu ya.” 25 Doko Abraham sadaa tsa: “Daa, nakaꞌan san ñuyii io yo niꞌi yo sa guaꞌa; san Lazaro ya, sa kuia. San vita nuyaꞌa niꞌi nu sa guaꞌa, san yoꞌo taꞌan yo. 26 San kono ntseꞌe en sa io dagua dagua sa io ntsu xiꞌin yo, san ma kada sa yaꞌia nu io jaꞌa ichi xan nisa nu io xan ma kada sa yaꞌia nu ichi yaꞌa.” 27 San tsa kuika sadaa tsa xi Abraham: “Sakundaꞌvi da jnu ni, taa, tsandaꞌa ni Lazaro xan xeꞌe s-tata da 28 kuan io oꞌon xani da, san nakadaa nu kuan ndasa ma kij nu sa uꞌu sa ndaꞌvi yaꞌa.” 29 Doko Abraham sadaa tsa: “Io sa chidotuni Moisés xiꞌin ndidaa tsa kaꞌan x-kuenta Ndios. Na kaꞌvi nu ndidaa sa chidotuni tsa.” 30 San tsa kuika kachi tsa: “Abraham taa, guaꞌa ka tu en tsa xiꞌi xan na nandoto san nakiꞌin tsa ku kada tsa san ora yukua naxikokagua tsa yukua ndidaa tsa.” 31 Doko Abraham sadaa tsa: “Tu ti sakunini nu ley xiꞌin ndidaa sa káꞌan x-profeta Ndios, san ma kininchisa nu kuani en ndii na nandoto.”