Toꞌon dadaguataꞌan xiꞌin tsayee dakiꞌin ndikachi xi
15
San kuyachi tsa teen yaꞌvi tuini sa kuxi Roma xiꞌin ndidaa ka tsa io x-kuachi xi sa kunini tsa sa kaꞌan Jesús, 2 san ndidaa fariseu xiꞌin escriba ndaa toꞌon tsa:—Nu yaꞌa nakuaka taꞌan nu xiꞌin saj nu xiꞌin ndidaa nu io x-kuachi xi.
3 San Jesús sadaa ia toꞌon dadaguataꞌan yaꞌa:
4 —Na ñayii kuu tsa io sa io ni ndidaa ni tu io en cientu ndikachi tsa san tu dakuita tsa te en te ama ti taxuku tsa ndi kumi diko saꞌun kumi ka kitiukua san saꞌan tsa sa nanduku tsa kiti xita kuan ntsa na niꞌi tsa te? 5 San ora naniꞌi tsa te sakindodo tsa te d̶uku tsa san ku-iꞌni tsa, 6 san nasa tsa xeꞌe tsa san kana tsa ndidaa tsa mani xiꞌin tsa xiꞌin ndidaa tsa io yachi sa io tsa san sadaa tsa: “Ku-iꞌni ni xiꞌin da kuan naniꞌi da ndikachi da kiti da kiꞌin da.” 7 San dan kachi da sa duꞌua sakoo sa ku dee andivi ora na ta-uꞌu en tsa io x-kuachi xi san adi kumidikosaꞌunkumi tsa sani-ini sa ti nandeꞌe sa nata-uꞌu.
Toꞌon dadaguataꞌan sa kuu ñadeꞌe naniꞌi s-tuini xi
8 Ña na ñadeꞌe kuu ña tu io uxi moneda plata xan, san dakiꞌin ña en, Ama ti natoon ña kandil, san tiꞌvi ña xeꞌe ña san naduku ntseꞌe ña ntsaa na naniꞌi ña ña? 9 San naniꞌi ña, sa kana ña ndidaa ña io yachi xiꞌin ña xiꞌin ndidaa ña mani xiꞌin ña san sadaa ña: “Ku-iꞌni ni xiꞌin da kuan naniꞌi da moneda plata dakiꞌin da.” 10 Kachi da sa duꞌua ku-iꞌni ndidaa x-ángel Ndios sa nata-uꞌu en tsa io x-kuachi xi.
Toꞌon dadaguataꞌan nuyee kuaꞌan san naxikokagua
11 Kachi ia tuku:
—En tsayee ío ubi d̶aꞌa tsa. 12 San d̶aꞌa tsa nu ku luchi sadaa nu s-tsa: “Taa, taj ni ndidaa sa kachi ni sa kuu xaꞌan da.” San tsa yaꞌa sañaꞌan tsa jnu. 13 San ti yaꞌia kuaꞌa kii, nuyaꞌa diko nu ndidaa sa io nu san dataka nu tuini san kee nu kuaꞌa nu en ñuu xika san dandeꞌe duꞌua nu ndidaa sa ku xaꞌan nu. 14 Ndeꞌe s-tuini nu san kixi en doko kaꞌnu ntseꞌe ñuu yukua san nuyee yukua táꞌan ntseꞌe nu doko. 15 San saꞌan nu jnu en tsayee sa na kuañaꞌan tsa chiion nu san tsa yaꞌa tsandaꞌa ñaꞌan tsa yuku jnu na kadi nu kuchi. 16 San nuyee yaꞌa oni xiꞌi nu doko san nchu kaj nu sa saxi kuchi, kuan ti xu niꞌi nu sa kaj nu. 17 San en kii sani-ini nu, san kachi nu: “¡Nadaa ñayii kidachiion xeꞌe ku tata ndo san oni tivi dagua sa kaj nu san ntsoo jaꞌa xiꞌi ndo doko! 18 Na ndukuin ndo, sa na nuꞌu ndo sa io ku tata ndo san kadaa ndo: Taa, kida da kuachi jnu Ndios xiꞌin jnu ni. 19 San ti nandeꞌe ka sa kunani da d̶aꞌa ni; kada ñaꞌan ni d̶a na en tsa kidachiion jnu ni xan.” 20 San ndukuin nu sa kunuꞌu nu sa io s-tata nu.
San xika ku ndij nu san xini ñaꞌan tsa jnu san kunda-ini ñaꞌan tsa san xino tsa san natan ñaꞌan tsa san nonontsaa ñaꞌan tsa san tsayuꞌu ñaꞌan tsa. 21 San sadaa nu s-tsa: “Taa kida da kuachi jnu Ndios xiꞌin jnu meni, kada ñaꞌan ni d̶a na en tsa kidachiion jnu ni xan.” 22 Doko s-tata nu kuan táꞌvichiion tsa xi tsa kidachiion jnu tsa: “Kama taxi en doꞌno guaꞌa san dakuiꞌno ñaꞌan jnu san choꞌon en daꞌyu dikindaꞌa nu san nachiꞌi nchisa saꞌa nu. 23 San ku kuaka ndikutu guaꞌa kuan san kaꞌni te sa na kaj ndo xiꞌin na kada ndo en viko. 24 Kuan nuyaꞌa kuu ku Daꞌa ntsu, nu sani-ini ntsu sa xiꞌi san vita nandoto nu, nu dakiꞌin ntsu san nani ñaꞌan jnu” san kesaꞌa tsa kida tsa en viko.
25 San d̶aꞌa tsa nu kaꞌnu kuan, io nu yuku san kuenta nasaa yachi nu jnu veꞌe san tsaku jnu sa kantsa xiꞌin sa kuvaa. 26 San kana nu en tsa kidachiion xeꞌe nu san ndukutoꞌon nu naku io viko. 27 San tsa yaꞌa sadaa tsa: “Xani yo nasaa nu, san s-tata yo táꞌvichiion tsa sa na kaꞌni ndikutu guaꞌa ka ndasa nasaa guaꞌa nu xiꞌin io nu ñuyii.” 28 Danduu nuyaꞌa nadiko jnu san ti nchu nayii nu. San kee s-tata nu san sakundaꞌvi tsa jnuu nu sa na nayii nu. 29 Doko sadaa nu xi s-tata nu: “Dan kuaꞌa ntseꞌe kuia kidachiion da jnu ni san nisa en kii ti dandoo da sa kada da sa taꞌvichiion ni san ti taj ni nisa en ndidiꞌyu yiki sa kaj da xiꞌin ndidaa nu mani xiꞌin da. 30 Doko nasaa d̶aꞌa ni nu dativi duꞌua ndidaa sa sañaꞌan ni xiꞌin ndidaa ñadeꞌe diko mee san saꞌni ni ndikutu nduu nduꞌu sa saꞌa nu.” 31 Dandu s-tata nu sadaa tsa jnu: “Daa, yoꞌo ndikii io yo ku nuu ntsu, san ndidaa sa io kuntsu ku xaꞌan yo. 32 Doko guaꞌa sa kada ndo viko xiꞌin sa ku ku-iꞌni ndo kuan xani yo yaꞌa sani-ini ntsu sa xiꞌi nu doko vita nchito nu san sani-ini ntsu sa kuaꞌan nu san vita naniꞌi ñaꞌan jnu.”